حد ينصحنى انا محتار اوى بين وظفتين (مهندس ولا معيد)

[mr_safwt]

شوف يا باشا ... لو انت غاوي علم و غاوي معامل وابحاث و بتحب التدريس و عندك القدره علي الشرح وتوصيل المعلومه يبقي سلك التدريس افضل مع مراعاه ان الحصاد مش هيبقي في الأول بمعني ان فرصه حصولك علي مناصب مرموقه سواء محليه او دوليه هتبقي اكبر بعد حصولك علي الأستاذيه مثلا و لو انت غاوي سفر و اخدت فرصه التدريس في احد الجامعات العالميه , يبقي احسن واحسن سواء ماديا او ادبيا ,.... يعني طريق محتاج شويه صبر بس نتائجه و فرصه في الحياه افضل .... اما الشركات لو انت شغال (multinational vendor) , سواء presales او after طبعا علي اساس انك مهندس , المرتب والبدلات هتبقي اكبر من المعيد بس الـ multi national ما لوش امان , و طبعا مميزاته في الترقي تتوقف علي اجتهادك و فرصتك علي الاطلاع علي الجديد من ناحيه المشروعات او التسويق هتبقي افضل بس ليها حدود , و طبعا اكيد حضرتك عارف ان المالتيناشونال او اي شركه بتبقي وظائف المبيعات او خدمه الجمهور هي نمره واحد و فرصه انك لما تاخد دورات زي mba مثلا و عندك قدرات قياديه ممكن تمسك regional managerمثلا .... بالتوفيق .

على فكرة فعلا انا شغال فعلا presales فى multinational vendor بس وكيل ليها
وباخد منها خبرة رهيبة ولو على كورسات الادارة ممكن تقول انا مخليها بعد 3 سنين مثلا لما اكون عندى الخبرة اللى تؤهلنى لشغل مناصب قيادية وان كنت هفضل pmp
علشان كدة سبت حكاية المعيد دية من دماغى خلاص

[mr_safwt]

لو انت مرتاح ماديا وعندك شقتك وعربيتك وبتحب التدريس ومستعد تفضل طول عمرك تذاكر بالعافيه يبقي معيد
لو عايز تبقي حر نفسك ومتحبش دلع الطلبه وغباء البعض منهم لاننا كنا طلبه برده وعارفين بنعمل ايه في المعيدين لما نبقي مش فاهمين يبقي خليك في شغلك في الشركه علي لأقل هتذداد خبره في حياتك العمليه والعلميه برده

زميل ليا كان معيد برده وبعد 3 سنين اتخنق وسابها واشتغل في شركه

لا خلاص شلتها من دماغى عشان ناس كتير حذرتنى منها

[mr_safwt]

بغض النظر عن الماده ومين افضل كدخل
استاذ جامعي ولا مهندس
انت حابب ايه وميال لايه

صدقني اي اختيار هايكون افضل لو انت حابه
واكيد هاتبدع فيه وتحقق مركز متميز فيه

عندك حق

[mr_safwt]

انا اتعرضت لنفس موقف حضرتك و فى الاخر اخترت الشركه لعده اسباب :-
- المرتب
- الخبره العمليه
- الترقيات و سهوله الانتقال لشركات اكبر بمرتب اكبر و تنوع مجال الخبرات

و بعدين لو مرتبك كويس او حتى شغلك ممكن يكون بيساعدك فى مصاريف الدراسات العليا فتقدر تعملها و انت شغال فى الشركه برضه و بكده تبقى خدت مزايا الاتنين حتى لو تعبت شويه مش اشكال انت كده بتبنى مستقبلك

مشكله الجامعات الاجنبيه ان مرتبها تعبان ( ممكن يكون قد الشركه الان لكن سنه و لا اتنين و هتلاقى الشركه مرتبها فرق جامد) و مش هتديلك مزايا كونك معيد فيها لانهم هيشغلوك للحد الأقصى و ممكن ما تلاقيش و قت تذاكر بالاضافه الى انك مع الوقت هتنسى العملى و هيبقى صعب تسيب مجال الجامعه لو غيرت رأيك لاحقا و بالتوفيق

فعلا ناس كتير قالتلى الكلام دة
وعشان كدة شلتها من دماغى

[زهير فكري]

على فكرة فعلا انا شغال فعلا presales فى multinational vendor بس وكيل ليها
وباخد منها خبرة رهيبة ولو على كورسات الادارة ممكن تقول انا مخليها بعد 3 سنين مثلا لما اكون عندى الخبرة اللى تؤهلنى لشغل مناصب قيادية وان كنت هفضل pmp
علشان كدة سبت حكاية المعيد دية من دماغى خلاص

معلش يا باشا .... يعني ايه وكيل ليها؟؟؟؟ pmp هتفيدك كجانب technical يعني آخرك مدير مشروع ودي تنفع اكتر للناس الafter .... اما بالنسبه للpre فده فرصته كبيره ان شاء الله لأنه بيبقي عليه مسؤوليه الترويج واقناع ال العميل انه يتعاقد و يشتري ... وطبعا ده اقوي حلقه في بيع المنتج و اللي هيفيدك اكتر ال mba بس حاول لو الماده متيسره تكون في مكان محترم ( اشتري الاسم) , واللي اعرفه ان لو مديرك اوروبي او امريكي هتبقي الدنيا متظبطه ... اما لو جنسيه تانيه من دول العالم الثالث فربنا يعينك .بالتوفيق

[ahmedkhairy]

أولا يا باشمهندس تصلى صلاة إستخارة وربنا يوفقك للأفضل
ثانيا أنا أفضل المعيد عن العمل بشركة كبيرة
1- المعيد وضع إجتماعى ممتاز ومكانة مرموقة جدا ( كادر جامعى )
2- بالإضافة للسابق دى معيد فى جامعة أجنبية وليست جامعة حكومية
3- دخل مادى ممتاز ما شاء الله
4- طبيعة العمل فى حد ذاتها تفرق كتير عن العمل بالشركات
5- عمل ثابت فى نفس المكان
بصراحة أنا أفضل الجامعة بمراحل

[Mostafa.Ismail]

كمل فى شركتك.

[mr_safwt]

يا جماعة انا بعد ما استقرت انى هاكمل فى شركتى
ناس كتير بتقولى غلط وناس بتقولى صح
انا نفسى اكمل فى الشركة مش متخيل نفسى واقف اشرح اى مادة
وفى نفس الوقت خايف اكون رفضت حاجة اندم عليها

[blazer]

على فكره انا اعتبر فى نفس وضعك
وشايف ان مرحله المعيد دى مرحله انتقاليه
بالنسبه لى هقدر اكمل كورسات اللغه اللى عاوز اتعلمها او اى كرسات تانيه واعمل ماجيستير
والحجات دى بتعلى ال salary بنسبه كبيره
يعنى بص لقدام
الا لو انت جايه ليك فرصه كبيره فى الشركه بتاعتك

[islamahmed1990]

انا بقي جمعت بين الاتنين
مهندس في شركه عشان انمي نفسي في مجالي من الناحيه العمليه و في نفس الوقت معيد ف جامعه خاصه عشان اكون ع علم مستمر بالدراسه و الماهج و الناحيه العلميه و طبعا البرستيج و كده و حاجه كويسه تضاف لل سي في
فحاول انك تكون معيد بظام الساعات (بارت تايم) و انك تقولهم في شغلهك ان معروض عليك و ان د هيخليك تغيب عدد ساعات معين يكونوا يا اما بالخصم او بالتعويض و ان شاء الله مش هيرفضوا

[islamahmed1990]

بس المهم انك تكون بتحب التدريس
يعني انا واحد متعتي في اني اكون واقف اشرح و لو هشتغل ببلاش فبالنسبالي الموضوع كان محسوم
و في نفس الوقت كلام الكتب مالوش علاقه بالشغل
فمينفعش حاجه تيجي ع التانيه

[mr_safwt]

بس المهم انك تكون بتحب التدريس
يعني انا واحد متعتي في اني اكون واقف اشرح و لو هشتغل ببلاش فبالنسبالي الموضوع كان محسوم
و في نفس الوقت كلام الكتب مالوش علاقه بالشغل
فمينفعش حاجه تيجي ع التانيه

لا بكره جدا التدريس