سبوره للاولاد فى البيت

[abokoko]

أنا هجيب لحضرتك من الاخر .. ب 5 جنيهات فقط .. روح سمير و علي .. و قوله عاوز فرخ ابيض من اللي بيتلزق علي الحائط و بيتكتب عليه .. دي انا عامله عندي ..

عباره عن ورق بلاستيك ( نفس خامه السبوره تقريبا ) بيتلزق علي الحائط ( زي الاستيكر ) و تكتب و تمسح و تعمل اللي عاوزه ( و ما بيبوظش و لا خربشه و لا حاجه )

و سعره 5 جنيه .. يعني ممكن كل عيل سبوره

اتفرجت عليه قبل ما اشترى اللوح
كان تقريبا 20 فرخ ب 25 جنيه او العكس
المهم لما اتفرج عليه قلت 100% مش هينفع مع اولادى ولو كمل يوم يبقي ممتاز
ههههههههههههههههههههههه

[MRBEBO]

كويس انك مرحتش سئلت على الوايت بورد عند سمير وعلي

امبارح كنت هناك المقاس اللي نزلت صورته هنا معدي 500 جنيه :(

[abokoko]

الجمد لله
وفرت فى الفوس
الاهم
انك تجيب اللوح وتقصه حسب مقاسات الشقه عندك
بالنسبة لى
انا علقته على الحائط مباشره بعلاقات فشر
العيب الوحيد
انى لم اعمل برواز له

[MRBEBO]

طيب انا شفت النهاردة الفورميكا الناعمة المتر ب 50 جنيه .... دي هتبقى كويسة ولا لا ؟؟

انا عملت سيرش في سيتات اجنبية وبيقولوا ان مشكلتها هيبقى فيه جوستنج ومش هتنضف كويس وهتسيب اثر ... ايه رايكم ؟

[abokoko]

علشان تتجنب انها تسيب اثر
ابقي امسح الكتابة اول باول
كمان والاهم حاول تتجنب ان الكتابة تتساب ساعات كتيره
يعنى انها تبات لتانى يوم

[MRBEBO]

طيب ممكن اعرف الفيبر حضرتك جبته منين ؟ وهل ملمسه انعم من الفورميكا ؟ وهل لو سبت الكتابة فترة بيسيب اثر ؟؟

[abokoko]

الفيبر والفروميكا عند اى تجار الاخشاب
وبيبقي عندهم منشار القص
وممكن حضرتك تقول لهم عايز اتفرج على الانواع وتعرف الاسعار وتقارن
مع ملاحظه الصناعه بتفرق فى السعر بسيط والسمك بيفرق برضه فى السعر

لو سبت الكتابة يوم مثلا بتلاقي اللون صعبه الازاله
لكن بسيطه - عندى زجاجة صغيره فيها بنزين وبقماشه صغيره تتحل المشكله
بس خلى بالك انا مخبي البنزين فوق الدولاب بعيد عن الاولاد
كمان ممكن تجرب رشه صغيره من ال wd40 بس عن نفسي لسه مجربتوش

على فكره نوع القلم بيفرق فى الكتابة
والمنتشر نوع اسمه unik--وعن نفسي
بفضل عنه نوع اسمه sigmaflo - من 2.5-3 جنيه وله حبر اشتريته ب6 جنيه بس لسه لم اجربه
وكل الاقلام بيبقي مكتوب عليها
WHITE BOARD MARKER
وتتاكد منها علشان تعرف انها للكتابه على السبوره

تحياتى لحضرتك

[MRBEBO]

انا عملت تجربة كده على التربيزة الفورميكا عندنا .... وفعلا بتسيب اثر

بس جربت على السيراميك وسبته يوم كامل وبعد كده مسحته مسبش اي اثر "رائع"

بس للاسف هتجيب حاجة زي السيراميك ازاي :(

معنى كده ان الفيبر زي الفورميكا بيسيب اثر .... طيب يبقى جبته ليه مع انه اغلى الضعف ؟

القلم اللي استخدمته نضيف جدا ماركة yoken ياباني جبته من سمير وعلي ب 4.50 :( وطبعا وايت بورد ومكتوب عليه انه ممكن يتملي

تعديل

على فكرة انا لسه مجرب الجلانس على الفورميكا لقيته بيمسح اي اثر للقلم

[abokoko]

بس الجلانس -- مياه -- والمياه هياثر على الخشب الفيبر او الفروميكا
بالاضافة الى ان الاثر المتروك على السبوره مش كبير
انت حضرتك ممكن تجرب الا كريلك اللى هو زى بتاع الاعلانات او اليفط
لانه نوع من البلاستيك المقوى وبكده مش هياثر باى سوائل وعمره الافتراضي هيكون اطول وممكن تجيب سماكه صغيره 2 او 2.5 مللي بس اسعاره بتكون اغلي ومقاس اللوح اصغر كما ذكرت فى المشاركات السابقه هنا

[MRBEBO]

طيب انت مقولتليش يا باشا انت جبت ليه الفيبر مع ان الفورميكا ارخص والاتنين بيسيبوا اثر ؟

هل ممكن الواحد يشتري مقاس اصغر من اللوح ولا مينفعش يعني مثلا 70*75 ؟

هحاول اشوف محل دعايا واعلان واسئل عن الاكليرك برضوا

[MRBEBO]

لسه راجع من محل دعايا واعلان عاوز يحسب 48*75 اكليرك 3 ملي ب 200 جنيه !!!!!

وبيقولي سعر اللوح 700 جنيه !!!!!!!!!!!!

وانه كده كرم ما بعده كرم :))

[abokoko]

الاكريلك غالى وانا عرفته هنا فى المشاركات السابقه راجع حضرتك وكمان هتعرف الاسعار التقريبيه
بس ايه اللى يخليك تشترى 3 مللى اشترى 2 او 2.5 مللى وهيكون فى فرق كبير فى السعر
روح للمحلات اللى بيتبيع لوازم المنزل فى محلات كده كانها بتبيع الف صنف وصنف للمنزل عتلاقى عندهم او هيقولوا لك على الاماكن اللى بتبيعه او تروح لاى محل دعايه وهو يقول لك على التجار والعناوين

[MRBEBO]

انا لسه راجع من سمير وعلى .... قلت احتمال اشوف حاجة اقل

المهم لما سئلت السيلز هناك قالي احنا عندنا تشكيلة كبيرة

طبعا عرفت معلومة ان عندهم الوايت بورد اللي بحامل ودي اللي في رنج 500

اما الوايت بورد اللي بتتعلق مباشرة على الحيط لقيت مقاسات كتير

من اول 35 جنيه ودي مقاسها 30*45 و اللي بعدها ب 80 جنيه ودي 45*60

المهم عندهم مقاس لغاية 2 متر ب 400 جنيه تقريبا

باقي الاسعار 180 ودي تقريبا 90*60

وفيه مقاسين تاني 200 و 300

المهم الصناعة نضيفة جدا جدا والبورد مجنتيك بحيث ان البشورة بتلزق عليها

انا جبت اللي ب 80 جنيه :)

[abokoko]

الف مبروك يا باشا
والاولاد هيفرحوا بيها جدا
بس ما تدعيش عليا لما تلاقى نفسك كل شويه عايز قلم جديد للاولاد ههههههههههههههههه
ربنا يخليهم لك وتفرح بيهم وتفرحهم

[abokoko]

حضرتك جرب تنزل لهم الاسطوانات الوارده بالمشاركة التاليه

http://www.nilemotors.net/Nile/189118-a.html