كنت حضرب النهاردة علقة مووت

[ashouhdy]

ماشى انا بالعربية ومعايا مراتى وبينتى ال 6شهور وقاعد اكلم مراتى عن الثورة والعدل اللى مستنيينة وان الشعب دة اتظلم كتير واتبهدل واتهان و واقفين فى الاشارة

الاشارة فتحت وكلة بيجرى عشان يلحق ال 30 ثانية قبل ماتقفل وانا يدوبك بعدى على اخر 7 ثوانى وتقلب احمر والشارع المعاكس بدء يتحرك ببطء دوست بنزين عشان الحق وبكلم مراتى عادى ومطمن

فجأة

واحد بتاع 50 سنة جتتة وضخم وبكرش ضخم وفى ايدة ست كبيييرة عجوزة بعكاز قرر انة يعدى و محروق ابو الاشارة

راح رافع ذراعة بيشاور يعنى عشان كلة يقف وكان حظى انا انة هو اللى فى وشى

ببص فى المرايا ورايا ولسع حفقع فرامل لقيت مينفعش غير انى حهرس البدال واحتمال ان مراتى وبنتى جمبى ال 6شهور يلزقوا بوشهم فى الازاز والتابلوة غير تأثير خبطة اللى ورايا ممكن يموت البنت الصغيرة

قرصت بنزين ورميت بعيد عنة بتاع متر كامل وعديت قام قايل اية

خلى عند اهلك دم يا بارد وقام رازع بايدة على صاج العربية من ورا وهبد بذراعة

انا كنت ماشى تقريبا على 40 او 30

طبعا انا مصدقتش طب بيشتمنى لية وبيهبد لية دة انا ملمستوش حضنت يمين وسبت اللى ورايا يعدى

وقمت راجع مارشدير لقيتة واقف فارد كرشة والست العجوزة فى ايدية نزلت الازاز شوية (من ناحية مراتى والبنت) على اليمين وفى قمة نرفزتى

قلتلة انت راجل قليل الادب عشان تشتم وانا ملمستكش

قام مادد ذراعة جوة العربية بيشوح انت غبى وانت وانت بصوت جهورى لقيت طبعا مراتى مذهولة والبنت حتبدأ تصرخ والدم فاااار فى عروقى قعدت اقول كلام مش فاهمة انا بذعيق فجأة الناس اتلمت

نص بيحوش ونص بيهبد على الازاز الاربعة المقفولين اة معندوش دم عشان راكب عربية يدوس على البنى ادمين الغلابة هو اية لأ مش حنسكت ونص بيقول حصل خير والازاز مفتوح نصة ناحية مراتى والبنت والايدين كترت جوة العربية

بقيت مش عارف افكر نفسى انزل اكلة بسنانى ودماغى بتقولى مراتك وبنتك مراتك بنتك ممكن يحصلهم حاجة وهى الدم اتسحب من وشها


بطرف عينى شفت وشها وشكل البنت رفعت الازاز ودست بنزين بس براحة مش فرك

ومشيت

قام ابو كرش يمد ذراعة عايز يفتح الباب اليمين بتاع مراتى اللى ناحيتة عشان اقف

الحمد لله انا دايما اول ما بتحرك بقفل السنتر

طبعا الباب مفتحش قام بعلو صوتة والشتيمة بعلو صوتة

انزل يأبن العر* وبيجرى على عربية 125فيات كدة بتاعتة تقريبا بيفتح بابها وعايز يجرى ورايا وناس تشتمنى انا وناس شايفها فى المرايا مسكاة من كتفة

ومراتى ماسكة دراعى امشى ياحمد امشى امشى

مشيت كنت رايح البيت بعد الموقع دة بعشرين متر

نزلت مراتى والبنت واطمنت انهم طلعوا العمارة

حلفت واقسمت بالله انى الف تانى

لفيت العربية ورجعت يدوبك 5 دقايق ... رجعت تانى ملقتش العربية بتاعتة سألت عسكرى وضابط (متفرج طبعا) قاللى مشى



يا الله

قد اية الدم بيغلى جوايا وانا عايز انزل افرمة وافرم الناس دى

بس منظر مراتى وبنتى خلانى امشى

مش عارف انا اتصرفت صح ولا غلط انى سمعت الشتيمة وموقفتش

مش عارف

وانا كنت لسة قبليها ب 5دقايق بدافع عن الشعب وبقول غلبان وجميل

حسبى الله ونعم والوكيل

حسبى الله ونعم الوكيل

[Ghosts]

معلش يا بشمهندس ....
اللى يعيش فى البلد دى ياما بيشوف قرف ....

أهم حاجة أن بنتك ومراتك بخير ....
متزعلش نفسك ....

[MohssenRashed]

طبعا اتصرفت صح و بصراحة انا بحييييك على اللي انت عملتة, عشان انا لو مكانك كنت هنزل و اكيد هكون انا الخسران.

[ahmad--ezzat]

ولا يهمك انسي الموضووووع انت اتصرفت صح,,,يشتم مهمها يشتم,,عالم واطيه ولمامه,بس مكنش المفروض تقف من الاول

[OMAR61995]

ﺃﻧﺖ ﺻﺢ
ﻷﻥ ﺛﻘﺎﻓﺔ ﺍﻟﺸﻌﺐ ﺍﻟﻐﺒﻲ ﺑﺘﻘﻮﻟﻬﻢ ﺃﻥ ﺃﻱ ﻭﺍﺣﺪ ﺭﺍﻛﺐ ﻋﺮﺑﻴﺔ ﻳﺒﻘﻲ ﻣﻔﺘﺮﻱ ﺍﺑﻦ ﺗﻴﺖ ﻭ ﺟﺎﻳﺒﻬﺎ ﻋﺸﺎﻥ ﻳﺪﻭﺱ ﺍﻟﻨﺎﺱ ﺍﻟﻐﻼﺑﺔ
ﻭ ﺍﺣﻨﺎ ﺍﻟﺸﻌﺐ ﺍﻟﻮﺣﻴﺪ ﺍﻟﻠﻲ ﺑﻴﺤﺐ ﻳﺘﻔﺮﺝ ﻋﻠﻲ ﺍﻟﺨﻨﺎﻗﺎﺕ ﻭ ﺍﻟﺤﻮﺍﺩﺙ ﻭ ﻣﻤﻦ ﻳﺸﺎﺭﻛﻮ ﻣﻦ ﻏﻴﺮ ﻣﺎ ﻳﻌﺮﻓﻮﺍ ﺍﻟﺴﺒﺐ ﺯﻱ ﻣﺎ ﺣﺼﻞ ﻣﻌﺎﻙ ﻛﺪﻩ

[ashouhdy]

والله حاسس انى حتجنن وانا فعلاغلطان انى رجعت من الاساس ... غباء منى

[lanos2004]

معلش بتقف ليه-يا سيدى الى يشتم يشتم-دة الواحد لو حط راسه فى كل حاجه-كان زمانى يا قاتل يا مقتول-فى الحاجات دى كبر مخك-وعديها -وابتسم كمان-خليك بارد-ديب فريزر -انا بقيت تلاجه خلاص

[TARAXAN]

اتصرفت غلط من الاول
طول ما مراتك تجنب الخناق حتي لو اتشتمت في الشارع
لانك سواء ضربتة او ضربك في كلا الحالتين خسران , الستات بيحصلها رعب في المواقف دي....ميغركش شدتها في البيت عليك :-) برة البيت بيبقوا حاجة تان
ي
كان زمان لما يبقي معاك المدام الناس بتعدي منعا للاحراج
حاليا شعب واطي بيتعمد يعمل معاك مشاكل لما يلاقي حد معاك

[zangry]

مكنتش وقفت خالص من الاول سيبه يشتم بس كويس انك قافل السنتر الحمدلله وربنا يخليلك اسرتك ويسترها معاك

[adel_2346]

اوعى تتخانق وانت معاك حد من اهل بيتك

[frhateg]

خد من ده كثير . و الله الواحد زهق من العربيات و سواقتها . شوارع زحمه و ناس معظمهم همج . و اصبح سلوك معظم الناس لا يطاق . عموما في الحالات دي و لما يكون معاك اولادك لازم تتحكم في اعصابك بدل البهدله . و ربنا يرحمنا برحمته .

[cvt2008]

إحمد ربنا
بس حضرتك غلطت إنك رجعت وحطيت نفسك ومراتك فالموقف دة
اللى معاة واحدة ست يحاول ياخد الأمور ببساطة فأولها وميخلهاش تكبر
لكن لو لوحدك وبجد تكون مش غلطان متسبش حقك حتى لو هتطحن
وفالنهاية الطيب أحسن
وأحمد ربنا مرة تانية
إنك أولا مخبطوش
ولا الموضوع تطور لأكتر من كدة

[م. حاتم السباعي]

الحمد لله انك بخير يا دكتور و ان الاسرة بخير
مش عارف ابدأ ازاي
انا طبعا مقدر انفعال حضرتك بسبب الموقف و ملاحظ من كلامك ان الراجل نفسه مش محترم بسبب هذا الكم من الالفاظ اللي سمعتها حضرتك
بس انت عارفني انا احب احلل قليلا الموقف
حضرتك وصفت انك خرجت من الاشارة ( مندفع ) بسبب كذا كذا
و الراجل نزل من الرصيف اللي جمب الاشارة رافعا ذراعة يعني انا و من بعدي الطوفان
فلو انا مش فاهم غلط يبقي حضرتك تتحمل جزء من الخطأ الذي تم و الذي ادي لكل ما حدث بعد ذلك بغض النظر عن ان الراجل مش محترم
و كان رأيي ان حضرتك اما ترفع لهم ايدك معتذرا و لا تلقي بالا بما يقوله الرجل و تسير في طريقك
او بما انك اخدت قرار بالعودة كنت تنزل بسرعة و تقول الف سلامة علي الحاجة معلش الحمد لله انها جت سليمة و ليه الغلط احنا ناس محترمين و كده كان يمكن اتكسف علي دمه
كل التحليل السابق انا بنيته فقط من تصور معين لان بصراحة المفروض اللي راكب العربية و سايق هو اللي بتكون عنيه مراقبة كل حاجة امامه و خلفه و كان ممكن حضرتك ببعض من التركيز تكون مراقب حركة الراجل قبل ما ينزل اصلا من علي الرصيف او قبل ما يهم بالدخول لنهر الطريق بحيث يصبح امامك بأعطائه ( كلاكس مفزع ) مع نور جامد لو بالليل تجعله ( يكش )
هذا تصور عام اعذرني لو انا متحامل بعض الشئ علي حضرتك بس انا حاسس ان نسبة تركيزك في الطريق لم تكن اعلي من 70% و هذه كافية لحدوث حادث لا قدر الله بسبب خطأ الغير
انا اسف اني طولت عليك
و حمد لله علي سلمتك و لو نداء صغير في المنتدي نيجي لحضرتك هوا ( اي خناقة يا دكتارة معاك رجالة نايل موتورز )

ملحوظة (( انا شاكك يكون الراجل ده اخواني و كان مودي امه تنتخب ههههههههههههه ))

تحياتي اليك

م.حاتم السباعي

[Land_Cruiser]

الحمد لله ربنا ستر و بعد كده خللى بالك ما تقفش لاى حد مهما كانت الاسباب و حتى لو كنت لوحدك لان فى حراميه متخصصه فى السرقه بالطريقه دى . تنزل تتخانق معاه فتلاقى حد تانى راح راكب العربيه بتاعتك و طالع يجرى بيها

[ashouhdy]

والله ياجماعة ومهندس حاتم انا ملحقت اصلا انزل الازاز و اارفع ايدى حتى بدليل ان رزع على الصاج هبد مرتين قبل ما العربية حتى تعدى دة حتى الازاز ميلحقش ينزل

تانى حاجة ولا لحقت اراقب ولا نيلة دى اشارة و واحد رمى نفسة ومعملش حساب حتى انة معاة ست كبيرة و مقدرش المسافة اللى بينة وبين العربية حتلحق تقف ولا لأ

اللهم رفع دراعة وجرر الست جر لنص الطريق وانا قدامى حلين

يا أضرب فرامل ومراتى وبنتى يلزقوا فى التابلوة دة غير ان اللى ورا حيخبط ويرزع يعنى تأثير مضاعف على الرضيعة من الخبطة

يأما ارمى شمال بعيد عنة ومفيش ضرر ودة اللى حصل

انا اصلا غلطان انى رجعت

ولو كان سكت كان ممكن انزل واقولة فعلا ملحقتش اقف

الراجل بقى اخوانى مش اخوانى فلول ولا لأ فى المقام الاول دة بنى أدم :)))

بس انا دمى فاير من الشتيمة اللى ختها ومن الناس اللى قامت عليا من غير سبب ومن بهدلتى قدام الاسرة من شتايم ... :(((

يعنى كنت اعمل اية