صاحبى حاسس انو بيضيع ... افيدونى

[koshary]

صاحبى اتعرف على جماعه تبع مسجد وبقى مرتبط بالمسجد ده بالذات جدا نبقى معدين قدام مسجد تانى والمسجد بيقيم الصلاة ويمشى يقول هروح اصلى فى المسجد بتاعى وبيقعد فى المسجد تقريبا طول اليوم وساعات كتير جدا جدا بيبات فى المسجد وبياخد اكل وبيشترى حاجات للمسجد دى حاجات بعضها مدايقنى لاكن انا مقدرش امنعو انو يتقرب من ربنا بس هو تقريبا لغى حياتو الشخصيه نهائى مبقاش يقعد مع اخواتو ومبقاش يقعد فى البيت ومبقاش يخرج معانا انا واصحابى ومثلا اكلمو تعالى اقعد معايا فى البيت نشرب شاى ونذاكر شوية يقولى لا انا هروح اقعد عند ربنا وباع الموبايل ال i phone بتاعو واشترى موبايل نوكيا من غير كاميرا واغانى ومبقاش يتفرج على التليفزيون ومبيتكلمش فى اى حاجه غير الدين والقرأن ومربى دقنو وعلطول لابس لبس قصير ومثلا فى مشوار بعيد بنقضى مصلحة ولا بنعمل حاجه يقولى نمشى على رجلينا علشان ناخد ثواب اكتر اقولو ياعم هى دى فيها ثواب وكل ما اكلمو يقولى متقولش انت عملت ولا حد عمل قول ربنا عمل اقولو ياعم ماهو ربنا بيعمل كل حاجه بس فى حاجات احنا اللى بنعملها والا ربنا بيحاسبنا ازاى على حاجه هو بيعملها ساعاااات كتير جدا مبيعرفش يرد على اسألتى ومبقاش بيدحك ويهزر زى الاول على طول ماشى موطى راسو فى الارض بجد حياتو اتغيرت جدا جدا وبقى كئيب اوى ... وبيطلع فى الجماعات تبع التبليغ والدعوه اخر مره طلع 6 اكتوبر وقعد 4 ايام وبيقولى بعد الامتحانات هروح سوهاج نعمل تبليغ ودعوه وهنقعد اسبوعين ... مش عارف اعملو ايه والله انا مش ممانع انو يقرب من ربنا بس لدرجة انو ميتفرجش على التليفزيون او يبيع الموبايل اللى فيه كامير او ميركبش مواصلات طيب ليه ... ياريت حد يفيدنى اعمل معااه ايه ....

[bmya]

ربنا يقويه ويثبته ويهدينا جميعا

[grand hand]

فترة وهتعدى

[mohammadrashee]

ممكن تقولي فين الضياع اللي حضرتك خايف منه
انه ميتفرجش على تليفزيون
ولا انه بيروح دعوه
على العموم كل غربال جديد له شده
ممكن المووضوع يكون زايد شويه بس بعد كده الدنيا هتظبط ويقدر يوازن
بس ليه سؤال هو لو كان بيشرب مخدرات كنت برده قولت في العنوان ضاع ولا قولت دماغه بقت عاليه
يا ريت نضع الأمور في مكانها الصحيح
وربنا يهديه للخير
من اراد الله به خيرا يفقه في الدين

[KHALED AYMAN]

الي بيوصل للمرحله دي بيكون دماغه بقت مقفوله اصلا...وعمره ما هيسمع نصيحتك ولا هيفكر فيها اصلا.،ادعيله بقي

[SAMEH_FOUAD]

طالما ماشى صح خلاص ومش متجة لافكار متطرفة خلاص سيبة وربنا يهدينا احنا بس, اللى اتعودنا على الحياة المنيلة بنيلة اللى كلها اخطاء وربنا يهدينا ان شاء الله

بس هو اكيد غلطان فى موضوع المواصلات دة اية علاقة دة بالثواب يعنى ؟؟؟

[koshary]

ممكن تقولي فين الضياع اللي حضرتك خايف منه
انه ميتفرجش على تليفزيون
ولا انه بيروح دعوه
على العموم كل غربال جديد له شده
ممكن المووضوع يكون زايد شويه بس بعد كده الدنيا هتظبط ويقدر يوازن
بس ليه سؤال هو لو كان بيشرب مخدرات كنت برده قولت في العنوان ضاع ولا قولت دماغه بقت عاليه
يا ريت نضع الأمور في مكانها الصحيح
وربنا يهديه للخير
من اراد الله به خيرا يفقه في الدين

الضياع انو مبيقاش يزور اهلو مبقاش يود اصحابه ويقابلهم زى الاول موضوع ان حياتو بقت مختصره على الدين بس انا عارف ان الدين كل حاجه فى حياتنا بس انو هو ميهتمش بالمذاكره ويجيب درجات قليله فى الامتحانات ... موضوع لو بيشرب مخدرات كنت هكتب كدا برضو لانو صاحبى ولازم اخاف عليه

[koshary]

طالما ماشى صح خلاص ومش متجة لافكار متطرفة خلاص سيبة وربنا يهدينا احنا بس, اللى اتعودنا على الحياة المنيلة بنيلة اللى كلها اخطاء وربنا يهدينا ان شاء الله


انا مش بتكلم ان احنا اتعودنا على حاجه معينه انا بتكلم ان هو تقريبا لغى حياته خالص

بس هو اكيد غلطان فى موضوع المواصلات دة اية علاقة دة بالثواب يعنى ؟؟؟

دا فى حاجات تانية انا مقدرش اتكلم عليها اصلا

[AboELsoud]

من وجهه نظري هي فعلا فتره و هتعدي
هو حاسس انه كان مقصر جداااا في حق ربه فبيحاول يعوض
ده غير ان حبه للدين شديد جدا و الحماسه واخداه
ده غير ان دي بدايه لحاجه كويسه جدااااا و اكيد مش هنقارن بواحد بيضيع بجد في الشرب و الشم

بعد فتره ان شاء الله هيعرف انه ممكن يقعد مع اقاربه و في نفس الوقت يبقى بيطيع ربه
و يعرف انه ممكن يذاكر او يشتغل و في نفس الوقت يكون ربنا بيحبه
و يعرف انه ممكن يهزر و يضحك و يقعد مع اصحابه كتير و في نفس الوقت يكون بيطيع ربنا و مش بيعمل معصيه

القصد انه هو دلوقتي شايف الدين من جهه واحده اللي هي الطاعات و هو بيحاول يبقى كويس فيها على قد ما يقدر
فاضله انه يعرف الجهه التانيه اللي هيه المعاملات و ساعتها هيعرف يوازن ما بينهم و يعرف انه ممكن يكون مش قاعد بيصلي و في نفس الوقت يكون بيطيع ربنا ( زي انه يشتغل مثلا )

ربنا يهدينا جميعا و يثبتنا

[engtmk]

قال تعالى: (يَا أَيُّهَا الَّذِينَ آمَنُوا لا تُحَرِّمُوا طَيِّبَاتِ مَا أَحَلَّ اللهُ لَكُمْ وَلا تَعْتَدُوا إِنَّ اللهَ لا يُحِبُّ الْمُعْتَدِينَ)

زمن كثرت فيه المتع الدنيوية حتى أهلكت الحرث والنسل، وهنا أحب أن أبين أننا في موقف بيان لحكم الله، ومراده الذي بينه في كتابه وهو الدعوة إلى عدم تحريم الطيبات مع عدم الاعتداء، وإن الأمر الواحد يفعله العبد فيزداد قربا من الله ويفعله آخر فيزداد بعداً عن الله، وإن فريقاً قيل له (قُلْ مَنْ حَرَّمَ زِينَةَ اللهِ الَّتِي أَخْرَجَ لِعِبَادِهِ وَالطَّيِّبَاتِ مِنَ الرِّزْقِ) [الأعراف: 32]. وقيل لفريق آخر (أَذْهَبْتُمْ طَيِّبَاتِكُمْ فِي حَيَاتِكُمُ الدُّنْيَا وَاسْتَمْتَعْتُمْ بِهَا) [الأحقاف: 20]. فالفريق الأول تمتعوا على الوجه الذي أذن الله لهم فيها فجمع لهم لذة الدنيا والآخرة، والفريق الثاني تمتعوا على الوجه الذي دعتهم إليه الشهوة والهوى سواء أذن لهم أو لم يأذن لهم فانقطعت لذة الدنيا وفاتهم لذة الآخرة.

قل لاخيك اعبد الله وطعه وان صله رحمه لهي اولي من الدعوه لله والجهاد في سيبله

في حديث جبير بن مطعم رضي الله عنه:
أنه سمع النبي صلى الله عليه وسلم يقول: ( ألا لا يدخل الجنة قاطع ) [البخاري رقم 5984 فتح الباري (10/415) ومسلم (4/1981)].

والنصوص في الواردة في صلة الرحم والنهي عن قطعها كثيرة منها العام، كما مضى ومنها الخاص بنوع من القرابة، (كالوالدين) وغيرهما.

والمقصود أن الذي لا يجاهد نفسه على صلة أرحامه، ليس أهلاً للجهاد في سبيل الله، لأنه عاصٍ لله ولرسوله قاطع لرحمه، وقد يكون سبباً في منع الله نصر المؤمنين على أعدائهم، وقد يكون غير قادر على الصبر والمصابرة أمام الأعداء.

لهذا أمر رسول الله صلى الله عليه وسلم من استأذنه في الجهاد معه دون أن يستأذن والديه، أن يرجع إليهما ويجاهد في طاعتهما والقيام بحقوقهما، كما في حديث عبد الله بن عمرو رضي الله عنهما، قال: جاء رجل النبي صلى الله عليه وسلم فاستأذنه في الجهاد، فقال: ( أحي والداك ) قال: نعم، قال: ( ففيهما فجاهد ) [البخاري رقم 3004 فتح الباري (6/140) ومسلم (4/1975)].

انصحه ان قليل يواظب عليه خير من كثير يشقيه ولا يقدر عليه .
وانصحه الا يشقي جسده فتمل نفسه وعليه ان يمتع نفسه مما احل الله فالرسول كان باسما ضاحكا
فركوب سياره او مواصلات ليس حرام وانما الحرام لو كان ذاهب لعمل يكره الله او رسوله اما لو ذهب لعمل يحبه الله ورسوله كالسعي علي معاش امراه عجوز او قضاء حاجه لاخ من اخوانه في الله او عمل فهو عمل يثيبه عليه الله ان شاء الله

عن عائشة رضي الله عنها أن رسول الله صلى الله عليه وسلم قال لها في عمرتها إن لك من الأجر على قدر نصبك ونفقتك "
رواه الحاكم وقال صحيح على شرطهما
وفي رواية له وصححها" إنما أجرك في عمرتك على قدر نفقتك " وصححه الألباني.
-فمن هذا الحديث نعلم أن الأجر يكون على قدر التعب والمشقة من جهة وعلى قدر النفقة من جهة أخرى ، فالماشي له أجر المشقة ، وراكب السيارة أو الدراجة له أجر النفقة ،
أما حديث الصحابي- الذي امتنع عن اتخاذ الحمار رغبة منه في مزيد الأجر وإقراره صلى الله عليه وسلم له على ذلك - فهو محمول على أن الدابة ليس فيها كبير نفقة ، وعلى ذلك يكون المشي على الأقدام وركوب السيارات إلى الجماعات أفضل من ركوب الدواب.
وادعو الله ان يعينه ويثبته ويهدينا واياه لما فيه خيره والصلاح في دنيانا واخرتنا

والله اعلي واعلم

[ghostmido]

والله يا خى يابخت صاحبك.
ربنا يجازيه خيرا ان شاء الله

[SonaSteel]

بصراحة مس هاقدر ازيد حاجة عن اللي اخواني قالوه
ربنا يزيده ويثبته علي الحق حتي يلقاه
وشويه هايهدي للاسف وهايرجع تاني ....... بس ربنا يثبته ان شاء الله
يابخته فعلا والحمد لله مفيش قلق دلوقتي زي زمان .... يعني لا امن دولة ولا اي حيوان يقدر يكلمه
ان شاء الله يدعو امة لا اله الا الله
ابشر ان شاء الله

[HAITHAM1985]

حتما سينتكس ........ لأن هذا الفكر متقارب جدا من فكر التكفير والهجرة ......... وأنا لا أتمنى أن تكون هذه الإنتكاسة عنيفة ......... لأن الأصل فى الأمور هى الوسطية ومخالطة الناس كى تكون معاملاتك هى أصل الدعوة الى الله لا كلامك ...... الدين المعاملة

وليس غريبا علينا قول النبى صلى الله عليه وسلم فى جزء من حديث طويل رواه أبو هريرة : أن مقام أحدكم يوما فى سبيل الله خير من صلاته فى مسجده سبعين عاما ......... التفضيل ليس معناه الترتيب أو الإلغاء كما أن المقام فى سبيل الله ليس معناه الجهاد بالسيف لاااااااااااا ولكن كل أنواع المقام ....... التعليم - خدمة الأهل - معاملة الأصدقاء - زيارة المرضى - التبسم والإندماج والعمل والنجاح بدافع إعمار الأرض أيضا كل ذلك مقــــــــــــام فى سبيل الله وهذه هى المعانى الواسعة للإسلام لا التفكير المتقزم لفهم الأمور بمعانيها المباشرة

من ناحية أخرى لو كانت الإنعزالية هى الحل لكان النبى قد أثر المكوث فى المدينة وقد أصبح مليكها وأمرها وناهيها ولكنه ذهب الى أهله بنى الكفر والضلال وقد خالقهم بخلق حسن وعفا عنهم فوضعهم أمام حقيقة أمرهم كيف لا يكون نبيا وقد قدر وعفى ......... أنا وأنت أيضا مأمورين بفعل ذلك بالإندماج ونشر الفضائل باللين والحكمة والموعظة الحسنة

أرجو ألا يفهم كلامى على سبيل الخطأ أنه محاولة لإحتكار الفكر أو التدليل بالثقافة والمعرفة فأنا أحقر من أن أدعى ذلك وأنا لا شىء فى كون الله الواسع فجميعنا يتدنى أمام ذات الله العظيم

[me_medoo]

لا تقلق يا كوشري

كل أنسان يعرف مصلحتوا ... ويعرف طريقه ... وانتا فاكرتني زمان بأبن عمتي (أنتيمي ) كان بروضوا كده بس هو كان قبل كده مقطع كابيرهات شارع الهـــــرم لدرجة أنو كان ممكن يتصل بيا بالليل ويقولي ملقيش معاك 1000 جنيه سلف علشان الفلوس معجزة معايا ههههههههههه أقولوا معليش معايا ورقة بعشرتلاف جنيه وممعيش فكة روووح غور كتك القرف ...

وبعديها بصيت لقيتوا التزم وبقى من جماعة الدعوة ... وأقلتلوا الله يخرب بيتك هو انتا ياأسود يا أبيض ...

بس بيني وبينك كلنا مبسوطين له أنو على الاقل ساب الفساد الي هو فيه وخليه يعمل الي يريحوا ... طالما مبيدايقش حد أو بيئذي حد وعمال يتعبد ربنا وفي حالوا .. وربنا يهديه يارب ويهدينا ... يارب العالمين .

@@@@@@@@@
وتحياتي

[megaman]

لا تقلق على صاحبك وحاول انك تتعرف على الجماعه اللى بيقعد معاهم هما ناس كويسه جدا على فكره ومنهجهم معتدل للغايه بس صاحبك هو اللى عنده ميل للعزله وشدد على نفسه محدش قاله يعمل كده هو اللى غاوى روح اقعد معاهم وحتلاقيهم غير صاحبك خالص وخليهم يقولولو براحه شويه لان الشيطان ممكن يضحك عليه ويخليه ما يخشش مسجد تانى ابدا الموضوع بسيط باذن الله والمشكله غالبا تتعلق بسلوك صديقك الفردى وليس لجماعة المسجد دخل بذلك تقدر تتاكد بنفسك وراجع كده سلوك صاحبك ونفسيته قبل ما يدخل المسجد اكيد فيه عوامل اخرى زى فشل عاطفى او اسرى او دراسى