فضفضه لأني قربت اطق

[khaled_bibo]

السلام عليكم ورحمة الله وبركاته

لو سمحتوا يا جماعه ان عاوز افضفض معاكوا لأني حاسس اني هاموت و ان في جبل على قلبي

الموضوع اني في تانيه ثانوي بس عندي احساس فظيييع بالوحده مع ان من 6 شهور بس كان عندي

شله صحاب و كانت الدنيا حلوه لغايه اما اكتشفت ان فيهم مجموعه و بتشرب مخدرات و بتزني استغفر

الله العظيم فابعدت عنهم و استقريت على كام واحد كده المهم شويه لقيتهم هما كمان مصاحبين بنات

و انه بيحبها و الكلام ده و يا سلام لو قلت لواحد ترضى تتجوز واحده انت مشيت معاها من غير اي حاجه

رسمي يقولك ما امها عارفه فلت مش مشكله ده اختلاف في وجهات النظر و شويه الاقي انهم بيزنوا

على دماغي عشان اعرف وحده و نجحوا في كده بس مطولتش يمكن مكملتش 5 ايام و رجعت

لصوابي شويه الاقي فئه منهم كانت بتعرفني عشان معايا عربيه و بس و ناس تانيه كلها حقد انت

ازاي عندك 17 سنه و معاك عربيتين و يا سلام بقى بعد الامتحان لو مشيت علطول تلاقي كذا واحد

بيكلمك و يقولك ايه عملت ايه في الامتحان بنبره كلها فرح و شماته انك بدام مشيت علطول يبقى

نيلت في الامتحان و اللي بيبعك عشان واحده متستهلش و كل متقابل واحد تلاقي رازع ام الموبايل في

ودنه و عامل فيها روميو مش عارف ايه اللي حصل مع ان ربنا يعلم ان عمر ماحد فيهم طلب حاجة

و اتأخرت عليه و لا عمري جرحت حد بصراحه حاسس باحساس الوحده القاتله و مش لاقي حد

افضفض معاه غيركوا و عارفين ان فيكوا ناس هتنصحني و انا واثق في نصيحتها و اسف لو الموضوع

طويل حبتين و لو انه ميجيش نص اللي في قلبي

[aly_hosny]

انا مقصدكش في ال هاقوله دا
بس الجيل بتاعك دا بايظ بكل ما تحمله الكلمة من معنى
البنات قبل الولاد
حاجة مستفزة لما تعرف ان واحدة في 2 اعدادي ولا في 3 اعدادي و بتسال صاحبتها انا اعرف منين اذا كنت حامل ولا لأ

و طبيعي هيبقى صعب جدا تلاقي حد محترم بس اكيد فيه و انت مش لوحدك
متكسفش لو لاقيت حد محترم انك تروح تقوله انك عايز تصاحبه بس اهم حاجة متفضلش مع حد مش كويس و تقول ان انا مش هعمل زيه
لانك اكيد هتعمل زيه لو فضلت معاه

[khaled_bibo]

مش عاوز اقولك اكتر من كده ما خفي كان اعظم ان معاك ان في بتاع 2 او 3 كويسين بس المشكله انه بيعرفك ساعة

المصلحه بس قضيت المصلحه و لا كأنه يعرفك غير اللي يجي يقولك انا بادعي عليك كل صلاه !!! عشان الحمد لله ان الى

حد ما ذكي و بلقط بسرعه

[ehab]

الــمــســتــحــيــلات الــثــلاثة
الغول والعنقاء والخل الوفي

[dede_dodo88]

هي المرحلة العمرية دي بتبقى مليانة بلاوي, بلاوي بمعنى الكلمة يعني..
و هتمتد معاك لحد الجامعة كمان يمكن بصورة أكبر شوية لأنه مجتمع مفتوح أكتر من المدرسة.
المهم أنك تفضل محافظ على نفسك مهما شفت و مهما كانت المغريات أو الناس اللي بتحاول تشدك معاها..
أنا بالنسبالي مرحلة ثانوي دي كانت أسود سنين في حياتي بسبب كل الحاجات اللي بتشتكي منها دي و صراعي مع نفسي أني أعدي المرحلة دي بسلام من غير ما أتأثر..
تغور الصحوبية لو هيجي من وراها قرف و أنك تخسر نفسك.. يبقى في الحالة دي تفضل لوحدك أفضل..
بس أكيد هتلاقي حد كويس تتعرف عليه, هو مش هيكون باينلك لأن النوعية دي بتكون عادة مستخبية وسط الزحمة.. لكن دور هتلاقي..

[shaddadfalcon1]

عديت من المرحله دي بامان عن طريق العزله واني كنت لوحدي تماما مليش دعوه بحد وكنت بشوف الناس بتخرج وتصيف وتتفسح وتكلم بنات ووووووو وكنت بكبر دماغي واللي بيقول عليا مغرور واللي واخد قلم في نفسه واللي يقول مش بيكلم مسلمين وغيره والحمد لله دلوقتي هما زي ماهما وانا استريحت بفضل الله

فكبر دماغك منهم خالص وخليك في حالك وطالما انت مبسوط ماديا يبقي دي دافع ليك كمان انك تخليك في حالك عشان القر والقرف

اطلع لف بعربيتك وزور قرايبك وعدل في عربيتك لو معاك فلوس
اشتري في نادي اعمل اي حاجه متخلكش تتجوز لصديق

[khaled_bibo]

والله ما تعرفوش كلمكؤا ريحني قد ايه ده انا كنت خلاص حسيت اني غلط و اني معقد و هما اللي صح مش عارف ليه الناس بتبصلي باستغراب يعني ازاي ابقي ماشي لوحدي و مش في بقي سجاره او باتكلم في الموبايل والله كل اللي انا عاوزه ان الناس تسبني في حالي مش اكتر

[ghostmido]

شد حيلك يا خلودة انا عارف الفترة دى اصعب مرحلة عمرية.
نصيحتى لييك انك خليك قريب من ربنا يعنى لو مش بتصلى ابداء صلى ولو بتصلى حاول تواظب على الصلاة فى المسجد حاول تصوم وواظب على قراءة القرءان .
بجد ربنا يوفقك.
الفترة دى اللى بتصنع فيها شخصيتك يا تكون راجل يا ما بلاش احسن.
شد حيلك يا معلم

[cameeron]

اولا يا خالد عاوز اقولك انك بطل انك بتتحمل البعد عن مغريات البوظان و عاوز اقولك استمر بكل قوة على كده و ما تتهزش ابدا و انصحك ماتركزش قوى فى ان لازم يبقى جنبك الاصدقاء المحترمة بقدر ما حاول تشغل وقتك بنشاط كويس يعنى رياضة او كورسات النشاط هو اللى هيجيبلك الاصدقاء المحترمة مع الوقت وقرب دايما من ربنا اكتر و اكتر و واظب على الصلاة علشان ربنا يثبتك دايما و يبعد عنك صديق السوء و احنا فى الحدمة دايما تاخواتك و جنبك قد ما نقدر

[OMAR61995]

أنا قدك بالضبط و فى نفس مشكلتك
ناس كانت كويسة و متفوقة
فجأة بقت السيجارة عندهم حاجة عادية
و فى ناس وصلت لأبعد من كده
و بقى عندهم لا مبالاه غريبة

[AhMeD EzZ]

الــمــســتــحــيــلات الــثــلاثة
الغول والعنقاء والخل الوفي

لا مش مستحيل ابداً .. المهم انك تكون مخلص النية لله تعامل كل شخص بما يرضي الله

انا الحمد لله انا و اصحابي 5 و فينا مسيحين بس بجد و بدون مبالغة و كلام حرفياً بقالنا اكتر من 10 سنين اكتر من اخوات مع بعض بشهادة الغريب قبل القريب

ربنا يخليهم لي

[egyptiandiver]

ديماً كل ما تتلخبط افتكر المثل المصري البلدي القديم: إلي بيشيل قربة مخرومة... بتخر على راسو... ربنا يحفظك - أخوك أحمد سامي

[shaddadfalcon1]

انا بس استغربت لحاجه اتك بتقول انهم بيزنو
طيب اهلهم فين ؟ واهل البنات دي فين؟

[khaled_bibo]

في غيبوبه هو لو كان الاهالي واخده بالها كان حالنا وصل لكده

[3mr Farrag]

بص يا عم الحج
انا كنت بعاني من الموضوع ده
مش في موضوع بيشرب مخدرات ولا سجاير و الكلام ده...من ناحيه انه انت اللي بتسأل و محدش بيسأل غير لو في مصلحه...
و جربت الناس في شغل معاهم و حاجه مرض
المهم انا بقيت مريح دماغي..و لا بقي يفرق معايا حد
لدرجه اني عادي ممكن انزل اخرج لوحدي و ماكلمش حد

يعني من الاخر فكك من اللي انت مش عاجبك...
و رأيي كمان ما ترحش تتعرف علي حد و بالعافيه...ممكن عادي تجرب...لقيته كلمك و عملك حساب
خير و بركه ...مش بيكلمك و مكبر دماغه.. ولا تحط في دماغك

اوعي تضايق نفسك علشان الناس....اللي هيا نفسها مش فارقه زعلك عليها او من تصرفاتها

نصيحه مني ليك.....ماتديش الامان لأي حد..و اعتبره انه عايز منك مصلحه قبل ما تعتبره انه عايز يعرفك لله....و لو طلع كويس و محترم يبقي برضوا خير و بركه