تجربتى المريرة مع السواقة

[AirForces]

انا اتعلمت اساسيات السواقة الصراحة فى مدرسة تعليم مع انه كان كفتة على الأخر بس على الأقل اتعلمت ازاى اوازن بين الدبرياش والبنزين والباقى بعد كدا اتعلمته على عربيتى كنت بمشى بيها فى شوارع فاضية ودا طبعا بعد ما والدى فشل فى تعليمى على ال 128 بعد محاولات مريرة :d

بس نصيحة ما تحاولش تسوق عربية واحد صاحبك ابدا عشان حتى لو انت سواق بس ممكن تتعرض لمواقف محرجة كتير جدا .. مرة خرجت انا وشوية اصحابى وواحد منهم كان جايب عربيته وواحد تانى كان لسه متعلم سواقة بقا وفرحان وقاله ادينى اجربها والتانى يقوله انسى طب يا عم دا هو الحتة دى بس والتانى يقوله انسى لحد ما قاله طب هات اركنها فوافق المرة دى لأنه مكانش بيعرف يركن اوى وياريته ما وافق :d

صاحبى التانى دا ركب العربية من هنا ولسه بيجيب بنزين ومشى خطوتين ولقينا طرااااخ .. واحد لبس فيه من شارع جانبى .. وبالرغم من انه الشخص التانى اللى خبط فى العربية هو اللى غلطان بس صاحبى صاحب العربية ما اقتنعش ابدا وفضلوا اصحابى الأتنين قافشين على بعض وكانت خروجة زى الفل :d

[Memo-kh]

انا حكايتى مع تعلم السواقة غريبة شويه ويمكن محدش يصدقنى لما أقولكم أنى و الحمد لله الحاج الله يكرمه ويعطيله الصحة وطول العمر كنا نعيش معاه وإحنا صغيرين فى السعوديه فى مدينه صغيره إسمها رفحاء وكان كل يوم جمعه نروح معاه أنا واخواتى الكبار ( لى أخين أكبر منى ) يعلمنا السواقة فى البر ( الصحراء ) طبعآ أخويا الكبير كان فى الثانوية والتانى الإعدادية والعبد لله 6 إبتدائى وكانوا بيسوقوا لوحدهم وطبعأ أنا مش ساكت مرة أقعد على رجل الوالد ومره أسوق لوحدى بس مجرد أنى امشى حتى لو مسافة صغيره طبعا انت حواليك صحرا فا مفيش أى خوف من اى نوع وبعد كده من بداية المرحلة الإعداديه كنت بسوق عادى جدا وعلى فكرة اللى سافر السعودية يعرف إن دا السن الطبيعيى لركوب العربيات هناك ( يعنى فى المدرسه الإعدادى كل عيّل معاه تويوتا هاىلكس موديل السنه ويغير العربيه كل سنه ) والحمد لله ربنا يديمها نعمه مخبطش العربيه نهائى ( ويمكن عشان مفيش حاجة أخبط فيها أساسآ هههههههه )
مع إنها كانت تويوتا كرسيدا 81 وحش كاسر لوخبط بيها فى جبل مفيش مشاكل المهم لما رجعت مصر فى سنه أولى ثانوى بقت المشكله بالنسبه لى فى أنى مش بعرف أسوق فى الزحمة عشان متعود على أن مفيش أساسآ هناك اى حاجه فى اى حاجة بس الحمد لله كانت عربية شاهين وإتعلمت عليها ومخدشتهاش الحمد لله خلاصة الكلام البركة فى الحاج وأحب أقولكم على نصيحه أنا إن شاء الله ناوى أنفذها مع أولادى أول مايطول الولد أو البنت الدواسات والدركسيون علمّه هتفرق معاه كتير أوى ومش هيخاف أبدا من العربيه .
دى خلاصة تجربتى وآسف للإطالة .

[zrzr1]

طب وليه الاصرار علي التعليم بنفسك, حصتين تعليم سواقه وكنت جنبت نفسك والناس اللي ملهمش ذنب كل الحوارات دي

[theangel]

الموضوع ده بيدينى امل فى الحياه بعد ما كنت خلاص قربت اتعقد
بس المشاركة دى بالذات بتعبر عنى اصل انا كمان عملت حادثه يوم وقفة العيد الفجر و الخساير كانت جامدة شوية فى العربية و كنت مصدومة جدا وقولت مش هسوق تاني من ساعتها و انا بصلح فى العربية و يدوب لسة بادئة تفوق من الحادثة نزلت بيها كام مرة بدرى كده و برجع على طول عشان خايفىة النهاردة بقى بعد الفجر خبطتها تانى

بجد انا خلاص اتعقدت و مش عايزة اسوق تانى لانى مش عارفة ازاى اصلا اتعلم صح

ولله حضرتك السواقه مع الوقت والممارسه زي اي حاجه بتبقي سهله اي كانت العواقب اللي بتقابلك ف البدايه هي بتبقي مجرد دروس مش اكتر :) اهم حاجه خلي بالك بس وخلي عندك ثقه ف النفس كده علشان متحسيش انك بتعملي مهمه في تل ابيب

[karimmagdy50]

حلو اوى الموضوع ده انا اول عربية حطيت رجلى فيها كانت لادا 2105 وما ادراك ما الادا
كرهت ام العربيات بسببها مع ان ابويا بيعشقها
لحد ما فضلت ورا ابويا لحد ماباعها وجاب بيجو 405
اه على الجمال والاحترام فعلا اسد حسيت انا نا مركبتش قبل كده عربيات
كنت اصلا غاوى اعد فيها بس من غير حتى ماادورها
بس للاسف باعها وجاب شاهين
رجعت تانى انظر للعربيات نظرة مختلفة
بس فعلا اهم حاجة عدم الياس والثقة

[Hmatchy]

يا جماعة اهك حاجة فى السواقة الاحساس
حس بالعربية فى لفت الطارة فى دوست الفرامل
لازم تفهم ان لكل سرعة رد فعل معين ولكل موقف تصرف
استنتج بنفسك من المعطيات اللى معاك من الطارة و الدواسات ايه اللى هيحصل
اهم نصايح للى لسة بيتعلم ودى هتنفعكو جامد اوى ودى الطريقة اللى علمت بيها واحد صاحبى السواقة وبردو وكان عامل زيكو كده ان السواقة مجرد عملية حسابية بحتة
1- انزل بليل فى الشوارع الفاضية علشان متتحطش تحت ضغط عصبى وحدد شارع فيه ملفين بعاد شوية ومفيش تقاطعات و يسلام لو فى مطب او اتنين(مثلا جسر السويس من فندق السلام لحد عمو حسنى منشيت التحرير)
اتعلم ازاى تحافظ على حارتك وخليك ماشى فى الشمال و اتعلم ازى متسرحش العربية منك وتنقل على حارة تانيه وتفضل مع الطريق وده هيكون سهل لما تتعلم تركز مع الرصيف وتحافظ على المسافة بينك وبينو وبالتالى هتلاقى نفسك محافظ على حارتك مهما راح الطريق يمين او شمال وبكده نضمن ان احنا منرميش على حد ونوفر جزء من تركيزنا لباقى مهمات السائق اللى هقولهلكم واحده واحده
2- حاول تهدى قبل الملف او المطب لسرعة مناسبة باستخدام الفرامل و الضغط عليها سنة سنة علشان يكون عندك القدرة تستشعر بنفسك كل دوسة هتهدى العربية اد ايه ولازم السائق اللى جمبك يتابعك فى الاول بانك تزود اكتر او اقل
3- حاول تاخد الملف فى نفس الحارة بس مع متابعة السائق علشان متحكش فى العتب ويتابعك بانك تكسر لجوا او تعدل لبرة شوية لحد ما تعرف لوحدك امتى تكسر و امتى ترجع تعدل
4- الخروج من الملف فى نفس الحارة
5- تكرار جميع المراحل حتى الاحساس بالتمكن منها


اليوم التالى
1- مراجعة نفس الخطوات السابقة على سرعات مختلفة
2- بداء النظر فى المراية و السيارة متوقفة والتعلم ان لا يكون كامل التركيز فى المراية ومحاولة ملاحظة اى تغير امام السيارة وهى واقفة من شخص او سيارة يمرو امامها
3- بدء التحرك بالسيارة و النظر فى المراية للحظات مع ملاحظة الاحتفاظ بنفس الحارة
4- تكرار الخطوة السابقة مع المراية الاخرى ومراية الصالون وايضا ملاحظة الاحتفاظ بالحارة
5- بدء الانتقال من حارة لاخرى لمفاداة بلاعة مثلا بعد النظر فى المراية (يجب ان ينبهك الذى يجلس جمبك بمكان البلاعة لتاخذ وقتك فى الاستعداد و النظر فى المراية)
فى النهاية يتم التعرف على ابعاد السيارة بالوقوف بجوار رصيف مرة و امامه مرة والنزول لمعرفة اين الرصيف كما يراه من الداخل واين مكانه الحقيقى من السيارة
ملحوظة الكلام ده للى هيعلمك اوع انت تقعد تحفظ فيه ولو عايز تجيب عربيتك و انا اكون معاك بليل معنديش اى مانع انا علمت 5 قبل كده بنفس الطريقة منهم واحد كان زيك بردو وبياخد دروس تعليم بس مكنش فى دماغو و اهو دلوقتى معاه سيراتو و اوقات الشيطان بيلعب فى دماغو وبيحاول يشد معايا

[eng_sh]

ولله حضرتك السواقه مع الوقت والممارسه زي اي حاجه بتبقي سهله اي كانت العواقب اللي بتقابلك ف البدايه هي بتبقي مجرد دروس مش اكتر :) اهم حاجه خلي بالك بس وخلي عندك ثقه ف النفس كده علشان متحسيش انك بتعملي مهمه في تل ابيب

هى فعلا الممارسة هى الحل بس الموضوع محتاج شويه وقت
انا الغلطة اللى عملتها انى اصريت اشترى العربية و اتعلم السواقة فى وقت انا مش فاضية فى تماما
هى اه دروس بس صعبة شويه و ربنا ييسر

[CaptaiN-AhmeD]

ياجماعه والله انا بسوق من سنيييييييييييين بس اما باخد عربية واحد زميلي او اي عربية بتاعت حد قريبي

احساس تاني ! كأني عمري ماسوقت ولا رجلي لمست دواسات معرفش ليه

انسب حاجه تتعلم عليها وتبقى محترف عليها هي عربييييييييييييييييتك وبس

والحمد لله انا كنت فاكر نفسي ف البطييييخ اما كنت بتعلم ودا لأني علمت نفسي بنفسي محدش قعد جنبي وقالي اعمل ايه ولا حاجه

كنت بقعد جنب الحاج اراقب بس ازاي بينقل اما يسمع صوت المكنه يبدء يعلى وازاي موازنة البنزين مع الدبرياج

بعد كده وانا ف تانيه ثانوي لقيت نفسي بقوله هات يابابا المفتاح عاوز انزل اغسل العربيه ( اي حجه والسلام عشان انزل انفذ المخطط )

خدت العربيه وهووووب على طريق المطار واحنا ساكنين ف حلمية الزيتون اه والله دا الي حصل

وللاسف محدش وقفني خاالص وعديت ع كمين ولا حد فكر يسألني حتى ع رخص

وياريتهم كانو وقفوني لأني ف النهايه لقيت نفسي توهت
واضطريت اتصل بالحاج اقوله يجي يلحقني

الخلاااااااااااااااصه جبت عربيه الحمد لله بعد التخرج ورايح جي كل يووم عالصحراوي لكن بردو نفس المشكله حتى الآن

اسوق اي عربيه حد تاني بحس اني ابيض بروح مبطل واقوله اتفضل مفتاحك اهوو