مشكله زوجيه ...... ارجو النصيحه

[beshomilan]

ربنا يكون فعونك بجد..مش عارف اقولك ايه
هو انتوا متجوزين عن حب ولا جواز صالونات؟؟
انتوا قلقتونى ياجماعة من الكلام ده اوى..انا خاطب وبكلامكم ده انا قلقت اكتر جداااااااا

[sanhory]

ياريت بره البيت بتشتغل ..... الاخ / sanhory .... عاوز الزوج يقعد بالبيبي و الزوجه تخرج حره مع صاحبتها .... طب لو كان قال مثلا " ان الزوج ياخدها و يخرج و يفسحها و يفسح عياله ....او يفسحهاا هيه شخصيا .... " كانت مقبوله

اه يا اخوانا من حقها تحس انها انسانة لوحدها من غير دمل لازق في قفاها من حقها تقعد مع صاحبتها البنات بعض الساعات و تحس انها بنت و تهتم بشكلها و يتكلموا في الموضة و في اي حاجة ولا هي عشان اتجوزت سي السيد لازم خلاص متبقاش بنوتة و بعدين مهو كل دا بيعود عالزوج في الاخر

و بعد كدا ترجعوا تقولوا انا مراتي بقت شبه الشاويش عطية , واحدة لازق في قفاها دمل مش عارفة تعمل اي حاجة ولا حاسة انها بنت زي البنات اللي في سنها و شالت الهم بدري

واللي حيقولي امي كانت بتعمل و كانت بتخلي امهاتنا دول مفيش زيهم و بعدين امي و ام اي حد فينا كانت ست بسيطة و المطبخ ده عندها هو حايتها

و 90 في المية مننا و هو بيتجوز عايز واحدة من سكان جاردن سيتي و خريجة معرفش ايه و بتتكلم كام لغة و هاي كلاس و بعد كده عايزها تبقى زي امهاتنا البسيطة لا سيدي الفاضل مش هي دي

و بعدين

\. طب لو كان قال مثلا " ان الزوج ياخدها و يخرج و يفسحها و يفسح عياله ....او يفسحهاا هيه شخصيا .... " كانت مقبوله

يعني يا انا يا انا انتي ملكيش اي حياة انتي حاجة كدة و خلاص و لو عايزة تشمي هوا انا برضه

ياخوانا ما الواحد ساعات كتير بيزهق من البيت و العيال و بينزل يشم هوا مع نفسه او مع اصحابه
اشمعنى هن ملهومش الحق ده ولا حكم سي السيد قافش او يمكن احنا عندنا رجلين و هن عندهم رجل واحدة مثلا

[sanhory]

ده تحليلك و دي و جهه نظرك .......

اختلافي معاك انا ذكرت انه في 95% من مشاركتك .....

هو انت قصدك 95% ولا 5%

و أعذرني : يعني ايه الزوج يعرض علي زوجته ان البيبي يقعد معاه ... و هيه تخرج حره مع صاحبتها ؟؟؟؟ ( ده جزء من اللي مختلف معاك فيه ) ..... مش دي الرجوله ....علي الاقل من وجهه نظري .

ممكن اعرف ايه اللي انتقص من رجولة الراجل لما يقعد مه ابنه ساعتين تلاتة في البيت مهو كدة كده قاعد مع ابنه ولا بنته
و هل الجزئية دي لوحدها 95% و الباقى 5%

و لو سمحت .... لما حد يقولك ان مختلف معاك .... ياريت تسأله " انت مختلف معايا في ايه " .... عشان يبقي النقاش فيه موضوعيه ..... مش انك تفرض وجهه نظرك و تحليلك الشخصي لسبب الاختلاف .... متحاولش انك تفرض وجهه نظرك علي غيرك .

دا حضرتك بتتكلم عن مشاركتي ولا مشاركة حد تاني انا لا فرضت ولا تنيت , الكلام موجود اللي عاجبه عاجبه اللي مش عاجبه انا اسف ميزعلش نفسه ولا كاني كاتب حاجة

[ahmedsamir5edr]

أستاذ سنهوري انت رجل مثاااالي .. راااااائع .. انا اسعد اصحابي في زواجه يفعل تماما مثلك .. وصفه سحريه .

[sanhory]

أستاذ سنهوري انت رجل مثاااالي .. راااااائع .. انا اسعد اصحابي في زواجه يفعل تماما مثلك .. وصفه سحريه .

اشكرك يا استاذ احمد
والله القصة مش سعي للمثالية اكتر منها احترام انسانية الاخرين

[samyyousef]

بعد قراءة الموضوع صدمت ممن اقترح الطلاق!!!!!!!!!
فما قرأته شيئ وارد و معتاد و لم نفاجئ بأمر خطير يستدعي الطلاق
و لكن قد يستدعي الزواج بأخرى لو كانت الظروف تسمح بذلك.....و إذا لم يكن سيؤدي بك الى ما هو أخطر.
اما علاج مشكلتك فتجدها في القرآن...............فقد اشتكيت الى أهلها و لم تعين حكم من أهلها و حكم من أهلك
يجب أن نسير و راء شرعنا بالذات في هذه الأمور ...فالتسمي حكم من أهلك ( من تثق في حكمته و هيبته و سداد رأيه) و لتسمي هي حكم من أهلها......ليحكموا فيما أنتم فيه
هناك جانب آخر يتصل بك........فقد يكون ما يحدث امر عادي في حدود المحتمل و لكن أثره عليك قد يكون كبير بسبب زيادة حساسيتك بسبب الضغوط الحياتية او لأي اسباب اخرى
في النهاية تمنياتي لك بالتوفيق و ربنا يصلح حالك
تحياتي

[Eng_hatemfathy]

انا قريت اول صفحة وفهمت الباقة وتوقعت ما سوف اراه فى باقى الصفخات وبداية عايز اقول حاجتين اهم من بعض
الاول ان مواضيع المساكل الزوجية تسترعى الانتباه والمشاهدات عشرات اضعاف مواضيع السيارات والتى هى اصل المنتدى
ثانيا واسمحلى انبه على الملأ ولن يكون نصيحة علنيه لان الموضوع مشاهد من الكل لا ينبغى علينا معشر الرجال ان ننشر اسرار بيوتنا على المنتديات وخاصة من الاعضاء القدامى الذين غالبا معروفون لاعضاء اخرين وارى ان الاولى لمن اراد المشورة الا يبين شخص السائل
ثم ما ذكرة الاخ السائل حال اغلب البيوت حتى بيت الفاروق عمر ولكن المشكلة التى يحياها اغلب الرجال هى فقدان مهارة ادارة الخلاف والتصرف اثناء المعركة
تتصف كثير من الفتيات بالصوت العالى وغلو فى مهرات لغة الجسد حتى يظنها من يراها وهى تتكلم انه امام فيلم عربى او بنت شعبية بتتكلم بايدها ووسطها وكتفها وعنيها وكل حته فيها وده بيكون شرارة المعركة من باب متعليش صوتك ومتتكلميش معايا كده ومتبصليش من فوق لتحت وبتبصى كده ليه انا مش مالى عينك وممكن الموضوع يكور شوية لحد لو بصيتى كده تانى هتلاقى القلم على وشك انا متخلقش اللى يبصلى كده انا مشغل تحت ايدى عشرين نفر الواحد فيهم بمية منك وانتى نسيتى نفسك ولا ايه وحاجات من كده
وفى الحقيقة الراجل الحر اللى دمه حامى الحاجات ديه بتجننه وتخليه هيموت مراته
ودايما السلوكيات دى من الستات مبتكونش باينه ايام الخطوبة وبتكون رقيقة رقة السنين وبعد الجواز يا اما سماسم العالمة يا اما فضة المعداوى
طب ايه الصح فىالموقف ده لو الراجل عرف يهدى نفسه اول 3 دقايق
اولا لازم يدر وشه وميبصش عليها علشان لو شافها بابص كده تفكيره هيتحول من التفكير فى المشكله واحتوائها الى الانتصار للنفس
لو حست الست انها فشلت فى نرفزة جوزها واشعال الموقف هتدور على سلاح تانى تقرفه بيه وهتلاقيها غيرت دفة الحوار والحركات للاعلان عن التذمر من البيت والعيال والمجهود و.......
وساعتها الوقت المثالى لادارة دفة الحوار وتغيير حرارة الموقف من النار الى التلاجة وخفض الصوت والاستماع اكثر من الرد حتى لو المواضيع هايفه لان الست عايزة ترغى مش تحل فسيبها ترغى
وبعد انتهاء الازمة انت تشعلها تانى بس بزكاء يعنى بصوت عالى بس حنين كان لازم الموضوع يدار كده كل حاجه وليها حل من غير ما ننكد على نفسنا -مبسوطة وطبعا حته تهديد فى الاخر نظام منش كل مرة تسلم الجرة
وفى الاكل قبلة بسيطه
فى الاحوال العادية لة الراجل مدورش وشه انا متأكد ان كلمة الطلاق هتدخل فى الحوار كام مرى وممكن تكون بجد مرة فيهم

المصيبة الكبيرة مش فى الست اللى اتكلمنا عليها من صوت عالى وحركات زبالة انما المشكلة فى قليلة الادب اللى ممكن تشتم جوزها -اكيد ساعتها الراجل هيقول كظ فى العيال ولو دسته وغالبا هيمد ايده ويعجنها وممكن برده يسبلها ميت ملة
الست دى الحل السهل معاها هو الكلاق وتحمل تبعاته واللى اتكلمنا عليها كتير فى الموضوع اللى اتنشر من اسبوعين ولسه شغال ومفتوح
ولكن لو واحد اعتبر الجواز وخاصة بعد الانجاب مشروع وهو مصر انه ينجح
ايه الحل مع واحده زى دى
انا شايف ان الموضوع لازم يكون فيه على الاقل مرة ضرب علشان تترعب من انها تغلط تانى ولو واحده متعوده ولسانها زفر مش عارف بصراحه ازاى الراجل يتجنبها فاعتقد مش صح واحد يسيب نفسه يتهزأ قدام ولاده علشان خايف عليهم
ده مجرد رأى مبنى على خبرات خاصة وعامة
وربنا يهدى سرك ويصلح حال اهلك واهل الاخوة جميعا والكل مبتلى اصبر واحتسب

[أحمد كمال]

ربنا يكون فعونك بجد..مش عارف اقولك ايه
هو انتوا متجوزين عن حب ولا جواز صالونات؟؟
انتوا قلقتونى ياجماعة من الكلام ده اوى..انا خاطب وبكلامكم ده انا قلقت اكتر جداااااااا

و لااااااااااااااااااااااااااا بتفرق


بالعكس جواز الصالونات احسن لانك بتفكر بحكمة و عقل و بعيد عن المشاعر اللي بتوديك ورا الشمس

[hassanin_lada]

الله يعينك يابيه

انا كده قررت اني ماتجوز خالص .. روح ياشيخ ربنا ينصرك عليها ويهدي بينكم ويخليلك ابنك

[shaddadfalcon1]

اللي يسمع كلام حضرتك يقول اني بقول اقعدو في البيت و شغلو الستات

ظروف الحياة بتفرض حاجات تتعمل مالاطباء الستات ساعات بيبقوا يوم الجمعة مش في البيت و ازواجهم في البيت ايه اللي حصل يعني قامت القيامة ؟ ولا هو كد يبقى كده و خلاص

لا تكن لينا فتعصر ولا تكن قاسيا فتكسر

العمل مش فرض علي الست وطالما الزوج مكفي بيته يبقي مفيش شغل للست ومينفعش تبقي بتنزل تتبهدل في الشارع والمواصلات والشغل واختلاط وغيره وكل ده ياخد حوالي 80% او اكتر من طاقتها وبعد كده نقول كتر خيرها انها مستحمله العيال

كل امراء ميسر لما خلق له ومتفتكرش انك عشان بتتعب لما تقعد بالعيال واكلهم وشربهم هي كمان لازم تتعب من كده لان ربنا خلقها لكده
بالظبط زي الست متقدرش تمسك فاس وتفضل تشتغل بيها طول النهار

[lonedoctor]

معلش اسمحلى اخى الكريم اقول انه اول خطوة فىى فشل حياتك الزوجية هو عرض مشكلتك الخاصة فى المنتدى
تقبل تحياتى

[ramyhekal]

انا مش متزوج بس من وجهة نظرى لازم تكون شخص يستحق الكرم بالنسبه لها بمعنى ايه ان المخطوبين لما بيكونو قريبين من بعض اوى دايما فى مشاكل وقلق لما يبقى من بعيد لبعيد تبقى الدنيا حلوه من الطرفين بس اللى انا اقصده فعليا انك تعمل الحاجه اللى تخليها تقول ياريته يرجع يعاملنى زى زمان هو بقى عامل ليه كده والتفاهم معاه صعب صدقنى ده عباره عن دلع منك او من اهلها وده الحل من وجهة نظرى

[ahmed1981]

أسأل الله تعالى أن يصلح لك حالك

مبدئياً لا تنتظر تغييراً قبل أن تحافظ على الصلاة كما تحافظ على التنفس وتستمر على ذلك بقية حياتك
ستشهد في حياتك تغيير خلال شهور

لابد أن تكون نيتك في الإستقامة على الصلاة وعلى أمر الله تعالى هي لله تعالى فقط لا غير لأن ما بك من بلاء ناجم عن ما أنت عليه من تقصير في حق الله تعالى بلا جدال

ليست نيتك في الإستقامة هو إصلاح الحياة الزوجية أو إصلاح الزوجة ولكن نيتك فقط هي رضى الله سبحانه وتعالى

من ثمرات هذه الإستقامة أن يحييك الله حياة طيبة

يقول الله تعالى:
( مَنْ عَمِلَ صَالِحًا مِنْ ذَكَرٍ أَوْ أُنْثَى وَهُوَ مُؤْمِنٌ فَلَنُحْيِيَنَّهُ حَيَاةً طَيِّبَةً وَلَنَجْزِيَنَّهُمْ أَجْرَهُمْ بِأَحْسَنِ مَا كَانُوا يَعْمَلُونَ )
سورة النحل / الآية 97

الأمر الثاني:ــ
لا تتخيل ولا للحظة واحدة أنك تستطيع أن تجلب لنفسك السعادة بذراعك وعقلك وقوتك وذكائك .... إنسى خالص

والله لو طلقت ألف مرة وتزوجت ألف مرة والله تعالى لم يكتب لك الحياة الطيبة فلا أمل في البحث عنها

صدقني
كم من الرجال الطيبين تزوجوا سيدات طيبات
ولكن لسبب ما في علاقتهم بالله يحول الله حياتهم إلى غم وهم وجحيم


لذلك أريد منك أن يكون إيمانك بأن السعادة بيد الله فقط لا يتزعزع

ثم بعد ذلك قم أنت العبد بإرضاء خالقك ومالكك وأطلب منه أن يعطيك السعادة والحياة الطيبة في بيتك

المرحلة الثانية:ـ
الواقع الملموس
إن تحملك لزوجتك ليس ضعف منك بل هو الرجولة بعينها
فلو كانت الرجولة هي عدم التحمل لجعل الله تعالى العصمة في يد المرأة
لكنه سبحانه وتعالى جعلها في عصمة الرجل لأنه رجل

نعم أنت القائد والقيم في بيتك بحكمتك وتحملك وليس بسطوتك وقوتك

إبحث عن الأسباب في نفسك أولاً ومع نفسك
غير من نفسك للأفضل طالما في رضى الله سبحانه وتعالى

في نفس الوقت لا تقع فريست الصمت الزوجي
بل تكلم وناقش وإبحث عن الأسباب بطريقة غير مباشرة أو مباشرة بلا كلل أو ملل


والإبتلاء بالزوجة نوعان أنت تحدد نوعك :ــ

النوع الأول:
رجل من الصالحين المؤمنين شديدي الإيمان يبتليه الله بزوجة حادة الطباع
فيتحمالها لله تعالى ويرقيه الله في طبقات الصالحين

النوع الثاني:
رجل مؤمن ولكنه لديه القليل أو الكثير من التقصير في حق الله
يبتليه الله بزوجة حادة الطباع أو تتحول أخلاق زوجته للأسوء
وهذا البلاء حتى يكفر الله عنه ذنوبه وحتى يكون إنذاراً له بالعودة إلى الله تعالى

وعندما يعود إلى الله فإن الله تعالى يرفع عنه البلاء بإذنه سبحانه وتعالى ويدله على الطريق السليم لمعالجة ذلك البلاء



وكما قلنا إن السعادة والحياة الطيبة هي بيد الله يرزقها من يشاء

تذكر الدعاء التالي وكرره في كل وقت :ـ
(اللهم إني أعوذ بك من الهم والحزن
وأعوذ بك من العجز والكسل
وأعوذ بك من الجبن والبخل
وأعوذ بك من غلبة الدين وقهر الرجال)

وهذا الدعاء مستمد من حديث النبي صلى الله عليه وسلم التالي:ـ
روى أبو داود عن أبي سعيد الخدري قال
(دخل رسول الله صلى الله عليه وسلم، ذات يوم المسجد فإذا هو برجل من الأنصار يقال له: أبو أمامة
فقال يا أبا أمامة: ما لي أراك جالساً في المسجد في غير وقت الصلاة؟
قال: هموم لزمتني وديون يا رسول الله،
قال: أفلا أعلمك كلاماً إذا أنت قلته أذهب الله عز وجل همك وقضى عنك دينك؟
قال: قلت بلى يا رسول الله
قال: قل إذا أصبحت وإذا أمسيت:ـ
اللهم إني أعوذ بك من الهم والحزن وأعوذ بك من العجز والكسل وأعوذ بك من الجبن والبخل وأعوذ بك من غلبة الدين وقهر الرجال
قال: ففعلت ذلك فأذهب الله عز وجل همي وقضى عني ديني)

وإذا سلكت هذا الطريق فعليك أن تضيف عليه الدعاء قبل أذان الفجر فهذا أفضل وقت للدعاء
عود نفسك على الإستيقاظ قبل أذان الفجر ولو بنصف ساعة وأدع الله تعالى بما تريد
إذا إستطعت أن تصلى الوتر وتدعوا في آخره
أو حتى تجلس تدعوا الله فقط قبل أذان الفجر
تحمد الله وتصلى على رسول الله وتدعوا الله تعالى بما تريد
هكذا تتحول الحياة.

[pro_samir]

مهم طبعا تعرف السبب ..

لو هي كويسه من جميع الجوانب ما عدا معاك ! يبقي دور علي الجانب التاني

قد يكون كما قال أحد الصالحين: إني لأرى شؤم معصيتي في خلق دابتي وزوجتي

[Ahmed Selim]

طبعاً الرجالة قالو ما فيه الكفاية.........حبيت بس أعلق على النقطة دى

أستاذ سنهوري انت رجل مثاااالي .. راااااائع .. انا اسعد اصحابي في زواجه يفعل تماما مثلك .. وصفه سحريه .

للأسف حتى المثالية مش بتنفع فى كل الحالات.........

ليا صديق مصرى من أم بولندية..........من ساعة ما أتجوز و هو بيساعد مراته فى كل حاجة و فى أى حاجة..........سواء بتشتغل أو لأ.

كنا دايماً نقوله قدام زوجاتنا " نصير المرأة" و بينا و بين بعض بنشتمه :)

المهم صاحبي ده من فترة حوالي سنة كده أتفتح نفس الموضوع...........و أعترف لنا أنه كان غلطان............واضح أن مراته أخدت على كده و بقى كل حاجة بترميها عليه......حاجة صغيرة حاجة كبيرة......ترميها عليه.......لدرجة أنه أبتدى يغلس عليها فى وجودنا فى مواقف معينة لما تحاول ترمي حاجة عليه.

الخلاصة............أن مش كل حاجة تنفع مع كل زوجة...........لازم تبقى عارف زوجتك كويس.........هل هى هتقدر اللى أنت بتعمله و لا هتاخد على كده و تسوق فيها و تعتبر ده حق مكتسب فيما بعد.