مش لاقى صحتى ؟؟؟؟؟

[rockana9112007]

اخوانى الاعزاء ..........السلام عليكم ورحمة الله وبركاتة


عندى مشكلة وعاوز استعين بخبراتكم الشخصية

اولا

احب اعرفكم على بعض المعلومات عنى

انا شاب مصرى اسلوب حياتى عادى جدااا مش بدخن ولا بشرب شاى او قهوة بشراهه

وبرضة مش بمارس رياضة ...كنت زمان بمشى بأنتظام ..دلوقتى لأ

مبفطرش الصبح فى البيت ...لكن لما بوصل الشغل بفطر واغلب الايام بفطر طبق الفول بالبيض المقدس لدى المصريين

بالنسبة للغداء بقضيها اى حاجة وخلاص يعنى فطيرة ..طبق كشرى ..سندوتشات جبنة او حلاوة


تعتبر الوجبة الرئيسية بالنسبالى هيا العشاء لما بروح البيت ودى بتبقى على حسب انا روحت الساعة كام يعنى عندك من 8 مساء حتى الساعة 1 صباحا

المشكلة انى بعد ماباكل فى البيت بتبنج وبنام ...طبعااا طلعلى كرش


المشكلة بدأت لما وصلت لسن ال30 ..
بدأت احس انى بهنج من اقل مجهود ..مش قادر اطلع السلم بسهولة ..مش قادر اشيل حاجة حتى لو كانت خفيفة
بقيت بحس ان رجلى مش شايلانى وركبى وجعانى .مبقدرش اقف لمدد طويلة
الصحة اللى كنت ببعزقها يمين وشمال معدتش لقيها
ساعات النوم كترت ..وحاسس دايما بالخمول وعاوز انام فى الشغل

حاسس ان لو حد زقنى زقة خفيفة او حتى سند عليا هقع


طبعا انا روحت لدكتور بس مش عارف الدكتور دة متخلف ولا بيفهم
قالى انتا وزنك زيادة .........لازم تخس
انا طولى 173 ووزنى حوالى 80 او 85 كيلو ...هو وزنى زيادة اة بس مش بالطريقة البشعة اللى تخلينى احس بدة كلة ..وعملت تحليل دم ومفيهوش حاجة تقلق


مش عارف اعمل اية
اكل اية طيب يدينى طاقة عشان الواحد يقدر يستحمل مجهود الشغل
هل فية نوع معين من الفيتامينات ممكن اخدة

انا قررت امارس رياضة بس خايف مقدرش على مجهود الرياضة

عاوز احس بالنشاط والحيوية زى زمان

ياريت تشاركونى بخبراتكم وارائكم

[ibn_seena]

اولا ... انت المفروض تعمل فحص شامل .... صورة دم ووظائف كبد وكلى ونسبة السكر في الدم
ثانيا ... تاخد اي فيتامينات مجدده للطاقه زي vitamax plus واحده يوميا مع الافطار
ثالثا ...هااام جدا ...... تظبط اكلك وتبعد عن المسبكات خالص لفترة
رابعا .... العقل السليم في الجسم السليم ... لازم رياضه وبالتدريج مش لازم مرة واحده .... قليل دائم خير من كثير منقطع ....
.................
ولو نفسيتك تعبانه او في شيء مزعلك حاول تاخد مشورة من طبيب نفسي هيفيدك جدا
.................
......................
...........................

[mostafa3000]

اعمل تحليل كليسترول ودهون ثلاثية

[marsguy]

طبعاً لا غنى عن قيامك بفحص شامل

بس اللي أنا أعرفه إن زيادة الكولسترول ممكن تعمل أعراض إرهاق زي اللي عندك

نصيحه عامه ليك ولكل الأعضاء لما تحلل فيروسات كبد وتطلع النتيجه سليمه إن شاء الله روح إتطعم ضد فيروس بي.

[Mostafa.Mahran]

انت عارف انا اكتشفت ان موضوع الارهاق ده نفسى بالصدفة كده

انا الطبيعى بتاعى ببقى مرهق و حاسس بتعب فى جسمى و مش بقدر اعمل حاجة حتى لو لسه صاحى من النوم ببقى مش فايق خالص

انا مضغوط فى الشغل و فى حاجات تانية كتير و على طول بفكر فيها

اخدت اسبوع اجازة متواصل من الشغل و كنت قريبا شبه نايم طول اليوم و مع ذلك نفس الارهاق

من قريب كده كنت فى فرح واحد صاحبى اوى و كنا فرحانين علشانه جدا و الفرح كان جميل و بصراحة كنت راجع مبسوط جدا و دخلت نمت الساعة 6 الصبح و طبعا قولت هقوم بالعافية علشان الحق اصلى الجمعة و اقسم بالله دخلت نمت و صحيت لوحدى قبل الصلاة و قايم فايق جدا و نشيط جدا و اول مرة احس بكده من سنين طويلة

الضغط العصبى و كتر التفكير بيسبب الشعور بالتعب و فى كورس mba المحاضر قالها باسلوب بسيط ان العقل بيفضى الضغط الى عليه فى الجسم

لو على طول فى ضغط و عصبية و تفكير اكيد هتحس انك تعبان و العكس برضه لو هادى و رايق هتحس انك كويس و سليم

[hassanin_lada]

بص حضرتك انا 21 سنه وجت فتره عليا حسيا نفس اللي انت فيه ده

زمان كنت رياضي يعني جيم كرة قدم جومباز كونجفو سباحه

جت فتره عليا وخصوصا من ساعة ماطلعت رخصة العربيه وانا خملان بطريقه رهيبه لان كل مشاوير بالعربيه طبعا كرشت لاني كنت متعود اكل بعد الجيم بطريقه بشعه بس كان بيتهضم مع التمرين لكن دلوقت مافيش اي تمارين

حتي لما اجي ازاكر بحس بغباء


بس اللي اكتشفته اني لما انزل اعمل رياضه (بتيجي عليا ايام تضرب في دماغي اجري او انزل الجيم لفتره (اسبوع او شهر))

بحس اني واحد تاني عاوز امشي عاوز اعمل مجهود بحس بصحتي لدرجة اني بفتري علي اصحابي (هزار الشباب )

بحس اني مخي فوق وبستوعب حلو جدا لدرجة اني بخاف احسد نفسي

اخيرا عشان ماطولش عليك اسلوب حياتنا سئ للغايه

حاول حضرتك تمارس اي رياضه وطبعا لازم يبقي في اكل صحي عشان يتناسب مع الرياضه

جرب مش هتخسر تنزل تجري لفتين في التراك لو جنبك نادي او اي مكان رياضي لمده اسبوع اه في الاول هتلاقي جسمك اتكسر في خلال 5 ايام بس بعد كده هتحس بصحتك

اسبوع واحد ونرجع نتقابل ونشوف ايه اللي حصل ومش هتخسر كتير

وانا عارف ان ممكن تكون ماعندكش وقت بس انا مش عاوز اكتر من نص ساعه كل يوم

وانشالله خير

[Mohab.Nabil]

انت عارف انا اكتشفت ان موضوع الارهاق ده نفسى بالصدفة كده

انا الطبيعى بتاعى ببقى مرهق و حاسس بتعب فى جسمى و مش بقدر اعمل حاجة حتى لو لسه صاحى من النوم ببقى مش فايق خالص

انا مضغوط فى الشغل و فى حاجات تانية كتير و على طول بفكر فيها

اخدت اسبوع اجازة متواصل من الشغل و كنت قريبا شبه نايم طول اليوم و مع ذلك نفس الارهاق

من قريب كده كنت فى فرح واحد صاحبى اوى و كنا فرحانين علشانه جدا و الفرح كان جميل و بصراحة كنت راجع مبسوط جدا و دخلت نمت الساعة 6 الصبح و طبعا قولت هقوم بالعافية علشان الحق اصلى الجمعة و اقسم بالله دخلت نمت و صحيت لوحدى قبل الصلاة و قايم فايق جدا و نشيط جدا و اول مرة احس بكده من سنين طويلة

الضغط العصبى و كتر التفكير بيسبب الشعور بالتعب و فى كورس mba المحاضر قالها باسلوب بسيط ان العقل بيفضى الضغط الى عليه فى الجسم

لو على طول فى ضغط و عصبية و تفكير اكيد هتحس انك تعبان و العكس برضه لو هادى و رايق هتحس انك كويس و سليم

رأيى ان الكلام ده سليم جدا ، فعلا الحالة النفسية للانسان بتفرق فى كل حاجة يعنى انا ايام المدرسة كنت بعمل مجهود كبير جدا و مش بحس بتعب مع ان وزنى كان اكتر من كده كتير و مكنتش بمارس رياضة خالص .. دلوقتى مع الجامعة و الضغط العصبى المتواصل بقيت تعبان على طول و مش بقدر اعمل حاجة و اللى كنت بذاكره زمان فى نص ساعة بقيت اقعد اذاكره فى 3 ساعات و مش بفهمه برضه .. حاول فعلا انك تغير جو و تفصل عن حياتك خالص و تعمل حاجة تبقى سعيد فيها جدا و متضحكش على نفسك دور فعلا على الحاجة اللى تخلى قلبك يضحك و هتلاقى كل حاجة بقت احسن .. طبعا الموضوع مش سهل و انا نفسى برضه ارجع زى زمان و ربنا معانا كلنا

[MIVEC.A92]

كلمة السر: أشتري عجلة.

للمشاوير القريبة و الصغيره هتفرق معاك جامد جدا.

[Imhotep]

كلمتين و بس..... ارجع امشى تانى بانتظام نص ساعة مشى جد ..... و شوف النتيجة بعد شهرين بس..... و هتدعيلى

[Sherifmt]

نصيحة من واحد حاسس بيك فوق ما تتخيل انت زي ما تكون بتتكلم بالنيابة عني كنت أكتر من كدة وربنا عافاني بالصوم الطبي
فكر انك تصوم صيام طبي بدون ما تحدد المدة وتوكل علي الله

أقرا أكتر عن موضوع الصوم الطبي قبل ما تتبتدي اي خطوة علشان الأعداد النفسي لازم يكون قوي علشان يديك قوة دفع تقدر تعدي بيهم اول 4 ايام وبعدها لما تلمس النتايج المذهلة انت بنفسك هتصر انك تكمل وعندي كتاب عربي ممتاز بصيغةpdf بيتكلم عنه بالتفصيل لو عايز الكتاب ابعتلي ايميلك........تحياتي من مكة

[Khaled Online]

عندي كتاب عربي ممتاز بصيغةpdf بيتكلم عنه بالتفصيل لو عايز الكتاب ابعتلي ايميلك........تحياتي من مكة

ياريت حضرتك ترفعه على أي موقع وتدينا الرابط للاستفادة العامة :)

[Sherifmt]

تم رفع الكتاب في اللينك التالي:

التداوي بالصوم شيلتون.pdf - 4shared.com - document sharing - download


ومستعد لتقبل التقد بانه حرام ومينفعش وارحم نفسك وكل الكلام ده واكتر ...... العبرة باللي جرب ولمس الفرق وحس بالنتيجة (: ......... تحياتي من مكة

[Kareem.ElAraby]

متابع

[pro_samir]

تقريبا نفس المشاكل

وأظن ان الاسباب اللي اتقالت ممكن تكون كلها مشتركه

قلة الحركه + الكوليسترول + الحالة النفسيه

انا وزني ثابت علي 100 تقريبا من زمان .. من كام شهر قلت اما اعمل تحاليل اشوف الدنيا فيها ايه

كان كله كويس الحمد لله ما عدا الكوليسترول والدهون الثلاثيه عاليين جدا جدا

ابتديت اتمشي واظبط أكلي مع علاج للكوليسترول لمدة شهر واتظبط الحمد لله

بالرغم من اني مكنتش منتظم خالص بس فعلا المشي مع ظبط الكوليسترول فرق كتير جدا وحسيت اني فوقت

الشهر اللي بعده بطلت علاج وحركه ورجعت أكل زي الأول بسبب الحاله النفسيه .. رجعت كل حاجه زي ما كانت

[ahmedkhairy]

حاول على قدر المستطاع ممارسة اى نوع من الرياضة
ولو حتى رياضة المشى
هتفرق كتير