أيه أفضل حاجة أستوردها من الصين ؟

[Ahmed_Adham]

نصيحه لأي حد ناوي يستورد ابعد عن اي حاجه تخص الكمبيوتر والموبايلات عشان الحته دي مخصوص فيها عتاوله كبار هيخلوك تاكل البضاعه بتاعتك ومش هتتباع جمله وطبعا عشان واحد مستورد جايب كميات كبيره يبيعها قطاعي في محل هيفضل يبيع فيها سنتين وتكلفه ايجار المحل هتاكل مكسبه وزياده كمان. ولازم قبل ما تجيب أي حاجه تكون فاهم كويس في موديلاتها وبتتباع جمله بكام وقطاعي بكام عشان بعد ما تجيب البضاعه وتيجي تبيعها لبتوع الجمله ميقولكش ده أنا بجيبها بكذا عشان يموتلك السعر.

ولو اني مش بنصح بالاستيرد عموما بس فيه اكسسوارات حريمي بيمشي حالها كويس زي التوك والبنس والدبابيس والحاجات دي ومش بتوزن كتير ومش بتاخد حيز كبير في الشحن ولا التخزين.

بالتوفيق للجميع.

[abo_anas]

اهم حاجه انت بتفهم فى ايه؟؟؟؟ او مجال عملك ايه

[aboomar22]

ياباشا اكسسوارات السيارات او حتى نشترى منك هههههههه يعنى شوية معطرات على فلاتر رياضية على جى بى اس على اسبريهات تلميع على شوية ليدات هتتباع ان شاء الله ---عموما برضه اقولك حاجة ابن خالتى شغال فى حجات زى كده هو المفروض مسافر قريب بس هو هيجيب حاجات مخصوصة للعربية الايمجراند بيقول انها هتنتشر جدا وهابقى حاجتها مطلوبة فكر انت كمان فى الموضوع ده

[mahmoud85]

شوف مصلحتك فين ياباشا واشتغل

البلد ليها حكومة تديرها وهي اللي خربتها وهي اللي تصلحها
مش هتوقف المراكب الماشية للناس ونقول مصلحة البلد
اللي عايز مصلحة البلد مايشتريش الحاجات اللي بتقولوا عليها تافه دي وساعتها المستورد تلقائي هيوقف استيرادها
لكن تيجي تقول تاجر السوق عطشان للصنف الفلاني وفي ازمة شديدة عليه وعليه طلب كبير يقوم هو بقى يقعد بقى يفكر في مصلحة البلد والكلام الغريب ده؟
ا

اعقلوها يا جدعان

طول مافيه زيك كده بالتفكير ده هنفضل زي ماحنا كده
السواق اللي ماشي بالدراع ويقولك اما البلد تتظبط ابقا اتظبط واللي بياخد بنزين في جراكن واللي بياخد رشوه ويقولك الكبار بياخدو احنا مش عارفين نربي عيالنا والموظف اللي بيروح ينام ويقولك علي قد فلوسهم ده علي اساس انه لو قبض 10000 مخه هيشتغل وضميره هيصحا فجاه

فعلا dislike كبيييييييييييييييير اوي يا عضو ياذهبي

[pro_samir]

لبان وطرح ايه بس حرام عليكم خربتو البلد

انتو تلمو الكام مليار اللي معاكم وتعملو مشروع يشغل كام ألف شاب

وينتج حاجه مفيدة تسند الاقتصاد وتخلينا نستغني عن المعونات

وتتبرعو بجزء من الأرباح لسداد ديون مصر

الكلام سهل وحلو

[Land_Cruiser]

وهي دي عايزه سؤال ؟ كشافات اضاءه بالشحن - مراوح بالشحن - لمبات اضاءه بالشحن و ممكن لو الميزانيه مع حضرتك تسمح تستورد مولدات كهربا بتشتغل بالبنزين او يا ريت بالغاز الطبيعي.
المرحله القادمه او حتي ابتداء من الان المشكله بدأت تظهر و لسه الصيف داخل علينا و المتوقع ان الكهربا هتقطع اكتر و اكتر فالناس هتبقي محتاجه الحاجات دي و هتتباع بسرعه ان شاء الله . المهم بس ان حضرتك تختار انواع كويسه و الاسعار كمان تبقي عادله بدون استغلال و بكده يبقي مكسبك حلال و بعيد عن شبهه استغلال حوائج الناس و تفيد أهل بلدك كمان بانك توفر لهم سلعه جيده بسعر معقول و بكده تبقي كل الأطراف مستفيده