آكل إيه و ماكلش إيه عشان اخس

[رزق]

أنا قاعد اليومين دول مهوس بالموضوع ده

ياريت لو حد عنده فكرة يقول

المشكلة إن الانترنت مليان بس معظم الخطط فيها أكل مش منتشر في مصر أو أكل من النوع 'الفافي'

مثال:

BREAKFAST
Yogurt-fruit parfait–8 oz nonfat plain yogurt layered with 1 cup mixed berries, 1/4 cup low-fat granola and 1 Tbsp. sliced almonds
(310 calories)

MORNING SNACK
Fruit-and-nut bar
(<200 calories)

LUNCH
Tuna-stuffed pita–Mix 1/2 can water-packed light tuna with 1/4 cup white beans, 1 tsp. each olive oil & lemon juice. Serve in a 4" whole-wheat pita with 2 leaves lettuce; serve with 1 cup grapes
(371 calories)

AFTERNOON SNACK
1 cup sugar snap peas with 1/4 cup hummus
(130 calories)

DINNER
Creamy Chicken Potpie served with 2 cups lettuce, sliced red onions and 2 Tbsp. white-wine vinaigrette
(497 calories)

الخ

احنا بناكل فول و بيض وفطير و مربي و عسل وطحينة و طعمية ومخلل وكده في الفطار مثلا
بس محدش فينا بيبص على السعرات وكده

و مش حتلاقيها غير لو على علبة أساسا
طب لو جاي الفول من التابعي مثلا
كده

[رزق]

حبدء بالمعلومات اللي اعرفها

متاكلش جلد الفرخة (أنا بعشقه)

كل 'اخضر' كتير - بروكلي خس و كده

[hany63]

كل عيش نص رغيف في الفطار بس باي حاجه
ثمرة فاكهه بين الفطار و الغدا
كل النشويات و الخضار و السلطه و بعدها بتلات ساعات كل البروتين وسلطه
وبعدها حتبقى الساعه حوالي ١٠ بليل فروت سالاط و زبادي منزوع
و ممكن كل اسبوعين تكسر النظام ده لمدة يوم كل اسبوع
عن نفسي خسيت ٢٥ كم في شهرين

[رزق]

طب تاكل إيه لما تحب تنانأ؟

[hany63]

النظام ده بتاكل فيه كل تلات ساعات يعني ما بتلحقش تجوع وده سر نجاحه انك بتخس من غير جوع و التمثيل الغذائي بيبقى مظبوط

[mohamed_selim]

كل كل حاجه بس كميات قليله و كل ٤-٥ مرات فى خلال اليوم و اخرك الساعه ٧-٨ لو هتنام على ١٢ و تكون وجبه خفيفه
متاكلش حاجات بزيت او سمنه كتير و طيعا جلد الفراخ عشان الهرمونات بتكون فيه و بيتخن
قلل السكر ل ٤-٥ معالق فى اليوم بس
الرز و العيش و البطاطس و المكرونه كميات بسيطه برضه و متاكلش كزا صنف منهم مع بعض فى الوجبه
ربنا معاك

[waelfarid]

كلنا هذا الرجل وفقك الله تخس وانت بصحة وعافية
وكنت فين ياخشب لما كنا نجارين
وكنتى فين يالحمة لما كنا جزارين

كربراتير يعني الداخل قد الخارج قد الحاجة بالضبط او اقل مع كثرة الالياف خس جزر طماطم فاكهة وحركة كتير وبلاش سهر ولا حرق دم يعني تعيش في المدينة الفاضلة

ياريت ياريت الواحد يعرف يخس
بس احنا بنتكلم في عشرات الكيلو جرامات وليس فيه خمسة كيلو زايدين مثلا هإ هأ هؤ
هو فيه فكرة الواحد يدخل غرفة ويطلقو وراه اي حاجة تخوفه هيفضل يجري لحد مايخس او يفطس قبل ما يلحق يخس واهو يبقي عمل اللي عليه
ههههههه

[EngAhmedSayed]

انا هقولك على طريقه جامده جدااااااااااااااااااااااا
بس متنساش تيبقى تدينى حق الكشف
و مفيهاش اى ضررررررررررر
سياتك تلتزم بالنصايح
اولا تمنع الاكل من الساعه 7 مساء او 8 مساء و تبداء الاكل الساعه 10 صباحا
هتقولى كل ده منا هيجى عليا وقت و هجوع جامد
هقولك تعمل ايه انتا هتشترى 2 كيلو تفاح و تحطه فى التلاجه كل ما تجوع اضرب واحده كل ما تجوع اضرب واحد
التفاح بقى بيعمل ايه بيحسس المعده بالشبع و لما تاكل تفاح تحس بالشبع و سد النفس عن الاكل
تمام هتجيب كل يوم علبتين ذبادى بلدى بقولك بلدى و اضربهم قبل ما تنام و كل بعد الذبادى تفاحه
بيعمل ايه الذبادى بيسيح الدهون و الشحوم قلى فى البطن بيطرد الغازات قلى فى البطن يعنى لو فى كرش بعد يومين او تلات ايام هتلاقى الكرش بيخس و بيقل افطر فطارك العادى بس عندك نصايحه يا تشرب مياه قبل الاكل بنص ساعه يا تشرب المياه بعد الاكل يجى ساعه او ساعه و نص سواء فى الفطار او فى الغدا و الغى وجبة العشاء و لو انتا من هواة شرب المياه فى وسط الاكل ابقى بدل المياه هيبقى عصير برتقال تفاح ليمون و ابعد عن المياه الغازيه بس
قدى القصه
ربك المستعان
قبل ما تعمل القصه دى ابقى اوزن نفسك و تابع

[Hondawy_2008]

متابع

[mohamedhamed]

بص يا سيدي
اول حاجة خلي عندك عزيمة قوية وايرادة وهدف واضح نفسك تحققه ودافع ميعن يعني عايز تخس علشان.....كذا
تمام كدة بقى عندك ايرادة وعزيمة وكل الكلام دة .....
تاني حاجة بقى روح لاي دكتور تخسيس بس يكون عندة سمعة كويسة وتابع معاها للاخر اهم حاجة للاخر ويكون عندك صبر
على فكرة كلامي دة عن تجربة شخصية وانا عملت كدة والحمد لله

[amrelsha3er]

والله انت جيت على الجرح ياباشا
مهندس احمد السيد جاب من الاخر بصراحه ده بالنسبه للاكل
الرياضه الرياضه الرياضه انشا الله حتى تمشى نص ساعه فى اليوم
حاول تروح جيم تلعب وسط وبطن وسويدى كتير لمجه شهر او ابوعين وبعدين دخل مع السويدى كمال اجسام العب شويه بنش وضهر وكتف ودارع مع السويدى ونظام الاكل وموضوع العشاااااااا ده اوعى اوعى هتبوظ كل حاجه نصيحه وانا ماشى باللى بقهولوك ده من يومين وابتديت والله احس بفرق ان المعده مرتاحه والكرش انقبض شويه والحركه احسن
صدقنى الاكل ده فعلا نقمه لما يكون بكتره وده يرجع بعض لثقافتنا وعادتنا كل حاجه عندانا مرتبطه بالاكل
احنا شعب اكييل الصراحه بس سيبك من ده كله وحطه تارجت فى دماغك وتابع وزنك كل اسبوع مثلا وانت كده كده هتحس بنفسك
ربنا معاك

[Ahmed Selim]

بص يا باشا أنا هرد رد قد يكون مش علمي.........بس على قد معلوماتي

أحنا أصلاً طريقة أكلنا غلط.....

أنا واحد من الناس مش أكيل و مع ذلك بتخن......و جت عليا فترة كبيرة مكنتش باكل غير وجبة أو أتنين فى اليوم بالكتير و برده بتخن :)......علشان عملية التمثيل الغذائي مكنتش مظبوطة.

الحل أنك تاكل فطار بسيط.....بيضة مسلوقة و حتة جبنة و ربع رغيف عيش و يفضل لو عيش سن
و تخللى دايماً معاك تفاح.....خيار....طاطم.........جزر....الخ......كل لما تجوع أضرب واحدة
الغداء تاكل الساعة 2 أو 3 و يفضل قبل كده كمان.......و برضه تبعد عن العيش و النشويات زي الرز و المكرونة........او تاكل بحساب.....يعني معلقتين تلاتة.......اللحوم من غير جلد و من غير دهون و يفضل مشوية...........أبعد عن أى حاجة مقلية.

العشاء قبل ما تنام ب 4 أو 5 ساعات........و برضه حاجات خفيفة.......زي زبادي و حتة جبنة و ربع رغيف عيش سن.

بيين الوجبات كل خضار فواكه زي ما أنت عاوز بس بلاش فواكه فيها سكر كتير زي المانجو و البلح و العنب.

الهدف من الأكل الخفيف بين الوجبات أنك تخلى عملية التمثيل الغذائي شغالة بقدر الإمكان طول اليوم علشان بتساعد على حرق الدهون........و دي الحاجة اللى مش مظبوطة عندي و بتخليني أكل قليل و أتخن.

أبعد عن البيبسي و الكولا و أي حاجة غازية..........و السكر المفروض أخرك معلقتين أو تلاتة فى اليوم تقسمهم على عدد الحاجات اللى بتشربها.

حاول تعمل أى رياضة حتى و لو مشي لمدة نص ساعة............او تمارين سويدي فى البيت.....زي الضغط و البطن....بهدف الرياضة مش التخسيس..............الرياضة هتخليك تحس بفرق أسرع و هتحافظ على الوزن اللى هتنزله طول ما أنت محافظ على الرياضة و على الأكل المعتدل.

أشرب مياه على قد ما تقدر...........على الأقل 2 و نص لتر فى اليوم

أبعد عن الأكل السريع.......زي ماكدونالدز و كنتاكي الخ.

الأكل المشوي أحسن حاجة.......بس بدون دهون طبعاً.

بالتوفيق.

[speed_magnum]

افطر فطار ملوك
واتغدي غداء أمراء
واتعشي عشاء فقراء
…
وتذكر قول النبي صلي الله عليه وسلم
نحن قوم لا نأكل حتي نجوع واذا اكلنا لا نشبع …

…
وخد حذرك من المقليات والمأكولات السريعه

[رزق]

في شبه اجماع على إن العشاء مضر قوي

ياترى لييه؟ :)

[Ahmed Selim]

في شبه اجماع على إن العشاء مضر قوي

ياترى لييه؟ :)

الأكل قبل النوم عموماً سواء غداء أو عشاء مش صح......ليه.... مش متأكد بالظبط.