إلى أي حد بيفكر يشتري حيوان أليف..

[magic girl]

بعيداً عن السياسة و أحوال البلد شوية :)

الموضوع ده عموماً لأي حد عايز يقتني أي حيوان أليف.. سواء كلب أو قطة او حتى عصافير وسمك !!

الواحد بيجيب الحيوان الأليف عشان يسليه و يأنسه طبعاً.. مفيش مشكلة..

بس أي حيوان عامةً، بيرتبط جداً بصاحبه..

يعني يوم ما حضرتك تجيب أي حيوان أليف، و ليكن مثلاً الكلب.. إعمل حسابك كده انه مسؤول منك لمدة عمره.. يعني من 10 ل 15 سنة تقريباً.. ده مش بلاي ستيشن هيتجاب عشان تلعب بيه و لما تزهق منه بعد سنتين و لا 3 تسيبه..

ده مخلوق حياته معتمدة عليك.. و الكلاب و القطط بالذات كائنات حساسة جداً و وفية لأقصى درجة.. يعني لو ارتبطت بصاحبها و سابته بعد كده ممكن نفسياً تتعب و تمرض..

و كمان خد بالك انه مسؤول منك لو تعب أو مرض في أي مرحلة من حياته.. يعني انا بربي قطط.. و الله الأم ساعة ما جت تولد صرفت حوالي 700 جنية للدكتور، و لبن صناعي مخصوص للقطط اللي اتولدت عشان الأم كانت تعبانة مش قادرة ترضع، غير الفيتامينات، غير التطعيمات بتاعتهم لما كبروا..

و فيه حاجات مش متوقعة ممكن تحصل !! لازم تعمل حسابك عليها..

و مينفعش أي حد يعمل زي بعض الناس اللي ميستهلوش لقب بني أدم اساساً و لما الحيوان الأليف بتاعهم يكبر أو يعجز و أو حتى و هو صغير و تعب و يبقى محتاج رعاية خاصة يقوموا بايعينه لأي تاجر، او أسوأ.. يقوموا مسربينه !!!

و مثلاً بالنسبة للكلاب بردو، فيه أنواع بتحتاج انها تتمسى كتير و الا بتكتأب.. لازم الواحد يبقى عامل حسابه انه هايمشيها.. يعني فيه واحد في عمارة قضادنا سايب كلب جيرمان شيبرد 24 ساعة على السطح.. برد بقى حر مطر، مش عامله حتى بيت يقعد فيه !! بجد الكلب صعبان عليا جداً !!

فياريت أي حد قبل ما يفكر هايجيب نوع إيه و تقليب و مش عارفة إيه.. يفكر في الكلمتين دول..

[alexaway]

طب الاول نتعلم ازاي نتعامل مع بعض كبني ادمين وبعدين نتعلم ازاي نعامل الحيوانات , كلام حضرتك جميل بس للاسف , قليل جدا من لديه نفس الروح الانسانية دي فى مصر .

[lanos2004]

انا كان عندى كلب بلاك جاك وعلشان بسافر كتير بعته صراحه بس لصديق يعنى لسه بشوفه

[magic girl]

طب الاول نتعلم ازاي نتعامل مع بعض كبني ادمين وبعدين نتعلم ازاي نعامل الحيوانات , كلام حضرتك جميل بس للاسف , قليل جدا من لديه نفس الروح الانسانية دي فى مصر .

طبعاً إحنا في مصر محتاجين فعلاً اننا نتعلم ازاي نتعامل مع بعض.. بس سوري يعني لو واحد جراله حاجة بيبفى عنده لسان و مخ يفكر ممكن يتصرف إزاي.. انما الحيوانات فتبقى محتاجة اللي يفهمها من غير ما تتكلم عشان كده كتبت الموضوع ده :)

و بالنسبة لقليل جداً دي، الناس لو بدأت بنفسها و انها توعي اللي حواليها صدقني ممكن يحصل فرق..

انا كان عندى كلب بلاك جاك وعلشان بسافر كتير بعته صراحه بس لصديق يعنى لسه بشوفه

كويس انك خليته مع حد ممكن تشوفه معاه، و انك بردو مسبتهوش يقعد لوحده كتير :)

[dolly13]

والله موضوع مهم فعلا ياماجيك
انا من هواة تربية القطط برده وحاليا عندى عصافير
مش قادرة اقولك قد ايه صعب اوى انى افرط فى حد فيهم حتى لو رقبتى

[blazer]

كلامك صح جدااا ودى روح ربنا هيحاسبنا عليها يوم القيامه
بس انا لو تسمحى لى اتدخل فى حاجه ممكن تكون متخصنيش
انا بستغرب لما اشوف حد يدفع 700 او 800 او حتى 100 جنيه عشان اكل حيوان ممكن يستغنى عنه في حين ان فيه ناس فى مصر بتاكل من صناديق الزباله و بتتغطى بمفيش لما بتنام على الرصيف او تحت شجره او فى نفق
الناس اولى بلفلوس دى
وانا اسف لو تدخلت مره تانيه

[magic girl]

والله موضوع مهم فعلا ياماجيك
انا من هواة تربية القطط برده وحاليا عندى عصافير
مش قادرة اقولك قد ايه صعب اوى انى افرط فى حد فيهم حتى لو رقبتى

بالظبط نفس إحساسي.. انا عندي 3 قطط حالياً و استحالة اني افكر استغنى عنهم.. حتى ناوية لما اسافر اخدهم معايا

كلامك صح جدااا ودى روح ربنا هيحاسبنا عليها يوم القيامه
بس انا لو تسمحى لى اتدخل فى حاجه ممكن تكون متخصنيش
انا بستغرب لما اشوف حد يدفع 700 او 800 او حتى 100 جنيه عشان اكل حيوان ممكن يستغنى عنه في حين ان فيه ناس فى مصر بتاكل من صناديق الزباله و بتتغطى بمفيش لما بتنام على الرصيف او تحت شجره او فى نفق
الناس اولى بلفلوس دى
وانا اسف لو تدخلت مره تانيه

لا مفيش أي تدخل ولا حاجة..

انا معاك طبعاً عشان فعلاً فيه ناس مش لاقية تاكل.. بس ممكن كلامك يبقى صح لما يبقى حد يكون بيربي حيوانات و مش بيطلع الزكاة اللي عليه مثلاً..

انما لو حد بيطلع صدقة و زكاة و بيحاول يساعد الناس على قد ما بيقدر ماظنش ان فيها مشكلة..

نفس مبدأ ان حد بيشتري مثلاً موبيل نفسه فيه ب 5000 جنية.. ماهو ممكن يشتري واحد ب 1000 مثلاً و يمشي نفسه بيه و الباقي يتبرع بيه أو كده.. بس محدش بيتكلم عن البذخ في التكنولوجيا عشان كلنا بنجيبه، بداية من الموبيلات و الشاشات ال LCD و اللاب توبات و..و.. حتلا العربيات.. مش كل حاجة بنجيبها بتبقى حيوية.. بس الواحد بيبقى حابب انه يجيب الحاجة اللي نفسه فيها.. فاهم قصدي؟ :)

و عامة ، الإنسانية مش بتتجزأ.. إستحالة تلاقي حد قلبه على الحيوانات و مش بيساعد الفقرا.. :)

[نينو]

طيب انا هقولك حاجة و سامحوني في اللفظ ده بجد انا عندي كلب بجد اوفي من اي حد انا عرفتو في حياتي اللي عاوز يتعلم معني كلمة الوفاء و الاخلاص يربي كلب وحياة ربنا انا بتعلم من الكلب ده الاخلاص يكون ازاي واللي عندو كلب و مربي اكيد عارف انا بقول ايه و قصدي ايه .

[moody_687]

انا الحمدلله مربي 5 قطط اه مطلعين عيني ف البيت بس ع قلبي زى العسل والحمدلله مش بتستخسر فيهم شىء ، وحصلي موقف ايام الكلية مع احدى القطط تعب ومرض ايام امتحاناتى وكان فضلي ع المادة يوم واحد بس نزلت ووديته المستشفى وطبعا الوقت جرى منى ف المذاكرة وكنت داخل المادة مقلق منها ربنا كرمنى وجيبت جيد جدا فيها
اللى حابب اقوله من الحكاية بتاعتي ان اى خير بتعمله لاى روح ربنا شايف و مطلع عليك وبيساعدك لو حصل حاجة وكما انقذت روح هتلاقي اللي ينقذك حتى و لو وقفت جنب اى روح سواء كانت انسان او حيوان فكلنا ارواح خلقها الله عز وجل

ملحوظة : واديني بقولها اهو اللي عايز يربي قطط يجيب اناث مش ذكور عشان مطلعين بوزي وربنا يخلهملي ويطلعوا بوزي كمان وكمان

[moody_687]

كلامك صح جدااا ودى روح ربنا هيحاسبنا عليها يوم القيامه
بس انا لو تسمحى لى اتدخل فى حاجه ممكن تكون متخصنيش
انا بستغرب لما اشوف حد يدفع 700 او 800 او حتى 100 جنيه عشان اكل حيوان ممكن يستغنى عنه في حين ان فيه ناس فى مصر بتاكل من صناديق الزباله و بتتغطى بمفيش لما بتنام على الرصيف او تحت شجره او فى نفق
الناس اولى بلفلوس دى
وانا اسف لو تدخلت مره تانيه

باشا اغلب الشعب المصري بيفكر زى حضرتك وده غلط الانسان زيه زي الحيوان الاتنين ارواح بيتألموا ويفرحوا يمكن اللي نتميز بيه هو العقل واقول لحضرتك ع حاجة حاليا ف مجتمعنا الحيوان افضل من الانسان ع الاقل مفيش غدر او خيانة ده انت ياباشا بتكون واكل مع صاحبك ف طبق واحد ويبيعك هل الكلب ممكن يعملها ؟؟ استحالللللللللة
وارجع اقول لحضرتك الناس اللي بتربي الحيوانات بتكون عطوفة ورحيمة اكثر من الانسان العادي وتاكد من يرى انسان فقير فانه يقوم بالتبرع له لانه بطبعه انسان عطوف ورحيم
واغلب تقدم الاجانب عن العرب عاما عشان الناس دي مثقفة وعندها روح وبتعرف ازاى تتعامل مع الحيوانات يكفي لمن يدوس حيوانا بيكون له عقوبة يعني معتبرين الحيوان زيه زي الانسان
من يطبق الاسلام هم الغرب وليس العرب

[nouranwar]

موضوعك جه في وقته علشان بدور علي كلب :)

[Abo Yasso]

قلبت عليا المواجع

[bobbozo4b]

كلام تمام تمام
والحمد لله انا بعمل كده فى السمك اللى عندى
لدرجة انى لما اسافر بخلى والدى هو اللى يطلع ياكله ويطمن عليه

[ALMAGICO]

موضوع جميل جدا
انا فاكر فى مرة كنت بشترى جرو فروحت لواحد كان عندة جراوى وكان موجود الاب والام وكل الجراوى وانا اخترت واحد من بين دة كلة المهم روحت تانى يوم عشان اخود الجرو فبشيلة لقيت الراجل قام واخد الجرو منى وقام قايلى جملة انا استغربت منها اوى قالى بص انت الوقت اخذت الجرو من بين باباة ومامتة واخواتة لو مش هتقدر تكون انت بالنسبة لية دول كلهم متاخدوش وعشان كدة دايما اقول لاى حد بيربى كلاب ان الدنيا بتاعة الكلب كلها هى الانسان اللى بيربية مالوش حد غيرة وصدقنى لو عايز تحكم على اى حد شوفة بيتعامل مع الحيوانات ازاى سواء بقسوة او بحنية

[ABO MALEK]

انا عايز اشترى كلب محترم للحراسة وفى نفس الوقت انا بخاف منهم (لو عايز اتجرأعليهم اعمل إيه)ياليت الإجابة تكون عن تجربة___من حد كان خواف؟