واتخبطت العربية بس مين فينا الغلطان ؟

[Karim_Monir]

السلام عليكم ورحمه الله
نازل الصبح رايح عالشغل زي كل يوم وخارجد من شارعي شارع فرعي على شارع جسر السويس الرئيسي
وعشان عارف سواقين الميكورباصات في الحتة دي بشعين بكون محرص قوي وباصص شمالي شوية
وباخد الملف وخارج ودششششش
واحد راكن عربية سريون فضي عالناصية اكتر من تلتها جوة الملف
وطبعا حكت الجنب كلها عندي
هو اكصدامه بلاستيك ومحصلهاش حاجة
وانا الجنب عندي خد البوية بتاعته كلها وكمان طبقلي طبلة الباب اللي ورا :-(
هو مكانش موجود وانا معرفتش اعمل ايه ومش عارف مين فينا الغلطان وخدت بعضي ومشيت
متضايق طبعا عشان العربية عندي كانت فابريكة كلها ومش عارف لسه الحتة دي تحتها تسليح الباب ولا لاء ومش عارف هاتترش ولا ايه
بس في اريكم مين فينا الغلطان ؟

[Terrible_DaRsH]

اللى ضيق الطريق طبعا هو الغلطان

[A_H_M_A_D]

اولا معلش يا باشا , بسيطه و ان شاء الله تتحل بسهوله و العربيه ترجع احسن من الاول

من ناحية مين اللي غلطان , فزيها زي معظم الخبطات اللي بتحصل بيبقى الخطأ مشترك و نسبي بينك و بينه

هو طبعا عليه النسبه الأكبر لأنه راكن غلط و في مكان ما ينفعش ابدا يبقى فيه ركنه , بس برضه انت اكيد سهيت شويه و كنت مركز اكتر مع شمالك ومدي الأمان للجنب التاني , لكن طبعا مع المرور بتاعنا ماينفعش تدي الأمان ابدا لأي جنب أو لأي دخله على شارع , والقاعده الذهبيه هي توقع خطأ الغير عشان ربنا يسترها معانا

حصل خير يا كريم باشا

[megosoft]

حمد لله على سلامتك - وقدر الله ما شاء فعل
طبعا أنت اللي غلطان - لأنك أنت ماشي وهو واقف.
حتى لو كان مضيق الشارع - أفرض أنه سادد الشارع خالص ! معنى كده نخبط له عربيته ونجيبها نصين عشان قافل الشارع !!!!!!!!!
لأ طبعا - بالنسبة ليا انا : دايما اقول لنفسي : يأما اعرف أمشي من غير ما اخبط حد ( مهما كان الحد ده ماشي او واقف ازاي ) لو انا مش عارف يبقى أحسن ليا أسوق في الصحرا لوحدي.

وربنا يعوض عليك وعلى صاحب العربيه التانيه.

[مزمار وحيد]

بسم الله الرحمن الرحيم

كل اجيال الأجداد والاباء من ثورة 1952 حتي ثورة 25 يناير

[megosoft]

كل اجيال الأجداد والاباء من ثورة 1952 حتي ثورة 25 يناير

مالهم ؟؟؟؟؟

[nona_yaris]

الحمد لله على سلامتك يا استاذ كريم
قدر الله وماشاء فعل
هو اكيد غلط منه انه يقف في مكان غلط
لكن ده اصبح امر واقع لأن مفيش اماكن للوقوف وكلنا بنضطر نقف في اماكن غلط
انت اللي كنت ماشي وهو واقف يبقي مع احترامي انت اللي غلطان طبعا في الخبطة
هو ممكن يكون غلطان انه وقف في المكان الغلط
لكن في الحادثة انت ماشي واكيد شايفه وهو واقف يبقي انت اللي عليك الغلط والا يبقي نمشي نخبط اي حد راكن غلط في الشارع
احمد الله واسترجع وربنا يعوضك خير انشاء الله

[alaa74]

قدر الله وما شاء فعل
والحمد لله على سلامتك يا كيمو
وفداك الف عربيه والحمد لله انها جاءت على قد كده .
طبعا الراجل اللى راكن غلط غلطان أكيد
بس إنت غلطان أكتر منه لأنك اللى ماشى
مش واقف زيه وكان المفروض انك تخلى بالك
لكن الحمد لله على كل حال وكويس
محصلش لعربيته أى حاجه لأنك أكيد كنت هتبقى متضايق
لو عربيته فيها حاجه وانت مشيت وسبته وضميرك كان هيئنبك .
وللأسف هو ده حال شوارعنا دلوقتى تسيب وإهمال
ربنا يسترها عليك وعلينا جميعا والحمد لله على سلامتك مره تانيه .

[dr.hazem]

لا حول ولا قوة الا بالله...
الحمد لله على السلامة والحمد لله انها جت على قد كده....
تقريبا نفس الموقف حصل معايا هنا بس بشكل تاني...
البلد هنا مطالع ومنازل جامده..
نازل منزل جامد ويطلع على الشارع الرئيسي وطبعا عيني عاللي جاي من الرئيسي... الحمد لله طريقي سالك وبلف وامشي لقيت في وشي بياع لب بعربيه واقف في المكان العجيب ده وانا مش مدي خوانه اصلا لان الساعه كانت 1 بالليل وطبعا فرملت جامد وبست عربية اللب...
حمدت ربنا انها جت على قد كده ومجتش في الراجل نفسه....
ومتسألش مين الغلطان لان للأسف المشكلة حصلت وخلاص على كده...
الحمد لله على كل حال...
تحياتي

Sent from my LT18i using Forum Runner

[مزمار وحيد]

كل اجيال الأجداد والاباء من ثورة 1952 حتي ثورة 25 يناير

مالهم ؟؟؟؟؟

واتخبطت العربية بس مين فينا الغلطان ؟ = تخلف حضاري + فوضي + همجيه فكريه

مالهم ؟؟؟؟؟ = عدم الوعي والبحث عن مصلحه مصر والمجتمع الذي سيعيش به الابناء والاحفاد + السلبيه في مقاومة الطغاه والظالمين + قبول إنتشار الفساد وعدم المقاومه = قانون الغابه + حياة غير كريمه للجميع

وإذا أردنا كتابه المعادله بالتفصيل سنحتاج لسنوات بدايه من الاجيال الأقدم التي تتحمل عظيم المسئوليه

ورغم كل هذا فهذه سنه الله في الخلق

هل يريد العباد تعمير الارض كما أراد الله منهم أم يريدون الافساد في الارض بقصد أو جهل أو سلبيه فالكل سواء

[megosoft]

واتخبطت العربية بس مين فينا الغلطان ؟ = تخلف حضاري + فوضي + همجيه فكريه

كلام حضرتك مفيد جدا . لكن يا ترى في توصيات للخروج من الأزمة؟

[المنسي]

كل اجيال الأجداد والاباء من ثورة 1952 حتي ثورة 25 يناير






واتخبطت العربية بس مين فينا الغلطان ؟ = تخلف حضاري + فوضي + همجيه فكريه

مالهم ؟؟؟؟؟ = عدم الوعي والبحث عن مصلحه مصر والمجتمع الذي سيعيش به الابناء والاحفاد + السلبيه في مقاومة الطغاه والظالمين + قبول إنتشار الفساد وعدم المقاومه = قانون الغابه + حياة غير كريمه للجميع

وإذا أردنا كتابه المعادله بالتفصيل سنحتاج لسنوات بدايه من الاجيال الأقدم التي تتحمل عظيم المسئوليه

ورغم كل هذا فهذه سنه الله في الخلق

هل يريد العباد تعمير الارض كما أراد الله منهم أم يريدون الافساد في الارض بقصد أو جهل أو سلبيه فالكل سواء

هل ده مجال للكلام اللى حضرتك كاتبه؟؟؟؟؟؟؟؟؟؟؟؟؟؟؟؟؟؟؟
مفيش فايدة........

[المنسي]

قدر الله وماشاء فعل يا استاذ كريم ... الواحد بيبقى سايق وعينه رايحة يمين وشمال على الطريق

[مزمار وحيد]

كلام حضرتك مفيد جدا . لكن يا ترى في توصيات للخروج من الأزمة؟

أشكر حضرتك جدا وأرى فى سؤال حضرتك رفض البكاء علي اللبن المسكوب فى ما بقي من أعمارنا وهذا والله عن حق أجمل الصفات فى المصريين وخاصه من المثقفين أو المتعلمين بشكل يسمح لهم بتفكير منطقي

ومع الاسف أن الحال الواقع الان فى المجتمع شديد الصعوبه كأزمة ومشكلة معقدة جدا لانها ترتبط بمدى فهم وإقتناع الاغلبية العظمى بضرورة التغلب على الواقع المرير ده

ومن وجهه نظري المتواضعه بمجرد المنطق أن البدايه في كل فرد اقتنع بهذة الضرورة فى إتجاهين فقط لا ثالث لهم

الاول تهذيب النفس واعادة الصفات الاخلاقيه لها فى كل تفاصيل الحياة الدقيقة

الثاني رفض أخطاء الاخرين من حولنا وعدم التكييف معها ولكن بالمعروف والكلمة الطيبه والتصرف كقدوه حسنة حتي إذا توقفت الحياة على أن يقوم الشخص منا بإفساد يكون مجبر عليه تبعاً للظروف المحيطه فعليه أن يفقد حياته دون أن يقبل أن يكون سلبى أو فاسد بالقوة ومن هنا سيكون قدوه حسنة وتنتشر الفضيله بين الناس مع الوقت ومع الاعتبار أن الشعب المصرى سريع الانجاز والتقدم فى أى شىء يريده بإقتناع

وطبعأ أولا وثانيا دول أشياء صعبه جدا جدا على كل نفس ولكن يكفى شرف المحاوله الدائمة الدائمة الدائمة بصدق وتحمل كل الاثار الجانبيه

[مزمار وحيد]

هل ده مجال للكلام اللى حضرتك كاتبه؟؟؟؟؟؟؟؟؟؟؟؟؟؟؟؟؟؟؟
مفيش فايدة........

انا أسف اذا كان الكلام بدا سياسياً ولكن من وجهه نظرى هذه جذور الموقف الذى تعرض له الاستاذ كريم كاجابه عن سؤاله وعلى الاقل علشان نعرف حل لمشاكلنا لا زم الاول نفهم أسبابها الحقيقية والاستاذ كريم بيسال فى الموضوع مين الغلطان يعنى بيحاول يدرس الموقف علشان يحاسب نفسه وده مثال الصدق والاخلاص مع النفس
اعتذر لك مرة أخرى بصدق أخى الكريم إذا كان كلامي ازعجك