طلباتكم لمراجعة التابلت المصرى اينار Innar Tablet Review

[Mahmoud Nagieb]

السلام عليكم يا شباب,
جمعة مباركة علينا وعليكم ان شاء الله

طبعا موضوع التابلت المصرى Innar عامل ضجة من فترة ولحد دلوقتى الناس مش عارفة راسها من رجليها ومش عارفين هل بجد التابلت كويس ولا مجرد فقاعة اعلامية لاغراض سياسة معينة

المهم , كونى محب للتكنولوجيا ومتابع ليها عن قرب , كان عندى امل انى اقدر اعمل ريفيو كويس للتابلت ميقلش عن اى ريفيو عالمى فى حاجة

حاولت ادعبس واوصل للمسؤلين فى شركة بنها علشان يقدروا يسمحولى بده , لحد لما ربنا وفقنى ووصلت لشخص جوا المصنع هيدينى تصريح ادخل المصنع وهعمل ريفيو للتابلت جوه وكل اللى انا عاوزه ان شاء الله

وان شاء الله الريفيو هينزل حصرى على نايل موتورز وجروب تانى على الفيس

دلوقتى ياريت كل الناس تقولى نفسها تعرف ايه عن التابلت علشان اخد بالى منه واجيب سيرته فى المراجعة

ولو فيه اى نصايح او تعليقات ياريت تقولوها ,

ان شاء الله غالبا هروح الاربعاء او الثلاثاء اللى جاى (ادعولى لانى مزنوق فى امتحانات اكلية اوى)


وياريت رجاء لو حد عنده ترايبود لتثبيت كاميرا D3100 يقوللى علشان محتاجين واحد نثبت الكاميرا عليه واحنا بنعمل المراجعة , وللاسف انا معنديش واحد

تحياتى ليكم

[marsguy]

السلام عليكم ورحمة الله وبركاته،،،

عاوز أعرف هل هو شكله متين؟ يعني البيلد بتاعه تحسه ماسك نفسه كده ولا تحسه مطبل وفيه فراغات والبلاستيك بتاعه ضعيف؟

وطبعاً في تضارب جامد في موضوع الأسعار, هل هايكون بـ 1500 ولا بكام؟ وهل فيه موديلات ولا موديل واحد بس.

شكراً

[Dr_Mido]

اعرفاي البطاريه سعتها ايها وبتتغير ولا لا و شغله بضغط وشوفه بيسخن ولا لا واعرفلنا الروم بتاعه مين هيطوره مستقبلا

Sent from my Xperia Arc S using Forum Runner

[speed_magnum]

عارف مشكلة المصريين هتفضل في سوء الادارة
يعني انت تتعب وتدور علي واسطه علشان تعمل ريفيو للتاب اللي المفروض تكون الريفيوهات بتاعته دلوقتي مغرقه الدنيا ومن جانب الشركه المصنعه ليه ومبينه كل مميزاته
..
عموما
انا عاوز اعرف الشاشه دقتها كام .. والبطاريه بتقعد اد ايه
وانت شغال عليه حاول تفتح برامج كتير وحاجات كتيرة عليه وشوف
استجابته هتبقي كويسه ولا لا وفي تهنيجه ولا لا
وشكرا مقدما

[SAMEH_FOUAD]

شوف ياباشا , طبيعى انت هتعمل علية تقرير شامل , يعنى لازم تنزل علية برامج عشان تتأكد من كفاءئتة

عموما ياريت تقوم بالاتى :

1- نزل برنامج an tu tu bench mark عشان تعرف الجهاز قارى كام واختبار كفاءة للهارد وير بتاعة الجهاز

2- شوف الرامات قارية كام ( الصافى بتاعها )

3- نزل العاب تقيلة , زى مثلا fifa 2013 ,ashphalt 7 , وشوف التليفون هيهنج معاهم ولا لأ , وهل هيسخن ولا لأ , والعب مثلا بتاع 5 دقائق وشوف البطارية كانت كام واصبحت كام

4- حاول يكون معاك تليفون شاشتة قوية s3 مثلا , وتقارن مابين الشاشتين فى الاضاءة المختلفة سواء فى الضوء او فى النهار

5- الكاميرا تشوف جودتها فى الاماكن ذات الاضاءة الضعيفة بالذات

6- حاول تشغل اكتر من تطبيق مع بعض شوف الجهاز هيهنج ولا لأ

7- ال materia بتاعة الجهاز هل بلاستيك ردىء ولا قوى

8 - حجم الجهاز تقيل ولا خفيف

9- التاتش بتاعة سلس ولا تقيل ومدى سرعة استجابتة

10- النت بتاعة سريع ولا لأ , وياريت تشوف موضوع الداونلود , تحاول تنزل اى حاجة من الماركت وتشوف سرعة الداونلود بتاعتة

وشكرا ليك ياباشا

[muslim_nsb]

ربنا يوفقك ان شاء الله
- هلي يوجد به برنامج gps الخاص بالخرائط ولا لأ
- حجم الذاكره الداخليه ram
- أقصى حجم للميمورى كارت اللي يركب عليه كام
وشكرا

[besso]

تصدق من كتر الاسئله اللى الواحد عايز يعرفها مش عارف يكتب ايه
بس ماتسبش تفصيله ولو صغير الا وتعرفها .....بالبلدى خليك رخم ههههههههههه
واستئذنك فى حاجه بقى لما تكتب الريفيو تحط معاه اجهزه تانيه منافسه ليه علشان نعرف نقارن

[amohsen]

أنا عايز أوضح نقطة مهمة، الجهاز لما تيجي تعملوا مقارنة تعملوا مقارنة تكون مع تابلت قريب في السعر، مينفعش نعملوا مقارنة مع iPad بـ 4000 جنية طبعا هتبقى مقارنة غير منطقية كأني بقارن فيرنا مع سيفيك!
تاني حاجة موضوع السخونية، أي تابلت أو سمارت فون في الدنيا بيسخن لما تعمل داتا كتير، بس برضة تقارنه مع حاجة قريبة منه

[beshomilan]

للتوضيح فقط:

التابلت اللى نازل لطلبة المدارس ليس به بلوتوث لانه مخصص للدراسه فقط
اما اللى هيكون فى الاسواق متوافر به بلوتوث

كمان هو مبيشلش شريحة دايركت ولكت يتركب فيه usb مودم لتشغيل 3g

السعر 1555 بضمان عام
وهيتباع فى منافذ بيع الانتج الحربى

ودى مواصفات التابلت اينار


وده كمان الريفيو بتاعه :)

http://www.youtube.com/watch?v=nQx-ZrBWuGE

[p r i n c e]

هوا نزل السوق فعلا ولا لسة؟

[S O P H O S]

فعلا سعر معقول المهم الجودة فالمرحلة دي

[beshomilan]

هينزل السوق منتصف هذا الشهر

[alaa_dash]

تسمحولي انقل من رصد :

.

رصد الـ #تقنية | #مصر #اينار | ما تريد معرفته عن اينار INAR ... الحلقة الأولي!

- الهدف:
عندما بدأ التفكير في مشروع إنتاج إينار كان الهدف الرئيسي المرجو منه بالأساس هو الهدف التعليمي و عليه فقد تم تحديد المواصفات لتخدم الطالب أكثر ما يمكن، و لذلك لن تجد إينار -الحالي- يدعم شريحة SIM Card و لا كاميرا ذات جودة عالية، و لكن يدعم USB Flash يمك توصيل مودم USB عليها للحصول علي دعم 3G، كان الإهتمام بالبروسيسور و الشاشة لضمان أداء عالي و جودة صورة لسهولة القراءة منه.

- ما القطع المستوردة منه من الخارج؟
البروسيسور و الشاشة و الرامات ... و التغليف الخارجي لإينار أو الـCasing لكن جاري تركيب ماكينة جديدة خاصة بتصنيع تغليف إينار في مصر.

- البيع:
سيتم البيع بشكل رسمي من منافذ بيع الإنتاج الحربي المنتشرة في جميع أنحاء الجمهورية يوم الأربعاء ١٥ مايو بسعر ١٥٥٥ جنيه، كما جاري التعاقد مع شركات توزيع تريد المشاركة في التوزيع الرسمي و لكن لم تنتهي الوزارة من حصرهم و الموافقة عليهم بعد.

أما عن ما يتردد عن إطلاقه مع شركات الإتصالات المختلفة فجاري ذلك لكن لن يتم في القريب العاجل أو لن يتم مع يوم الأربعاء المقبل حيث الإطلاق. كما أن نسخة إينار التي ستباع وقتها لا تختلف عن التي تسلمها الطلاب، حيث ستفتقد Bluetooth و SIM Card و نحن ننشر هذا لتأكيد الحقائق عن نسخة الإطلاق و التي تداول الكثيرين شائعات عن إختلافها عن النسخة التي وزعت علي الطلبة.

- خدمات ما بعد البيع:
أهم ما يمكن أن تحصل عليه مع إينار هو عام كامل من الدعم في خدمات ما بعد البيع، حيث ستحصل علي قدرة الحصول علي جهاز جديد كامل في الحال مع وجود عيب تصنيع في جهازك. كما يمثل التصنيع في مصر ضمان كبير لإستمرار تصنيع قطع الغيار و سهولة توافرها داخل مصر مما يعطي إينار ميزة كبيرة عن غيره من التابليتات.

كما يتم تجهيز عدة إكسسوارات لإينار و هي مصنعة بالكامل في مصر إيضًا كما ترون في صورة الخبر و هذه صورة حصرية لغطاء أو كوڤر من الجلد مخصص لإينار! كما هناك عدد من الإكسسوارات الاخري التي سيتم إطلاقها قريبًا.

- مستقبل إينار:
مصادرنا في مصنع إينار تؤكد أنهم علي عزم عمل من إينار ماركة ثابتة تأتي تحتها عدة موديلات، لم يتم تحديد الموديلات تفصيلًا و لكن هناك امل بظهور موديلات أخري: تحمل كاميرات ذات جودة أفضل ... تدعم الشبكات 3G و 2G ... تدعم Bluetooth ... تحمل بروسيسور اسرع ... تحمل أجهزة تحديد موقع أدق للإستخدامات عسكرية ... و غيرها.

تم التأكيد علي كم هائل من الطلبات علي إينار عربيًا حيث هناك عدة عروض طلبات أقلها ٥٫٠٠٠ قطعة و أكبرها ٢٥٠٫٠٠٠ قطعة! و هو ما سيتم تسليمه علي مدي زمني بعيد حتي تطوير المصنع بصورة كبري لقابلية إنتاج أكبر لسد الطلب.

إنتظرونا غدًا و حلقة خاصة حصرية عن ربط سعر إينار بالأداء المنتظر منه!
كما نرجو أن تكونوا معنا في زيارة خاصة لرصد التقنية الأسبوع المقبل لمصنع بنها للإليكترونيات الخاضع لإدارة وزارة الإنتاج الحربي! ... كونوا معنا

[alaa_dash]

رصد الـ #تقنية | #مصر #اينار | ما تريد معرفته عن اينار INAR ... تقيّم الأداء ... الحلقة الثانية

مقومات الأداء في الأجهزة الإلكترونية يعتمد علي عدة عوامل أهمها البروسيسور و معالج الجرافيكس، يحمل إينار بروسيسور RockChip RK 3066 و هو عبارة عن معالج ثنائي النواه كل واحدة عبارة عن بروسيسور Cortex-A9 ١٫٦ جيجاهرتز و معالج جرافيكس Mali 400 MP، أي ما يعادل تقريبًا كفاءة بروسيسور جالاكسي إس ٣ -نسخة ثنائية النواه- و لكن بستخدام تكنولوجيا أخري.

كيف يتم تقيّم أداء الأجهزة الإليكترونية؟
يتم ذلك عبر برامج متخصصة تدعي Benchmark Testing Apps أو تطبيقات تحديد المستوي، و هي تختلف فيما بينها بأسلوب التقيّم. حيث يقوم البعض بإستخدام:
١. عدد من الإختبارات لإختبار البروسيسور و الرامات و اللوحة الأم و تقيّم لجرافيك ثنائي و ثلاثي الأبعاد ثم تجمع سويًا لتخرج تقيّم كلي كما بالصورة و التقيّم الأيمن.
٢. يقوموا بعمل إجهاد عالي علي الجهاز لتعجيزه ككل و تقيّم أداء الجهاز خلال هذا الإجهاد يحدد البرنامج أقل و أعلي أداء و عليه يتم حساب التقيّم المتوسط كما بالصورة و التقيّم الأيسر.

في التقيّم الأيمن:
تم الإستعانة به لإظهار كفاءة كل جزء من أجزاء الجهاز علي حدي، لأنه كان واجب مقارنة صناعة لوحة الأم التي تتم في مصانع الإنتاج الحربي بمثيلاتها من الأجهزة الأخري. حيث سجل إينار تقيّم أداء متميز في تصنيف اللوحة الأم و التي يظهر تقيم أدائها بوضوح قارن حجم اللون الأخضر و هو تقيّم اللوحة الأم بالأجهزة الأخري، و قدرتها الأفضل حتي أحسن من لوح أخري لسامسونج و HTC!

كما حصل اينار علي ٤١٢٠ تقريبًا في مقابل ٢٧٠٠ تقريبًا لجالاكسي تاب ١٠٫١ و هو اقرب منافسي اينار من حيث الفئة و الكفاءة، أما HTC One X فقد تخطاهم حتي ٤٧٠٠ تقريبًا.

في التقيّم الأيسر:
تم إستخدامه للحصول علي أرقام دقيقة لأقصي إجهاد لإينار و مقارنته بالأجهزة الأخري و نتائجها و كما ترون فقد حصل علي ١٤٥٥ نقطة و هي متوسط بين ٢٠٤٢ و ١١٥٤ نقطة من الأدني للأقصي.

حصل هنا جالاكسي نوت ١٠٫١ -و ليس تاب- و هو نسخة رباعية النواة من "تاب" علي ١٦٨٤نقطة، و حصل HTC One X علي ١٤٣٢ نقطة أي أقل من إينار بعكس النتيجة في التقيّم السابق، كما حصل جالاكسي اس ٣ -ثنائي النواه- علي ١٤٠٤ نقطة مما يضع إينار في محل أداء راقي جدًا علي ثمنه.

جدير بالذكر أن أجهزة iOS آبل تعتبر ذات أداء منخفض جدًا بالمقارنة بالجميع و لكن هذا كان حال iOS دائما فنظام التشغيل محكم و متميز الإستهلاك في الأداء بالمقارنة بأندرويد مما يمنحها نوعية خاصة، فمستخدمي iOS يعلمون جيدًا سرعة إستجابة أجهزتهم بالمقارنة بأجهزة أندرويد.

مما سبق ننهي تقريرنا بأن إينار يضع نفسه في محل أداء أجهزة مثل جالاكسي تاب أو نوت ١٠٫١ و HTC One X و هي أجهزة مرموقة جدًا و نحن في إنتظار تحديثات إينار القادمة لمناقشة تطورها بإذن الله ...

و ده تعقيب منهم :

Quadrent Bench استخدم -كما علقنا في التقرير- لحساب كفاءة اللوحة الأم لإينار و مقارنتها مع مثيلاتها ... لإنها مصنعة في مصر.

سامسونج تطلق أجهزتها بصورة إقليمية بمعني أن هناك ٥ نسخ جالاكسي اس ٣ التي تباع في مصر رباعية النواة و رامات ١ جيجا، نسخة أمريكا رباعية النواة و رامات ٢ جيجا، كما ان هناك اسواق تباع نسخ ثنائية ... في الشرح تم بوضوح ذكر "ثنائي النواة" للدلالة عن النسخة المقارن بها ... راجع GeekBench عن عدد النسخ المستخدمة من جالاكسي اس ٣ و غيرهم
Android Benchmarks - Geekbench Browser
كل ما فعلناه هو الحصول علي النتيجة الخاصة بإينار و مقارنتها بأقرب الأجهزة المعروفة ...

اما بالنسبة للإعتراض لمقارنة بـOne X هل اعتبرتوا جالاكسي اس ٣ تابلت يعني؟!
آيفون ٥ يحوي بروسيسور ضعف أداء آيباد ميني و لازال يقارن معه ...

دمتم

ترقبوا حلقة خاصة عن اينار يوم الاربعاء القادم الساعة 8 مساءا في برنامج "تكنونايل" على قناه النيل للاخبار.

[samyyousef]

ان شاء الله يكون كويس
و اذا كان كويس فعلا اعتقد انه لن يحصل عليه من السوق بسهولة بل سيكون هناك سوق سوداء و وسايط و خلافة و سيزيد ثمنه عن السعر الرسمي
تحياتي و في انتظار التقرير