للخبراء : هل كيلو عسل السدر الجبلي يستاهل ١٠٠٠ جنية مصري !!

[Y a r i s]

هل كيلو عسل السدر الجبلي يستاهل ١٠٠٠ جنية مصري !!



مساء الخير ياشباب ... حبيت اكول عسل فرحت لمحل عسل لقيت عندوا كيلو العسل ب ٣٩ جنية
سواء اكان عسل برسيم او عسل موالح !

قلتلوا طيب انا عاوز عسل اغلى شوية على اساس مثلاً يقلي الكيلو ب ١٠٠ ولا ١٥٠ لقيتوا بيقولي في عسل سدر جبلي النص كيلوا منوا ب ٥٠٠ جنية يعني الكيلو ب ١٠٠٠ جنية !!!

فبصراحة بسئل نفسي ياترى معقولة واحد يدفع ١٠٠٠ جنية علشان يعملوا سندويتشين عسل بالقشطة !



ياترى ايه الي يخلي العسل ده بالسعر ده !!!
وهل ياترى العسل ابو ٣٩ جنية بتاع البرسيم الي احنا بناكلو ... ده عسل ولا ميه صفرة مسكر. ... ولا سوكر جولكوز ولا حكايتوا ايه !!
وليه العسل ده غالي كده !!! انا بصراحة حب الفضول بياكولني وعاوز ادوق معلقه علشان اعرف ده بيعمل ايه علشان يبقى بالف جنية ... يعني ياترى لو كلت منوا معلقه هطلع اجري على المحور ولا هاخود غوطسين لغايت قبرص وارجع :) !!

@@@@@@@@@@

وتحياتي

[canner]

اللى انا شفته كان فيه عسل جى من السعودية كان الكيلو بحوالى الف و نص بس ما رديتش ادوقه علشان انا مش بحبه بصراحه بس فيه ناس ممكن تدفع فيه كده و اكتر علشان ليه فوايد كتير و خصوصا للمتجوزين

[pro_samir]

يا راجل كنت دوق .. حتي لو مش هتشتري اهو تكتبها في السي في

علي فكرة العسل عندنا ب25 جنية

[marsguy]

الفكره مش في طعمه
الفكره في فوائده
لكن السؤال هل فعلا يساوي ألف جنيه؟ والسؤال التاني لو أنا رضيت أشتريه بألف جنيه إيه اللي يضمني إنه هايكون مش مضروب
أنا شخصيا أغلى عسل جبته كان عسل جبلي من سانت كاترين وكان ب 200 جنيه الكيلو، بس بصراحه خلاني ما يجيليش برد إطلاقا طول موسم الشتاء. كنت كل أما أحس إني خلاص هاعيى كنت أكل معلقه واحده وتاني يوم كنت باكون تمام

[subhimust]

شوف هو في السعودية الكيلو ممكن يوصل ل 20000 ريال يعني 40000 جنيو او اقل قليلا
مساء الفل

[hossam_elwani]

غالى جدا لان حسب معلوماتى النحل بيكون خلاياه فى وسط الجبال وبياخد رحيقه من زهور الجبل الى اغلباها فيها خصائص وفوائد متميزه لعالج الامراض وده مذكور فى القران بالنص

قوله تعالى : ( وأوحى ربك إلى النحل أن اتخذي من الجبال بيوتا ومن الشجر ومما يعرشون)

والى اعرفه ان اغلى عسل جبلى فى العالم هو العسل الجبلى بتاع اليمن

[bmya]

عاوزه اصلي هاته من بره مصر لكن هنا في مصرنا الحبيبه ماتضمنش ابدا

[S O P H O S]

يعني البيكانتو تستاهل 100 الف جنيه
علشان عســل يستاهل 1000 جنيه
رأي لا طبعا
ولكن بمبدأ المنطق مدام الفلوس علي طعام ومنفعة يبقي شئ ايجابي فالنهاية
مجرد رأي ..

[blazer]

والله الى معاه فلوس يتوكل على الله ويجربه ويقلنا ههههههههههههههه

انا واحد قريبى جاب لنا عسل من روسيا بسبب مرض والدتى رحمة الله عليها
! كان طعمه غرييييييب ومتقدرش تاكل منه اكتر من معلقه وكان سعره حاجه خزعبليه كدا برده بس معرفش اسمع ايه وكان لونه اسووود

[reda elgohary]

سعره دا معقول جدا وفيه كمان غذاء ملكات النحل أنا اخويا جاب لى منه من السودان ،،فعلا يستاهل سعره .

[ahmed_h_g]

على كده اللى ب30 جنيه صينى ؟؟؟

[sayed911]

معلومة غريبة طيب يمكن تعرف حضرتك العسل ليه غالي :) العسل الأصلي مهما عفا عليه الزمن من غير مواد حافظة ومن غير اي حاجة تماما العسل مبيبوظش ولا تلاجة ولا غيره ان شاء الله تسيبه 100 سنة :) بيفضل صالح للأكل :) سبحان الله تعالى :)

[canner]

يا راجل كنت دوق .. حتي لو مش هتشتري اهو تكتبها في السي في

علي فكرة العسل عندنا ب25 جنية

هههههههههههههههههه ما جاش الموضوع ده على بالى بصراحة كنت كتبتها جنب البرفان اللى 600 جنيه اللى شميته و ما اشتريتهوش فى السى فى

[lanos2004]

هوه سعر عادي جدا
بس المشكله مش في السعر
تلاقيه سكر عنب ومحطوط عليه معطر علي لون وتدفع ١٠٠٠ جنيه في الغش--لازم تخليه يجيب النحل ويحلف ان دة العسل بتاعه---لو جاب النحل وحلف في الحاله دي ادفع ١٠٠٠ جنيه وانته مطمن--
والي ٢٥جنيه ده بقه طريق صناعته سهله خالص
انته بتدوب ميه بسكر وتحطها جنب خليه النحل والنحل يشرب لما بطنه تتنفخ ويعملك عسل زي الفل من غير ما يتعب ويلف علي رحيق الازهار

[m_elkhishin]

اي سلعة اللي بيغليها :
1- صعوبة الحصول عليها
2- ندرتها و قلة الكمية اللي تقدر توفرها
3- الطلب عليها في السوق
4- سمعتها في السوق

وبالتالي العسل الجبلي:

1- صعب الحصول عليه لان مزارعه بتكون في مناطق وعرة.
2- بيعتمد على الازهار البرية وليس مزارع او حدائق وبالتالي كمية العسل اللي بتنتجها النحلة قليلة.
3- سمعة العسل الجبلي انه له فوائد صحية زود الطلب عليه.