سمعة البلد بتضرب بسبب شوية ناس ربنا يرحمنا منهم

[SAMEH_FOUAD]

السلام عليكم ورحمة الله وبركاتة

مش عارف ابدأ منين بس بجد انا متضايق جدااااااا لسببين هقولهم فى الاخر

القصة عشان مطولش عليكم

* امبارح كنت ماشى فى شارع الهرم واذ الاقى معركة كلامية بين سائق تاكسى وشخص وزوجتة من خارج البلد , وهما مسلمين على فكرة لان زوجتة محجبة , وتقريبا كدة هما من سوريا

وكانت المعركة تدور ان سائق التاكسى مع انة تاكسى ابيض بالعداد , عايز ياخد منهم فلوس زيادة عن القيمة اللى ظاهرة فى العداد , وهما مش راضيين وعايزين يدفعوا بس اللى مكتوب قدامهم
وسائق التاكسى مش عايز ينزل الراجل الا لما يدفع الزيادة , وطبعا سائق التاكسى عمال يزعق ويشتم , وعايز فلوس زيادة , والراجل الاجنبى راح متخانق معاة وضربة بوكس كدة وكل دة فى العربية لان سائق التاكسى مسكة من التيشرت بتاعة والناس واقفة وعمال تخلص دة من دة والسائق مش عايز يسيبة المهم الناس خلصت الراجل من سائق التاكسى , والغريبة ان سائق التاكسى ولا نزل ولا اتحرك من مكانة لانة عارف ان على حق

اللى حرق دمى بقى :

1- الناس دية بجد بتسوء سمعة مصر فى الخارج " الا من رحم ربى " لان فعلا بيعاملوا الاجنبى على انة مكنة فلوس خد منها على قد ماتقدر

2- ان الست زوجة الاجنبى دة , راحت سبة الدين لمصر كلها واليوم اللى جت فية مصر وفكرت اصلا انها تنزل مصر , وانا مقدرتش ارد عليها لانها الصراحة كانت منهارة من الخضة لانها كانت خايفة على زوجها وبتعيط , فى نفس الوقت طبعا استغفرت ربنا , وقولت عندها حق انها تقول انا اية اللى نزلنى مصر , اذا كان الشعب نفسة معظمة قرفان من العيشة فى مصر , تخيل بقى الاجانب يعملوا اية ؟؟؟؟؟؟؟؟

وموقف اخر حصل يدل على مدى ماوصلة تفكير الشباب المصرى او اغلبية الشباب المصرى
كنت فى المترو من فترة تقريبا شهر
واذا رجل اجنبى ( اوروبى) ومعة صديقتة وركبوا المترو وكان زحمة جداااا
مش عايز اقولك مع ان لبس البنت ماكنش مثير نهائى كانت لابسة عادى جدااااا
الا ان شباب مصر المحترمين ماكنوش عايزين البنت دية تعدى من تحت ايدهم
وعايزين يقفوا بالقرب منها وخلاص
وصديقها والله كان خايف عليها جداا لانة حس بالغدر وانا نفسى حسيت من الندالة اللى ممكن تحصل لانهم كان هناك مجموعة من الشباب كدة عمالين يقربوا منها جدااااا ( مايعرفوش بعض ) ويحتكوا بيها
وانا الحمد لله قدرت اتصدى لهذة النقطة انى جيبتهم مكانى عشان يبعدوا عنهم
لكن طبعا ماغلبوش وراحوا من الناحية التانية , وتخيل بقى لما ست كبيرة مصرية تقوم للبنت دية عشان تقعد مكانها , لانها فعلا حست بالغدر اللى عايزين يعملوا الشباب دول وكلامهم
وبعد مالاجانب دول نزلوا , تخيل بقى اسمع جملة الصراحة خلتنى بقول اية التفكير المتخلف دة
واحد بيقول بالنص كدة
" احنا مش رجالة عشان نخلى كدة البنت دية تنزل سليمة من غير مانعملها حاجة "
والغريبة لقيت اجماع لا بأس بة على الفكرة وتعالت الضحكات
وانا اكتفيت بالنظر للى قال كدة بأسلوب تحقير لانى مش مستعد ادخل فى جدال مع العقليات المتخلفة دية

وربنا يسترها على البلد والله ومن افكار الشباب الفظيعة اللى بتوصل البلد لانهيار كامل من جميع النواحى

[besso]

عقليات متخلفه بعيد عندك

[dede_dodo88]

واحد بيقول بالنص كدة
" احنا مش رجالة عشان نخلى كدة البنت دية تنزل سليمة من غير مانعملها حاجة "

يا نهار أسود!!
خلاص البلد دي مبقاش فيها أمل و الفئة دي منتشرة و عمالة تنمو وللأسف مفيش رادع ليها..

[ayman_kamal]

الحقيقة المرة احنا شعب عايز الحرق شعب لا بيعرف ربنا ولا بيطقيه شعب اخلاقياته بئيت في منتهى السوء

[horas3000]

welcome to Egypt

كمان هي سمعة البلد لسه بتتضرب
مخلاص

[SAMEH_FOUAD]

اصلا من اللى بشوفة كل يوم بعرف مدى الانحطاط الاخلاقى اللى فئة كبيرة اوى وصلتلة

والمفروض انهم محترمين وراكبين سيارات بسعر محترم

ابسطها امبارح واحد ماشى عكس فى شارع عادى يعنى مش حيوى وهادى جدااااااا , وفى المقابل سيارة لانسر ماشى وعندى من المساحة الكافية الناحية التانية انة يوسعلة , لأ الباشا تفكيرة ازاى يمشى عكسى دانا اموتة عشان مايعملش كدة تانى , وفعلا الراجل بتاع اللانسر فضل ماشى مكانة والتانية كان جاى بعشم ان دة هيوسعلة
والشاب اللى ماشى عكسى كان واقسم بالله عربيتة هتدمر لانة كان هيدخل فى سور خرسانى وممكن يتقلب , ولولا ستر ربنا ان كانت المسافة يدوبك على قد العربية , وبتاع اللانسر عمل فية كدة وجرى

والتانى راح مدى الخمساية , وطار وراة , والتانى من سوء حظة ان الطريق وقف , وطبعا دة جابة ووقف قدامة بعرض الطريق وخناق وزعيق

" الاسلوب الرسمى لحل اى مشكلة اصبح الخناق والشتيمة ثم الضرب والتكسير الى انت ينتهى بالموت "

شعب جميل جدااااااااااااا الصراحة , انا مش عارف فية اية واية اللى حصل للشعب دة , كلة بيستغل كلة وكلة عايز ينصب على كلة , وكلة عايز ياخد حقة بدراعة

ربنا يسترها علينا والله وفى الايام القادمة

[reda elgohary]

ياباشا طول ما فيه أفلام زي عبده مؤتة ،،وأغانى زي بت هاتى بوسه يا بت،،يبق الشباب لازم يتحرف أنا نفسى بفكر أدخن أو أشرب حشيش ،،ههههههههه

[ahmedsrs]

مع الاسف الشباب الضال بيعتبر ان التعدى على خلق الله وخصوصا البنات نوع من انواع الفحولة المفرطة خصوصا ان اغلب المجتمع بيشجع الاشكال الضالة دى على افعالهم

[reda elgohary]

لست معك ف التعميم

الحقيقة المرة احنا شعب عايز الحرق شعب لا بيعرف ربنا ولا بيطقيه شعب اخلاقياته بئيت في منتهى السوء

سيدي هناك عادات جليلة لازالت موجودة ف مصر وخصوصا ف الآرياف ،،وهناك مواقف تحدث تجعلك تشعر بما قال الرسول الخير في وفى أمتى الى يوم القيامة .

[محمد أنور]

كل ده بسبب غياب القانون و الشرطة ..
لو فيه قانون ممكن يردع اي متحرش او اي عامل زي سواق التاكسي او حتى المواطن اللي بيمشي عكسي و اللي بيتخانق و بيزعق .. كان هيفكر الف مرة قبل ما يعمل اي غلط .. لكن احنا شعب زال مننا الخوف و مبقاش يهمنا حد .. و فيه مثل بيقولك ان لم تستحي فافعل ما شئت

[Kefo_Honda]

البلد ديه عايزة تتنسف و تتبني من أول وجديد !!

[miceg]

الاخلاق انعدمت
مبقاش فيه اخلاق
والجيل الجديد طالع منيل ومقبل على أزمات بطالة
فهو فعقل باله عايش حياته ومقضيها إستهتار
ربنا لا تؤاخذنا بما فعل السفهاء منا
امين يارب العالمين

[ابو لؤى]

فى مره راكب ميكروباص والاجره ايامها كانت 75قرش ووحده اجنبيه بتتكلم عربى مكسر كده ركبت المهم دفعت 10 ج بقول للولد الكمسرى اللى على الباب ده ابعت يابنى الباقى بتاع العشره يقولى لا للاجانب سعر تانى اتنرفزت منه جداا استغلال اوى المهم كنت هنزل فضلت واقف لحد ماتخنقت معاه هو والسواق واخدت باقى العشره وطبعا الناس كلها سخنت على الواد واطمنت ونزلت ان الباقى رجعلها

[mgheam]

مفيش سمعه كويسة للمصريين في الخارج اصلاً
الاشكال دي خلت سمعه المصريين من زمان في الخارج انهم (شحاتين ونصابين ومعدومين الضمير)
والناس فاكره ان كل المصريين كده ميعرفوش ان دي فئة قذذره من المجتمع للاسف لاينفع معاهم دين ولااخلاق ولاديمقراطية
دول عايزيين ديكتاتور يعاملهم بالعنف غير كده بلدنا كل يوم بتتخرب وبتتحول لجنينه حيوانات كبيره

[Elawany13]

لا حول ولا قوة إلا بالله
عليه العوض ومنه العوض