الناس بتبيع وتشترى فينا كده ليه

[aldesha989]

السلام عليكم ورحمة الله وبركاتة

انا فعلآ اتخنقت من كل حاجه

ينعل ابو الجواز اللى مخلى البنى ادم عرضه ان حد يبيع ويشترى فيه

هو بقى صعب ان الواحد يستر نفسه ويتجوز ؟ ولا هو حرام ولا ايه يعنى

انا بتكلم بحرقه لانى جيبت اخرى

تروح تتقدم لواحده وتقول بحبها يقولك اصل شهادتك مش عجبانى
يعنى الشهاده مش هتدخلنى الجنه مافيش الا شهاده واحده اللى هتدخلنى الجنه
اشهد ان لا اله الا الله وان سيدنا محمد رسول الله غيرها مافيش

اروح اتقدم لواحده تانيه (صالونات)
يقولك اصل شقتك صغيره واحنا عايزين اربعه وصاله

ياعم مالها تلاته وصاله معلش اصل المستوى بتاع بنتى مش اقل من حد
طب ياعم خليها قاعده معاك

تحب واحده تانيه تقلبك مع اول عريس جاهز
طيب يا ستى مبروك

تتقدم لواحده تانيه (صالونات)
انا عايزه الشبكه فى الخطوبه ليه يا ستى
كده انا مش اقل من حد يا ستى هجيبهالك فى الدخله علشان ماعيش حاليآ الشقه اولى
لا انا مش اقل من حد برستيجى لا يسمح اه والله برستيجى ومدام معكش نأجلها لحد ما يبقى معاك
طب ياستى ربنا يوفقك ونأجلها خالص

تروح تتقدم لواحده تانيه (صالونات)
انا عندى الانتريه والشقه صغيره والشغل عندى مش ثابت والشهاده معهد
طيب مافيش مشكلة بس عندك انتريه ازاى
زى الناس
يعنى ايه
يعنى جيبته وشيلته وماحدش قعد عليه
طب اشوفه
تشوفيه ليه واحنا لسه ما قريناش فاتحه

انا اتخنقت فعلآ
وانا عارف انهم لو راحو شافوه مش هيعجبهم لانه مش مودرن وهما اكيد مش اقل من حد من بنت فلان ولا بنت علان والشقه كمان مش هتعجبهم علشان صغيره

السؤال هنا عمرك شوفت بيع وشراء بالشكل ده

ثم ايه الفكره فى ان الجواز بقى زفت هو حد لاقى جواز ولا عارف يتجوز ولا هى العمليه بقت بيع وشراء ؟

بجد فكره الجواز بقت حاجه زى الزفت انا كارهه الفكره من اللى بشوفه وكل ما استعين بالله وادخل موضوع الاقيه منحس وعلى كده
ركبت بقى فى دماغى انى مش هورى حد شقه ولا انتريه ولا حتى هوريهم وشى
يبقى يشوفو الانتريه فى الجنه
قولت للحاج انهى الموضوع مش هورى حد حاجه

انا فعلآ جيبت اخرى كل ما اقول النحس اتفك وهتنيل على عين اهلى واتجوز واعيش زى بقيت الناس ويبقى فى جو اسرى بدل ما انا قاعد لوحدى على طول

الاقى اللى يبيع ويشترى فيا وكأنى سلعه يبيعو ويشترو فيها

سامحونى انا قولت افضفض معاكو لانى بجد حاسس بأهانه فى كرامتى من كل واحد باع واشترى فيا فى موضوع زى ده وكأنى رايح اخطف بنتهم ولا الحسها التراب مثلآ

[AHMED12345678]

زعلان كدة ليه
يا باشا انت الكسبان
ادينا اتجوزنا ....... خدنا اية غير القرف والغم ووجع الدماغ
خليك فى نادى العقلاء
النادى بتاعنا اتملى ومعدش مستحمل ............ نادى المغفلين

[Gelgel2004]

متتجوزسش مصريه
تريح بالك و تعيش سعيد امد الدهر

[aldesha989]

زعلان كدة ليه
يا باشا انت الكسبان
ادينا اتجوزنا ....... خدنا اية غير القرف والغم ووجع الدماغ
خليك فى نادى العقلاء
النادى بتاعنا اتملى ومعدش مستحمل ............ نادى المغفلين

انا زعلان على بيع وشراء البنى ادمين وكأننا عبيد او الخدام اللى هيتجوز بنتهم ويدعكلها الفانوس يحققلها كل حاجه

متتجوزسش مصريه
تريح بالك و تعيش سعيد امد الدهر

احنا لاقين غير وش امهم العكر

[Dr_Mido]

ببساطه نصيبك.مجالكش

[Hunting_Eagle]

ببساطة خليك متاكد ان ربنا مش بيوفقك في الجوازات دي علشان مخبيلك حاجة حلوة

هي فعلا العملية بقت كام بكام بس المفروض البنات و اهاليهم يعقلو شويه لان العنوسه داخلة بقلب جامد الايام دي

[buddha]

بصراحة الشرق تخطوا حاجز الدين فى مواضيع الزواج
بطريقة خيالية بالرغم من كثرة العنوسة وارتفاع اعمار الزواج وانخفاض مستوى المعيشة


الغرب فى مواضيع الزواج قمة التساهل جدا جدا جدا ..... يعنى عايز تتجوز مفيش اى نوع من انواع التعقيد
التعقيد فقط انها لازم تعرفك كويس جدا جدا حتى ممكن تقعد معاك سنين عشان تعرف تقرر هل الشخص دة ممكن تعيش معاة طول عمرها

ومفيش حاجة اسمها خيانة نهائى او كزب

وبالنسبة لظاهرة بشعة كنت بشوفها وانا فى مصر ان ممكن واحدة متجوزة ماشية مع زوجها وبتبص على الشباب فى الشارع(قمة الخيانة )

[eleanor]

اهداء وماتعصبش نفسك لسا نصيبك ماجاش واحمد ربنا بدل ماتلاقى ناس كويسين معاك من الاول وبعدين يلعبو الدنيئه

[a_arazik]

لسة النصيب مجاحش ......قول الحمد لله وكبر مخك ياما هتعيش وتشوف

[احمد المصرى]

انا شايف ان الناس كلها ال انت دخلت بتهم محدش عمل اى حاجه غلط اساسا كل الموضوع ان نصيبك لسه لم ياتى وبس كدا وكل واحد حر انه يطلب ال هو عايزه وانت حر تقبل او ترفض دا شى طبيعى جدا

وهما بيتكلموا عن انتريه مثلا طبيعى جدا ان اى بنت مش هتقبل بانتريه غير لما تشوفه وممكن تقولها لو مش عاجبك نغيره تشبلها حريه الاختيار وان شاء الله مش هتغيره


الشقه صغيره دا مش عيب اطلاقا بس كل واحد وكل بنت حره فى القرار تقبل بالشقه او تقبل بحجره وصاله او مش هتتنازل عن القصر

صلى كتير وان شاء الله ربنا يرزقك ببنت الحلال

[amr011111]

لسه نصيبك مجاش. ومحدش بيتجوز مرات غيره
الحاجه التانيه لو انت شايف واحده ميه ميه والسعاده هتبقى معاها لا تقلق نسبه كبيره من الستات الا من رحم ربى بيخلوا جوزهم يكره اليوم اللى اتولد فيه اصلا :)

[monamize4]

ياراجل متزعلش نفسك

هو فى بنات لاقيه جواز ,,,,,,, خليها جنب ابوها عشان الانتريه مش عاجبهم
و ع فكرة انا مؤيد جدا لفكرة الجواز من غير المصرييات

فعلا ,, الجواز ده عامل زي الحمامات العامة ,,اللي جوه مش طايق الريحه ,, واللي بره مش قادر يستنى ..!

[kok3]

يا عم فكك بلا جواز بلا قرف عيش سنجل

[Abdm]

أولا فعلا أنت لسة ما جاش نصيبك مع بنت الحلال اللى ربنا كتبهالك ...وعسى أن تكرهوا شىء وهو خيرا لكم وعسى أن تحبوا شىء وهو شر لكم .. فربنا أن شاء الله كتبلك الخير بأذن الله فلا تستعجل ولكن عليك بالأستمرار فى البحث عن شريك الحياة ولا تمل ولا تيأس ...

وهذا لا يمنع من مصارحة أهل العروسة بتفاصيل وجود أنترية أو رؤية الشقة فهى أبنتهم ولهم الحق فى الآطمئنان عليها ويجب أن يكون بينكم الصدق وعدم الكذب أبدا ..ولكن على أهل العروسة عدم زيادة التكاليف والآعباء على الزوج .....

ولكن بصراحة قبل أن أتقدم لآى بنت الآولوية بعد وجود الشقة حتى لو على الطوب الآحمر هو تدبير وجود الشبكة قبل تشطيب الشقة ... فيجب أن يكون فى جيبى مبلغ الشبكة أولا لآنة ليس هناك خطوبة الا بشبكة ...
ويفضل أيضا أن تخلص من هم الدهب وتجيبة الآول علشان تكون خلصت حاجة مهمة من اللى عليك وبعدين تتفرغ الى تشطيب الشقة وهم عليهم الآنتظار ولكن بردة لا يستحب أن تكون مدة الخطوبة طويلة تفاديا للمشاكل

نصيحة عليك أن تستغل فترة البحث عن العروس فى تجهيز الشبكة أولا ثم بعد ذلك جهز شقتك وفنشها ودة هيوفر عليك الوقت ما يكونش طويل بعد الخطوبة وتدخل بسرعة يعنى كفاية 6 شهور خطوبة منعا لوجود مشاكل وخلي الشقة واقفة على اللون النهائى لمشاركة العروسة فى اللون لآن العروسة تحب ذلك وخلى الفنش بتاع الشقة دائما فى كل حاجة للمشاركة بينك وبين العروسة فى الآراء لآن الستات ليهم فى الفنش كويس قوى وبعدين هما بردة بيجهزوا معاك بعض الحاجات دية فى الفنيش من تبعهم يعنى أهل العروسة بيجيبوا حاجات فى الفنش وبردة يبقى مجال للحديث والدردشة ومشاركة الآراء بينك وبين العروس وتعرفها أكتر من خلال الكلام

والآخوة اللى بيصوروا الجواز بصورة سيئة ليس عندهم حق فهو ليس بهذة الدرجة من السوء ... وعلشان ربنا يكرمك وتعرف أنك ماشى على طريق سليم ويكون دائما معاك توفيق ربنا وأرادتة أوعى تروح تتقدم لواحدة قبل ما تصلى صلاة الآستخارة علشان لو ربنا أراد أتمام الزواج هيتم لآن فية الخير وأذا لم يريد فلن يتم لآنة ليس فية الخير لك ولم يأتى نصيبك بعد ...... فلا تضجر أو تيأس وأعلم أن الله يريد لك الخير دائما ....

والله الموفق والمستعان

[alking_2006]

انتا و الله بطل انك بتفكر فى الجواز فى الظروف اللى احنا فيها دى
احيك بجد
و متزعلش من اللى بيحصل من الاهالى لأن حصل مع زمايلى العن من كدا
و ان شاء الله ربنا هيعوضك خير