لو مكانى تعمل ايه؟؟؟؟؟؟؟؟؟

[khaled_sabry]

عاوز أوجه نظرك لحاجه تانيه

إنت لو إشتغلت في الحكومه فتره كبيره عقليتك هاتبقى شبه اللي حواليك

يعني مثلاً: لما بتروح بنك حكومي بتلاقي عقلية الموظفين إنه عادي أهزر براحتي وأشرب وأكل وأنا قاعد على الشباك ومش مشكله الناس تستنى يا عم ما هم كده كده قاعدين وحتى لو حد إشتكي المدير نفسه مش هايعمله حاجه.

لكن لما بتروح بنك خاص بتلاقى العقليه بتاعت الموظف إن الناس ما ينفعش تستنى بدون سبب ولازم أشتغل بسرعه على قد ما أقدر عشان ما حدش يتضايق ويشتكيني

لو إنت إشتغلت فتره في الحكومه هاتطبع بطباعها ولو حبيت تنقل شركه قطاع خاص محترمه غالباً مش هاتعدي الإنترفيو أصلاً ولو قبلت فيها هاتتعب عشان هاتعمل حاجه إنت مش متعود عليها خالص

صح انا خبرتى فى الشغل 10 سنين و قضيت منهم 3 سنين فى الحكومه
من الاخر الحكومه حتقتلك و حتبقى روتيني جدااا ده غير انك مش حتاخد فلوس و حتبقى نموذج الموظف الاصلع اللى بيرجع البيت ببطيخه و جرنال
يعنى من الاخر حتدفن نفسك بالحيا

[Y a r i s]

بس كمان فعلاً حاجة تقلق بخصوص وضع البلد
يعني كتير من الشركات. بتوظف الناس من هنا وبعد شوية تخفف من العمالة من هنا علشان الاجور والمرتبات والحالة الاقتصادية. يبتدوا يمشو في الموظفين ... وبالذات في الشركات الي. بتلاقي عندها تعثر في سداد المرتبات ويقلك المرتب لسه منزيلش ... واصل عندك مشكلة مش عارف فين وغلط في السيستم والكلام ده كلو ... بخلاف شغلانت الحكومة ... في شغل مفيش شغل انتا بتقبض ... البلد يتنهار مبتنهرش انتا بتقبض .... الحكومة فلست اتغيرت حصل مظاهرة الفرخة كلت عيالها والضفر طلع من لحمو انتا بتقبض ملكش دعوة باي حاجة في الكون غير انك بتقبض ... ده غير ان تسعين في الميه من شغل الحكومة انا بسميه لعب عيال ودلع ومرقعه لان احيانا بيكون دوامك في اليوم اربع ساعات بس ويوم ما تشتغل وتقول انا اشتغلت هما ست ساعات. بعكس القطاع الخاص الي بيخالفوا تعليمات مكتب العمل وبيشغلوك ١٢ ساعه وتوصل كمان ل ١٤ ساعه وقال ايه بيديك اوفر تايم .

بس في الحكومة مع احترامي لكل موظفين الحكومة. ده شغل ومش شغل لعب عيال من الاخر .... جالك ورق بتشخبط فيه وترميه في الدرج او تديه لزميلك الاستاذ حمدي .... جالك مواطن قلوا فوت علينا بكره يا سيد ... واذا المواطن سئيل وقلك علشان خاطري وابوس ايدك والكلام ده كلو. خد منو الورق وياترميه في الدرج. يا تقولوا ورقك مش عندي ووزعوا على اي موظف تاني زميلك بس واخر الشهر هتستلم مرتبك والحياة ميت فل وعشرة .

بيقولك مرة واحد راح يتقدم لبنت علشان يخطبها .... فابوا البت بيسؤلوا انتا بتشتغل فين يا ابني
العريس : بشتغل في وكالت ناسا للفضاء ياعمي
ابو العروسة : فين دي يا حبيبي .
العريس : في مدينة نصر
ابو العروسة : لييييييه هو فيه وكالة ناسااا في مدينة نصر .
العريس : ليه وهو في شغل اساساً في مصررررر ههههههههههههه.

[shaddadfalcon1]

لو ابوك هيجيبلك شقة ويجوزك يبقي خليك في الحكومه وامشي بمبدأ ان فاتك الميري اتمرمرغ بترابه وده فكر الناس اللي عايشه من 50 سنه تقريبا او اكتر

غير كده يبقي معلش دي حياتك ومتسمحش لحد انه يدخل فيها ودور علي الحاجه اللي هتجيبلك فلوس وخبره

[reda elgohary]

بعد كل الاراء السابقة أنا محتار أقلك ايه ،،، بس أنا كنت ضابط بالجيش رتبة ملازم أول ، والآن أنا تاجر وغير نادم على الجيش والبرستيج صدقنى الحياة مغامرة تحتاج المجازفة . وفقك الله .

[Mohammmed]

هو الصراحة الشغل فى مصر بوجه عام مقرف سواء حكومى او خاص
الا فى اماكن بالاسم

[S O P H O S]

لو الخاص كويس وهيكون فيه استقرار
توكل علي الله

[dede_dodo88]

فكك تماماً من القطاع العام أو الحكومي و دوس في أي فرصة تجيلك في شركة قطاع خاص يكون أسمها كويس..
شغل الحكومة ده عايز واحد يكون معندوش طموح و راضي أنه يقضي اليوم بيومه..
تتفق معايا أو تختلف أن والد حضرتك ملهوش أنه يجبرك على وظيفة معينة,, أه تاخد رأيه ماشي لكن في الأول و في الأخر القرار يرجع ليك أنت..