عسكرى ولا ظابط احتياط !!

[RIDER 2050]

السلام عليكم اهل نايل موتورز الكرام
كل عام وانتم بخير

كنت عايز اخد رايكم ف الموضوع ده لانى ف حيرة من امرى وربنا ييسر الحال
انا خريج السنه دى كليه هندسه قسم ميكانيكا باور وعندى جيش والمفترض ان المؤهلات العليا وبالذات الهندسه الميكانيكه بيتاخدوا ظباط وساعات من غير ارجا كمان الا لو نزل ف كشف الهيئه بقى لعسكرى

المهم دلوقتى انا معايا واسطه ممكن لو دخلت ظابط ينزلنى عسكرى بس محتار لان ف عيوب ومميزات للموضوع
يعنى لو بصينا لو دخلت ظابط
1- ظابط احتياط ليه مكانه كويسه نوعا ما جوا الجيش والتعامل افضل من العسكرى
2-المرتب بعد اول سنه بيبقى كويس
3-لو دخلت عسكرى سنه واخد الله اعلم هلاقى شغل كويس بعد ما اخرج ولا لا

بس عيوبها
مده الخدمه تلات سنين يعنى هخرج عندى 25 سنه وهبتدى ادور ع شغل من جديد

ولو دخلت عسكرى هيبقى مميزاتها انها سنه واحده واخلص بس هيبقى مفيهاش فلوس
واللى اعرفه ان التعامل مع العسكرى بيبقى دون المستوى

والحقيقه بردو انا مش حابب انى ابتدى حياتى بشغل الوسايط والكلام ده

ايه رايكم؟

[mero100]

سيبها علي الله ... و استعن بالله ... و تأكد ان الله حيوفقك للي فيه الخير .

[Mostafa.Ismail]

1- ظابط احتياط ليه مكانه كويسه نوعا ما جوا الجيش والتعامل افضل من العسكرى

المعلومة دى خاطئة .. خش عسكرى وخلص السنة واطلع شوف حالك.

[ESO101]

أنا شايفك مايل لظابط إحتياط
عسكري الميزة الوحيدة من ناحية المدة
لكن تعامل سيء جدًا
الظابط تعامل أفضل ومدة أطول
محدش هيقدر يفيدك
أنا شخصيًا كنت بتمنى عسكري عشان المدة
لكن لبست ظابط إحتياط
متنساش ظابط 3 سنين فالأيام السودة دي

[samyyousef]

موضوع أن الضابط له مكانه كويسة و افضل من العسكري ...فيها كلام
المفروض أن كلاهما يعامل معاملة تحفظ كرامته
العسكري هو ادنى الدرجات، لكن الضابط تعلوه رتب أعلى منه كما أن تصنيفه داخل الجيش انه احتياط و ليس ضابط عامل، فإذا كان العسكري سيعامل معاملة تحط من كرامته فسيلقى الضابط ذات المعاملة من الرتب الاعلى، اما اذا عُمل العسكري معاملة تحفظ له كرامته فابلتبعية سيعامل الضابط كذلك....ايا ما كان الامر
اتصور لو انك امامك فرصة عمل فيفضل ان تجند عسكري
اما لو لم يكن في الافق فرصة او لا تتوقع فوات فرص فيستحسن ان تدخل ضابط
بعبارة اخرى لو انك تبحث عن عمل في القطاع الخاص يفضل ان تلحق بسوق العمل بدري و ان تجهز نفسك بالدراسات و الكورسات اللازمة
اما لو انك ستعمل في الحكومة فسيحتفظ لك بعملك طوال فترة الخدمة فالتدخل ضابط

[mido01050]

المعاملة بتفرق ان محدش يقدر يعسفك زي مبيعملوا في العساكر لأني كنت ضابط احتياط لكن مبتتعاملش زي الضابط العامل بس انا طبيب بشري فكان معظم المعاملة على اني طبيب و كل الوحدة بتقلي يا دكتور من اصغر لاكبر رتبة.. اعتقد كونك مهندس هيفرق برده في المعاملة و الناس هاتتحترمك و تقدر مؤهلك
مشكلتك انك ملكش وظيفة بره الجيش و هتضطر تدور من اول و جديد يعد الجيش

[ICE_MAN]

ياباشا مش ناقصة عطلة .. عسكرى و خلص بسرعة و شوف مستقبلك

[hugan]

الضابط الاحتياط اي نعم ضابط لكن درجه تالته
الضباط العاملين بيعاملوهم معامله سيئه
غير ان كل الشغل بتاع الكتائب بيكون علي ضابط الاحتياط
والنوم خارج مبيتات الضباط العاملين
يعني ده اللي شوفته في سنه الجيش

[أحمد كمال]

3-لو دخلت عسكرى سنه واخد الله اعلم هلاقى شغل كويس بعد ما اخرج ولا لا

و يعني لو دخلت ظابط 3 سنين عالاقل هتخرج تلاقي شغل بسهولة و زمايلك يبقوا مديرين عليك؟

عسكري طبعا احسن


كمان لو ظابط احتياطك هيبقى لحد سن 46 ...... عسكري احتياطك 10 سنين بس ...... تخيل الذل انك تفضل لحد ما تتم 46 سنة بتسافر بتصاريح !!

[mido01050]

معلومة بس مرتب الضابط الاحتياط بقى في حدود اربع الاف

[vinosse]

معلومة بس مرتب الضابط الاحتياط بقى في حدود اربع الاف

انا كنت ضابط احتياط وكان بيجيلى استدعاء كل سنة لحد مسبتهالهم وسافرت
المرتب حتضيعوا لما يجيلك استدعاء
اول سنة مفيهاش مرتب
حيمضوك على عهد الدنيا علشان يخلعوا
عسكرى مهندس افضل بكتير وكل زمايلك العساكر والضباط بيحترموك احسن من ضابط وكلة محسسك انك طمعان فى الدبورتين

[S O P H O S]

راي عسكري
والله اعلم

[Elawany13]

موضوع المعاملة الحسنة ولا السيئة بيكون انت ونصيبك وحسب المكان اللى اتحطيت فيه
أنا من 10 سنوات كنت عسكرى وعلشان خبرتى فى الكمبيوتر اخدونى فى مكان تانى فى القيادة أرقى بكتير من وحدتى اللى كنت هترمى فيها
من 10 سنين الكمبيوتر ده كان حاجه كبيره قوى
وكانت النظرة لينا ان احنا علماء وعباقرة وكإننا إخترعناه
والكل كان بيحترمنا من اصغر عسكرى الى صف الضابط الى قائد الجيش
وكان لينا معاملة خاصة فى كل حاجه
بنام ونصحى بمزاجنا بدون طوابير - عمرى ما وقفت خدمات ولا اعرفها ........... الخ
برستيج تانى خاااااااااااالص

كنت بشوف ضباط احتياط بيتبهدلوا
وعساكر تانية مؤهلات عليا كانوا بياخدوا بالقلم على وشهم علشان غلطه عملوها
مرتبى كان بيجيلى من وحدتى لحد عندى من الوحدة من ضباط احتياط باين عليهم الكحرته والبهدلة
كانوا بينبهروا بالمكان اللى انا فيه والاجهزة الى قدامى والتكييف والرفاهيه
وكل ده كان بدون واسطة وبتدبير عجيب من ربنا سبحانه وتعالى
سيبها على الله وربنا يقدملك اللى فيه الخير

[Ahmed_Adham]

عسكري سنه واحده وتخلع احسنلك انما ظابط هيجيلك بعد ما تخلص استدعاءات بالعبط ممكن تفصلك من شغلك. ابن عمتي مهندس اتصالات دخل ظابط وبعد ما خلص اشتغل في شركه كبيره وكان بياخد كورس في الجامعه الامريكيه تبع الشغل وجاله استدعا عطله عن الامتحان بتاع الكورس والشغل خلاه يدخل الامتحان على حسابه وبعدين بعد سنه تقريبا جاله استدعاء تاني والشركه هددته بالرفد ولقى واسطه بالعافيه عشان ميروحش الاستدعاء فخلص نفسك عسكري سنه واحده وهتخلص قبل ما تحس بيها والتظبيط كله في مكان الخدمه يعني الواسطه اللي هتنزلك عسكري يكمل جميلته وينزلك مكان مرتاح متتعبش فيه. أسمع ان مستودعات الذخيره وخصوصا بتاع القوات الجويه أروق مكان للجيش. كان واحد صاحبي قضى جيشه في مستودع ذخيره بينه وبين بيتهم 20 كيلو وكان كل يومين جيش بياخد يوم أجازه. أخر دلع يعني...

[أحمد كمال]

عسكري سنه واحده وتخلع احسنلك انما ظابط هيجيلك بعد ما تخلص استدعاءات بالعبط ممكن تفصلك من شغلك. ابن عمتي مهندس اتصالات دخل ظابط وبعد ما خلص اشتغل في شركه كبيره وكان بياخد كورس في الجامعه الامريكيه تبع الشغل وجاله استدعا عطله عن الامتحان بتاع الكورس والشغل خلاه يدخل الامتحان على حسابه وبعدين بعد سنه تقريبا جاله استدعاء تاني والشركه هددته بالرفد ولقى واسطه بالعافيه عشان ميروحش الاستدعاء فخلص نفسك عسكري سنه واحده وهتخلص قبل ما تحس بيها والتظبيط كله في مكان الخدمه يعني الواسطه اللي هتنزلك عسكري يكمل جميلته وينزلك مكان مرتاح متتعبش فيه. أسمع ان مستودعات الذخيره وخصوصا بتاع القوات الجويه أروق مكان للجيش. كان واحد صاحبي قضى جيشه في مستودع ذخيره بينه وبين بيتهم 20 كيلو وكان كل يومين جيش بياخد يوم أجازه. أخر دلع يعني...

قانون العمل و قانون التجنيد يمنع الشركة انها ترفده في حالة الاستدعاء


و على فكرة الاستدعاءات حظوظ ممكن تبقى عسكري و يهروك استدعاءات كمان