عسكرى ولا ظابط احتياط !!

[RIDER 2050]

شكرا ع تفاعلكم ونصايحكم هيا وسام ع صدرى
وربنا يكرمكو فعلا انكو بتحبوا المساعده لوجه الله

سيبها علي الله ... و استعن بالله ... و تأكد ان الله حيوفقك للي فيه الخير .

كله ع الله وانا متاكد ان ربنا هيختارلى الاصلح باذن الله

المعلومة دى خاطئة .. خش عسكرى وخلص السنة واطلع شوف حالك.

الحقيقه بيتحكيلى من واقع التجربه لناس كتير ان كرامه العكسرى بيتمسح بيها الارض
للاسف
تانى حاجة انا لو دخلت عسكرى وخرجت ملقتش شغل هلوم نفسى جامد انى عملت كده

أنا شايفك مايل لظابط إحتياط
عسكري الميزة الوحيدة من ناحية المدة
لكن تعامل سيء جدًا
الظابط تعامل أفضل ومدة أطول
محدش هيقدر يفيدك
أنا شخصيًا كنت بتمنى عسكري عشان المدة
لكن لبست ظابط إحتياط
متنساش ظابط 3 سنين فالأيام السودة دي

طب وحضرتك من واقع الخبره شايف ايه الاختيار الانسب ؟ّ!

[RIDER 2050]

موضوع أن الضابط له مكانه كويسة و افضل من العسكري ...فيها كلام
المفروض أن كلاهما يعامل معاملة تحفظ كرامته
العسكري هو ادنى الدرجات، لكن الضابط تعلوه رتب أعلى منه كما أن تصنيفه داخل الجيش انه احتياط و ليس ضابط عامل، فإذا كان العسكري سيعامل معاملة تحط من كرامته فسيلقى الضابط ذات المعاملة من الرتب الاعلى، اما اذا عُمل العسكري معاملة تحفظ له كرامته فابلتبعية سيعامل الضابط كذلك....ايا ما كان الامر
اتصور لو انك امامك فرصة عمل فيفضل ان تجند عسكري
اما لو لم يكن في الافق فرصة او لا تتوقع فوات فرص فيستحسن ان تدخل ضابط
بعبارة اخرى لو انك تبحث عن عمل في القطاع الخاص يفضل ان تلحق بسوق العمل بدري و ان تجهز نفسك بالدراسات و الكورسات اللازمة
اما لو انك ستعمل في الحكومة فسيحتفظ لك بعملك طوال فترة الخدمة فالتدخل ضابط
كلام حضرتك الصح واانا متاكد من كده مليون الميه
بس للاسف مش ده للى بيحصل عايز اقل لحضرتك ان العسكرى نفسه لو طال فرصه للركوب مش هيتردد الا من رحم ربى
وده بان لما رحت اكشف اما بيصدقوا اى حاجة يزعقوا ويقلوا من كرامه اللى اداموا

المعاملة بتفرق ان محدش يقدر يعسفك زي مبيعملوا في العساكر لأني كنت ضابط احتياط لكن مبتتعاملش زي الضابط العامل بس انا طبيب بشري فكان معظم المعاملة على اني طبيب و كل الوحدة بتقلي يا دكتور من اصغر لاكبر رتبة.. اعتقد كونك مهندس هيفرق برده في المعاملة و الناس هاتتحترمك و تقدر مؤهلك
مشكلتك انك ملكش وظيفة بره الجيش و هتضطر تدور من اول و جديد يعد الجيش

بالظبط عدم وجود فرصه شغل بع دالجيش مخلينى بفكر اكتر
ربنا يقدم الاصلح

ياباشا مش ناقصة عطلة .. عسكرى و خلص بسرعة و شوف مستقبلك

كله بايد ربنا
بس انا لو خخلصت بسرعه وقعددت ف بيتنا او اشتغلت شغلانه بالمرتبان التعبانه اللى بنسمعها دى
هبقى خسرت انى مكملتش ف الجيش

[RIDER 2050]

الضابط الاحتياط اي نعم ضابط لكن درجه تالته
الضباط العاملين بيعاملوهم معامله سيئه
غير ان كل الشغل بتاع الكتائب بيكون علي ضابط الاحتياط
والنوم خارج مبيتات الضباط العاملين
يعني ده اللي شوفته في سنه الجيش

مهما وصلت بردو اكيد احسن من العسكرى
انا مش عارف ليه الناس كلها كده طول مهو رتبه اعلى لازم يقرف ويكدر اللى اقل منه
ده بقى اسلوب ححياه الا من رحم ربى

و يعني لو دخلت ظابط 3 سنين عالاقل هتخرج تلاقي شغل بسهولة و زمايلك يبقوا مديرين عليك؟

عسكري طبعا احسن


كمان لو ظابط احتياطك هيبقى لحد سن 46 ...... عسكري احتياطك 10 سنين بس ...... تخيل الذل انك تفضل لحد ما تتم 46 سنة بتسافر بتصاريح !!

من وجهه نظرى جزئيه التلات سنين دى لو خرجت ومشتغلتش ع طول هيعوضها نسبيا المرتب الكويس
وفعلا الاستدعا ل 45 سنه مشكله

معلومة بس مرتب الضابط الاحتياط بقى في حدود اربع الاف

اول 6 شهور 300
تانى 8 700
والباقى 3800

[RIDER 2050]

انا كنت ضابط احتياط وكان بيجيلى استدعاء كل سنة لحد مسبتهالهم وسافرت
المرتب حتضيعوا لما يجيلك استدعاء
اول سنة مفيهاش مرتب
حيمضوك على عهد الدنيا علشان يخلعوا
عسكرى مهندس افضل بكتير وكل زمايلك العساكر والضباط بيحترموك احسن من ضابط وكلة محسسك انك طمعان فى الدبورتين

ممكن توضيح لجزئيه الامضا دى مش فهمها !
المشكله انى ببص الحال البلد والشغل بقول ده لو ف جيش خمس سنين كنت دخلت وبفكر فعليا ف كليه الضباط الاحتياط بس لسه مخدتش قرار

راي عسكري
والله اعلم

ربنا ييسر الحال
امبارح انا اترشحت ظابط لسه الارجا وكشف الهيئه

موضوع المعاملة الحسنة ولا السيئة بيكون انت ونصيبك وحسب المكان اللى اتحطيت فيه
أنا من 10 سنوات كنت عسكرى وعلشان خبرتى فى الكمبيوتر اخدونى فى مكان تانى فى القيادة أرقى بكتير من وحدتى اللى كنت هترمى فيها
من 10 سنين الكمبيوتر ده كان حاجه كبيره قوى
وكانت النظرة لينا ان احنا علماء وعباقرة وكإننا إخترعناه
والكل كان بيحترمنا من اصغر عسكرى الى صف الضابط الى قائد الجيش
وكان لينا معاملة خاصة فى كل حاجه
بنام ونصحى بمزاجنا بدون طوابير - عمرى ما وقفت خدمات ولا اعرفها ........... الخ
برستيج تانى خاااااااااااالص

كنت بشوف ضباط احتياط بيتبهدلوا
وعساكر تانية مؤهلات عليا كانوا بياخدوا بالقلم على وشهم علشان غلطه عملوها
مرتبى كان بيجيلى من وحدتى لحد عندى من الوحدة من ضباط احتياط باين عليهم الكحرته والبهدلة
كانوا بينبهروا بالمكان اللى انا فيه والاجهزة الى قدامى والتكييف والرفاهيه
وكل ده كان بدون واسطة وبتدبير عجيب من ربنا سبحانه وتعالى
سيبها على الله وربنا يقدملك اللى فيه الخير

سبحان الله
اكيد عشان حضرتك انسان كويس ربنا كرمك الكرم ده
انا اتمنى انى مضطرش انى استخدم اى واسطه ف حياتى ان شاء الله
ربنا يكرم وييسر الحال

[RIDER 2050]

عسكري سنه واحده وتخلع احسنلك انما ظابط هيجيلك بعد ما تخلص استدعاءات بالعبط ممكن تفصلك من شغلك. ابن عمتي مهندس اتصالات دخل ظابط وبعد ما خلص اشتغل في شركه كبيره وكان بياخد كورس في الجامعه الامريكيه تبع الشغل وجاله استدعا عطله عن الامتحان بتاع الكورس والشغل خلاه يدخل الامتحان على حسابه وبعدين بعد سنه تقريبا جاله استدعاء تاني والشركه هددته بالرفد ولقى واسطه بالعافيه عشان ميروحش الاستدعاء فخلص نفسك عسكري سنه واحده وهتخلص قبل ما تحس بيها والتظبيط كله في مكان الخدمه يعني الواسطه اللي هتنزلك عسكري يكمل جميلته وينزلك مكان مرتاح متتعبش فيه. أسمع ان مستودعات الذخيره وخصوصا بتاع القوات الجويه أروق مكان للجيش. كان واحد صاحبي قضى جيشه في مستودع ذخيره بينه وبين بيتهم 20 كيلو وكان كل يومين جيش بياخد يوم أجازه. أخر دلع يعني...

والله انا نفسى سواء دخلت عسكرى او ظابط انى اقع ف مكان استفيد منه ف مجاله
وموضوع الاستدعا ده فعلا حاجة غبيه جدا بس
ا/ احمد تحت بيقلط ان القانون بيمنع الشركه انها ترفده ف الاستدعا
انا عارف ان القطاع الخاص عندنا ماشى بمزاجه بس اهو قانون وسارى وخلااص

قانون العمل و قانون التجنيد يمنع الشركة انها ترفده في حالة الاستدعاء


و على فكرة الاستدعاءات حظوظ ممكن تبقى عسكري و يهروك استدعاءات كمان

نصيب وارزاق
ربنا يقدم اللى فيه الخير

[ICE_MAN]

كله بايد ربنا
بس انا لو خخلصت بسرعه وقعددت ف بيتنا او اشتغلت شغلانه بالمرتبان التعبانه اللى بنسمعها دى
هبقى خسرت انى مكملتش ف الجيش

ان شاء الله مش هاتقعد بس اسعى انت كويس و اعمل اللى عليك و ربنا هايوفقك لوظيفة كويسة .. و حتى لو اشتغلت بمرتب ضعيف فى الاول ده هايكون احسنلك من الجيش لانك بتكتسب skills و experience و بتتعرف على ناس اكتر فى مجالك و دى بت add value ليك احسن 100 مرة من القعدة فى الجيش .. مجرد رأى

[eng_volto]

خش ضابط احتياط احسن ليك
طلما معاك وسطه يوزعك فى اى مصنع من المصانع الحربيه وهتستفيد بالمده شويه خبره وفلوس
البلد ظروفها زي الزفت
انا مهندس كهرباء ولسه محلص جيش عسكرى وندمان اني مدخلتش ضابط
المرتبات زي الزفت ومش موجود شغل اصلا

[vinosse]

بص ياهندسة
اى وحدة بيبقا فيها عهد مابين سلاح ومعدات وادوات خدمة بتبقى كلها كهنة بس لازم حد يمضى عليها
وبيختارو اكتر حاجة فيها عجز ويمضوك عليها وانت داخل من الباب اول يوم
انا عن نفسى مرضيتش امضى لما لقيت العهدة ناقصة ووقفت ضد قائد الكتيبة وجابلى جزاء حوالى 200 جنية خصم

[waleedrahmy]

انت
حاتبقي ضابط في الاشغال المتعبة والبهدلة
لكن
في النوادي والامتيازات لا

[RIDER 2050]

ان شاء الله مش هاتقعد بس اسعى انت كويس و اعمل اللى عليك و ربنا هايوفقك لوظيفة كويسة .. و حتى لو اشتغلت بمرتب ضعيف فى الاول ده هايكون احسنلك من الجيش لانك بتكتسب skills و experience و بتتعرف على ناس اكتر فى مجالك و دى بت add value ليك احسن 100 مرة من القعدة فى الجيش .. مجرد رأى

تمام وصلت فكرة حضرتك
كله ع الله واتمنى وضع البلد يتحسن شويه لحسن بالوضع ده نهج برا خالص احسن

خش ضابط احتياط احسن ليك
طلما معاك وسطه يوزعك فى اى مصنع من المصانع الحربيه وهتستفيد بالمده شويه خبره وفلوس
البلد ظروفها زي الزفت
انا مهندس كهرباء ولسه محلص جيش عسكرى وندمان اني مدخلتش ضابط
المرتبات زي الزفت ومش موجود شغل اصلا

طب ممكن توضح حضرتك ندمان ليه

بص ياهندسة
اى وحدة بيبقا فيها عهد مابين سلاح ومعدات وادوات خدمة بتبقى كلها كهنة بس لازم حد يمضى عليها
وبيختارو اكتر حاجة فيها عجز ويمضوك عليها وانت داخل من الباب اول يوم
انا عن نفسى مرضيتش امضى لما لقيت العهدة ناقصة ووقفت ضد قائد الكتيبة وجابلى جزاء حوالى 200 جنية خصم

اشكرك ع التوضيح

انت
حاتبقي ضابط في الاشغال المتعبة والبهدلة
لكن
في النوادي والامتيازات لا

انا فاهم ان التعامل مع الظابط الاحتياط بيبقى مختلف عن الظابط العامل
ولكن ف كل الاحوال افضل من العسكرى