في حد هنا أكل من مطعم ومبي !

[Y a r i s]

فى حد هنا اكل من ومبى
ومبي سلسلة مطاعم بريطانية للوجبات السريعة، تعتبر من أوائل المطاعم اللي فتحت فروع بره بلدها، بدأت في بريطانيا سنة ١٩٣١ وقعدت تنتشر فيها لغاية ١٩٥٣ وقررت إنها تطلع للعالم وتبقى مطاعم international وفتحت في اليابان وكذا بلد لغاية ما جت مصر والمغرب في نفس السنة وهي ١٩٧١م - وقفلت سنة١٩٩٨م

الذكريات اللطيفة مع ومبي إنه كان متخصص في الهامبرجر، وكان لسه شيء جديد محدش ياكله وقتها إلا الناس الهاي أوي فلما حسام حسن جاب الجون الشهير في الجزائر سنة ١٩٨٩م طلعت شائعات إنهم هايخلوه يفطر ويتغدى ويتعشى هامبرجر من ومبي
الصورة اللي انتو شافينها كانت دعاية للمطعم في الصحف سنة ١٩٨٦م

@@@@@@
وتحياتي

للامانة المهنية : الموضوع منقول من
صفحة كلاسيكيات
على الفيس بوك .

[أحمد الجندى]

الله يرحم ال Apple Pie بتاعته كانت خزعبيلة وقتها

[A.Saad]

ومبى ............. زمان

[Y a r i s]

هههههه ... عليا النعمة كل ما اعدي في شارع جامعة الدول ناصية ومبي.... واشوف دجاج تيكا وكنتاكي وهارديز اتحسر واقول اااااايه الله يرحمك يا عم ونبي. فين ايامك وفين لياليك

لا وشوف الاسعار ربع مييييييييه وخمسسسسسسسين قرش هههههه
الله يرحمك يا ستي لمن ابويا اقلها خدت العيال وغديناهم في ونبي. قالت لو ليه يا ابني حررررام. مفيش انضف من اكل البيت حتى اللحمة. متعرفش القطط والفيران الي دبحينها ههههه. ... ولا الورقة الي كان بيحطلك فيها السندويتشات. ... حتى كوبايت البيبسي كولا بالزبط بالزبط حجمها قد حجم كوبايت المية البلاستيك بتاعت المستشفيات ... هااايه ايام



بس هو ليه اختفى ونبي من مصر .

[A.Saad]

الصورة الاولى مكتوب عليها فتكات وانت للامانة كاتب انها من الفيس

[Y a r i s]

الصورة الاولى مكتوب عليها فتكات وانت للامانة كاتب انها من الفيس

هههه ماهو فتكات دي برضو كلاسيكيات
مستلف الصورة من امو عمار ههههه لا ياباشا هو فعلاً انا ناقلوا من بوست على الفيس بوك ... وتلاقي الادمنه. عضوة فتوكة نشطة او فتوكة شطورة ولا حاجة ... وهكذا تتداول المعلومات عن ومبي في فضاء الانترنيت الشاسع . ... وتحياتي

[SAMEH_FOUAD]

طبعا ويمبى كان فاتح عندنا فى ميدان لاظوغلى , فرع جاااااااااامد , كنت كل اسبوع لازم اخد بابا اخلية يأكلنى هناك

كان الساندويتش ب3 جنية او ب 4 جنية حاجة زي كدة

والله كان فظيع , وطعمة جميل جدااا

[S O P H O S]

زمان مش هيتكرر فعلا
كم نتمني الزمن يرجع تاني
ويرجع جزء من الخير والحب الي كان بين الناس

[Forever.Leo]

يااااااه .. على الكلاسيكيات ! .. بس على فكرة لسة فيه محطات و اماكن معروفة باسمه لحد دلوقتي ! .. جريت رقنا الله يسامحك !!

[Gelgel2004]

الله يرحم الايام دى
زوكريات بقى
كنت بزوغ من الكليه انا و صحلبى و نروح ناكل عندو مع الزميلات :)

للتوضيح فقط
بيف برجر لحم برجر
تشيكن برجر -= برجر فراخ.
فيش برجر = برجر سمك

همبرجر = هام برجر = برجر من لحم الخنزير

و ارجو اننا نصحح للجميع اسمها بيف برجر موش همبرجىر
الف شكر للموضوع

[mramzy]

حد فاكر البنانا بوت المشهوره بتاعته او الجلورى
لغايه 1997 كنت بقعد فى ومبي الميريلاند قبل ما يبقى المالكى
ايام
وا لالما فتح فرع المنيل كان كبايه الشاى ليبتون ب 10 قروش

[mero100]

‫اعلان مطعم ومبى فى الثمانينات - ذكريات مصر زمان‬‎ - YouTube


اخر وجبه اكلتها في ومبي كانت في فرع الخليفه المأمون في اواخر التمانينات .... طعمها لسه فاكره لغايه دلوقتي ... معرفش ده طعم الاكل و لا طعم الزمن الجميل .

[memo2000soft]

كانت ايام والله
الفرع اييلي كان عندنا في اول الهرم ليسة لغاية ديلوقتي المحطة باسمة

[monamize4]

وا لالما فتح فرع المنيل كان كبايه الشاى ليبتون ب 10 قروش

[Land_Cruiser]

فرع الخليفه المأمون الفرع الوحيد اللي لسه موجود لحد دلوقتي و فكرت كذا مره اروحه بس في آخر لحظه بيجيللي احساس عجيب أني هلاقي الأكل اللي فيه إنتاج الثمانينات او التسعينات . يا تري محدش يعرف هو ليه انقرض مع انه كان مشهور زمان زي كنتاكي و يمكن اكتر كمان