في حد هنا أكل من مطعم ومبي !

[A.Saad]

ومبى كان فرانشايز
وكان من ضمن اللى واخدين توكيله الشوربجى

[Mahmoud Nagieb]

ايه يا جماعة , ايه يا جماعة

بالراحة , لاحظوا ان فيه اجيال متعرفش ايه ويمبى ده

انا جوعت والله , بس هروح اكل فين بقى , ماهو قفل

هو صحيح لسة كسلسلة عالمية لسة فاتحة ؟ , ولا هو قفل فى مصر بس

طيب ليه قفل طالما كان شغال كده ؟؟؟

[dr_ahmed80]

انا لما شفت العنوان جاتلى قشعريرة ......... ياه ومبى
اصل ده كان السبب الرئيسى فى الخناقة مع والدى لانه كان بيرفض انى اكل الهامبورجر و القرف بقى ده و أمى طبعا زى اى ام مصرية معلش يا محمد الواد هيجيب سندوتش و خلاص كان باين ب 3 جنيه حاجة كده و كانت فكرة انك تدخل تدفع الاول و بعدين يجيلك الاكل غريبة جدا لان المعتاد تدخل مطعم تاكل و بعدين تحاسب و ده كان فى وسط البلد فى ميدان لاظوغلى و بقى مكانه جاد دلوقتى فى اميدان بس اعتقد انه قافل برضه بقاله كذا سنة
انها ايام الطفولة الطفولة البرييييييييييييييييييييييييييييييئة

[A.Saad]

فرع الخليفه المأمون الفرع الوحيد اللي لسه موجود لحد دلوقتي و فكرت كذا مره اروحه بس في آخر لحظه بيجيللي احساس عجيب أني هلاقي الأكل اللي فيه إنتاج الثمانينات او التسعينات . يا تري محدش يعرف هو ليه انقرض مع انه كان مشهور زمان زي كنتاكي و يمكن اكتر كمان

هو الفرع ده اللى عند شارع الهيئة الهندسية
ودور ارضى منخفض
انا كنت بشوفه قافل

[A_H_M_A_D]

كلت عنده في السعوديه زمان ، بس ماكدونالدز خلص عليه الله يسامحه

[friendship7897]

همبرجر = هام برجر = برجر من لحم الخنزير
و ارجو اننا نصحح للجميع

حد فاكر البنانا بوت المشهوره بتاعته

ياااااه
رجعتونا بأيام زمااااان
كانت فسحتنا الأسبوعية
كان فرع ومبي مدينة نصر
وكانت هناك سينما بتعرض فلمين ( واحد عربي وواحد إنجليزي ) بتذكرة واحدة
وكان سندوتيش البيف بورجر ( الهمبرورجر ) بعد المعلومة الهامة بتاعة أ/ عبد الجليل ( جزاه الله خيراً )
والحلو البنانا بوت ( طبق على شكل مركب فيه موز على جانبي الطبق وثلاثة بولة ايس كريم وشوكليت سايحة وكريم شانتي على الوش )
بس أعتقد أنه مش كان حلو أوي للدرجة دي
بس كان حلو أوي وقتها لأنه مافيش غيره
لأني في يوم كنت في السوبر ماركت ولاقيت الشيكوليت العظيم أيام زمان ( كورونا ) روحت بدون تفكير جبت علبة كاملة للإستمتاع بالشوكولاتة بتاعة زمااان - ولكن لاقيتها حاجة وحشة أوي - معرفش هي أتغيرت ولا أحنا اللي أتغيرنا وأعتدنا على الأذواق المختلفة المتطورة .

[fourseasons]

كان عندنا فى شارع اسكندر ابراهيم فى ميامى قدام السنترال

بس مكنش محل.كان عبارة عن كرفان و تيك اواى.بس طان طعمه حدوتة.الله يرحم ايام زمان

[nona_yaris]

ياااه
ويمبي !!
كان زمااان
وكان بردو فيه مطعم شهير في عباس العقاد اسمه شو إن وكمان موكا اللي في الخليفة المأمون ده كان اول مطعم يعمل السندوتشات الكبيرة
والسبورت كولا والتييم والكندا دراي
كانت ايام حلوة

[horas3000]

للتوضيح فقط
بيف برجر لحم برجر
تشيكن برجر -= برجر فراخ.
فيش برجر = برجر سمك

همبرجر = هام برجر = برجر من لحم الخنزير

و ارجو اننا نصحح للجميع اسمها بيف برجر موش همبرجىر
الف شكر للموضوع

المعلومه دي كنت قريتها قبل كده
و صدقتها و ده عملي لغط كبير و انا في امريكا
و لاحقا عرفت انها غير صحيحه
و اختلفت الاقاويل في اصل الكلمه من ان مصدر الشاندويتش نفسه مدينه Hamburg في المانيا او انه تعديل لنوع من الانواع اللحمه اسمه Hamburg steak

و الموضوع ملوش علاقه بكلمه ham قوي و الاسامي الي حضرتك ذكرتها عاده بتطلق علي قطعة اللحمه نفسها لما تيجي تشتريها مش بالشاندوتش نفسه

و بقي معروف ان كلمه هامبرجر تطلق علي اي قطعة لحم مطبوخ من اي نوع بين خبزتين دائريتين اغلب الوقت

اما ومبي نفسه مليش شرف التعامل معاه بحكم عيشتي في الكويت و انه مكانش مشهور زي هارديز مثلا
بس واضح من كلامكم انه كان جامد

[khaled_sabry]

ياااااااااااااااه ومبى
بالنسبالى ومبى لايمثل ليا الا اول اسم لمطعم جاهز اسمعه و انا صغير
و بحكم انى من اسيوط فمعرفوهش لكن اذكر مره ان والدى (عليه رحمة الله ) قالى اننا اكلنا فى ومبى ده فى احدى زيارتنا للقاهره و انا صغير فى الثمانينات كنوع من الترفيه و زياره المعالم القاهره
طبعا هو قالى الكلام ده فى حوار سنه 2000 او 2001 و كان ردى عليه (ايه ياعم الناس الجعانه دى بقى بتسافر علشان تاكل فى ومبى )
طبعا ماكنتش اعرف اختلاف مقايس العصر

[Gelgel2004]

ايام حلوه و ناس احلى
احنا اتغيرنا جدا و التركيبه بتاعه المصريين عموما نتيجة الظروف اللى حوالينا اتغيرت جدا

[mastr_n]

أدفع كل ما أملك وارجع اعيش أيام أواخر التمانينات وأوائل التسعينات
ياة على الايام الحلوة والناس اللى كانت بتمشى تضحك فى الشارع
ولعب الكورة فى الشوارع
واللة العظيم كنت باخد مصروف جنية فى اليوم ويوم الخميس كانت 5 جنية بتخلينى مللك ههههههههههه

اخر مرة كلت فى ويمبى جامعة الدول وبعدين خدت الحلو بتاعى فى بيت الدوندز قدامة علطول

بصراحة فخور أنى من جيل التمانينات
شكرا صاحب الموضوع رجعتنا للزكريات الحلوة