أخر صدمة ليا مع شركة الكهرباء

[أشرف العدوي]

http://www.nilemotors.net/Nile/355142-a.html

كنت كتبت الموضوع ده من فترة

و الكهرباء كانت بتيجي اقصى حاجة 250 او 300 جنيه

امبارح عدى عليا أبو نسمة و جايبلي فاتورة بكام بقى

400 لاء

500 لاء

800 لاء

900 لاء

1000 لاء




1047 جنيه

مش فاهم في ايه او اعمل ايه
انا حاسس اني بشتغل علشان ادفع كهرباء بس

و كمان في مخزن عندي مقفول من 2005 ليته جايب ليه 40 جنيه كهرباء
طيب فتحته و كشفت على العداد ازاي
و جم منين الـ 40 جنيه دول

انا عايز اعمل محضر بس مش عارف ابتدي منين و اعمل المحضر في مين
هل في الكشاف
و لا مدير الوحدة
و لا وزير الكهرباء


ياريت الي يعرف الخطوات ايه يقولي عليها ضروري علشان ابتدي فيها بكره

[Ahmed_Adham]

طيب متشوف القرايه في أخر وصل مع الوصل الجديد مع العداد؟ وهل الشهر اللي فات أو اللي قبله كنت بتلاقي القرايه في الوصل قريبه من قرايه العداد ولا فيه فرق كبير بينهم؟

[ashekwalaa]

أنت دفعت الأول؟؟؟؟؟؟؟؟؟؟؟؟؟

[KemozTanta]

متدفعش واتظلم وشوف اخر قراية 3 شهور فاتوا
واشتكي
ممكن جدا يكون في سرقة وحصلت مع ناس واكتشفوا ان المحصل بيضرب وصولات نفس شكل وصولات الشركة بقيمة عالية

[أبو_يوسف]

كنت هاعمل موضوع في نفس السياق..

انا استهلاكي العادي في الصيف بيكون من 600 ل 800 كيلو وفاتورة شهر 6 جات كدا
شهر 7 جاي استهلاك 300 كيلو فقط
شهر 8 جاي القراءة مغلق ومكتوب المبلغ دفعة وقالك كل مدينة نصر كدا علشان فض الاعتصام محدش راح البيوت
فاتورة شهر 9 جاي فيها الاستهلاك 2600 كيلو واشهر المحاسبة 2 والفاتورة جاية ب 1050
وببص في القراءة الحالية في الايصال لقيتها قريبة جدا من قراءة العداد بفرق 40 كيلو فقط يعني اخدوا القراءة مثلا يوم 15/9 قبل تحصيلها بيومين مش في اول شهر 9!

الخلاصة:
1- ان شهر 7 اللي جاي استهلاك 300 كيلو يا اما الكشاف اخد قراءة قليلة يا إما اخدها بدري اوي عن معادها
2- شهر 9 يا إما الكشاف اخذ قراءة عالية يا إما اتأخر اوي في اخذ القراءة..
3- ودي الأهم ان المفروض قراءة شهر 9 اللي مفروض تتشرح على شهرين مشرحينها على شهر واحد فقط.. يعني لو اتشرحت على شهرين كانت هاتبقى ب 798 ج بدلا من 1050ج

طبعا اول نقطتين هايبقى صعب اثبتهم الا لو قدرت اعرف تواريخ الابلاغ عن قراءة العداد..
انما النقطة التالتة بتاعة التشريح دي ممكن اثبتها طبعا..
السؤال بقى هل ممكن اعملهم مشكلة في حماية المستهلك ولا ايه؟
وهل في وسيلة للابلاغ عن القراءة سواء بالتليفون او الانترنت بدلا من الاعتماد على الكشاف تلافيا لاي نصب؟ لان كل ما القراءة تزيد تدخل في شرائح اعلى..

هارفع لكم ملف الاكسيل اللي بيحسب فاتورة الكهرباء..

[amrezzat82]

كتييير من محصلين الكهرباء معندهمش ضمير و بيضربوا الأرقام و مكسلين يعلوا الشغل زي اي موظفين للأسف..
و موضوع القراية اللعب فيها ده عشان المحصل مكسل يطلع لكله و ممكن انت تطلب تعديل القراآات و متدفعش غير المتوسط الطبيعي عشان متخشش فى شريحة العالية و و تدفع أضعاااف

أنا رحت عملت شكوي 3 مرات فى المعادي و عملت طلب مسافر و مضيت على القراية و العداد بره أصلا عشان البيه متخلف و بيضرب أرقام و الشقة مقفولة و بعد كل ده ألاقيه كل شهر بيألف قراية من دماغه.. و كل شهر عاملي قراية من دماغه شكل ..حافضالهم و اروح اهزهأهم و اعمل طلبات تانية..يخرب بيت التخلف اللى احنا فيه

[أبو_يوسف]

دا رابط لملف الاكسل اللي ممكن تحسب بيه فاتورتك - حد غيري اللي كان عامله ورفعه على النت- :
فاتورة الكهرباء - Download - 4shared

ودا رابط موقع للاستعلام عن فواتير الكهرباء علشان تتأكد ان المحصل مش بيزور فواتير:
الشركة القابضة لكهرباء مصر
وهاتلاقي الشركة اللي انت تابع ليها على الايصال

[أبو_يوسف]

لو عايز اعملهم مشكلة يا جماعة..
اروح حماية المستهلك ولا النيابة الادارية؟

[Bonanza]

انا جالي اخر فاتورة للكهرباء الشهر ده 990 جنيه

بس بقالي اكتر من 3 شهور مفيش قراءة بتتاخد و بيجيلي فواتير جزافي 50 جنيه و 70 جنيه و كده

بس لما راجعت الاستهلاك اللي جاي في الفواتير و القراءة بتاعة العداد لقيتها مظبوطة

الفكرة ان البهوات بيكسلوا ياخدوا قراءة العداد و يسيبك 3 شهور جزافي لحد ما بدخل في شريحة اعلي و يحاسبني بتعريفة عالية

[Land_Cruiser]

معظم الناس جاتلهم الفاتوره بتاعه ٧ و ٨ و ٩ مع بعض و مكنش في محصلين بييجوا ياخدوا قراءه العداد في المده دي و بيحطوا أما رقم جزافي من تأليفهم او بيكتبوا مغلق مع ان العداد بره الشقه و بيقطعوا كعب الايصال و السبب و الله اعلم انهم كانوا خايفين ينزلوا يحصلوا الفلوس و ياخدوا القراءه علشان ما يتثبتوش و في الاخر احنا اللي بندفع الثمن و نتدبس.

[أشرف العدوي]

انا راجعت على القراية و لقيتها مظبوطة
للأسف
انا قيمة الاستهلاك نفسها مش طبيعية
يعني أكتر من 2000 كيلوا
و الشقة مقفولة لحد الساعة 5 كل يوم
و مافيش و لا سخان كهرباء و لا ميكروويف هو تكييف 3 حصان بيشتغل 6 ساعات تقريباً و يمكن اقل

هو كدة في لعب بيحصل ايه بقى مش عارف
هل ممكن هو يلعب في قراية العداد

و هل يمكن اقدم طلب مثلاً ان حد يجي يفحص الشقة كلها و يشوف الاحمال

انا مش عايز اسرق كهرباء
يعني الموضوع ده مستبعده تماماً حتى الان
بس لو الوضع فضل كدة
انا هخرج نص الشقة بره العداد

[أبو_يوسف]

هو اللعبة اللي حصلت ان ال 2000 كيلو المفروض يتوزعوا على 3 شهور انما هما حسبوهم استهلاك شهر واحد..
يعني مثلا 2000 ك على 3 شهور يبقى استهلاك الشهر 660 كيلو تقريبا ب 125 ج × 3 شهور = 375ج

اما لو اتحسبوا استهلاك شهر واحد يبقى 740 جنيه

احسبوها على الملف المرفق سابقا..

[kamal12]

فاتورة الكهرباء

روح شركة الكهرباء و إطلب تشريح الفاتوره على المده الزمنيه

[أشرف العدوي]

اه حلو موضوع تشريح الفاتورة ده

[أبو آسر]

أنا برده الفاتورة جاتلي الشهر ده أكتر من 600 جنيه واستهلاك 1424 ك.و ويبدو إن ده اتجاه عام الشهر ده للحكومة عشان تغطي على خسايرها وإفلاسها وديونها من قوت الشعب الغلبان لأن حضرتك مش أول ولا تاني ولا عاشر واحد يشتكي من فاتورة الكهربا الشهر ده بالذات ولو دورت في النت هتلاقي شكاوى بالآلاف وفي ملايين مدفعوش الفاتورة واسأل المحصل وهو هيقولك
حسبنا الله ونعم الوكيل
نصيحتي متدفعش الفاتورة ومحدش هيقدر يقطع الكهربا عنك أو أضعف الإيمان روح الشركة واعترض على المبلغ والاستهلاك وهاتلهم فواتير الشهور اللي فاتت وقولهم يشرحوها وينزلوك لشريحة أقل ويقسطوها كمان على كذا شهر