صلاة النساء للتروايح في المسجد في الميزان

[OlaOsman]

- واحدة صحبتي راحت تصلي التروايح أول يوم في المسجد لقته مليان على آخره و النساء بدأوا يصلوا على سلالم المسجد و بعدين فرشوا في "الشارع" و بدأوا يصلوا.. في الشارع في الغيط مش مهم.. المهم صلاة التروايح في المسجد.

- النهاردة في برنامج فتاوي جه اتصال تليفوني من سيدة بتحكي فيه انها ضهرها بيوجعها اوي و مش بتقدر تقف فترات طويلة، بس هي حريصة على صلاة التراويح في المسجد و بتسأل الشيخ تعمل ايه! تتعب.. تتبهدل مش مهم.. المهم صلاة التروايح في المسجد.

- الزوجة تفطر هي و زوجها و أطفالها و تبدأ تلم في السفرة بسرعة و تغسل الأطباق بسرعة و تلبس العيال بسرعة عشان تنزل المسجد بسرعة عشان تلحق لها مكان جوه المسجد و في إيدها أطفالها.. سنهم كام مش مهم.. يعيطوا يصرخوا يتعذبوا و يعذبوا المصلين معاهم مش مهم.. المهم صلاة التروايح في المسجد.

- في المسجد تبدأ صلاة التروايح و يبدأ معاها التزاحم و الفوضى و ركن النساء بيشهد كثير من المعارك بسبب المكان مرة وبسبب اللي زنقت عليها مرة و لأسباب أخرى عديدة لن يعجزن عن اختلاقها.. و في الاستراحة بين الركعات حدث عن الرغي و لا حرج و ليته كان رغي برئ.. لا شك أنه يبدأ كذلك ثم لا يلبث ان يتحول إلى مجايب في سيرة فلانة و علانة.. و بعدين الله أكبر.. و نكمل التراويح عادي.. هي مش برضه في المسجد؟ تبقى أكيد مقبولة.

فاصل و نواصل مع كثير من التساؤلات و علامات الاستفهام و التعجب!!

[OlaOsman]

هي الناس معذبة نفسها أوي كده ليه عشان صلاة التروايح في المسجد؟؟ مين قال انها فرض حتى على الرجال في جماعة؟ فما بالك بالنساء اللي أصلا عندهم مشكلة في فقه المساجد.. ليه المساجد ازدحمت اوي كده بالنساء؟ هي صلاة الجماعة اتفرضت على النساء و انا معرفش؟ طيب يا ريت الناس حريصة على الفروض اوي كده كحرصهم على صلاة التروايح جماعة في المسجد.

طبعا شئ محمود و جميل ان الناس بدأت تسيب المسلسلات في رمضان و تتجه للمسجد، انما لو كان ده ناتج عن تدين حقيقي كانت تبقى الصورة أجمل بكتير.. لكن يا فرحتي بكثرة عدد المصلين في المساجد و همه برة المسجد - و احيانا جواه - سلوكهم يندى له الجبين

هي فعلا الناس مش مدركة ان صلاة المرأة في بيتها أفضل؟ عمرهم ماسمعوا حديث رسول الله صلى الله عليه و سلم اللي رواه عبد الله بن مسعود رضي الله عنه ، عن النبي صلى الله عليه وسلم قال : " صلاة المرأة في بيتها أفضل من صلاتها في حجرتها وصلاتها في مخدعها أفضل من صلاتها في بيتها " . رواه أبو داود ( 570 ) والترمذي ( 1173) .

احنا بأه بنسيب الأفضل عند ربنا و نروح لغيره مش عارفة ليه.. عشان الروحانيات اللي صلاة التروايح و صوت الإمام؟ ده الموضوع تحول لمتعة شخصية بأه مش عبادة.. لو على العبادة يبقى صلاتك يا أمة الله في بيتك و مخدعك أفضل عند الله من خروجك لصلاة التروايح و الله أعلم بالأجر هنا أفضل و لا هناك.

الموضوع في نظري تحول لموضة و هوجة زي بالظبط صلاة التهجد في العشر الأواخر و اللي بيحصل فيها.. أبص من البلكون الساعة 2 و 3 بالليل ألاقي واحدة نازلة من بيتها رايحة تتهجد في المسجد.. يا سلام و هو التهجد في البيت مش هايتقبل؟ ده حتى التهجد و قيام الليل محتاجة لهم خصوصية اكتر من اي صلاة تانية! انما اللي بيحصل ان الستات بيلموا بعض و يروحوا يصلوا التروايح و التهجد كإنهم رايحين السوبر ماركت!

انا عارفة ان ممكن ناس كتير تختلف معايا في رأيي، انما انا شايفة العبادة أرقى كتير و أكثر خصوصية من اللمة و الدوشة و الموضة اللي بدأ بعض النساء يتبعوها في السنوات الأخيرة.

[solycar]

ممكن اضيف نقطة


صلاة الفجر اول يوم رمضان كان المسجد مليان و الناس واقفة فى الشارع اكتر من اللى جوة(ما شاء الله)

ليلة العيد بدون مبالغة عدد المصليين لا يتعدى 150 فرد

بس خلاص :)

[Jato.33]

حضرتك بصراحة فعلاً الموضوع ده رائع

الموضوع ده الواحد تعب من الكلام فيه مع بعض الرجال
أول مرة أشوف واحدة بتتكلم عليه بالطريقة الموضوعية دية

طبعاً لا يختلف معكي أحد عاقل بصراحة وكفاية حضرتك مؤيده الموضوع بالأحاديث وكلامك منطقي جداً ما شاء الله ربنا يحفظك بصراحة 10/10

على فكرة الموضوع ده بأه خارج رمضان كمان
ظاهرة رهبنة النساء والهوس المنسوب إلى الدين
حضرتك مش ملاحظة خروج عدد كبير ومتزايد يومياً من البنات بالذات اللاتي تتراوح أعمارهن ما بين 20 والـ30 سنة تقريباً في الأعمال الخيرية التطوعية وأيضاً حفظ القرآن وتحفيظه طبعاً مش بقول إن ده غلط لكن لما تسيب البنت والدها ووالدتها كبار السن أو زوجها وأولادها عشان تخرج تخدم الغُرب بالساعات بدون مراعاه للوقت أو تقعد في البيت تقرأ القرآن وتحفظ وتقرأ في الكتب الشرعية عشان تروح الدار أو المعهد أو الجمعية الخيرية إلي مشتركة فيها وتسيب والدتها كبيرة السن تعمل شغل البيت لوحدها وتسيب زوجها إلي بيشتغل بالساعات يخدمها وأولادها ولا كإنها عندها جوا بيتها ما هو أولى من الخروج
أعتقد ما يحدث في التراويح إمتداد لهذا الأمر
أعتقد إنه جهل وفتنة ربنا يستر علينا منها
فين فقه الأولويات؟
ونُذكر بقول إمنا عائشة رضى الله عنها (لو رأى النبي صلى الله عليه وسلم ما أحدث النساء بعده لمنهن المساجد)

[PRO-DRIVE]

الافضل الارشاد لتقويم الناس و تعريفهم ميعملوش عشان كدا غلط

مش نقعد ننتقد و نقول شوافوا بيعملوا ايه

اللي بيروح التراويح هو حر في انه يروح او لا و اللي مبيروحش برضه محدش بيقوله لا

و برضه مدام مبيضروش حد و فا كل واحد حر في افعاله !

[Hossam.Hamdy]

ميصحش الستات و البنات تقف تصلى فى الشارع او فى مكان مكشوف للناس او للعمارات و البلكونات عشان مينفعش حد يشوف الستات و هى بتركع و تسجد.......
الصلاه للمرأه فى بيتها اولى....اما لو عايزه تصلى فى المسجد يبقى تصلى فى مكان مقفول مش مفتوح لكل الناس....طبعا صلاة التراويح و التهجد احساسهم حلو جدا بس لازم اختيار مكان مناسب...وبعدين الستات بيتكلو كثير و بتبقى دردشه

[جمال]

كلامك سليم جدا يا علا, بارك الله فيكى

[bee]

+1000000000000000000 يا علا
والمرأة بيتها أولى بصلاتها ..

[KoDaK_Gti]

ياريت تقروا الكلام اللى على الموقغ ده لأن اكيد فيه ناس متعرفوش

http://www.islamadvice.com/ibadat/ibadat11.htm

وان شاء الله تستفادوا

[WalidAdel]

الموضوع في نظري تحول لموضة و هوجة

+100

معاكي اوي في الكلمه دي علي فكره

[M_ashraf]

الله ينور عليكي
كلام سليم 100%
انا شفت اعلان عن حضانةتعلن انها على استعداد
لاستقبال الاطفال في وقت التراويح
شوفتي الناس بدأت تطلع السبوبة ازاي

[alaa_dash]

صباح الخير ...
صلاة التراويح بتيقى اجمل كتير مع مجموعة و ذهاب البنات الى المساجد في حد ذاتها
حاجة كويسة ...المشكلة بقه في السلوك اللي قولتي عليه..و ديه مش من البنات بس ..
من الاتنين ...كمثل.اللي بيطلع يدخن سيجارة بعد اول اربع ركعات ..!و يرجع يتمضمض
و يكمل ..
حتى تحولها - الصلاة- لمتعة شخصية ..فالشباب برضه نفس الحكاية ..و العيال الصغيرة ممكن يكونوا مع ابوهم :)
اما بقه الحديث عن افضلية صلاة المرأة في بيتها فأكيد عارفة حديث لاتمنعوا إماء الله مساجد الله...
السؤال بقه لو مفيش الكلام ده كله و مكان السيدات واسع و مفيش زحمة
ولا عيال صغيرة و حق البيت مكفول و كله تمام ..
صلاة البيت لسه افضل ....صح ؟

[OlaOsman]

جزاكم الله خيرا كثيرا على المشاركات :)

لي عودة ان شاء الله مع الردود.

[sab3aawy]

فكرتونى من كام سنة بأحد اقاربى، وهو رجل احسبه عند الله من الأتقياء، فى تجمع عائلى رمضانى توجه بالكلام الى احدى قريباتى، وهى سيدة صغيرة السن غير محجبة تعمل فى مجال السياحة،والتزامها الدينى اقل من المتوسط، لكنها تأتى فى كل رمضان وتغطى نصف شعرها وتمتنع عن وضع المساحيق وتذهب لصلاه التراويح فى احد المساجد، المهم ان قريبى ده سألها :" هاه الموضة السنة دى جامع ايه؟" فنظرت له مستنكرة وقالت له:"موضة....ايه موضة دى؟" فقال لها، مانتم كل سنة ليكم موضة، ياللا يا بنات السنادى جامع الحصرى فى ستة اكتوبر، الامام اللى هناك صوته رهيييييييييييييييييييب، السنة اللى بعدها، ياللا جامع النور يا بنات ، اصل الجو بتاعه حكاية"، فتزايد استنكار قريبتى وقالت له، ايه اللى انت بتقوله ده، خلاص عملت العبادة موضة، فقال لها: اصلها لو عبادة بجد كنا التزمنا بقدر منها طول السنة، لكن المسألة مجرد اننا بنعيش فى المود وخلاص، قمر الدين وفوازير ومسلسلات وخيام رمضانية والتراويح فى جامع كذا والسحور فى دار الدفاع ، ثم كرر عليها احاديث افضلية صلاه المرأة فى بيتها ، وانتهى الحوار عند هذة النقطة

فهى فعلا موضة مش اكتر

[hn_kamal]

أنا متفق معاكي فى بعض اللى قولتيه لكن ما نقدرش ننكر حديث الرسول عليه الصلاة والسلام
"لا تمنعوا اماء الله مساجد الله" ولكن لازم يكون فى حدود المسموح به يعنى ما ينفعش الستات تصلى فى الشارع أو مكان مكشوف مثلا
لكن من مزايا ذهاب الستات أو الرجال للمساجد هو أنه الصلاة فى جماعة ثوابها اكبر من صلاة الفرد وطبعا المفروض ان الناس تحاول تستزيد من الخير وخصوصا فى هذه الايام المباركة بالاضافة ان الصلاة فى المساجد بتقلل من مشاهدة المسلسلات والفوازير وخلافه
ده غيرانه ممكن أثناء سماع القرآن او الخطبة القصيرة التى بين الصلاة تحدث الهداية والاقتراب اكثر من الله عز وجل نتيجة التركيز والخشوع
وأخيرا نسأل الله عز وجل الهداية للجميع وأن يتقبل منا رمضان والفوز بالجنة والنجاة من النار