Tweet
تحذير هام : من عصابة التكاتيك في ٦ أكتوبر ! { أنا أتسرقت } !!
سيداتي سادتي { أنا اتثبت ... سرقوني تحت تهديد السلاح }
الموضوع وقبل ما اقول ايه الي حصل معايا ... جاري وحبيبي برضو. اتثبت من قبل هذه العصابة الشهر الي فات وعملت موضوع انا وكتبت الي حصل بالزبط بس بعد كده ترددت اني انشروا .. مش لحاجة بس مخافة اني انشر الرعب او الزعر بين حبايبي واخواتي من سكان المنتدى ... وقلت العملية مش ناقصة وموقف فردي وعدى .
المهم امبارح كنت بتمشى. قرب جامعة ٦ اكتوبر ... وطبعاً مبقيتش اسوق العربية خالص علشان ماتثبتش بالعربية زي ما بنسمع من الاعضاء فقلت اطلع مشاويري كلها مشي وموصلات !!
المهم المشي رياضة برضو :) ... ماشي عند جامعة ٦ اكتوبر بالزبط قدام معرض ماك .... بين الشجر وبصيت لقيت توك توك جي عكس وركن قدام مني بمسافة ( يمكن علشان يديني الامان )
شوية طبعاً انا ماشي في طريقي لقيتوا بيسئلني بصوت واطي فانا من. سزاجتي وهبلي قربت منو علشان اسمع هو بيقووول ااايه !!!! يا ام الغبااااااااااااااء. يا ام غبائي !!! لمن قربت لقيتوا بيسئلني هو الحي الثامن نروحلوا منين بس طبعاً اداني امان بحيث اني اقرب منو. مسافة كافية !! قلت لو لا انتا تلف كده يمين في يمين عند الصنية شمال هيجيلك الحي السابع على يمينك بصيت لقيت اربع مطاوووي اتفتحت عليا ( السواق والي جمبوا وواحد قاعد ورى. وطبعاً الواد الي واقف جمبي شدوني من هدومي اركب اركب اكتم نفسك مش عاوزين نسمع صوت ... طلع المحفظة طلع الموبايل الي معاااااااك ... طبعاً زي ما انتوا عارفين. انا مبحبش اشيل موبيلات معايا ابداً ... المهم انهم يصدقوا ان ممعيش موبايل مش قادرين يصدقوا اني ممعيش موبايل او محفظة !!!
وطبعاً لقيت واد حاطط مطوة على رقبتي والتاني مطوة في فخدي والسواق قام طلع بالتوك توك في حته ظلمة بالزبط بالزبط امام مستشفى جامعة ٦ اكتوبر والي جمب سواق التوك توك طبعاً محضر المطوة مستني مني اي مقاومة علشان يقوم غاززني بالمطوة الرابعه في قلبي ... طبعاً هيتجننوو ازاي ممعيش موبايل ولا محفظة ... وعلى شتيام وقلت ادب { طلع الموبايل يامعفن } ... عملي بيه وممعكش موبايل ده انتا هتتقطع النهردة ... بصيت لقيت واد ابن حلال فيهم قال : لا ياجماعة بلاش قتل ... قتل لا احنا ناخود حاجتو ونعورو ونرمية هنا في اي حته ... المهم قريت اية الكرسي في سري خطف خطف وقلت خليني استشهد كمان في سري ... كنت حاسس ان ساعتي. خلاص آآن ميعادهاا وان عمري كلو ميساويش ١٠ جنية !!
وهتدحكوا لمن تعرفوا. المسروقات :
١- تم سرقة اتنين كيلو لبن جاموسي . ( فاخر جبتهم من أخوان البطة) .
٢- عدد ست ارغفة فينو فاخر من ابو نص جنية
٣- نص كيلو باسترمة .
٤- ربع كيلو حلاوة .
٥- وكيلو جبنة قريش .
٦- وكان معايا ورقة جربانة ٥ جنية في بياع مرضاش ياخودها مني حتى ... وقلي شوفلنا خمسة غيرها يا استاذ !
٧- وساعة كنت لابسها في ايدي الواد بالمطوة في ثواني عمل كده تك قطع الاوستيك وخلعها في ثواني . مع انها متسواش بصلة انا كنت واخدها هدية داعية من احد الشركات الي بنتعامل معاهم في الشغل . وقديمة بس انا قلت البسها اهي شغاله والسلام .
@@@@@@@@@@@@@@@@@@@@@
الحمد لله ربنا لطف ... الجميل انا مكنتش مصدق الي حصلي ... فمشيت لحد الحصري ووقفت هناك لقيت تالت ظباط حاطين كراسي وقاعدين عند جامع الحصري بيشربوا شاي ... وكل واحد والتاني قاااد كده ... بقيت واقف محتار اقولهم. ولا مقلوهمش علي حصلي ... طيب حتى لو قلتلهم هستفيد ايه او هيعملوا ايه ... ما هينوبني غير اني اسليهم بحكايتي وقصتي ... ولو تعاطفوا مع الي حصلي همغص عليهم كوبايت الشاي الي بيشربوها ... فقلت لنفسي يالله ولا تقول ولا تعيد سيبهم يشربوا كوبايت الشاي بالهنا والشفااا ... تلاقيهم ياعيني واقفين طول النهار. على رجليهم ومصدقوا يرتاحو شوية ثم دول بتوع مرور ملهمش علاقة بالتكاتيك فيالله بقه ... المهم موصفات التوك توك ده هو توك توك جربان عامل ستاير جلد ... العيال الي ركبينوا بشرتهم لونها بالزبط بالزبط زي بشرة احمد زكي كده او الواد رمضان بتاع عبدو موته ... البشرة الي لاهيا قمحية ولا سودة سماهم في وجوههم يا أخي ... وتلاقيهم راكبين كده مع بعض مستنين اي ضحية في الوقت والزمن والمكان المناسب ... ااااه بالمناسبة كانو مشغلين اغنية بصوت عالي. بتاعت { تسلم الايادي} تحس اشكالهم اشكال ميكانيكية او سمكرية وسحنتهم سحنت الايتام او بتوع الدار .
نصيحتي ليكم < لاشيء > مش هقدر انصحكم بحاجة بس لمن اربع شباب حتى لو كانوا اصغر منك يوقفوا ويسئلوك عن طريق او عن مكان خود بعضك وامشي وكمل على طول ( هقولك ايه ) خلي بالكو جداً جداً جداً من بتوع التاكاتيك. دول لا معلقين نمر ولا مرخصين ولا تقدر تجيبهم . وحتى. في اللجان محدش بيوقفهم ويفتشهم ... نصحتي ليكم !!! مش عارف اقولكم ايه ابقى كل واحد يشيل المطوة بتاعتوا .. هقول ايه محدش يطلع من بيتوا الا ببطاقتوا ومطوتوا معاه !! طيب ما هنتمسك ويلبسوك قضية حمل سلاح ابيض ... لان الي زينا بيتقفشوا بسهولة اما العيال الشمامة دي بيقدروا يسلكوا بسهولة ! والمطوة في جيبهم ده شيء اساسي
لمن رجعت البيت مرضيتش اقول لعيالي علي حصلي
بس مخدتيش بالي ان على بنطلومي في دم من اثار غزة المطوووة
حطيت بنتاديم وكلونيا على الجرح ومش عارف اروح المستشفى اخود حقنة تيتانوس ولا ملهوش لازمة انا خايف لا يتنقلي مرض ايدز ولا فايروس وبائي من المطوة دي الي كانت مغزوزة في لحمي ... كل الي حصلي ده ميهمنيش لكن بسئل نفسي لحد ايمتى ... لحد ايمتى العيال دي متسابة كده. لحد ايمتى التكاتيك محدش بيهوب ناحيتها وسيبين عيال شمامة. ركباها بدون ترخيص او نمر وتسرح وتمرح زي ما يحللها ... طيب انا اتسرقت مني جبنة وفينوا ولانشون وباسترمة ولبن وساعه قديمة. ياترى انتا ( بعد الشر ) لو كنت مكاني. غمض عينك كده وفكر انتا بتطلع من بيتكم معاك ايه قول لنفسك لو حد هيثبتك. هيلاقي معاك ايه وايه وايه وايه وهياخود ايه وايه وايه !
وكلو كوم والناس الي بتقولك عوزين نشجع السياحه في البلد
اه واللهي فكرة جميلة ورائعه. احنا بصو نعمل جروبات. ( جروب السطو المسلح. دول لوحدهم ) والي عاوز يطلع سياحة ويتقلب في عربيتو دول لوحدهم ونعمل خطف عيالهم وطلب فدية دول كمان كده جروب لوحدهم وكلو بسعر والي عاوز تثبيت توك توك ده بسعر وتثبيت موتسيكل ده بسعر اخر ونعمل كمان خيارات عاوز مطوة ولا خرطوش ولا الي ... والي ميعرفش ايام عصابت ريا وسكينة ... اتشال طقم كامل ايشي حكم دار وايشي باش شويش وايشي وايشي لغايت ماعرفوا يمسكوا العصابة دي ... ياترى حتت التوك توك ده مش قادرين تمسكوه
ده انا كرامتي عمال تنقح عليا وكل ما اقول لحد حصل معايا كزا كزا ... ابص الاقيه دحك وقالي وايه يعني ما انا كمان وقفوا ثبتوني وخدوا مني كزا وكزا وكزا ... ده حتى الي ما اتثبتش اكيد يعرف حد اتثبت ... دي بلد ايه دي ياربي ...
يافرحتي بعربيات اتاري ماشين ورى بعض ومشغلين السرينة ... طيب انتوا ماشين ورى بعض ليه ورايحين جين بتتمشو ليه ولا هو اي منظر والسلام ... ما توقفوا تفتشوا. اي عربية ملاكي مشتبه فيها امسكوا اي واحد داخل عكس وقفوا اي عيل سايق توك توك وقلوا بطقتك وفتشوو .
لذلك احذروا ياخونا لمن تلاقوا عيال راكبين توك توك صحاب مع بعض دول مش طالعين يتفسحوا دول طالعين يصطادوا النهرده كنت انا الضحية ياعالم بكره الدور على مييين . وربنا يقوي الشرطة ويعينهم يارب انهم يقبضوا على الاشكال الضالة دي ويخلصونا منهم . حاكم العملية كده زادت عن حدها قوي .
@@@@@@@
ياريت الي اتثبت يحكلنا هو اتثبت ازاي
علشان ناخود برضو الخبرة والعظة احنا كمان
ونعمل احتياطتنا ... وربنا يستر طريقنا وطريقكم
وتحياتي
ياريت الي اتثبت يحكلنا هو اتثبت ازاي
علشان ناخود برضو الخبرة والعظة احنا كمان
ونعمل احتياطتنا ... وربنا يستر طريقنا وطريقكم
وتحياتي
Comment