بياناتى مع بلطجى !!!!!!

[khaled_sabry]

السلام عليكم
من اسبوع (يوم الاحد الماضى) كنت بنقل ملكية عربيتي فى مرور السلام "اللعين"
كان المرور زحمه جداا و الموظفين بيتعاملو مع المواطنين فى منتهى التعالى و قله الادب
المهم كنت مطر انى اتعامل مع واحد مخلصاتى من اللى كانو ماليين المرور
و طبعا اديتله الرخص و "البطاقه اللى مكتوب فيها عنوانى"
فى اثناء ما احنا مستنيين انتهاء الرخصه قعدت معاهه و مع شويه البلطجيه اصحابه على القهوه
بصراحه فى قعدتهم استعدت اجواء فيلم حين ميسره
فمن خلال قصصهم اللى كانو بيقلوها اثناء شربهم لسجارتين حشيش اكتشفت
ان شويه البلطجيه دول ليهم علاقات قويه بالموظفين اللى جوه لدرجه ان فيه احدى الموظفات متجوزه واحد منهم و الاخ المخلصاتى اللى بتعامل معاه طلع دخل السجن كام مره قبل كده و هربان اصلا من الجيش و الشله اللى انا قاعد فيها دى منهم البلطجيه اللى بيتأجرو فى الاحداث السياسيه اللى بنشوفها و قبل الثوره كانو هما اللى بيطلعو يلمو بطاقات الناس فى بيوتهم لصالح ميمي العمده مرشح الحزب الوطنى فى الانتخابات ... الخ
فى المقابل هما اكتشفو مقدار سذاجتى و انى ابن ناس و ماليش فى الكلام ده خالص - يعنى من الاخر زبون لقطه
المهم خلص الموضوع و نقلت الملكيه و اخدت تصريح ب 6 اشهر لغايه لما يجي ملفى من مرور اسيوط - طبعا هما قالولى بعد كام شهر هات لنا التصريح و نطلعلك الرخص لكن انا مش ناوى اعمل كده و ناوى اخلصها بنفسى

اللى خلانى اكتب الموضوع ده انى لاقيت عم حاتم (المخلصاتى) بيتصل بيا الناهرده (بعد اسبوع تقريبا) بيسلم عليا !!!!!!!!!!!!
اللى خلانى اخاف انه لسه مسجل نمرتى لغايه دلوقتى ؟؟؟ لأن غير الطبيعي اصلا انه يسجل نمرتى و ليه محتفظ بيها لغايه دلوقتى

فهل هو ممكن يأذيني من خلال البيانات اللى جمعها من خلالى ؟؟ (بيانات رخصه العربيه - بيانات البطاقه و العنوان - نمرة الموبيل)

[eng.m7md.ali]

مش هقولك اكتر من انك غلطان غلط كبير اوي

[meero_boy2000]

مش محتاجه سؤال طبعا غلطان انت بتدي مفتاح عربيتك للحرامي ده الواحد لما بييجي يعمل مفتاح لفصل البنزين بيروح لكهربائي ميعرفش بيته فمبالك عموما اللي حصل حصل وربنا يسترها علينا وعليك وان شاء الله خير بس خلي بالك المره الجايه

[mr_safwt]

انت اكيد كنت فى مرور السلام لان دة وكر البلطجية
انا عارف انه مرور ابن ستين فى سبعين بس معظم الللى هناك شكلها اصلا لا يصلحوا للحياة الادمية

[khaled_sabry]

طيب يعنى كنت حعمل ايه ؟؟؟
ماكنشى ينفع اتعامل بنفسى لأن المرور زحمه و الموظفين فى منتهى قلة الادب اصلا و منتهى الهرجله
انا تبع مرور السلام ده بقالى 5 سنين و لاول مره اتعامل مع مخلصاتى لأن المره دى كانت اصعب مره اروح فيها فعلا - و بصراحه لو رجعت بالزمن كنت كررت نفس الفعل
و ماكنتش انا لوحدى اللى بتعامل معاهه على فكره
المهم سؤالى هو اخره ممكن يعمل ايه ؟؟؟

[khaled_sabry]

علشان تبقو معايا فى الصوره

http://www.nilemotors.net/Nile/310966-a.html#post3874550065

من ردود احد الاعضاء فى الموضوع السابق بيقول انه لما بيروح هناك بيروح من الساعه 9 و على الساعه 2 بيبقى مخلص مصلحته و مروح
انا كنت بعمل كده طول ال 5 سنين اللى فاتو
انا بقى المره اللى بتكلم عليها كنت هناك من الساعه 8 (من قبل حضور الموظفين ) و كان يوم الاحد (كنت واخد اجازه مخصوص) و كان زحمه و قلة ادب من الموظفين غير طبيعيه ماشفتهاش عمرى قبل كده

[khaled_sabry]

انا خطر فى ذهنى خاطره
هل ممكن التصريح اللى استلمته (تصريح كمبيوتر) و اللوحات الجديده (اللى استلمتها من الشباك بنفسى) يكونو مزورين و الاخ اللى اتصل بيا ده بيتصل علشان يطمن هل اكتشفت الخدعه و لا لاء ؟؟

[saddam]

صديقي المواطن
قولا واحدا لا تقلق ومفيش حاجة وأنا خبرة في مرور السلام وده تلاقيه الدنيا كانت ناشفه عنده فبيحاول يقلب عيشه بأنه يفكرك إنك لو عزت حاجة إوعه تروح لمتعهد غيري وأحب أفهمك بطاقتك محدش يعرف يعمل بيها حاجة
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

[khaled_sabry]

صديقي المواطن
قولا واحدا لا تقلق ومفيش حاجة وأنا خبرة في مرور السلام وده تلاقيه الدنيا كانت ناشفه عنده فبيحاول يقلب عيشه بأنه يفكرك إنك لو عزت حاجة إوعه تروح لمتعهد غيري وأحب أفهمك بطاقتك محدش يعرف يعمل بيها حاجة
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

انا دلوقتى مش مقلق من البطاقه - لأن صور البطاقه مترميه فى خمسين حته من زمان :)
لكن دلوقتى فكرت - هل ممكن انى اكون اتعرضت لعمليه نصب كبيره و تكون العربيه انتقلت ملكيتها ليه هو مش انا - هو اخد منى الرخص القديمه و خلانى اسلم بنفسى النمر القديمه على الشباك (ملاكى اسيوط)
و بعد كده هو جابلى تصريح (كمبيوتر- شبه الرخصه بالظبط بس مافيهوش ختم ) ب 6 اشهر و اللوحات الجديده انا اللى استلمتها برضه بنفس الارقام اللى فى التصريح طبعا
فهل فيه احتمال ان التصريح اللى معايا ده يكون تصريح مزور و الحقيقى يكون فيه اسم المالك اسم واحد منهم فى تصريح تانى يكون معاهم ؟؟

[Khalid_Mostafa]

يوم اجازة تاني و تروح تسأل في المرور...ومتسألش موظفين و لكن تسأل ضابط

[أحمد كمال]

انا دلوقتى مش مقلق من البطاقه - لأن صور البطاقه مترميه فى خمسين حته من زمان :)
لكن دلوقتى فكرت - هل ممكن انى اكون اتعرضت لعمليه نصب كبيره و تكون العربيه انتقلت ملكيتها ليه هو مش انا - هو اخد منى الرخص القديمه و خلانى اسلم بنفسى النمر القديمه على الشباك (ملاكى اسيوط)
و بعد كده هو جابلى تصريح (كمبيوتر- شبه الرخصه بالظبط بس مافيهوش ختم ) ب 6 اشهر و اللوحات الجديده انا اللى استلمتها برضه بنفس الارقام اللى فى التصريح طبعا
فهل فيه احتمال ان التصريح اللى معايا ده يكون تصريح مزور و الحقيقى يكون فيه اسم المالك اسم واحد منهم فى تصريح تانى يكون معاهم ؟؟

الملكية ما بتتنقلش من غير عقد بيع في الشهر العقاري ......

[AhMeD MeTwAlY]

انت روحت للتصريح !!! ربنا معاك
لواحات مزوره ورخصه مزوره اعمل استعلام عن مخالفات اللوحات والرخصه
عايز تتطمن اكتر روح اعمل محضر فقد لوحات وطلع ليك لوحات جديده برخصه جديده انا كان معايا عربيه زي حلاتك كدا جيبها من بورسعيد وفضلت عندي سنه وشوية وبعتها بالتصريح بردو بس لما كان التصريح ينتهي كانت اعمل محضر فقد رخصه ومدة 15 يوم يا راجل دي بلد ماشيه من غير نظام
ودمتم للنضال علي راي صدام

[khaled_sabry]

يوم اجازة تاني و تروح تسأل في المرور...ومتسألش موظفين و لكن تسأل ضابط

انا فعلا روحت ولسه راجع و سألت اتنين موظفين و الاتنين اكدولى ان التصريح سليم و التوقيع اللى عليه سليم
بصراحه طمنونى اوى
لكن برضه حعمل بنصيحتك و اسأل ظابط - بس الاسبوع اللى جاى بقى

[wawamoha]

و لا الهوى هو بيحاول يدور عل شغل بس .. و انا بضطر للاسف اتعامل مع الناس دي في مرور فيصل بس ما بقعدش معاهم عل القهوه ..خللي في حاجز بينك و بينهم
ماتقلاقش ان شاء الله خير

[mrghost]

واحد زميلى ضحكوا عليه واحد منهم
قاله هات اجيبلك المخالفات واخد منه 100 جنيه كأن فى مخالفه ع العربيه واتضح انه خد ال 100 جنيه وخلع وزميلى اكتشف ان العربية معليهاش حاجه وفضل واقف ف الطابور كمان لحد ما استلم الرخصة