اتخانقت مع صاحب كشك غسيل السيارات

[moody_687]

كنت راجع مع اختي من عند دكتور الاسنان والعربية كانت كلها طين من المطر وبعدين قلت اغسلها بالمية ع السريع حتى من غير تصبين وبالفعل غسلتها واللي بيغسل سرسجي وشكله صايع المهم خلص واديته 5 ج قالي ايه ده قولتله انا بغسلها ف المحل ب 5 ج لو مية بس لكن لو تصبين ب 10 ج قالي خليهالك انت لو لقيت ذرة تراب فيها ليك الحق قولتله اساسا العربية متنشفتش ومعمولة اي كلام قولتله من الاخر عايز كام قالي 15 ج
قولتله نعم 15 ج كمان ليه فقولتله بقولك ايه هما ال 5 ج هتاخدهم ولا قالي مش هاخدهم قولتله عنك مااخذتهم
ورايح اركب العربية عشان اختى سايبها لقيته بينادي وبيقولي انت بتبرطم بتقول ايه ولقيت اتنين سرسجية جايين تبعه وبيقولولي هات 10 ج وخلص الليلة عشان منكسرش عربيتك ورايح التاني يجيب شومة عشان يضربني بيها
انا مردتش اتكلم عشان اختي معايا وخايف يحصلها حاجة واضطريت اطلع 10 ج ودفعتهاله
انا عايز اخد حقي عشان هو قل ف ادبه وشتم وانا الشخصين محاوطين عليا
انصحوني اعمل ايه انا بفكر اجيب ناس واروح ادرمغ ام الكشك عليه وساعات اقول اهو موقف وعدى ومتكبرش الموضوع عشان ممكن يكون له توابع مش كويسة مش عارف اعمل ايه وهل انا غلطان عشان دفعت الفلوس بالرغم انه قل ف ادبه معايا

[amr011111]

هوه احنا مش فى دولة القانون علشان كده كبر دماغك وخلاص لان توابع الموضوع ده كتير الا بقى لو انت اصحابك كتير وتخدهم وتقوله هات ال 10 جنيه ومتروحش بالعربيه

[أبو آسر]

هوه احنا مش فى دولة القانون علشان كده كبر دماغك وخلاص لان توابع الموضوع ده كتير الا بقى لو انت اصحابك كتير وتخدهم وتقوله هات ال 10 جنيه ومتروحش بالعربيه

[aldesha989]

انتا غلطان
انتا اللى ما سئلتش من الاول هتأخد كام وله حق يعمل اللى يعمله بعد كده

لما كنت بركب اى تاكسى زمان
كنت بعمل حاجه من تلاته
بسئل قبل ما اركب هتأخد كام
بدفع اللى يقول عليه
بديله بزياده

ليه بقى لان ليا تجارب كتير مع السواقين ولاد الحلال دول
قعدت فتره كل ما اركب مع سواق تاكسى نتعارك انا وهو ومره وصلت لمد الايد وكان معايا والدتى وما استفدتش حاجه غير انى هزقت نفسى مع واحد ملهوش اى تلاتين لزمه
فكان لازم تقوله هتأخد كام فى الغسيل
انا لما بروح اغسلها عند حد ببقى عارف هو هيأخد كام او بسئل قبل ما اعمل اى حاجه يمكن يا اخى ماعيش ال 15 جنيه دول ومعايا 10 جنيه بس بدل ما احرج نفسى بسئل وبريح دماغى من الشمامين دول

للاسف مصر لا فيها قانون ولا فيها غير الشمامين والحمد لله على نعمة الاسلام وكفى بها نعمه

[Silent~Dream]

هو موقف يضايق بس كبر دماغك دى ناس متستحقش الواحد يتعامل ولا اصلا يبصلها حضرتك المفروض كنت سالت فعلا قبل الغسيل لان هنا كل حاجه ماشيه بالبركه

[dedi]

يا باشا كبر دماغك دى اشكال صيع وضفرك برقبة 50 واحد منهم دول تلاقيهم مبلبعين حاجة

[mk3]

يعنى المجموع كله 15 ولا 10

[DODGE2013]

كان المفروض تساله تاخد كام الاول

انا اي حاجه بجبها او خدمه بتتقدم لازم اعرف بكاااااااااااااااام

بس لو قدرت تلم صحابي وتاخد حقك يكون افضل لانه علم عليك بصراحه

ولو اخدت حقك حيخاف يعمل كده تاني مع حد وتبقى كسبت ثواب بردوا

[miceg]

بصراحة غلطتك انت من البداية
كل منطقة وليها التسعيرة بتاعتها والموضوع كله طالما انت مسألتش .. هو من حقة يطلب اللي هو عاوزه
لكن ياه لو سألته من البداية .. هتشيل نفسك من الموقف البايخ ده
السرسجية دول ملو مصر
من كام يوم كنت راكن عربيتي بره النادي وكنت لسه غاسل العربية غسلة معتبره
والعربية مافيهاش نص إبره باين
لقيت المساحات مرفوعه وإبن الحلال اول ماشافني جاري يلمع العربية
ومستنيني وانا بدور اني اطلعله حاجة
قولتله هو انا قولتلك اعمل حاجة فالعربية
سيادتك الفوطة الزفرة بتأثر على البوية ودلوقتي انت أذتني وسبته ومشيت
فيه مبدأ لازم تعود نفسك عليه
ما أخذ بسيف الحياء فهو حرام
وسامح المسامح كريم
متلوثش إيدك مع الاشكال دي

[foxhonda2008]

كبر دماغك يا كببر بس بعد كده اسأل الاول
وتخيل لو روحت و لميت صحابك و كلته علقه موت وواحد صاحبك راح مشيلوا بأي حاجه انت قلي هتحاسب علي المشاريب
قصر الموضوع خلص الكلام و اديك بتتعلم

[miceg]

كان المفروض تساله تاخد كام الاول

انا اي حاجه بجبها او خدمه بتتقدم لازم اعرف بكاااااااااااااااام

بس لو قدرت تلم صحابي وتاخد حقك يكون افضل لانه علم عليك بصراحه

ولو اخدت حقك حيخاف يعمل كده تاني مع حد وتبقى كسبت ثواب بردوا

ياباشا مش دول اللي لما تاخد حقك منهم يتعظو
انت اكيد تقصد حد تاني وطبقة ثانية غير دول
وبعدين بعد ماياخد حقهم ويراضي نفسه ايه اللي استفاده
بالعكس هيحط نفسه فتفكير وشغلان البال
وممكن يحصل مالم يحمد عقباه

[akramlail]

كبر دماغك عادي بيحصل اكتر من كده
انا كنت راجع من القاهره ايام الحظر وكان الشكمان مكسور وصوته عالي الساعه اتنين بالليل ومعايا مراتي المهم الشكمان وقع وفرده الكاوتش اللي جمبه ضربت معرفش ليه ومفيش غيري ف الطريق فضلت ماشي ع الجنط ومعيش استبن لحد ملقيت كشك بتاع كاوتش فيه عرباوي طلعلي فرده زباله وحطلي فيها قلب وانا مرعوب لا يسبتوني بس مضطر جيت احاسبه وقلتله متستغلش الظروف قالي لا ابدا عاوز كام قالي 250 جنييييييه اقوله ازاي دي جديده ب 300 يقولي ده سعرنا فضل موقفني بتفاوض معاه نص ساعه واخد 150 بالعافيه وبيقولي سيبلي حاجه من معاك رهن للاسف الناس بقت وحشه جدااا والواحد كل يوم بيزعل انه عايش في هذه البقعه من الارض

[فبريكا]

زميلي العضو العزيز ... حمدلله على سلامتك وانت عملت موقفين احدهما صح والاخر غلط ... الصح انك راعيت ان معاك اهلك واحترمت نفسك وهين قرشك ولا تهين نفسك .
الغلط انك تغسل عند حد وصايع وماتسالوش بكام حتى لو قالك مش حنختلف صمم انك تعرف بكام لان الاولوا شرط اخرو نور .

بالنسبة تتصرف ازاي فيه مواقف لازم تحكم عقلك فيها اولا المبلغ مش كبير للدرجة علشان تعمل كل الشوشرة دية وتجيب صحابك وحتى لو جبت اصحابك حد فيهم يا اما حيتعور او يموت او حد من اصحابك حيعور او يموت وفي كلا الحالات حتقع في مشاكل. المسامح كريم ومحدش بيتعلم ببلاش والغلط مش اننا نغلط ولكن الغلط اننا نقع في نفس الغلط مرة تانية .

بالتوفيق

[DODGE2013]

ولا اقولك كبر دماغك وسبها على الله ربنا بياخد الحق

[mastr_n]

انت حكمت عقلك ودة الصح لأن الدنيا مش متعادلة انت لوحدك وهما معاهم شومة وانت معاك اختك

وكبر مخك واقصر الشر احسن وبلاش تروحلهم تانى ممكن يحصل فى الامور امور ويبقى انت الخسران

انت المفروض كنت هاندلت الموضوع من الاول خصوصا ان معاك حريم
المرة اللى جاية تخن صوتك مع الاشكال دية خش فيهم بسدرك هايكشوا بس كلوا بالعقل والطريقة ممكن منغير خناقة يكشوا منك