بتدفع كام شهرياً للعماره

[amr011111]

عندنا عداد السلم و عداد للاسانسير
انت مقولتش ان البواب و نضافة السلم داخلين معاكم ... تفصص المصروفات .. الشقق الساكنه تدفع الميه و الكهربا .. كل الشقق (ساكن او لا) يدفع للبواب و النضافه لانهم بيستفيدو كده كده ... طبعا هتتخانقو و محدش هيرضى يدفع بالساهل بس حاولو

للاسف 9 شقق وشقتين منهم مش بيدفعوا غير كل فين وفين

[mahgary]

25 نظافة العمارة و كهرباء السلم لان عندى عداد مياه و15 للجنينى العمارة 24 شقه والساكنين 15 شقه

[yuong313]

احنا برج 13 دور فيه شقق وفلل دوبلكس عدد الشقق 33 شقة العدد الفعلي اللس ساكن 24 شقة عدد الشقق اللي بتدفع فعليا 20 شقة
المصاريف الثابتة الشهرية
1300 ج نور سلم
500 بواب
100 صيانة اسانسير
بندفع شهريا كل شقة 100 ج قابل للزيادة او النقصان
اوقات ماتور الماية يتحرق في مصنعية كهربائي وادوات كهرباء
واوقات بنشتري حاجات للاسانسير واي شيء اخر بيتم حسابه وبيتقسم بالتساوي

طبعا في بلطجة وليه وعلشان ايه ومش دافعين واللي بيتهرب واللي يعمل نفسه مش موجود طول الوقت
من الاخر احنا شعب عايز يعيش ببلاش

[sas5]

يوم الخميس الماضى دفعت فاتور الكهرباء لعداد السلم والاسانسير 44 جنيها
جراج وارضى وخمسه ادوار والاسانسير بيستخدموا الكهرباء
ودفعت لشقتى 92 جنيها بالرغم انه مفيش مكيفات طوال الشهرين الماضيين حاجه غريبه

[SAMEH_FOUAD]

اول حاجة عشان تبقى عارف , لما يجى وصل النور والكهرباء بتاع العمارة , لازم الاول تشوف القرايات متقاربة ولا لأ , عشان ممكن يكون بتتاخد عشوائى يعنى لو جاتلك الفاتورة مرة 1000 جنية هتجيلك كل مرة 1000 جنية كحساب متوسط الاستهلاك , ودة حصل معايا لانى ماسك اتحاد ملاك العمارة اللى انا فيها , جاتلنا الفاتورة 1600 جنية , وهية اصلا بتيجى كل مرة 800 جنية بالكتير , فقولت لمحصل النور مش دافع وورينى العداد هل مطابق ولا لأ , بتنشوف الرقم لاقينا الدنيا مختلفة تماما , قولتلة بس سيبلى بقى الكعب وانا هتظلم ,

موضوع العمارة عشان تبقى عارف تمشى ازاى

1- اتفق الاول مع فنى اسانسير يجيى يعملك صيانة دورية للاسانسير كل شهر بملبغ ثابت دة هيوفر عليك حاجات كتير , وهيحافظ جدا على الاسانسير

2- الفاتورة اللى تيجى تتقسم على عدد السكان وتتدفع

3- تخصصوا مبلغ شهري للطوارىء وليكن مثلا 20 جنية

4- اللى ساكن يتحاسب زى اللى مش ساكن لسبب واحد ان فواتير الكهرباء والمياة مش بتيجى على الاستهلاك فعليا , لأ هية بيتعملها متوسط على حسب عدد الشقق الموجود فى العقار يعنى لو عمارة فيها 20 شقة وساكن منها 10 بس , هيجى الاستهلاك اعلى من عمارة فيها 10 شقق بس

[qkash.com]

فيه ناس كتير معندهاش دم ومبتحبش تدفع...بلطجة بقي استخسار- نتانة -غلاسة كلاً حسب شخصيته
بس تقول ايه بقي لازم تتعايش مع النوعيات دي لأنهم حوالينا في كل مكان

[المنسي]

هتكلم عن العمارة عندى العمارة 20 شقة ساكن منها 6 شقق فقط لاغير كل ساكن مننا بيدفع للبواب مبلغ 80 جنيه مقسمين 50 شهرية للبواب و 30 غسيل العربيات لما بتيجى فاتورة كهرباء للسلم والاسانسير ( الاتنين على عداد واحد ) بتتقسم على الشقق الساكنة فقط والكهرباء بتيجى ساعات 140 او 120 بس وصيانة الاسانسير فى الشهر 115 جنيه بتتقسم برده على 6 شقق والمية بتجى مبلغ هايف يعنى ممكن كل شقة تدفع 10 او 15 جنيه بالكتير
اعرف عمارات عاملة وديعة فى البنك وبيصرفو منها وعمارات تانية مقسمين الشهرية يعنى اللى مش ساكن يدفع نص اجرة الساكن ( عايزين نعمل كده فالعمارة مش عارفين )