التراب .. ليه ؟

[swimmer25]

4 حاجات بتخليني أشغل التكييف في دبي واقفل الإزاز ولما بيكونوا مش موجودين بفرح جدا عشان أنزل إزاز العربية زي ما كنت بعمل في مصر وأنا سايق

الجو الحر جدا
العواصف الترابية الكتيرة جدا
الرطوبة العالية جدا
السرعة العالية ...بس مش شرط دي لو الباقي مش موجودين

شوف الحتة دي جامدة
Mission: Impossible Ghost Protocol "Sandstorm Chase" Movie Clip Official [HD] - YouTube

[hilal]

صديقي العزيز
شوف سيارات جمع القمامة وهي بتوزع القمامة بالعدل على الشوارع أثناء سيرها وانت تعرف السبب
عن المحليات حدث ولا حرج
نقطة البداية شوف ثروات المسئولين في المحليات وانت تجيب من الآخر

[Ahmed_Adham]

عشان عندنا مش كل الرصيف مبلط وخصوصا اللي بين الاتجاهين (ده واحد)
وعشان الناس بره عندها عربيات بتلحس الاسفلت يوميا انما عندنا في المواسم بس (ده 2) حتى لما بيقررو يشيلو التراب اللي على الطرق (زي الدائري من اسبوع كده) بيجمعو التراب أكوام على جنب ويسيبوها يومين تلاته على ما عربيه تيجي تشيلها وبالتالي يكون باقي 10% من التراب بعد ما 90% طار وبهدل الطريق تاني.

خلاصه الكلام كل الدول فيها تراب بس مش كل الدول بتنضف الطريق يوميا.

[Anaslbda]

للمعلومية كان في مشروع جبّار أيام حكومة نظيف كان المفروض يتعمل حزام من الشجر حوالين القاهرة الكبرى كلها وفعلاً بدأ العمل فيه, لكن فجأة توقّف وفلوسه راحت للجهاز الوطني لتنمية سيناء. متعرفش فساد ولا سوء تخطيط.

أنا كنت شغّال في مشروع لتوليد الكهرباء من الطاقة الشمسية, المشكلة الكبرى اللي كانت بتواجهنا هي إن الألواح اللي بتمتص أشعة الشمس محتاجة مسح كل 5 دقائق عشان الغبار وكانت بتبوظ بسرعة.

اللي ينرفز فعلاً عمّال النظافة اللي بيكنس الشارع ويقوم مجمّع التراب تحت الرصيف ويسيبه على كده ويروّح. اليوم اللي بعديه الهواء بيوزّع التراب مره تانية.

سوء تنظيم على تخطيط على قلّة ضمير على قلة نظافة على ناس معندهاش دم على حكومة حرامية.
الله المستعان

[hossam_elwani]

4 حاجات بتخليني أشغل التكييف في دبي واقفل الإزاز ولما بيكونوا مش موجودين بفرح جدا عشان أنزل إزاز العربية زي ما كنت بعمل في مصر وأنا سايق

الجو الحر جدا
العواصف الترابية الكتيرة جدا
الرطوبة العالية جدا
السرعة العالية ...بس مش شرط دي لو الباقي مش موجودين

شوف الحتة دي جامدة
mission: Impossible ghost protocol "sandstorm chase" movie clip official [hd] - youtube

المهم النتيجه البلد نضيفه فى كل الاحوال !!!!!!!

[hossam_elwani]

بمنتهى البساطه علشان احنا معفنين......ومحدش بيشوف شغله
انت فاكر ان كل البلاد مبتتوسخش ......لا طبعا بتتوسخ من عوامل الجو ....ورغم ذلك تلاقى الشوارع بتلمع لان فيه ناس شايفه شغلها
بالاضافه ان احنا كمان بنوسخ الدنيا ...يعنى تلاقى واحد مكسر شقته ورامى الكسر فى الشارع ....فالزم الشارع يتوسخ
بتوع الزباله هناك بتشتغل بجد مش واحد واقف وماسك مقشه علشان يشحت وخلاص
انا ليا واحد لسه راجع من ابو ظبى كان هناك سياحه ....بيقولى انا وقفت وسندت على صندوق الزباله وانا معرفش انه هو دا صندوق الزباله.....متخيل انت بقى صندوق الزباله دا كان شكله عامل ازاى....علما بان صندوق الزباله هناك لونه ابيض.
شوف عندنا بقى صندوق الزباله بيبقى عامل ازاى .....تعرفه من على بعد كيلو .

+1111111111111

[marsguy]

كنت قرأت من فتره إن السبب في الموضوع ده هو جبل المقطم

كل يوم بيحدف على القاهره غبار وتراب

مش عارف مدى صحة الكلام ده إيه

[S O P H O S]

مش عارف السبب
ولكن الجيل الجديد هيستحمل يعيش كام سنة
فالجو الملوث ده !

[benmatar]

أحد الأسباب العلمية الرئيسية للموضوع ده هو جبل المقطم
إيه؟؟؟؟؟؟؟؟
أيوة يا فندم جبل المقطم هو بمعنى أصح هضبة مرتفعة في وسط القاهرة ومش صخرية وإنما جيرية في أغلب الطبقات يعني ببساطة مش زي جبال مكة أو جبال لبنان (أمثلة لجبال صخرية داخل المدن وحولها) ومع ذلك معندهومش التراب اللي عندنا.
دول الخليج العربي عندهم تراب برضه بس عبارة عن غبار الصحراء (رملة ناعمة جدا) ودي أرحم من الهضبة الترابية اللي عندنا، بالإضافة لمعدلات التلوث المهول والزحام الشديد اللي بيخلي التراب عندنا محمل بالملوثات الضارة وعوادم السيارات ولو زودت عليهم شوية رطوبة تحصل على النتيجة النهائية ألا وهي الهباب اللي احنا فيه.
طبعا لو ركنت عربيتك في مدينة مطروح أو مدينة السويس أو الشروق او اكتوبر مثلا تلاقي بعد عدة أيام طبقة من التراب برضه ولكن مش سوداء زي اللي بتتراكم على العربية لو ركنتها ساعتين في وسط البلد عشان نسبة الملوثات اقل ومش مشبعة بالأجسام السوداء زي قاهرة المعز.

[abdulkhaleq]

هيييييييييييييه فكرتني بأيام الخليج
الرطوبه خزعبليه
والحراره بتسيح الكوتشيهات
والقميص الأبيض لحد اما يدخل الغساله ياقته بتبرق بياض !!!
مصر بلد معفنه جدا ياعزيزي
الهواء ملوث قوي (اكتر من دول الخليج بحوالي 5 مرات مثلا)
مافيش اي تخطيط للنظافه عموما ولا للشوارع ولا لأي حاجه
عربيات الميكروباص والفيسب اللي عماله تعبي الهوا عادم
و...
كفايه كده عشان البلد دي بتجيبلي اكتئاب

[drcobra]

الشوارع مبتتكنسش خالص الناس بتوع النظافة اخرهم يلموا ورقتين

[Y a r i s]

معليش طيب هو اسكندرية مفهاش جبل المقطم وبرضوا اذا دخلت دهاليز وحواري الاسكندرية في بحري والابراهمية والعاصفرة الدهاليز الدهاليز هتلاقي العفرة دي .

بصو في الخليج او في اي بلد محترم في الدنيا في حاجة اسمها عربيات بتكنس الارض ... العربيات يومياً بتعدي في جميع الاحياء وعلى كل الشوارع يومياً ... في مصر. عندنا عربية في شارع الهرم وعربية في مدينة نصر وعربية في اكتوبر بتعفر الدنيا وعربيتين في المعادي وبنشوفهم فس المناسبات فقط ... لكن في الدول التانيه العربيات بتشفط الغبار والعفار من الشوارع بصفة يومية ... بخلاف مصر الي مفهاش شوارع. اصلاً متسفلت اسفلت زي العالم والناس ... وتحياتي

[wawamoha]

مع احترامي الشديد جدااااااااااا لكل الاراء دي :
بص يا باشا عل جوجل و انت تعرف ..................................

الاصل ان القاهره و كل محافظات الدلتا مبنيه في وسط الدلتا اللي هيا تربه طينيه ...فعادي جدا انك احنا نبقى عايشين في متربه .....
الجو في اوروبا مطير ...يعني التراب اللي بيطلع عندهم بينزل عل طول بالمطر .. فلتر طبيعي - اما عندنا فجاف ..اي ترابه تطلع من الارض تصل لعنان السماء ...
عاوز تتاكد و انت نازل من الطياره بص عل القاهره ..... كالحه متربه غير اي مدينه تانيه

هذا و الله اعلم

[moudy88]

الموضوع بسيط جدا ...وهو بسبب انعدام النظافه والطرق والشوارع المتكسره واللي مش متسفلته

انا ساكن في حدائق القبه

لو قولت للبواب امسحلي العربيه علشان نازل واتأخرت ساعه ...والله العربيه بتبقى كأنها متمسحتش

ولما روحت مارينا ...العربيه فضلت 4 ايام ولسه بتلمع ومش محتاجه مسح

شوفوا الفرق مابين مارينا وحدائق القبه وباقي مناطق مصر ..هتعرفوا ليه البلد مليانه عفره وتراب

وعلى فكره انا كنت عايش في السعوديه في المدينه ومكه والعربيه مكنتش بتبقى بالمنظر ده زي مصر