موقف حصل مع عساكر امن مركزى فى القطار عايز رايكم فيه

[RAPID]

انهاردة ركبت قطار مميز من احد المحطات ومن المحطة اللى بعدها ركب حوالى 100 عسكرى امن مركزى ومعاهم اشولة فيها حاجتهم رايحين تقريبا وحدة تانية ومعاهم الظابط، اول ما ركبوا عسكرى جه وطلب من الركاب يسيبوا العربية ويروحوا عربية تانية كله مشى الا انا قلتله مش هتحرك من مكانى وشوف نفسك رايح فين قالى احنا عساكر قولتله عايز تقعد اتفضل مش عايز اقعد على جنب

الظابط شايف الحوار من اوله جه وبيقولى لو سمحت العربية دى للعساكر ومينفعش حد مدنى يقعد معانا، قلتله ليه قالى عشان العدد والحصر ومعرفش ايه، قلتله على دماغى من فوق بس للاسف مش هتحرك من العربية انا هنا قبلكم كلكم ومش من حقك تقومنى من مكانى .. المهم هو حس ان دماغى جزمة تقريبا وانا عليت فى دماغى انى مش هتحرك فسكت وقعد مكانه وكملت رحلتى من غير ما اسيب مكانى

دلوقت عايز اعرف هل من حق عساكر الداخلية او الجيش يقتحموا عربية فى قطار ويخلوا الركاب منها وهل ده قانونى ولا لأ؟ وعايز اعرف اللى انا عملته ده صح ولا غلط ؟ بصراحة دمى محروق من الموقف ده

[Merooxx]

يا عمي ولا تحرق دمك ولا حاجة ومعلش احمد ربنا اللي هوا سابك ومعملش معاك السليمة
( وبركه تشوفو مصر)

[matrix_it]

اكيد مش مكتوبة فى القانون ! تصرفك سليم

[abo_lamar]

ومفيش حد خالص من الركاب اتكلم ولا اعترض ؟؟؟؟؟؟؟؟

هو عربية القطار بتشيل كام راكب يا باشا عشان يبقى في ركاب في العربية ويطلع 100 عسكري بالضابط بتاعهم

بالشيلة و الحمولة اللي معاهم ؟؟؟؟

اللي اعرفه ان يا باشا في سيارات مخصوصة تبع الجيش او الشرطة بتنقل العساكر لو كانوا بيتنقلوا من وحدة

لوحدة تانية مش بيتنقلوا بالقطار بالعدد الكبير ده ....

[starlanos]

لاء انته مش غلطان عارف لو كان ايام المسجون مبارك كان زمانك متظبط
لازم الكل يتصرف زيك

[hossam_elwani]

ﻻتتحدث عن القانون واحترامه انت فى مصر

الى انت عملته صح

[prof2013]

البلد من غير رئيس فكل واحد رئيس نفسه دالوقتي ومفيش قانون بيحكمنا
وتحياتي

[AHMED12345678]

القطارات الحربية هى للعسكريين فقط وركوب المدنيين استثناء وبغرامه
اما القطارات المدنية فللمدنيين والعسكريين على حد سواء دون تفرقة فى الركوب
والتفرقة فى القطارات المدنية فقط للحاجزين بالعربات المكيفة
واعتقد ان العربية الى حضرتك كنت راكب فيها مكنتش مكيفة
الى حصل دة مش قانونى

بس عايز تعرف الناس لية سابت العربية بسهولة
اقولك
علشان اللبس الميرى بتاع العساكر وخوف الناس من استهداف العساكر من اى عمل ارهابى فيتخدوا فى الرجلين
علشان كدة سابوا العربية للعساكر
وكان المفروض تسيب العربية لسلامتك الشخصية خصوصا ان عدد العساكر مغرى لاى عمل ارهابى

[عصام غنايم]

اللى حضراتكم متعرفهوش ان العساكر هى اللى تتحاكم مش انت

هم ليهم خطوط عسكريه تنقلهم ومش من حقهم يركبوا مواصلات مدنى

افتكر وانا فى الصاعقه عسكرى مات فى حادثه جوه ميكروباص مدنى وهو مروح بلدهم فى اجازته

جابوا البدله بتاعته وحاكموها واتعلقت واتضرب عليها رصاص ( يعنى اعدموا البدله )

واهله مخدوش ولا جنيه تعويض

[monamize4]

البلد من غير رئيس فكل واحد رئيس نفسه

like

بس عايز تعرف الناس لية سابت العربية بسهولة
اقولك
علشان اللبس الميرى بتاع العساكر وخوف الناس من استهداف العساكر من اى عمل ارهابى فيتخدوا فى الرجلين

ممكن برضة

[matrix_it]

اللى حضراتكم متعرفهوش ان العساكر هى اللى تتحاكم مش انت

هم ليهم خطوط عسكريه تنقلهم ومش من حقهم يركبوا مواصلات مدنى

افتكر وانا فى الصاعقه عسكرى مات فى حادثه جوه ميكروباص مدنى وهو مروح بلدهم فى اجازته

جابوا البدله بتاعته وحاكموها واتعلقت واتضرب عليها رصاص ( يعنى اعدموا البدله )

واهله مخدوش ولا جنيه تعويض

البقاء لله بس ليه يعدموا البدلة ثانيا هو اذنب فى ايه عشان كل دة؟؟

[عصام غنايم]

البقاء لله بس ليه يعدموا البدلة ثانيا هو اذنب فى ايه عشان كل دة؟؟

لم يتبع تعليمات الأمن العسكريه بأستخدام خطوط المواصلات العسكريه فقط وركب مواصلات مدنيه مع مدنيين

[r0xer]

موقف ايجابي منك..وببساطة الظابط جاب ورا لانه عرف انك عارف حقك وفاهمه.

مش من حقهم اطلاقاً يخلوا اي مكان إلا في حال وجود خطر يهدد الركاب وطبعا دا والقطر واقف مش عشان يقعدوا مكانكم وبيكون في رتب تانية كبيرة وشغلااااااااااااانة!

ثانياً، لو حصل وكان طول معاك في الكلام او قل ادبه...كنت حاول تصور شكلهم ولو معرفتش يبقى عالاقل تعرف رقم القطار وانت طبعا عارف اتحرك الساعة كام، وتاخد بعضك على مكان من 2:

والكلام الجاي دا لأي حد يتهان من ظابط شرطة أو جيش، اللهم بلغت..:

لو العيال دي شرطة يبقى طوالي عالتفتيش بتاع الداخلية واوعى تمشي من هناك غير لما تكتب مذكرة باللي حصل وتقدمها ولو معاك شاهد مثلا، يبقى اتأكد 100% هيتنفخوا.

لو جيش، يبقى تطلع على العفريت والبعبع الكبير...سرية 28 في مدينة نصر. بيسموها س28.

والأيام دي من ساعة ما عمو طنطاوي مشي وحمدي بدين مشي وكل الشلة دي...واي شكوى بقت تتقدم بقى يتفرم صاحبها لو اثبت عليه حاجة، ومتقلقش هما مش موالفين مع بعض لان هناك تعارض في المصالح :)

موقفك ايجابي وفعلا كلنا بنحييك عليه.

[abo_lamar]

وكان المفروض تسيب العربية لسلامتك الشخصية خصوصا ان عدد العساكر مغرى لاى عمل ارهابى

معلش يا باشا ماتزعلش مني .. جملة مستفزة بصراحة ...!!

يعني ايه يسيب العربية لسلامته الشخصية عشان عدد العساكر كتير و مغري لاي عمل ارهابي ؟؟؟؟

هما العساكر دول مش بني أدمين زينا وفاكر أن ارواحهم رخيصة ومالهاش قيمة فخايف على زميلنا انه يقعد

معاهم في عربية واحدة لحسن يا عيني تيجي الطوبة في المعطوبة و يموت معاهم في اي حادث

ارهابي ممكن يحصل لقدر الله ؟؟؟

ربنا بيقول في كتابه الكريم ...

بسم الله الرحمن الرحيم ...

أينما تكونوا يدرككم الموت ولو كنتم في بروج مشيدة

صدق الله العظيم .

[mfs3570]

هوه ليه اغلب الردود بتتكلم عن العافيه وعدم احترام القانون .....ليه ميكونش فعلا اجراء امني ليه ميكونوش ركبوا القطار خوفا من استهداف سيارتهم ....هوه فيه حد اطلع علي الامر اللي مع الظابط انه مسموح يركب القطر ولا لاء هل فيه ظابط هيجازف بمستقبله لو العساكر دي حصلها حاجه .......... كان فيه حاجه زمان اسمها روح التسامح .......... زمان بقا ....ولاتنسي حضرتك انه كان ممكن يخلي العساكر دي اللي اغلبهم مش متعلمين .يضايقوك طول الطريق .لكن للاسف هوه كان محترم بكلام حضرتك ...ليه كلنا منخليش التسامح هوه اللي بيننا متهياءلي ان لو كان ال100عسكري دول سواقين ميكروباص او بلطجيه كنت هتنزل حرصا علي سلامتك واحترامك لنفسك ...لكن لانه كلمك باحترام فحضرتك عاملته كده