موقف حصل معايا. عايز رأيكم

[Mohamed_Hamid]

السلام عليكم ورحمة الله وبركاته

كنت من كام يوم فى كارفور ومعايا المدام بنجيب شوية طلبات. واحنا جوه حبيت اشرب سبرايت وخدتها من الثلاجة اللى جوه وفتحت الكانز وشربت منها. ثوانى كدة لقيت شاب من الأمن جوه الماركت جالى وطلب منى بأدب شديد انى احاسب على الكانز. طبعا انا اتفاجئت واول مرة يحصل معايا الموقف ده واتضايقت وقلتله انا طبيعى كنت هحاسب عليها عند الكاشير. قاللى انا عارف طبعا ان حضرتك كنت هتحاسب عليها بس هو التعليمات ان المشروب لازم يتحاسب عليه الأول. فى الظروف الطبيعية انا كنت هقفش علشان حسيت انه طلعنى مشبوه :) بس لميت الدور علشان مراتى معايا ورحت معاه للكاشير راح الولد واخد الكانز واديته الفلوس وحاسب هو الصراحة وجابلى الباقى والكانز لحد عندى بكل احترام بس حسيت ساعتها باحراج خصوصا ان كان فيه ناس واقفة ادام الكاشير وحسيت انهم بيبصولى على اساس انى كنت هضرب على الكنزاية وسوبر مان لحقنى قبل ما اهرب :).
السؤال بقى هل ده تصرف سليم من بتاع الأمن وانا اتصرفت صح ولا تصرفه كان غلط وانا برضه كان المفروض اقوله مش دافع الا عند الكاشير؟ رأيكم ايه...

[friendship7897]

لأ عادي
طبيعي أن الأمن يعمل كدة
والحمد لله انك ما أتنفزتش على الفاضي ولا تطاولت عليه لأن دا حقه
أنا كنت أفتح لأبني عصير أو مياة خلال فترة الشراء
وعند الحساب أحاسب العلبة الفاضية
لكن لما الأمن بياخد باله بيلفت نظرك
بس واضح إنهم بيوجهوا أول بأول دلوقتي
لأن فيه ناس معندهاش ضمير بترمي العلبة على جنب
ودا أنا شوفته أكتر من مرة برضوا
عموماً ولا يهمك
وعدت على خير وبالهنا والشفا
المهم أخبار العروض أيه في كارفور
كويسة ولا لسة معملوش ومستنيين عيد ميلاد كارفور يوم 2 يناير ؟!

[DODGE2013]

انت الي غلطان

دلوقتي كله بقى يشك في بعضه للأسف

[saddam]

صديقي المواطن
عادي جدا وبرضو حصلت معايه في نفس الكارفور من سنة تقريبا وأنا من عادتي بجيب حاجة البيت مرة في الشهر فبقعد ساعتين داخل كارفور السوبر ماركت فبجوع أحيانا فباكل سنيكرس أو مارس وبحاسب عليها وأنا خارج في الباسكت ومرة واحد قال لي روح إدفع طبعا أنا مدفعتش وبكل هدوء قلتله على فكره إبن الناس باين ولو إنت مش حتثق بيا أنا حثق بيك وقلتله خد آدي 200 جنيه حطها في جيبك لما تشوفني رايح أحاسب عالشوكولاتة أم 4 جنيه إبقه رجعهالي طبعا الرجل إعتذر ورجعلي الفلوس وقال لي ولاد الحرام مخلوش لولاد الحلال حاجة ولا يحدث إلا في مصر
وكويس إنك دفعت وده حقهم عشان للأسف كل تجربة جميلة وناجحة في مصر لازم نخربها بكل الطرق ونجيب ضرفها
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

[أحمد كمال]

قواعد المكان كده ..... و هو مطلوب منه يحمي فلوس المكان

هو كفرد امن مش هيعمل كشف هيئة لكل واحد عشان يعرف هو هيدفع و لا هيرميها على جنب ........ و لو المشرف بتاعه شاف انه سكت عالموقف ممكن يجازيه او يرفده

حضرتك محترم بس انا ياما شفت ناس سايبة علب مفتوحة و شوكالاتات و كيك و بلاوي سودة ...... بيفتحها و ياكل او يشرب و يرميها في اي ركن

[wshoman]

هو المشكلة ان ولاد الحرام ماخلوش لولاد الحلال حاجة وده هو السبب - لان اكيد في ناس بتشرب وتاكل وترمي الورق جوه الارفف وده فعلا لاقيتة - بس خلاص ده اكيد حيبقي درس انك ماتشربش حاجة تاني -

ولكن تخيل لو كل واحد عمل كدة - كان اكيد حتبقي شكلها مش لطيف ان الناس تاكل وتشرب وهي ماشية في المول

[Mohamed_Hamid]

شكرا لكم جميعا وعندكم حق انا مقدر موقفه برضه

[Mohamed_Hamid]

لأ عادي
طبيعي أن الأمن يعمل كدة
والحمد لله انك ما أتنفزتش على الفاضي ولا تطاولت عليه لأن دا حقه
أنا كنت أفتح لأبني عصير أو مياة خلال فترة الشراء
وعند الحساب أحاسب العلبة الفاضية
لكن لما الأمن بياخد باله بيلفت نظرك
بس واضح إنهم بيوجهوا أول بأول دلوقتي
لأن فيه ناس معندهاش ضمير بترمي العلبة على جنب
ودا أنا شوفته أكتر من مرة برضوا
عموماً ولا يهمك
وعدت على خير وبالهنا والشفا
المهم أخبار العروض أيه في كارفور
كويسة ولا لسة معملوش ومستنيين عيد ميلاد كارفور يوم 2 يناير ؟!

لا للأسف لسه مفيش عروض العيد السنوى منزلتش لغاية لما كنت هناك السبت اللى فات بس مش عارف فى جديد ولا لأ

[reda elgohary]

الموقف بسيط ولا تعطيه أكبر من حجمه وياما بيحصل متاخدش ف بالك ، تخيل أنك كان معاك حد غير المدام مجموعة عمل أو قريب من الدرجة الثالثة كنت هتعمل ايه ؟؟! .
خد الآمور ببساطة وربنا ييسر لك.
المهم عملت حسابى ف ربع رومى ولا نسيتنى ؟.

[أبو آسر]

أنا عن نفسي علطول الأولاد بياكلوا شيبسي أو بيشربوا عصاير وبسيب الفوارغ مع باقي المشتريات وبحاسب عليهم ومحدش في يوم كلمني بس مش عارف يمكن علشان لسة محدش قفشني ولا إيه ^_^
بس أنا الموقف اللي شفته كان قريب : جروب شباب مع بعض كانوا عمالين ياكلوا شيبسي وبتاع الأمن قالهم ممنوع الأكل داخل الماركت لكن مأجبرهمش إنهم يدفعوا يمكن دي تعليمات جديدة ويمكن اليومين دول بس علشان زحمة رأس السنة

بخصوص عروض كارفور أعتقد العروض هتبقى يوم 3 يناير يوم الجمعة لأني سألت على تليفزيون lg فلقيته بنفس سعره على مواقع البيع أونلاين فلما قلت للكاشير كده قالي خلاص استنى يوم 3 هتنزل عروض على التليفزيونات وممكن التليفزيون أبو 4000 جنيه يبقى ب3600 وكده

[mohamedbook]

انا بنزل كارفور القاهرة اسكندرية وبشرب اي حاجة من هناك وباكل شوكلاتة وفي الاخر بحاسب عليها وانا خاج عشان خاطر بحط الفارغ في العربية بتاع المشتريات
واول مرة اعرف الكلام ده

[aminibrahim]

شكرا لكم جميعا وعندكم حق انا مقدر موقفه برضه

عادي كنت في كارفور المعادي وعمل معايا كده -- بصراحه عندهم حق انا شوفت اسره من ارع افراد كل واحد اخد تفاحه يدوقها تخيل

بس مش كلى الهايبرات بيعملو كده

[mahmoudysf]

انا ولادي متعودين يشربو عصاير ويحطو الفارغ في عربية المشتريات وبحاسب وانا خارج عادي

[AlGazar2]

تقريبا دى تعليمات جديدة بينفذوها لان الموقف ده حصل معايا قريب برضه

تقريبا الادارة اتغيرت و بقى فى اداره فرنسية او اشراف مباشر من فرنسا ففى حاجات كتيره اتغيرت فى كارفور

[khaled_sabry]

الموضوع بسيط و بصراحه بتاع الامن عنده حق
ماتزعلشى منى
لكن مثال - انا بشتغل فى شركه كبيره محترمه و فيها كانتين للموظفين فى المبنى بتاعنا
و طبيعي ان موظف الكانتين مايبقاش قاعد فيه احيانا او ممكن يكون فى البوفيه اللى هو الاوضه اللى جنبه على طول فالعادى الواحد بياخد اللى عاوزه و يحاسب بعدين
الشهر اللى فات اكتشفنا عجز 600 جنيه فى الحسابات - بمعنى ان اجمالى "البسكوت و الشبسى" اللى موظفين "محترمين" سرقوهه و طنشو الحساب يصل الى 600
تخيل بقى حصلت السرقه دى كام مره علشان نوصل للمبلغ ده و الكلام ده فى نطاق 400 موظف بس !!