الاستثمار بالعملة

[iamin911]

اخواني الاعزاء ( السلام عليكم و رحمة الله و بركاته )

معي مبلغ 50,000 جنيه
اريد ان احافظ عليهم و اجعلهم لاولادي للمستقبل باذن الله في صورة وديعة بالبنك
فأي من العملات ممكن ان احولهم لوديعة لمدة 10 سنوات

فهل الدولار ام اليورو ام الريال السعودي ام الجنيه الاسترليني افضل للتحويل و جعلهم في صورة وديعة

و لكم جزيل الشكر على الرد كما ارجوا ان يكون الرد باسباب مقنعة.....................
و شكرا

[أبو آسر]

وعليكم السلام ورحمة الله وبركاته
نصيحة حولهم دولارات وعينهم في مكان آمن في البيت مثلا أو عند الحاجة وما شابه لأن الدولارات هتزيد جامد الفترة الجاية ومتخافش عليهم مش هيتلاحظوا لأن الحكاية كلها حوالي 70 ورقة من فئة ال100 دولار فمش هيتلاحظوا وممكن تحطهم وسط كتاب قديم مثلا أو ما شابه للتمويه
أما موضوع إيداعهم في البنك فغير مأمون في ظل الظروف الاقتصادية الحالية والقادمة ربنا يعديها على خير
ولو بتدور على الاستثمار فتحويلهم لدولارات في حد ذاته استثمار لأن قيمتهم في ازدياد وغالبا هتستفيد منهم أكتر من استفادتك بالفوائد الربوية البنكية اللي مفيهاش بركة أساسا حتى لو فايدتها 100%
وفي الآخر القرار لحضرتك دي نصيحتي ومن وجهة نظري الشخصية ولك كامل حرية الاختيار لكن أنا عن نفسي بعمل كده حاليا

[hilal]

نصيحتي لك هي التنويع
اعمل سلة عملات صغيرة
يعني شوية دولارات وشوية يورو وشوية استرليني وشوية ريالات وشوية ذهب
والهدف من ذلك تنويع المخاطر
ولا انصح بالبنوك لاسباب دينية ، وهناك تقلبات سياسية قد تؤدي الى الاطاحة بالمدخرات
هذه معتقداتي ولك ان تقبلها او ترفضها مع احترامي لكل من يخالفني

[saddam]

صديقي المواطن
يورو ودولار وإسترليني وين ياباني ويوان صيني ودرهم إماراتي ودينار كويتي وتحطهم وديعة في بنك وإنساها وتعال بعد 5 سنين والفوائد حطها في حساب لوحده وتتصرف بيه بناءا على الفتوى التي أنت مقتنع بها فهل أنت مع من حلل فوائد البنوك فإستعملها وإن كنت مع من حرم فوائد البنوك فتصدق بها أو إستنى لغاية محد يخطف إبنك أو يسرق عربيتك ويطلب فدية فممكن ساعتها تديله فلوس الفوائد دي
إنما قصة تحت البلاطة والكتاب وعند الحاجة فإياك إياك إياك متسلمش رقبتك لحد بتاتا مهما كان قريب منك
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

[أبو آسر]

صديقي المواطن
يورو ودولار وإسترليني وين ياباني ويوان صيني ودرهم إماراتي ودينار كويتي وتحطهم وديعة في بنك وإنساها وتعال بعد 5 سنين والفوائد حطها في حساب لوحده وتتصرف بيه بناءا على الفتوى التي أنت مقتنع بها فهل أنت مع من حلل فوائد البنوك فإستعملها وإن كنت مع من حرم فوائد البنوك فتصدق بها أو إستنى لغاية محد يخطف إبنك أو يسرق عربيتك ويطلب فدية فممكن ساعتها تديله فلوس الفوائد دي
إنما قصة تحت البلاطة والكتاب وعند الحاجة فإياك إياك إياك متسلمش رقبتك لحد بتاتا مهما كان قريب منك
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

ما هو علشان ميسلمش رقبته لحد مهما كان يبقى ميسلمش فلوسه لبنك ممكن يتحفظ عليهم بسبب قرارات حكومة فاشلة تحت ظروف بلد غير مستقرة
يبقى يحطهم وسط كتاب قدام عينيه أضمن ولا لأ ؟؟

[Ahmed_Adham]

ما هو علشان ميسلمش رقبته لحد مهما كان يبقى ميسلمش فلوسه لبنك ممكن يتحفظ عليهم بسبب قرارات حكومة فاشلة تحت ظروف بلد غير مستقرة
يبقى يحطهم وسط كتاب قدام عينيه أضمن ولا لأ ؟؟

الاحتفاظ بالفلوس في البيت برضه بيعرضها لمخاطر السرقه والحريق وبدل ما الخساير تكون عينيه تكون من كل اتجاه فكل اختيار من الاتنين له ميزه وله عيب ويفضل اتباع قاعده عدم وضع البيض كله في سله واحده.

[kondor]

هو لسه في ناس بتحط فلوس في البيت فى 2014!!!

[أبو آسر]

هو لسه في ناس بتحط فلوس في البيت فى 2014!!!

أنا ! تخيل ؟!
بس لما تكون الفلوس قدام عنيا أحسن عندي 100 مرة من إني أحطهم في بنك أولا هيشغلهم في عمليات الربا اللي بيعملها ثانيا هيسلفهم لحكومة أنا غير معترف بيها ثالثا معرض في أي لحظة إن الفلوس مقدرش أسحبها بسبب قرار غبي يطلع الساعة 2 بالليل أو على الأقل يبقى ليا مبلغ ويقولي مش من حقك تسحب غير مبلغ صغير وأعلى ما في خيلك اركبه
يبقى ابني في حضني وأقعد أدور عليه ؟!

[hilal]

هو لسه في ناس بتحط فلوس في البيت فى 2014!!!

وانا كمان لا اتعامل مع البنوك ، تخيل؟؟؟؟

[الاستاذ]

اشترى بنصهم دولارات والنص التانى دهب بس سبائك او دهب كسر
----------------

تنبيه بعدم شخصنة الحوار
مشرف 6 ب
12.46am
4/1/2013

[hossam_elwani]

السؤال ياجماعه اننا لو حطينا وديعه بالدولار وفى اى وقت حبيت افكها هل المبلغ المسترد حيبقى فى وقت الازمات مسترد بالدولار ولا بالعمله المحليه ولو بالعمله المحليه بيبقى بسعر صرف الايداع ولا الصرف ؟؟؟
سؤال مهم جدا للى عنده خبره فقط

[hugan]

لوقلقان من ربا البنوك لو الفايده معتبرها ربا
اختر الضرر الاخف
بنك مصر للمعاملات الاسلاميه
او بنك فيصل
الجنيه قيمته يوميا تقل
ولا تستطيع الاستثمار
وما ينفعش الفلوس تحتفظ بيها في البيت طبعا
يبقي اختار نظام الوديعه اللي تحبها لكن ببنك تعامله المفترض انه اسلامي
شخصيا حسابي بنك مصر للمعاملات الاسلاميه
ان الدوله تستحوذ علي اموال المودعين
مستحيل طبعا رغم عدم اعترافي بلانقلاب


تنبيه عام : يرجى من السادة الاعضاء عدم تحويل مسار الموضوع ....تم حذف المشاركات الخارجة عن اطاره
مشرف 6 ب
12.57am
4/1/2014

[kondor]

أنا ! تخيل ؟!
بس لما تكون الفلوس قدام عنيا أحسن عندي 100 مرة من إني أحطهم في بنك أولا هيشغلهم في عمليات الربا اللي بيعملها ثانيا هيسلفهم لحكومة أنا غير معترف بيها ثالثا معرض في أي لحظة إن الفلوس مقدرش أسحبها بسبب قرار غبي يطلع الساعة 2 بالليل أو على الأقل يبقى ليا مبلغ ويقولي مش من حقك تسحب غير مبلغ صغير وأعلى ما في خيلك اركبه
يبقى ابني في حضني وأقعد أدور عليه ؟!

لا طبعا في لحظة البيت يتسرق او زلزال او حريقة تحصل اي حاجة ساعتها هتعمل ايه؟؟ انت كده معامل الخطر عندك عالي جدا لو علي الربا ممكن تحطهم في حساب جاري او بنك اسلامي او غير كل ده خزنة حديد في اى بنك لو انت مش عاوز تحط فلوسك في بنك اسلامي ولا مش اسلامي. و الخزن الحديد محدش يقدر يقربلها و لا يقدر يطلع قرار بتجميدها و لا البنك يقدر يشغلها و لا بيعرف فيها ايه اصلا.

[kondor]

السؤال ياجماعه اننا لو حطينا وديعه بالدولار وفى اى وقت حبيت افكها هل المبلغ المسترد حيبقى فى وقت الازمات مسترد بالدولار ولا بالعمله المحليه ولو بالعمله المحليه بيبقى بسعر صرف الايداع ولا الصرف ؟؟؟
سؤال مهم جدا للى عنده خبره فقط

بالدولار طبعا المشكلة الى ممكن تواجه البنك ميكونش في دولار كفاية في خزنة البنك و ساعتها لازم يكلم ال dealing room علشان تشتري دولار من داخل او خارج مصر المهم العملية ده بتاخر العميل ساعتها ممكن من حق البنك يعرض على العميل يستلم المبلغ بالجنية بسعر صرف اليوم الى العميل جاي يسحب الفلوس و من حق العميل يرفض و يطلبهم دولارات و في الحالة ده العميل ممكن ينتظر من كام ساعة لي 5 ايام عمل طبعا على حسب قوة البنك و ده عمره مايحصل فى البنوك الكبيرة لاسباب كتيره البنوك ده ليها فروع خارج مصر و شبكة مراسلين بتمكن ال dealing room يجيب الدولار في لحظات و الحاجة التانية ال provision للعملات بيكون كبير يعني لو بنك جالة 100,000 دولار اول حاجة بيعملها بيشيل 20,000 فى الخزنة و ال 80,000 يشغلهم في حاجات secured او على الاقل 110% supported

[egyptawy2010]

بالدولار طبعا المشكلة الى ممكن تواجه البنك ميكونش في دولار كفاية في خزنة البنك و ساعتها لازم يكلم ال dealing room علشان تشتري دولار من داخل او خارج مصر المهم العملية ده بتاخر العميل ساعتها ممكن من حق البنك يعرض على العميل يستلم المبلغ بالجنية بسعر صرف اليوم الى العميل جاي يسحب الفلوس و من حق العميل يرفض و يطلبهم دولارات و في الحالة ده العميل ممكن ينتظر من كام ساعة لي 5 ايام عمل طبعا على حسب قوة البنك و ده عمره مايحصل فى البنوك الكبيرة لاسباب كتيره البنوك ده ليها فروع خارج مصر و شبكة مراسلين بتمكن ال dealing room يجيب الدولار في لحظات و الحاجة التانية ال provision للعملات بيكون كبير يعني لو بنك جالة 100,000 دولار اول حاجة بيعملها بيشيل 20,000 فى الخزنة و ال 80,000 يشغلهم في حاجات secured او على الاقل 110% supported

استاذ Kondor
تنصح حضرتك بوديعة دولارية ولا وديعة بالجنيه ولا الواحد يحط الفلوس فى عقار