كاتبين مؤخر كام يامتجوزين والقايمة ايه ظروفها؟ افيدونا..؟

[r0xer]

السلام عليكم.

القفص الذهبي الأيام القادمة..دعواتكم!

كاتبين مؤخر كام؟ ودفعتو مهر كام؟ وبتكتبوا كل حاجة في القايمة ولا الحاجات اللي العروس جابتها وبس؟

المتوسط دلوقتي كام للمؤخر ياترى؟

العروسة مش عايزة حاجة خالص...لكن انا عايز زيها زي الناس عشان مبقاش قصرت في حاجة مستقبلا قدام نفسي وعشان كدا بسألكم.

الف شكر لكم مقدماً...

[أحمد كمال]

ما تكتبش قايمة ....... اسمع كلامي ارجوك

المؤخر حق شرعي ....... القايمة لأ

[lad]

بلاش قايمة فعلا و المؤخر من 20 لى 30

[ABO MALEK]

قايمة مفيش..المؤخر 10 :20 الف جنيه.
مبروك مقدما.

[احمد المصرى]

العادات والتقاليد بتاعت الشعب المصرى بيكون فيها قايمه وماخر ودا بيختلف من مكان لمكان وطبيعه ناس وظروف اجتماعيه وماديه


فى ناس بتكتب قايمه ب 5 الاف وفى 50 الف وفى 100 وفى اكتر كمان


والمؤخر برضوا نفس القصه ونادرا لما تلاقى عروسه او اهل عروسه مش هيكتبوا قايمه ومش هيتكلموا فى الماخر

[ahmedabutaleb]

بص ياباشا بالنسبه للقايمة فانا هقولك هوا المفروض الناس زمان كان الراجل بيدفع مهر جزء منه مقدم والجزء التانى مؤخر. الجزء المقدم ده كان ابو العروسه بيكمل عليه ويشترى اثاث البيت وخلافه.
بس دلوقتى الوضع اختلف بدل ما تدفع مهر مقدم بقيت بتجيب بالمهر جزء من الاثاث حسب الاتفاق. وبما ان المهر لا يرد الا فى حاله الخلع او عدم الدخول والله اعلم فكل اثاث البيت اللى انت جايبه واللى هيه جايباه بيبقى ملكها شرعا ساعه الطلاق لاقدر الله وعشان كده اخترعوا القايمه فاعتقد ان القايمة حق شرعى للعروس والله اعلم بس الكلام ده اللى سمعتوا من مشايخ.
بالنسبه للمؤخر فده باقى المهر وخلى بالك المؤخر ده بيبقى دين عليك عشان فى ناس فاهمة ان المؤخر ده فى الطلاق بس ده بيبقى دين بتسدده فى اى وقت حتى وانتوا لسه متجوزين ولو لا قدر الله توفيت بيتسدد قبل توزيع الميراث. فحاول بقدر الامكان خلى المؤخر قليل لانك كده كده لازم تدفعه ده دين والدين بيمنع صاحبه من دخول الجنه حتى يسدد.
والف مبروك ياباشا مقدما.

[Imhotep]

انا داخل اتمنى لك السعادة و الخير و التوفيق فى حياتك القادمة كأخ عزيز فى المنتدى
كان نفسى افيدك فى التفاصيل الاخرى بس احنا عندنا النظام مختلف شوية :-)

[khaled_sabry]

انا كاتب مؤخر 10000 جنيه و القائمه فيها الحجات اللى جابتها المدام فى العفش
هو الموضوع من وجهة نظرى عادات و تقاليد اكثر منها حاجه تانى
فيه عائلات بتكتب مؤخر اكبر من كده و فيه اقل من كده و نفس الكلام فى القائمه - لكن دى مش نقطه تقرر على اساسها الاستمرار او عدمه

[speed_magnum]

القايمه بتبقى على الطبيعه وبفواتير المشتريات اللي العروسه جابتها
اما لو الناس قدروا مبلغ معين وقالولك امضي عليه
فالامر يرجع اليك والى معرفتك بالناس ومعرفة مدى اخلاقهم وطباعهم
وخد بالك الموضوع دا لو حصل فيه خلاف
عمر النفوس ما بتصفى

[dodo2000]

بلاش القايمة و المؤخر معاك لحد 15 -20

[محمود السيد]

اتمنى من الله لك الزيجة الصالحة و نصيحة لا تستهون بالقائمة والمؤخر لانه قانون من حق الزوجة اخذهم فى اى وقت سوا كانت على زمتك او عند الطلاق بس خلى بالك بالقائمة ممكن تتحبس لانه تعتبر ايصال امانة اما المؤخر ففى بعض الاحيان يتم تخفيض جزاء منه ولكن شرعآ من حقه اخذه دون نقص لانه عقد بين الطرفين بالايجاب والقبول والرضا

[AshTurbo]

ألف مبروك يا باشا ربنا يجعله قرة عين لك ويرزقك الذرية الصالحة ....

بالنسبة لسؤالك معنديش خبرة في الموضوع ده بس عندي وجهة نظر لو حابب تعرفها.. انا ولا هكتب قايمة ولا مؤخر الا لو حاجة كانت شرعية يعني لو المؤخر شرعي علشان يضمن حقوقها لو لا قدر الله أختلفنا فيما بعد ماشي معنديش مشكلة بس عامة أنا أصلاً عمري ما هسيبها لا قدر الله غير بالمعروف وغير ماكون مديها أكتر من حقها مش هستنى حاجة أكون كاتبها على نفسي بس طبعاً مين بقى من البنات اليومين دول يقدر الموضوع ده علشان كده لحد دلوقتي ملقتش بنت الحلال واللي طبعاً لو لقيتها عمري ما هحتاج أكتبلها قايمة ولا مؤخر لأن ببساطة هكتبلها عمري كله .

[mahmoud_ali]

ربنا يباركلك فيها دى اهم شئ..انا معنديش خبره لسه بصراحه بس اللى فيه الخير يقدمه ربنا

[hossam_elwani]

ما تكتبش قايمة


لاتغرق فى المثاليه

[Y a r i s]

اااااااااه منكم يا شباب. اليومين دول عاوزين تاخدوا البيت بلوشي كده
بصو انا هبسطهالكم. العمليه عاملة زي ايه. انتا لمن بتروح تاجر عربية. هل بتروح تدفع ايجار اليوم كده وخلاص ولا بتمضي على شيك من غير رصيد وتدفع تامين وي وي وي ... الشيك من غير رصيد ده. قياساً او شبيه. بالقايمة .

بص الشرع. احل للمرءة مهر. واحل لها مؤخر .... طيب الزمن الي احنا فيه. الشقه على العريس والفرش على العروسة. ... قول مثلاً المهر ١٠ او حتى ١٥ هل ده مهر عادل اكيد لأ لانو ميجيش تمن لاب توب وحتت موبايل ... لذلك فبدل ما بتدفع مهر انتا بتشتري. عبش بيه. ويكتب في وثيقة الجواز المهر. جنية ... يعني خدت البت من بيت ابوها بلووووشي كده .... طيب في حالت الطلاق. البنت فقدت عذريتها وفقدت اهم ميزه فيها انها صبية ويمكن تتجوز ويمكن تقعد كده جمب ابوها. متستفه ... طيب فين مهرها فين حقها. هتقول اصل مهرك جبت بيه عبش طيب اكتب بقه يا حلو. العبشة ده باسمها وهو ده الي احنا بنسميه القايمة ... هتقولي طب مافيه شبكة. هقولك الشبكة دي. حاجة شكليات وبنسميها هدية العروسة. بمعنى ايه فاكر حكاية سندباد وعلي بابا. ايام مراح يخطب الاميرة زمردة. وبعت للملك صندوق. فيه دنانير من الذهب وقالوا دي هدية يامولاي للاميرة زموردة وياريت تتكرم يا مولاي على الموافقه بطلب ايد الاميرة زموردة لصديقي علي بابا سارق المغارة :) المهم قصه كده هبقى احكيهالكم بعيدن قبل النوم. لكن القصد الشبكة هو ذهب يهدى للعروس كعربون محبة ولا يسترد كده او كده. حتى لو طلقتها ولم تدخل بها ... لكن لو متمش الجواز واتفركشت الدنيا وانتو لسه على البر فمنحقك تسترد هديتك وجميع العطايا .

وعامةً. كلو بيبقى هلاهيل في الاخر وحبت ملل. ملهومش اي تلاتين لازمة. .... ولو هيا سيئة. بتبقى عاوز ترميلها كل حاجة وتنفد بجلدك. ولو هو سيئ. بتبقى البت عاوزة تخلص باي شكل منو بس اهم حاجة. اكتب كل حاجة في القايمة بس متكتيبش المرتبة ومخدتين. + التلفزيون. يعني اهو تسيبلك حاجة تنام عليها بدل ما تنام على الارض :) وبالتوفيق