كاتبين مؤخر كام يامتجوزين والقايمة ايه ظروفها؟ افيدونا..؟

[مصطفى-حسن]

بالنسبة للناس اللى بتنصح بعدم كتابة القايمة
ببساطة شديدة
افترض ان واحد داخل يتجوز اختك او بنتك وبيقولك مش هكتب لها قايمة خالص
يا ترى ردك هيبقى اية؟؟؟؟؟؟؟



وبالنسبة للاستاذ روكسر بقولة الف مبروك
وزيك زى الناس
اللى اتجاب بس سواء من طرفك او طرفها هوة اللى بيتكتب فى القايمة باسعارة الحقيقية
والمؤخر على حسب الوسط الاجتماعى اللى انت فية

الى الجميع .....وبكل نية خالصة.......اتقوا الله فى بنات الناس

[hossam_elwani]

حقوله اكتب مؤخر مرضى جداااااا وفقط

[أحمد كمال]

بالنسبة للناس اللى بتنصح بعدم كتابة القايمة
ببساطة شديدة
افترض ان واحد داخل يتجوز اختك او بنتك وبيقولك مش هكتب لها قايمة خالص
يا ترى ردك هيبقى اية؟؟؟؟؟؟؟

ردي هيبقى رد جدي الله يرحمه ابو امي لما ابويا ساله عالقايمة

قال له يابني انا مآمنك على لحمي و دمي هاكتبك ورقة بشوية خشب؟


و اختي ما اتكتبلهاش قايمة و اساسا ده كان طلبنا

و بناتي مش هاطلب لهم قايمة

هو مش مأجر شريط فيديو فهاخد منه رهن

[minicooper20]

اختلف الناس على موضوع القايمه كتير
لو انتا داخل على عيله من عاداتهم انهم بكتبو قايمه يبقى مش هيتنزلو مها قلت
عنها اما لو داخل على عيله مبكتبوش زى استاذ احمد كمال كده فا مش هتكتب
لكن هنا يظل السوال هل انتا كا راجل يضغط عليك بالقايمه اشك
انتا ممكن تخلى الست تقلق خد هدومى بس طلقنى
فالموضوع نسبى يعنى

[r0xer]

اشكركم جزيل الشكر وبارك الله لكم جميعا.

علشان نبقى على بينة البنت مش عايزة حاجة..اهلها متعنتين جدا ولكن هي ولافارق معاها...هي مصرية لكن عاشت برة كتيير عشان كدا فكرها مختلف عن حبايبنا اللى هنا..
هكتبلها مؤخر اكتر من اختي ومش هكتب قايمة لاني هجيب كل حاجة في الشقة حتى المعالق والحلل..

هل في عليا اي وزر شرعي او ابخست قدرها؟علما انها حتى مش عايزة مؤخر غير ربع جنيه..


حاجة تانية.لو كتبنا عهود جواز زي اخواتنا المسيحيين فيها مشكلة؟ايه رايكم؟

افيدونا افادكم الله

[hobiko]

ما كتبتش قايمة ............ لما فتحت الموضوع مع اهل مراتى قالولى احنا مستأمنينك على بنتنا مش حنستأمنك على شوية خشب

و لما جيت للمؤخر ....... قالولى احنا بنعامل ربنا و خلينا المأذون كتب على الصداق المسمى بيننا او حاجة زى كده

اهل مراتى بسم الله ما شاء الله اكبر كنت متوسم فيهم الخير و اثبتوا فعلا انهم اهل خير فعلا و كانوا متعاونين فى الجواز جدا بلا افراط و لا تفريط

[khaled_sabry]

حاجة تانية.لو كتبنا عهود جواز زي اخواتنا المسيحيين فيها مشكلة؟ايه رايكم؟

افيدونا افادكم الله

يعنى ايه تكتب عهد جواز ؟؟؟
الموضوع ده مش شرعى عندنا و يتهيألى مايفرقشى عن الوعد الشفهى بحاجه

[hitman235]

انا كنت موافق على مضض على مؤخر 60 الف و قايمه 80 الف و طبعا دى ارقام كبيره نوعا ما بس الموضوع كله اتفركش قبل الكتاب بسبب الطلبات الماديه الاخرى

[Imhotep]

اشكركم جزيل الشكر وبارك الله لكم جميعا.

حاجة تانية.لو كتبنا عهود جواز زي اخواتنا المسيحيين فيها مشكلة؟ايه رايكم؟

افيدونا افادكم الله

المسيحيين فى مصر و بالذات الارثوذكس مفيش موضوع عهود الجواز ده. . . لو انا فاهم صح انت اللى تقصده هو اللى اسمه بره ال premarital agreement و دى بتبقى اتفاق قانونى بين الطرفين انه فى حالة الطلاق يحصل كذا و الست تاخد كذا و الراجل ياخد كذا و دى حاجة قانونية و ليست دينية. . . و الاتفاق ده بيتعمل لانه لو الموضوع اتساب عايم ففى حالة الطلاق القانون هناك بيسمح للست تتقاسم الثروة التى تم تكوينها اثناء الجواز مع الراجل و دى طبعا حاجة ممكن تكون مجحفة للراجل بس بيعملوها لان الست ظروفها اصعب فى توفير سبل المعيشة لنفسها
هنا فى مصر المسيحيين و بالذات الارثوذكس كل حاجة بتتم بأتفاق شفوى فى قعدة اتفاق قبل الخطوبة عشان كل حاجة تبقى واضحة. . . و غالبا بيرسى الموضوع على ان اللى يقدر يعمل حاجة يعملها و غالبا كله بيبقى مناصفة فى جهاز الشقة اللى هى طبعا على العريس هى و الشبكة اللى هى عبارة عن هدية و بالتالى مفيش لها قيمة معينة انما هى على حسب مقدرة العريس

[mrghost]

كاتب مؤخر 15 وقايمه ب 93 الف جنيه بس انا مناسب من اﻻرياف فهى دى تقاليدهم بيكتبوا كل حاجه ف القايمه

[blazer]

طب لو العريس جايب العفش كله ,, لازم يكتب قايمه و لا من حقه ميكتبش و يكتب المؤخر بس

[maskeen]

مافيش قايمه...الموضوع ده فى الوسط عندى يعتبر اهانه

المؤخر مكتوب "المسمى بيننا"..

[أحمد كمال]

مافيش قايمه...الموضوع ده فى الوسط عندى يعتبر اهانه

المؤخر مكتوب "المسمى بيننا"..

احنا بنات عيلتنا كلهم مفيش قوايم لان احنا بتجوز بناتنا مش بنأجر عربيات و فعلا الموضوع اهانة كبيرة


بالمناسبة ...... انا مطلق قبل كده و ما كنتش كاتب قايمة و خرجت بشنطة هدومي و بس ..... من غير ما يكون فيه قايمة و لا غيره ......

[drmsadek1979]

انا مستغرب جدا من موضوع ان مفيش قايمة ده
انا في بلد أرياف مغيش جواز من غير قايمة
وبعدين اقل قايمة هنا من 200 الف وانت طالع
والمؤخر من 20 وانت طالع
عندنا مثلا العريس بيجيب الشقة والعفش والستائر والنجف
العروسة بتجيب المطبخ سواء خشب او الوميتال والاجهزة والسجاد
فيا ريت حد من الأفاضل يوضح لي اي موضوع الجواز من غير قايمة ده واي الضمانات البديلة للقايمة

[maskeen]

انا مستغرب جدا من موضوع ان مفيش قايمة ده
انا في بلد أرياف مغيش جواز من غير قايمة
وبعدين اقل قايمة هنا من 200 الف وانت طالع
والمؤخر من 20 وانت طالع
عندنا مثلا العريس بيجيب الشقة والعفش والستائر والنجف
العروسة بتجيب المطبخ سواء خشب او الوميتال والاجهزة والسجاد
فيا ريت حد من الأفاضل يوضح لي اي موضوع الجواز من غير قايمة ده واي الضمانات البديلة للقايمة

انا متفهم يا فندم استغراب حضرتك
لكن الحقيقه ان الموضوع هو عادات ومفاهيم
فى الارياف زى ما انت بتقول كده ودى عاداتهم
فى الاحياء الغنيه فى القاهره بيبقى موضوع القايمه ده بيتفهم على انه ايصال امانه ونوع من التخوين والماديه..لان ايه معنى العفش والفلوس لما بنتك تتبهدل وتتهان! وبعدين هى الفلوس والعفش هى اللى هاتجبر الراجل انه يعامل الست كويس مثلا؟ طبعا لا...عشان كده الماديات بتبقى موضوع غير مهم قوى (باستثناء الشبكه عشان المنظره والمهر عشان الجهاز يبقى على مستوى)

ارجو ان ماحدش يزعل منى بس هو ده السائد فى الوسط الاجتماعى بتاعى