هل في حد بيحضر لدكتور ابراهيم الفقي ؟؟

[Bossy_Fadl]

انا سمعت عنه ايام الجامعة

عشان كان في بنات صحابي بيروحو يحضرو محضراته

هما كانو بيشكرو في محضراته و كلامه اوي

بس انا طبعا مقدرش احكم علي حاجة معرفهاش لا بالسلب و لا بالايجاب

بس انا عموما بيعجبني في المجال ده الدكتور شريف عرفة جدا

و ان شاء الله اقدر اقول رايي لما اقرا محاضرات دكتور ابراهيم او اسمعها في يوم

[aratux]

يعنى إيه أخد تريد مارك؟
أى حاجة يا صديقى ممكن تعملها تريد مارك, و زى ما إسمها بيقول, دى علامة تجارية
يعنى ممكن الشبراوى من الصبح يسجل اللوجو بتاعه يبقى علامة مسجلة!!!
دى مش معناها إنك كويس أو وحش خااااااااااااااااالص

الراجل ده أنا حضرتله, و رأييى النهائى إنه فى الهجايص

[Yarisawy]

يا صديقى انا او انت ممكن بكره الصبح نروح نعمل اجراءات انشاء المعهد الأمريكى الكندى الفرنسى البريطانى للفضاء الخارجى

المعهد ده شركة هو عاملها مش مؤسسة تعليمية كندية و هو وصل لرئاستها و كل الشهادات اللى معاه من جامعات مجهولة

معاك حق يا صديقى انا دورت على النت لقيته خريج سياحه وفنادق وهاجر بعدها لكندا وخد شوية شهادات.. ممكن فعلا الشهادات اللى معاه مش جامده .. بس عارف اكتر حاجة عجبتنى لما شوفته مره انه بيركز دايما فى كلامه على الجانب الدينى ... لكن عموما الواحد وضحله حاجات برضه من كلامكوا ... بس برضه ده مايمنعش انه ممكن يكون راجل كويس

وكل سنه وانت طيب :)

[banboty]

في الهجايص و سبوبة عيش زيه زي د. عادل عبد العال

موضة تاخد وقتها و هتخلص

[Yarisawy]

يا صديقى انا او انت ممكن بكره الصبح نروح نعمل اجراءات انشاء المعهد الأمريكى الكندى الفرنسى البريطانى للفضاء الخارجى

المعهد ده شركة هو عاملها مش مؤسسة تعليمية كندية و هو وصل لرئاستها و كل الشهادات اللى معاه من جامعات مجهولة

صح كلامك يا صديقى انا دورت عليه فى النت لقيته خريج سياحة وفنادق وهاجر بعدها الى كندا ثم اخد شوية شهادات وفتح مركز , فعلا معاك حق بالنسبه لموضوع الشهادات وعموما انا شايف ان احسن حاجة فى الراجل ده انه بيركز على الجانب الدينى وده مش موجود فى ناس كتير

وكل سنه وانت طيب

[Ahmed.kamel]

مع احترامى الكامل...مشكلتنا أن كل من لايعلم ينصب نفسه حكما ليحاكم الاخر ...فنلاقى واحد مبيعرفش حتى يقرأ القرأن صح ولاعمره فتح كتاب فقه بينتقد المفتى الفلانى فى فتواه ...والدكتور الفلانى لانه مكتبش الدواء الفلانى يبقى دكتور ضعيف وياه بقى لو قالك تعمل أشعة وتحاليل ...يبقى دكتور فاشل مبيعرفش يشخص الحالة خبرته قليلة....

[Ahmed.kamel]

يعنى لما أجى أنتقد حد وقرر أنه لايملك علم وأنه مجرد موجة وواحد مطرقع والشهادات اللى معاه فشنك ابقى كحد أدنى قرأت عن التنمية البشرية أو علم أدارة الموارد البشرية ومداخله حتى وبناءا عليه انتقده ويكون نقد موضوعى فصورة نقاط محددة 1 2 3 مش جمل عايمة....مطرقع ..!!!!.....نهايته ....كل سنة وانتم طيبين ....

[MoToRiZeR]

انا محضرتلوش ولا محاضرة لكن قريت معظم كتبه تقريباَ

الراجل ده بيعمل حاجة ظريفة جداَ .. بيقولك كلام إنت عارفه كله و لكن بيفندهولك
يعني إنت من جواك عارف إنت ممكن تعمل إيه .. هو كل اللي بيعمله بيشيل التراب من علي إرادتك الهمدانة
و بيقولك إنت تقدر عشان كذا و كذا و كذا .. و عشان تنفذ إنت المفروض تعمل كذا و كذا و كذا

و بيبقي كلام إنت عارفه كله بس هو اللي بيعمله التفنيد و التحفيز .. و انا شايف ده مطلوب خصوصاَ لو حد بيواجه مشاكل في حياته بيحتاج النوع ده من التواصل حتي لو في شكل كتاب أو محاضرة .

[Dream286]

يعنى لما أجى أنتقد حد وقرر أنه لايملك علم وأنه مجرد موجة وواحد مطرقع والشهادات اللى معاه فشنك ابقى كحد أدنى قرأت عن التنمية البشرية أو علم أدارة الموارد البشرية ومداخله حتى وبناءا عليه انتقده ويكون نقد موضوعى فصورة نقاط محددة 1 2 3 مش جمل عايمة....مطرقع ..!!!!.....نهايته ....كل سنة وانتم طيبين ....

اتفق معك جملة وتفصيلا

[iunknown]

يعنى لما أجى أنتقد حد وقرر أنه لايملك علم وأنه مجرد موجة وواحد مطرقع والشهادات اللى معاه فشنك ابقى كحد أدنى قرأت عن التنمية البشرية أو علم أدارة الموارد البشرية ومداخله حتى وبناءا عليه انتقده ويكون نقد موضوعى فصورة نقاط محددة 1 2 3 مش جمل عايمة....مطرقع ..!!!!.....نهايته ....كل سنة وانتم طيبين ....

مع احترامي لكلام حضرتك


بس فيه مثل قديم بيقولك
انت لا تحتاج لتأكل السمكة كلها لتعلم انه فاسدة

[Dream286]

اتفقت الاراء

انا كنت عايز اقول حاجتين بس

كان نفسي يكون النقد اوضح من كدة زي ما قال الزميل يعني نلمس العيوب والمزايا بنقاط واضحة عشان نستفيد لكن مش نهجم في الشخصية نفسها زي بعض الصحف

النقطة التانية اعتبروه بوفيه مفتوح
بمعنى خد منه اللي يفيدك ويهمك وسيب الباقي
هو بنفسه اللي قال كدة على نفسه

تحياتي للجميع ...

[amir]

الموضوع لا يستاهل، كل اللى بيعمله نوع من التحفيز بالايحاء، أو البرمجة العصبية زى ما بيسميها و أغلب اقتناع الناس به نتيجة لشخصيته المقنعة، بس علميا هو غير مؤهل اطلاقا و لو على الشهادات الغريبة اللى عنده، ممكن تجيبها من على النت.

يا جماعه بالهداوه
الموضوع لو حد يحب يعرف عنه اكتر لأن واضح ان الناس متمسكه بمدء ان الناس عموما اعداء ما يجهلون و نازلين سلخ في فروه د. ابراهيم الفقي
الموضوع اساسا مش من تأليفه ولا اختراعه ولا كدب و هجايص و اشتغالات
ده علم جديد نشأ من فروع مختلفه من العلوم و يحضرني منها و يا رب الذاكره متخونيش علم النفس و علم الاجتماع و كان في حاجه تالته
هو اسمه neuro linguistic programming و اختصاره NLP
و ده علم مهم جدا جدا و الناس بتتهافت علي حضور الدورات بتاعته لأنها مؤثره جدا في حياتنا اليوميه
و لو حد منكو يحب ممكن يعمل سيرش و ينزل شويه كتب عن الموضوع ده من غير ما يدفع ولا مليم
و ساعتها يقدر يحكم هل هو شيء مفيد ام لا
اما رمي التهم جزافا كده شيء غير صحيح
انا قريت في الNLP من غير ما اروح ليه اي دوره من مبدأ توفير الفلوس انما ليا واحد صاحبي اخد مش بس دورات عاديه انما دورات تأهيليه للتدريس و حاليا بيشتغل كويس في الموضوع ده و بيحاضر و بينزل كتب كمان
اسمه د\ شريف عرفه يمكن حد فيكو سمع عنه لأنه كمان كان ليه سايت كاريكاتور علي النت اسمه http://www.3arafawy.com/
فياريت الكلام يكون عن علم و بالراحه احنا مش هنطلع فلوس من جيبنا نحطها في جيب ابراهيم الفقي او غيره
احنا هنا بنفيد بعض

[Dream286]

فياريت الكلام يكون عن علم و بالراحه احنا مش هنطلع فلوس من جيبنا نحطها في جيب ابراهيم الفقي او غيره
احنا هنا بنفيد بعض

فعلا يا دكتور امير كل المقصود اننا نستفيد بغض النظر عن اي اعتبارات تانية

يا جماعة والله انا مستغرب اوي اوي من الردود اللي فيها عدوانية واضحة وسبب استغرابي ان احنا في كل المواضيع اللي في المنتدى دا تحديدا بتتناقش بحق بموضوعية شديدة بعيد عن اي شئ
يعني اكيد الراجل فيه حاجة صح مع ان انا عن نفسي شايف انه ناجح جدا
والتنمية البشرية علم فعلا مش معترف بيه في مصر انما دا مؤثر جدا في الدول الغربية
مين هنا بيهتم بالانسان ولا نفسيته سواء في البيت او الشغل او اي مكان
لكن هناك انتاج الانسان اضعاف اضعاف هنا لأنه مؤهل بشريا بشكل ممتاز
دا على المستوى الفردي
طبعا على المستوى الدولي
هما بيتفوقوا علينا بكتير لأن هما برضو بيلعبوا بنقط كتير منها التأثير النفسي قبل اي حاجة
يعني بيخلوك تفقد ايمانك بنفسك وقدراتك وبالتالي تري الوحش الغربي الرهيب بكل قدراته فإحنا هنا عاجزين حتى عن التفكير
اعتقد اذا كانت الدول الغربية بتفخر براجل زي دا ان هو طور العلوم دي عندهم اعتقد من باب اولى اننا نفخر بيه احنا او على اقل تقدير نستفيد بالنقاط الايجابية اللي فيه لأن هو لا نبي ولا رسول مش كل حاجة فيه صح وفي نفس الوقت مش ابليس الراجل ما أذاش ولا ضر حد بالعكس
انا عن نفسي حضرت له مرتين وسمعت له قبل كدة محاضرات
فعلا مخسرتش حاجة بالعكس
ومش لازم تدفع فلوس انت ممكن تقرأ له او تشوف له محاضرات من خلال الانترنت
ومش عايزين عادة اعداء كل ما هو جديد تسيطر علينا بالعكس شوف وادرس وقرر في الاخر

[Hossam_Hassan]

يا جماعه بالهداوه
الموضوع لو حد يحب يعرف عنه اكتر لأن واضح ان الناس متمسكه بمدء ان الناس عموما اعداء ما يجهلون و نازلين سلخ في فروه د. ابراهيم الفقي

يا د/ أمير، انا وضحت فى مداخلتى انى باشتغل فى مجال التنمية البشرية من خلال مجال الضيافة من 9 سنين فى 3 من اكبر سلاسل الفنادق فى العالم و خبرتى الأجمالية فى صناعة الضيافة بكل فروعها حوالى 15 سنة، يعنى عارف انا بقول ايه و مش "باجهل" امور سطحية تعتبر سبوبة لناس كتير، و فى نفس الوقت لا توجد اى مصلحة لى فى سلخ فروة الأستاذ ابراهيم الفقى، انا قلت رأى عن خبرة و تجربة و دراسة و ممارسة، يبقى مفيش داعى لتفسير الرأى ده على انه جهل او تحيز.

[amir]

اعتقد اذا كانت الدول الغربية بتفخر براجل زي دا ان هو طور العلوم دي عندهم اعتقد من باب اولى اننا نفخر بيه احنا او على اقل تقدير نستفيد بالنقاط الايجابية اللي فيه لأن هو لا نبي ولا رسول مش كل حاجة فيه صح وفي نفس الوقت مش ابليس الراجل ما أذاش ولا ضر حد بالعكس

علي فكره هو بيطبق ال nlp و بيشرحها فقط معنديش علم اذا كان اضاف ليها شيء

يا د/ أمير، انا وضحت فى مداخلتى انى باشتغل فى مجال التنمية البشرية من خلال مجال الضيافة من 9 سنين فى 3 من اكبر سلاسل الفنادق فى العالم و خبرتى الأجمالية فى صناعة الضيافة بكل فروعها حوالى 15 سنة، يعنى عارف انا بقول ايه و مش "باجهل" امور سطحية تعتبر سبوبة لناس كتير، و فى نفس الوقت لا توجد اى مصلحة لى فى سلخ فروة الأستاذ ابراهيم الفقى، انا قلت رأى عن خبرة و تجربة و دراسة و ممارسة، يبقى مفيش داعى لتفسير الرأى ده على انه جهل او تحيز.

حسام باشا
انا استشهدت فقط بموضوع ان الانسان عموما عدو ما يجهل
لكن اني اقول عليك جاهل يبقي مبفهمش حاجه
لأني مهما اوتيت من علم اكيد في اكتر منه عند ناس تانيه
ده حتي اللي احنا بنقول عليهم جهله و اميين دول لحنا بنقول كده علي اساس انهم مبيعرفوش يقرو و يكتبو انما لو بالحكمه و الرزانه ممكن يكونو اغزر منا جميعا
و طبعا خبرتك في المجال ده تديك الحق في نظره موضوعيه و مباشره لكن هل اديت نفسك فرصه حضور احدي الدورات ولا قريت احد الكتب عن الموضوع؟
سيبك من الراجل ده و اسلوبه و كل حاجه بس لو قريت الكتب المتوفره علي النت علي موضوع ال nlp ممكن تلاقي حاجه مهمه بالنسبالك
انا عن نفسي الموضوع افادني كتير
ده مش تشكيك فيك لكن بجد ممكن تلاقي الموضوع شيق و مفيد