من الصفر الي 300,000

[ICBM]

اهم حاجة ابعد عن الفوركس والتسويق الشبكي مع الاحترام لمشتركيهم وبتوع توظيف الاموال

السيد الفاضل amrrashed: شكراً لمرورك الكريم , وبالفعل أنا بعيد كل البعد عن الغش الإلكتروني
حيث لم تصل ثقافة التجارة الإلكترونية إلى مجتمعنا العربي بشكل كامل وسليم .

شكراً جزيلاً

[ICBM]

اولا ربنا يبارك لك فى مالك ويرزقك اكتر ان شاء الله
ثانيا : اهم نصيحة انك تكون متابع الشغل بنفسك اللى هتبتدى فيه يعنى لومحل تبقى قاعد فيه بنفسك وتتابعه بنفسك وهكذا ولا تعتمد على اي شخص اى كان مدى ثقتك فيه
ثالثا : شوف من الشغل اللى انت اشتغلته قبل كده ايه المجال اللى عندك فيه خلفية ولو بسيطة عشان ما تتخمش فى اى شغلانة وانت معندكش علم
يعنى مثلا: لو شغل مقاولات شوف هتتبتدى فيه ازاى و هتعمل ايه بالضبط ولو ما عندكش خبرة حاول تشتغل مع حد او تعرف من حد ليه خبرة فى المجال ده يفيدك ( لان بصراحة اصحاب كل شغلانه هما ادرى بشعابها من اى حد تانى)

رابعا : اختيار ايه المجال اللى هتعمل فيه مشروع بتعتمد عليك اكتر من اى حد تانى مثلا فيه واحد اشتغل مقاول وعرف ازاى يعمل فلوس مش معنى كده ان كل الناس هتعرف تشتغل نفس الحاجة او مثلا واحد اشترى مكروباص او اتوبيس وشغله وجاب منه فلوس مش معنى كده انك تروح تعمل زيه ولكن دور على اللى يناسبك بالنسبة لرأس المال اللى معاك والمجال اللى تقدر تشتغل فيه
خامسا : مهم جدا تبتعد فى البداية على ان يكون ليك شريك لان الموضوع ده فشل مع اكتر الناس اللى اعرفها

سادسا : فعلا بالناسبة للسوق فى مصر زى ما قال الاخوة الدنيا نايمة واللى معاه قرش بصراحة ما بيغامرش بيه دلوقتى ولكن اللى شغال فى مصر هو بيع الاراضى او المحلات الاستهلاكية زى الاكل والشرب وتجارة الكمبيوتر وهكذا ولكن قبل ما تبدأ فى اى حاجة منهم شوف هتعممل ايه بالضبط قبل ما تصرف مليم يعنى شوف المكان اللى هتوفره للمحل مثلا ايجار ولا تمليك ويفضل التمليك طبعا لان البيع والشرى عمليه مش ليها دخل ثابت شهريا عشان ممكن ايجار المحل يكلفك على الفاضى او تكون المبيعات اقل من الايجار

سابعا : لو عاوز تصنع حاجات ممكن تعمل صناعة ( كارتون او حقن بلاستيك وعمل شنط بلاستك وفيه شنط بتتعمل من الزبالة مثلا وممكن تعمل علب بلاستك

لو قررت تعمل مشروع صناعى شوف هتشترى المكن بكام والعمالة هتتكلف كام وكذلك المكان اللى هتشتغل فيه

ثامنا: اى مشروع شوف الاول هتشترى الحاجات اللى هتشتريها بكام و كمان هتسوق المنتج بتاعك فين و ازاى

وفيه افكار مشاريع و دراسة جدى على اللينك ده بتاع الصندوق الاجتماعى ولو مش معاك يكمل ممكن تاخد قرض منهم وتشتغل فى المشروع اللى يناسبك

دراسات جدوى استرشادية - الصندوق الإجتماعى للتنمية

فى النهاية الرزق بتاع ربنا و ربنا يوفقك يا رب

السيد العضو الكريم ahmed_2014 : شكراً جزيلا كل الشكر على مرورك وعلى نصائحك الرائعة والصحيحة , وتأكد أنني وضعت كل كلمة في الحُسبان وقرأتها جيداً واستفدت وعززت الكثير
من كلامك ومن الرابط الخاص بـ دراسات الجدوى الاسترشادية , اكرر شكري مع تمنياتي بالتوفيق لنا جميعاً

[ICBM]

النصيحه الوحيده اللي اقدر قدمها
اشتغل في الشيء اللي بتفهم فيه وتكون معلم فيه
غير كده هاتكون مغامره والبلد دي مفيش فيها حد عنده ضمير نهائي

السيد العضو الفاضل hugan : شكرا لمرورك الكريم , وبالفعل ما أسعى ألية من مشروع يعتمد بكل تأكيد على الخبرة والفهم وإلا فهي مغامرة غير مربحة .

شكراً جزيلاً

[ICBM]

متابع بأهتمام

السيد الفاضل moody_687 : شكراً لمرورك الكريم , وشكراً لمتابعتك

شكراً جزيلاً

[MAHMOUD MOHAMD]

حضرتك ممكن تتجه للاستيراد من الصين ناس مشهوره فى مجال الكماليات عملت مكاسب وهميه من بيع المنتجات الصينيه ادخل على موقع زى aliexpress وخد فكره عن اسعار كماليات السيارات المطلوبه وهتلاقى فرق رهيب فى السعر بس امانه عليك لو عملت المشروع دا اكسب بما يرضى الله فى حاجات تمنها فى الصين لا يتعدى 50 جنيه وتباع هتا ب 200 300 400 ووالله فى اكتر من كده وسافر وهات بضاعتك من هناك وممكن تعمل خدمه توصيل وممكن تحزن بضاعتك فى بيتك وتبيع من على النت
بس فى اى مشروع متحطش فلوسك كلها فيه اعمل حساب اى مشكله وربنا يوفقك للى فيه الخير انا كنت بفكر فى المشروع دا بس ظروف شغلى لاتسمح ليا دلوفتى

[amgomaa]

النصيحه الوحيده اللي اقدر قدمها
اشتغل في الشيء اللي بتفهم فيه وتكون معلم فيه
غير كده هاتكون مغامره والبلد دي مفيش فيها حد عنده ضمير نهائي

الراجل ده بيقول كلام 100 ال 100 واحب اضيف حاول مترميش كل الفلوس اللى معاك فى مشروع دلوقتى اتقل شويه لغاية متشوف البلد رايحه فين

Sent from my GT-S5282 using Forum Runner

[husseinsalah]

انا ماعنديش حاجة معينة بس نصيحة ما تثتسمرش غير تلتين فلوسك على اقصى تقدير

[S O P H O S]

ربنا يوفقك ان شاء الله

[م. حاتم السباعي]

الاخ الكريم الفاضل المجتهد icbm

في البداية اللهم احفظ لك مالك و اجعله طريقا لك الي الجنة

نصيحتي اليك هي ان تقسم المبلغ الي ثلاثة انصبة اما بالتساوي او بنسب

و لا تدخل بيهم جميعا في عملية واحدة او مشروع واحد ابدا مهما كانت المغريات و مهما كانت الامال

فلا تضع كل البيض ابدا في سلة واحدة

و اري ان الاستثمار في مجال العقارات او الاراضي او اي شئ متعلق بهما شئ جيد

تحياتي اليك و ربنا يوفقك

[Ah.Farid]

الموضوع جميل
وكل الاخوة ادلوا بأراء محترمة وخصوصا فكرة عدم استثمار كل اللى معاك مهما زاد او قل فى استثمار واحد؟
ودايما فية مقولة (شيل حاجة للزمن) الحاجة دة ممكن تبقى 25% من اللى معاك تحافظ علية وتبعدة عن شغلك

وكمان انك تشتغل فى اللى انت تعرفة كويس وبتحبة كمان ,,,,وامشى ورا دماغك سواء مكسب او لاقدر الله خسائر لية لان زى الدنيا لما بتعطى برضة بتاخد ودايما تعقلها وتتوكل على الله

اهم حاجة انك تعمل مخصص شهرى لعمل الخير وصدقنى الصدقات بتمنع حاجات وحشة كتير انا مثلا كل لما تزنق فى حاجة او تعصلج معاك حاول تتصدق بأى شىء ,,,,وهتشوف النتيجة وبيقولك ما ضاقت الا ما فرجت

ولك تحياتى وبالتوفيق

[Amro_ON]

نصيحتي البلد في حاله غير مستقره...والقيمه الشرائيه للجنيه بتنزل بشده....اشتري اراضي او عقارات لحفظ قيمة فلوسك وفي نفس الوقت هيبقى استثمار كويس

بما اني عايش في الارياف فالناس هتجنن على الاراضي وسعرها ضرب بشكل غيرب كل واحد سحب فلوسه من البنك وبيشتري ارض سواء زراعي او بنا حسب امكانياته

لو عاوز فعلا تتاجر يبأ زي ما الاخوه نصحوك...خش مجال انت فعلا فاهم فيه كويس...وحتى ده لازم تدعبس وراه كتير قبل ما تدخل

[KemozTanta]

ربنا يبارك لك في مالك وفي صحتك يارب و انا ليا رأي اتمني يفيدك..
المبلغ اللي معاك رائع ! رائع بمعني انك تقدر تحقق بيه اللي نفسك بيه بس فكر له صح الصح
التفكير الصح في رأي هو الآتي
أولاً: لو ملكش خبرة كافية جدا وابن سوق في مشروع تجاري وعارف هتجيب ايه وتبيعه بايه يبقي ابعد عن مستنزفات الاموال يعني المشاريع اللي بتحتاج مبالغ تأمين وايجار وما الي ذلك..
ثانيا: فكر وخلي تفكيرك فقط في الحاجة اللي تحط فيها 100 جنية النهاردة و بكرة لو حبيت تبيعها لإي ظروف تجيبلك ال 100 تاني مش 99 وبكدا تبقي انت شخصياً مطمن علي فلوسك وشقي عمرك..
اللي قدامي حاليا هي العقارات ، شوف شخص او اتنين أمناء يحطوا نفس المبلغ هتجمعوا مبلغ محترم أشتروا ارض وحد رابع يدخل بالمباني .. أقل تقدير فلوسك في أرض وقدام عينيك وبتزيد كل يوم قيمتها ولو قدرت تطلع بيها يبقي الـ 300 بقوا 600 ودا أقل تقدير بالعكس ممكن اكثر..
تخيل انت 4*300 يعني مليون و200 الف ، قطعة ارض ب 800 الف وال400 تبنوا بيهم حتي محلات وكام دور وتبيعوا المحلات وتكملوا باقي العمارة
لو فرضنا أرض 100 متر *8000 يعني ال 800 الف هتعمل عمارة 8 أدوار يبقي كل واحد شقتين مساحة 110 متر وصافي 90 متر
لو بعت الاثنين قول 500 الف ولو خليت لك واحدة وبعت التانية يبقي جبت تقريباً فلوسك .. ودا خلال سنة ع الاكثر
دا المشروع اللي انا اقدر انصحك و استأمن فيه مبلغ زي اللي معاك وملوش دعوة بالبلد واستقرارها

[menaraafat85]

ده حد ممكن يفيدك فى دراسات جدوى للمشاريع
https://khamsat.com/consulting/marketing-advice/62948-%D8%A3%D9%82%D8%AF%D9%85-%D9%84%D9%83-%D8%AF%D8%B1%D8%A7%D8%B3%D8%A9-%D9%84%D9%85%D8%B4%D8%B1%D9%88%D8%B9%D9%83-%D8%A7%D9%88-%D9%85%D9%86%D8%AA%D8%AC%D9%83-%D9%85%D9%82%D8%A7%D8%A8%D9%84-5?r=239475

[A_H_M_A_D]

أعتقد ان الصين هي هاتكون مفتاحك لتحقيق حلمك و للوصول الى هدفك

بس يبقى نقطتين مهمين

1- لازم يكون معاك شريك أمين و فاهم كويس و يسافر معاك و يعرف يوصل للاسواق المظبوطه هناك , وخلي بالك الغش هناك كتير قوي , لازم يكون معاك حد فاهم هو بيشتري ايه و بكام و بيدفع لمين

2- لازم تختار نوعية بضاعه تكون عارف كويس هاتصرفها فين و ازاي و امتى و بكام , يعني تكون عامل دراسه واعيه و شامله للسوق هنا في مصر و متطلباته و لازم يكون ليك علاقات مع تجار كبار وموزعين صغيرين

انا عارف ان الموضوع مش سهل , لكن مفيش حلاوه من غير نار , ولو نجح معاك بإذن الله هاتقدر تضاعف المبلغ ده كذا مره في فتره قصيره

[a7medsh3rawi]

بسم الله الرحمن الرحيم
هتعمل مشروع هتلاقى الحكومه وقفالك بالمرصاد وعايزاك تفشل بكل الوسائل الممكنه
مشاريع ناجحه + ايدى عامله ماهره + رأس مال متوفر - ضرائب الحكومه - تسويق داخلى وخارجى = خساره فادحه
مصر الان بها جميع المشاريع ولكن مشكلتها الحصار الاقتصادى للسوق المصرى
توريد بضاعه من الخارج وبيعها داخل مصر بيضر بالعمله المصريه والايدى العامله المصريه
الغزو الصينى لمصر يعتبر أسوأ من احتلال الانجليز والفرنسيين

المجال المتاح حاليا ومكسب مضمون باذن الله
العقارات والاراضى
1- ممكن تشترى ارض وتأجرها بالمده او بالمشروع ولو عايز تسيبها فاضيه وتبيعها
لما سعرها يزيد
2- ممكن تشترى عماره فيها محلات وكل شهر تلم الايجار وبرضه لو جالك بيعه حلوه
اتوكل على الله

رأى يحتمل الصواب أو الخطأ
والله أعلى وأعلم