تشطيب الشقه!!!!!!!!!

[midoabdeen]

السلام عليكم ورحمة الله وبركاته

انا داخل على توضيب الشقه وعايز اعرف الاسعار دلوقتي ايه لاني بقالى كتير جدااا بعيد عن المجال دا

هى حوالى 100م صافى

على الطوب الاحمر

عايز اعرف كل بند تكلفته كام خامات ومصناعيات تقريبيا

ياعني الكهربا والسباكه والمحاره والسيراميك والخشب والالوميتال

انا هعمل ابواب خشب للاوض بس انما الباقي كله الوميتال شبابيك وبلكونه

عايز اعرف الحاجات اللى اجيبها دلوقتى واركنها مايحصلش ليها حاجه لانى هوضب على مدار سنتين ونصف تقريبا علشان الفلوس فممكن اجيب حاجات كده واركنها واعمل كل بند على مراحل

وكمان الانواع الكويسه والاماكن الارخص ياريت تدلونى عليها

ياريت الافاده لكل اللى مر بالمرحله دى قبلى وعلشان الكل يستفاد باردوا

[dr/hamza]

50 الف اقل حاجة علشان تطلع كويسة

[mohamed_selim]

انا ممكن اقول 70 مش خمسين لانه لسه هيمحر و الاسعار غاليه فى كل حاجه

[midoabdeen]

طيب قولهالى واحده واحده طيب

ليه تصدموني كده

شكلها كده مافيهاش جواز يا جودعان

[hugan]

لو هاتشطب بلدي
500 جنيه للمتر
لو هاتشطب فاخر
1000 او 1200
اي استفسار
01223928311

[midoabdeen]

هى الاسعار دي اسعار تشطيب بس ولا اسعار التشطيب والعفش

[minicooper20]

من ١٢٠٠ لى ١٥٠٠ للمتر لو هتعمل حاجه سوبر لوكس
ده من تجربه حيه

[amr011111]

بص يا باشا

انت ممكن تعمل شغل شيك ان شاء الله ب 40 الف او 45 الف
للشقه ال 100 متر
اول حاجه هتعملها لو انت عندك كسر جوه الشقه او حتى لو مش عندك انك هتأجر ونش وده يوميته بتتراوح من 500 لحد 800 حسب المنطقه وحسب اتفاقك ده غير طبعاً إكراميات العمال
وبالمره هتطلع كميات الرمل والاسمنت للمحاره والسيراميك وهتطلع برضه السيراميك فيه


فهتحسب طبعاً فى الاول كميات السيراميك اللى محتاجها وهتجيب مبيض محاره يقولك هيحتاج كام متر رمل وكام طن اسمنت واحيانا بيحتاج جبس

وتجيب برضه بتاع الكرانيش والمصيص يقولك هيحتاج اد ايه اسمنت ابيض

وهتجيب بتاع السيراميك يقولك هيحتاج كام طن اسمنت وكام متر رمل وكام شكارة اسمنت ابيض

وتحضر كل الحاجات ديه ( رمل واسمنت واسمنت ابيض وجبس وسيراميك )


الخطوه التانيه انك
تكتب مع نفسك ورقه ان انه بند ينفع يشتغل مع التانى وانه بند يبدأ قبل التانى

يعنى المفروض السباك يشتغل هوه والكهربائى ( دول بنديين ينفع يشتغلوا فى نفس الوقت ) قبل المحاره والسيراميك وهكذا

بالنسبه لبعض الاسعار الالف طوبه بيتباعوا من 270 ل 320 حسب الكميه اللى انت هتشتريها ده لو انت هتعدل فى الحوائط وغالبا هتاخد الالف طوبه ب 320 علشان الكميه قليله

عربيه رمل 6 متر ب 120 جنيه

مصنعية السباك لتأسيس مطبخ وحمام وتركيب الاجهزه من 800 ل 1000 جنيه

تمن الباب السلسله من 350 ل 420 جنيه مصنعيه وخشب

بالنسبه للكهرباء بتتحسب بالنقطه

وهكذا

من الاخر هتعمل شغل سوبر لوكس ب 500 جنيه

[ياسر مصطفي]

محارة بس ل100 متر هتكلف فوق 6 الاف جنية بالاجرة

[shiko85]

السلام عليكم ورحمة الله وبركاته

وعليكم السلام ورحمة الله وبركاته

انا داخل على توضيب الشقه وعايز اعرف الاسعار دلوقتي ايه لاني بقالى كتير جدااا بعيد عن المجال دا هى حوالى 100م صافى على الطوب الاحمر عايز اعرف كل بند تكلفته كام خامات ومصناعيات تقريبيا ياعني الكهربا والسباكه والمحاره والسيراميك والخشب والالوميتال انا هعمل ابواب خشب للاوض بس انما الباقي كله الوميتال شبابيك وبلكونه

الكهرباء بالنقطه و الأسعار مختلفه من صانيعى لأخر حسب الطمع و الجشع اكتر سعر سمعته 25 جنيه تركيب و 25 جنيه توصيل للنقطه الواحده للمفتاح او الباريزه و مش بس كده لو وش فيه 3 مفاتيح بيحسب الواحد لوحده يعنى 150 تركيب و توصيل بس المتوسط و المعقول من 15 لــ 25 تركيب و توصيل

السباكه الحمام بالعزل و تركيب الخلاطات و السخان و كل حاجه بـ 800 لــ 1000

المحاره مش عارف
السراميك بتحدد المساحه و الأنواع و تركيب المتر بــ 20 لــ 30 جنيه

الباب الخشب الكبس الجاهز من 250 لـــ 450
الألوميتال المتر 550 لـ 850 جنيه قطاع ps على حسب نوع الزجاج و اللون عادى ولا واخد فلم خشب

عايز اعرف الحاجات اللى اجيبها دلوقتى واركنها مايحصلش ليها حاجه لانى هوضب على مدار سنتين ونصف تقريبا علشان الفلوس فممكن اجيب حاجات كده واركنها واعمل كل بند على مراحل وكمان الانواع الكويسه والاماكن الارخص ياريت تدلونى عليها ياريت الافاده لكل اللى مر بالمرحله دى قبلى وعلشان الكل يستفاد باردوا

الخشب لو مش متخزن كويس هيبوظ
السراميك هيبقى قديم و هيطلع اشكال و رسومات احدث
الألوميتال الزجاج ممكن يتكسر من الصناعيه و السلك هيتقطع و الكاوتش هينشف و المجرى هتتسد و العجل هيجى عليه تراب و يبوظ يعنى هتعمل الوميتال من اول و جديد
حاجة الكهرباء هتلاقى اشكال احدث بعد سنتين لكن انت ممكن تخلص التأسيس دلوقتى بدون اى مشاكل
علشان تبدأ الفحوائط معجون و دهانات هتلاقى 90% من الصناعيه بيقولوا بعد السراميك
اطقم الحمامات و الخلاطات هتبقى موديل قديم بس ممكن تخلص التأسيس و العزل
انا مش عايز اعقدك والله بس هى دى الحقيقه علشان خساره بعد ما تعمل كل ده تغيره

[shiko85]

فالحوائط

[Terrible_DaRsH]

لو احتاجت ديكورات بالأخص ورق حائط تحت امرك

[4fun14]

ايه يا جدعان اللى انتوا بتقولوه ده؟؟؟؟؟
1000-1500 للمتر عشان يشطب سوبر لوكس؟
يعنى شقة صغيرخ 100م تتشطب ب 150 الف؟
وانا مثلا شقتى 150 عاوزلى ربع مليون جنيه عشان اشطبها بس؟؟؟؟
احنا لسه شفنا ايام سودا؟؟؟؟؟؟؟؟؟؟؟؟؟؟!!!!!!!!!!!!

[midoabdeen]

يا جماعه انتوا فهمتونى غلط

انا مش هبدا دلوقتى مش قبل اخر السنه على ما افوق من فلوس الشقه

بس انا اقصد انى ابدا اجهز شويه ياعني مثلا اجيب من الفلوس اللى تتبقي منى حاجه كل شهر

لفات سلك مثلا مفاتيح كهربا خلاطات لمبات

من الاخر الحاجه اللى لما تقعد ميحصلش ليها حاجه

وكمان لما اجي ابدا يبقى الحمل خف شويه عليا لو بدات مثلا فى بند الكهربا يبقى عندى اصلا معظم الخامات اللى هيحتاجها وكده

وبند النقاشه خارج الحسبه من ناحيه المصنعيات لان دا كان شغلى اساسا

وكمان الاسعار اللى سمعتها دى ايه تشطيب بس ولا تشطيب وعفش

لان 150 الف دا رقم مبالغ فيه مافيش شاب يقدر عليه الا لو فى مساعدات من الاهل

فانا عايز اعرف متوسط سعر لفه السلك بكام ومتوسط سعر متر السيراميك
ولو عايز اعمل مثلا الرسيبشن بورسلين سعر المتر دلوقتى كام

[amr011111]

ايه يا جدعان اللى انتوا بتقولوه ده؟؟؟؟؟
1000-1500 للمتر عشان يشطب سوبر لوكس؟
يعنى شقة صغيرخ 100م تتشطب ب 150 الف؟
وانا مثلا شقتى 150 عاوزلى ربع مليون جنيه عشان اشطبها بس؟؟؟؟
احنا لسه شفنا ايام سودا؟؟؟؟؟؟؟؟؟؟؟؟؟؟!!!!!!!!!!!!

يا جماعه متكبروش الموضوع السوبر لوكس ل 100 متر لا تزيد عن 50 الف
الهاى سوبر لوكس حاجه تانيه