مسلسل التحرش تفتكر مين المسئول

[sherif Anton]

لو حد شاف برنامج الطبعة الاولى اللي على قناة دريم النهارده المذيع قال ان من بين الذين تم الاعتداء عليهم واحدة منقبة !!!!
يعني الشباب المنحل ده نازل الشارع ومفيش في دماغه غير هدف واحد ... انثى واي انثى مهما كانت طريقة لبسها ... شباب بايظ ومحتاج تربية وايد من حديد

[maka]

لو حد شاف برنامج الطبعة الاولى اللي على قناة دريم النهارده المذيع قال ان من بين الذين تم الاعتداء عليهم واحدة منقبة !!!!
يعني الشباب المنحل ده نازل الشارع ومفيش في دماغه غير هدف واحد ... انثى واي انثى مهما كانت طريقة لبسها ... شباب بايظ ومحتاج تربية وايد من حديد

يبقى كده فعلا عليه العوض فى البلد دى

[OlaOsman]

شباب بايظ ومحتاج تربية وايد من حديد

تماما كده.. اللي ماربهوش أهله.. الحكومة أهله (تربيه)

[R A N A]

المشكلة فعلا بقت ان الموضوع انتشر في كل الأعمار وده نتيجة قوية للي بيشوفوه في الفضائيات وعلى النت كله عايز يطبق اللي شافه ويكتشف بنفسه والموضوع فعلا مبقاش ليه علاقة بتأخر سن الجواز (رغم انه سبب قوي برده لا يمكن تجاهله يعني وخلى شباب كتير يائس من انه ينول الموضوع بالحلال فيعمل الحرام بقي وخلاص ويتخذ ده مبرر لنفسه لكن العاقل منهم يعني بيعمله بطريقة مستترة ومش مكشوفة خوفا من لوم الناس) لكن انه يتعمل بطريقة جماعية والناس واقفة تتفرج انا بجد مش متخيلة ان حال البلد وصل للدرجة دي من الانحلال والحكومة لو مبهدلتش العيال دول وطبقت عليهم اقصي العقوبات بجد هاتفتح المجال للموضوع ده وهايبقي منظر طبيعي جدا في كل شوارعنا وفي كل الأوقات مش بس في المناسبات.

بصوا ياجماعة برده يقع جزء من اللوم على البنات في خروجهم في التوقيت ده بالذات
انا عن نفسي بقالي سنين بتجنب الخروج في ايام العيد مهما كانت الظروف لاني عارفة ان الوقت ده للأسف بتلاقي فيه معظم الفئات البايظة من الشباب او مايطلق عليهم تحديدا المراهقين اللي لاحصلوا رجالة يمكن محاسبتهم والتفاهم معاهم بالعقل والمنطق ولا حصلوا اطفال يمكن تربيتهم وتأديبهم وعقابهم في بعض الأحيان ضيفوا على كده ان وقت العيد بالذات اللي معاهوش فلوس طول السنة بيكون وقتها معاه فلوس واللي مبيخرجش من بيته طول السنة فسحة العيد بتكون بالنسبة ليه هي المتنفس الطبيعي لكل رغباته من خروج وتهييس ومعاكسة بنات وقرف.

انا بجد بقيت اخاف اني اخرج في اي مكان يكون فيه تجمع كبير من الناس لاني عارفة ومتوقعة اللي ممكن يحصل من ناس ضعيفة الايمان ومريضة نفسيا عشان مديش فرصة لاي حيوان تسول له نفسه انه يعمل اي حاجة تسيئلي وتجيبلي عقدة نفسية ومن ضمن الأسباب اللي خلتني اشتري عربية هي اني مشوفش النوعية دي من اللي مينفعش حتى نطلق عليهم بني ادمين على الاأقل هاصون نفسي من مجرد نظرة او معاكسة من ناس منحلة معندهاش اي اخلاق خصوصا ان النخوة للأسف انعدمت من الناس والبنت اللي بتتعرض لموقف زي ده مبقتش تلاقي حد يدافع عنها زي زمان كله بقي يقول يالا نفسي وانا هاعمل ايه يعني.

وفعلا ياجماعة الحكومة المفروض زي ماهي بتتجمع في الماتشات والمظاهرات ونلاقي عربيات الامن المركزي بتبقي مالية الدنيا في اي اماكن فيه تجمعات كبيرة من الشباب بالذات ، المفروض برده يتعمل حساب الكلام ده في الاعياد والمناسبات انا مش فاهمة هما ايه اللي مسكتهم لحد دلوقتي خصوصا ان الموضوع اتكرر اكتر من مرة مستنيين كام حادثة اغتصاب وكام حادثة تحرش يعني عشان يعملوا حسابهم وينزلوا العساكر بتوعهم في الشوارع يشتغلوا شوية بقي بذمة وضمير ويحموا الناس بقي ، هما بيتحركوا بس في احداث اثارة الشغب طب ماهي الحوادث دي تعتبر اثارة شغب برده
واللي جنني بجد انهم متحركوش الا لما صحفي كلم رئيس مباحث وكان بالصدفة قريب من موقع الأحداث مش فاهمة ازاي شارع حيوي زي جامعة الدول ده يحصل فيه الكلام ده والضباط ميدخلوش الا متأخر اوي بعد البهدلة وقلة الادب ماتكون اخدت مجراها.
فعلا سمعة مصر بقت زي الزفت وللأسف الناس بره لما بيتنقل لها الأحداث دي بيتقال ادي الشباب المصري وبيتعمم على الكل ان شباب مصر عندهم حرمان ونتيجته الوحشية والهمجية (وانا شفت ردود على موضوع علي اليوتيوب من اجانب بيقولوا حاجات مشينة بجد عن الشباب المصريين والمسلمين بالذت وبيتهموهم للأسف بإنهم مبيقدروش يتحكموا في غرايزهم وعشان كده بيلبسوا بنتاهم الحجاب ويفرضوا عليهم لبس محتشم مش بس عشان دينهم امرهم بكده لأ عشان شبابهم الغريزة بتحكمهم اكتر وبتخليهم يتصرفوا بعشوائية مع البنات الغير محجبات) بجد انا دمي اتحرق لما سمعت الكلام ده وزعلت اوي ان هي دي الصورة اللي بتتنقل لهم عننا وده طبعا نتيجة للتعميم الأعمي بسبب شوية مراهقين سفلة مالقوش رادع يردعهم عن الهمجية والتخلف ده.

صدقوني لو حطوا في كل شارع عسكري واحد مفيش حد من السفلة عديمي الأخلاق دول هايستجري يتحرش ببنت او ست اوي حتى يعمل اي شئ غير قانوني زي السرقة اللي بقت عيانا بيانا كده
بجد الموضوع دلوقتي بقي محتاج تدخل مباشر من وزارة الداخلية قبل ماتبقي ظاهرة بجد يصعب السيطرة عليها.
ربنا يسترها علينا بجد وعلى حال البلد دي

[Abo_Lina]

السبب هو التخلف
لا فضائيات و لا نت ولا كلام فارغ
دي شعوب عقلها فاضي و عندهم استعداد فطري للبوظان و الانحراف
و شكرا

[M!NA]

اللى رايح يعمل الخير مبيبصش اذا كان هيعملوا مع بنات او ولاد ومش فى

نيته الاختلاط يبقى ده مش حل لموضوعنا وشكرا

و هو أنا قلت أنه رايح يعمل خير و بس؟؟؟ أنا بقول عملية شاملة لتطوير الشباب و البنات.... من جانب بيختلطوا و من جانب تاني جو الاختلاط شبه عائلي أو أسري و من جانب تالت بيعملوا خير....

هنا نبقا ضربنا عصفورين بحجر...

عموما لو مش مقتنع أن الاختلاط حل براحتك... بس في جميع الحالات الكبت مش هو الحل....

و ايه هو عكس الكبت؟؟ أكيد الاختلاط... و أنا لا أدعو للاختلاط في جو من المسخرة... أرجو قراءة ردودي السابقة بتمعن أكتر...

و شكرا برضه

[maka]

عموما لو مش مقتنع أن الاختلاط حل براحتك... بس في جميع الحالات الكبت مش هو الحل....

و ايه هو عكس الكبت؟؟ أكيد الاختلاط... و أنا لا أدعو للاختلاط في جو من المسخرة...

و شكرا برضه

وانا اه اللى يوصلنى للكبت ما انا اغض بصرى وامشى فى حالى ولما

اوصل لسن الزواج لو مقدرتش عليه اصوم زى ما امرنا الرسول (عليه افضل الصلاة والسلام)

لكن منعلاجش الحرام بحرام

أرجو قراءة ردودي السابقة بتمعن أكتر..
بقول اختلاط و اجتماع على عمل الخير.

اللى رايح يعمل الخير مبيبصش اذا كان هيعملوا مع بنات او ولاد ومش فى نيته الاختلاط

[gade2]

السلام عليكم
انا راى ان العيب داخلنا احنا ايوه احنا كل واحد فى الكجتمع هو مسئول بنسبه كبيره او صغيره فى الموضوع ده
بالمناسبه انا لسه فى الجامعه وكل اما امشى مع صحابى واشوف البنات ولبسها والشباب والجرأه الزايده لفضل اقول لغيت امتى هنفضل كده
بس عمرى مالقيت اجابه

[meza]

عرض الآراء فى الموضوع ده أحسن بكتير من مواضيع سابقة و أتمنى يستمر على نفس المستوى.


المشكلة من وجهة نظرى تتلخص فى كلمة واحدة الكبت.

الشباب بيتشحن بسبب عوامل كتير إنتوا عارفينها من أفلام و أغانى و كلام مع الأصحاب إلى آخره ..... تفريغ الشحنة دى لازم يتم و إلا هيتجه الإنسان لتفريغه بطرق أخرى.
بسبب البطالة فى مصر و إنعدام الأخلاق العامة بين الشباب و فقدان كل ما تحمله كلمة حقوق الإنسان و إحترام الآخر من معانى .... لا يتم تفريغ تلك الشحنة ... بالإضافة طبعاً إلى إهمال الوسائل الأخرى لتفريغ تلك الشحنة مثل التعليم الدينى و التربية السليمة و الرياضة.

و شىء آخر أنا أراه جزء كبير من المشكلة .... هو جهله بالجنس الآخر ... فتلخصت معرفته بالجنس الآخر فى جزء ضئيل جداً و هو الجزء الجنسى فقط لا غير.
ممكن نعمل إستبيان بسيط بين الشباب و نركز على المتسكعين فى الشوارع ... و نسألهم هما شايفين إيه هى أهم فايدة للبنات ؟ .... أغلبية الإجابات هتكون معروفة طبعاً.

ذكر أحد الأخوة إن الإختلاط هو السبب ...... للأسف كلامك خاطىء تماماً حسب ما أعرفه عن الطب النفسى ... الإختلاط ده شىء طبيعى .. الله لم يخلق الرجال فى نصف الكرة الشمالى و النساء فى النصف الجنوبى.

ما دامت تربية الإنسان سليمة و تعرفه حدوده فى التعامل مع الآخرين ... لا وجود لمشكلة.
لكن الفصل بين الجنسين ... من وجهة نظرى هو مثل سور برلين الفاصل بين ألمانيا الشرقية و الغربية و مثل جزيرة قبرص المنقسمة لشطرين ... نجد مزيد التباين و البعد بين الناحيتين بدلاً من التوافق و الإخاء و لن يستطيع الطرفان التعايش إلا بعد أن يتعرف كل طرف على الآخر ..... و هناك أمثلة أخرى كثيرة ... و الفصل ده مش هيحل المشكلة لكن هيثبطها فقط لحين ظهور مشاكل أخرى أخطر و أعنف كثيراً.

و كلمة الإختلاط لا تحمل أى معنى سىء (مش كلمة قبيحة يعنى) ... مش فاهم ليه فيه ناس بياخدوا الكلمة دى بمعنى سىء أو إنها شىء منبوذ !!! ..... كل الكلام ده مستورد من ثقافات أخرى مش بتاعنا.

أحب أن ألفت النظر لشىء آخر هام له علاقة بالموضوع و بالمناسبة هو يعتبر جزء من دراستى فى مادة طب المجتمع ..... نتيجة أخرى للفصل بين الجنسين هو إنتشار الشذوذ الجنسى ... بالطبع الأسباب كثيرة ... لكن أحد الأسباب هو الكبت .. و الأدلة على كلامى معروفة لمعظمنا ... فبدلاً من أن تسير العريزة فى الإتجاه الطبيعى يتم تحويل مسارها إلى طريق خاطىء .... و لا أقصد طبعاً أن يتم السماح بالمعاشرات الخاطئة بين الشباب ... لكن معرفة الآخر تمثل إنارة لذلك الطريق الصحيح... حد فاهمنى ؟!

[meza]

وانا اه اللى يوصلنى للكبت ما انا اغض بصرى وامشى فى حالى ولما

اوصل لسن الزواج لو مقدرتش عليه اصوم زى ما امرنا الرسول (عليه افضل الصلاة والسلام)

لكن منعلاجش الحرام بحرام

غض البصر عن إيه؟! ..... إنتا محتاج غض التفكير تماماً عن حاجة إسمها بنات ... لأن اللى مش هيشوف بنات فى الشارع هيشوفها عالنت و اللى مش هيشوفها عالنت هيشوفها فى أسرته و اللى مش هيشوفها فى أسرته هيشوفها فى خياله ..... و لو مقدرش خالص ... يا هينتحر يا هيدور على حاجة يفرغ فيها الكبت ده .. و ممكن الحاجة دى تبقى صح أو غلط ... بس فى الغالب بتبقى غلط.

الحل ده صعب أوى ... لأنك كده كأنك بتسجن حرامى لمدة 5 سنين مثلاً على أمل إنه ينسى يعنى إيه سرقة !!!

[MoToRiZeR]

غض البصر عن إيه؟! ..... إنتا محتاج غض التفكير تماماً عن حاجة إسمها بنات ... لأن اللى مش هيشوف بنات فى الشارع هيشوفها عالنت و اللى مش هيشوفها عالنت هيشوفها فى أسرته و اللى مش هيشوفها فى أسرته هيشوفها فى خياله ..... و لو مقدرش خالص ... يا هينتحر يا هيدور على حاجة يفرغ فيها الكبت ده .. و ممكن الحاجة دى تبقى صح أو غلط ... بس فى الغالب بتبقى غلط.

الحل ده صعب أوى ... لأنك كده كأنك بتسجن حرامى لمدة 5 سنين مثلاً على أمل إنه ينسى يعنى إيه سرقة !!!

بالزبط كدة يا دكتور .. إحنا دلوقت قي زمن هتشوف يعني هتشوف .. خصوصاَ لو شاب و بتتعرض لكل الوسائل الإعلامية و الترفيهية دي .. لذلك فعلاَ هتغض بصرك عن إيه ؟! عشان كدة انا فعلاَ شايف إن لبس البنات مش مؤثر بالصورة اللي متخيلنها .. يعني هو بيبقي مثل الضوء الأخضر للي بيتحرشوا بالنبات بس لو ملقوش بنت مش لابسة كويس بيمسكوا في أي بنت و خلاص .. لذلك هي مشكلة وعي و ثقافة في المقام الأول للشباب .. بس هيجبوها منين !؟

[moh_kamal67]

انا اخترت الشباب واخلاقهم
الغريب ان الناس مستغربة من اللى حصل
ياما شفت طلبة ابتدائى لما يلاقوا طالبات كبار يعنى ثانوى او جامعة يلمسوا جسمهم ويطلعوا يجروا وهما بيضحكوا ، دول اهلهم ماربهومشى ولافهموهم دين
ياما شفت شباب اكبر لما يلاقى عيلة ماشية وفيها سيدات يقعدوا يختاروا اقذر الشتائم الجنسية علشان يسمعوها للعائلة اللى ماشية قرفانة منهم آل ايه موش واخدين بالهم ، اهلهم مربهومش مفيش دين مفيش اخلاق
تعالوا يامالكى العربيات اتنين يخبطوا عربياتهم ، تتفتح قوائم السباب الجنسى والدينى على اعلى مستوى سواء كانوا رجلين او بينهم امرأة
مفيش اخلاق مفيش تربية مفيش دين مفيش قيم مفيش احترام مفيش ذوق مفيش لباقة ولياقة
يا اساتذة دى ازمة اخلاق ودين
الرسول عليه السلام قال فيما معناه ( انما بعثت لاتمم مكارم الاخلاق)
مكارم اى ماعلى ما تسامى ما كرم ، والناس اللى بتعمل كده معندهاش مبادئ الاخلاق اصلا
انفلات اخلاق + كبت +مخدرات + عدم وجود دين = شوية حيوانات ينهشوا من تصادف من الاناث
حفظ الله امهاتنا واخواتنا واقربائنا وبناتنا وجيراننا والنساء اجمعين من هذا الكابوس

[sa3dawy]

كل ما سبق !!

[M!NA]

اقتباس:
اللى رايح يعمل الخير مبيبصش اذا كان هيعملوا مع بنات او ولاد ومش فى نيته الاختلاط
_________

و هو أنا قلت أنه رايح يعمل خير و بس؟؟؟ أنا بقول عملية شاملة لتطوير الشباب و البنات.... من جانب بيختلطوا و من جانب تاني جو الاختلاط شبه عائلي أو أسري و من جانب تالت بيعملوا خير....

هنا نبقا ضربنا عصفورين بحجر...

واضح أنك مقريتش برضه :)

[amir]

لو هنتكلم عن القيم الدينيه يبقي لازم نشيد بدور التلفزيون و السينما البطولي في ازاحه العديد من القيم الدينيه علي سبيل المثال و ليس الحصر طبعا
الصلاه: عمرك شفت في فيلم حديث نسبيا البطل بيصلي, اللهم الا لو كان محبط احباط فظيع جدا جدا او ارهابي متشدد حقير و عاده بيتم القبض عليه و النكايه بيه, و كمان ساعات كتير بيتم التعامل مع الصلاه و المصليين عموما خاصه في المساجد كأنهم شخصيات معقده و عندها انفصام في الشخصيه مثلا يجيبلك واحد بيصلي الفرض بفرضه و تلاقيه عينه زايغه علي النسوان او بيسرق او بيحشش, و ده ان كان متواجد في المجتمع انما مش لازم ابدا نشيع الصوره دي عن المصلين و تبقي اول صوره تيجي في دماغنا لما نشوف واحد سني بدقن او عنده زبيبه صلاه
الصوم: انا مش كبير قوي في السن بس عمري ما شفت الصيام كركن من اركان الاسلام بيعرض في فيلم او تمثيليه عرض بيوفيه حقه
الحج و العمره: طبعا في الافلام بيطلعو اللي عايز يحج او يعتمر كأنه رايح يشتري المغفره بفلوسه
الزكاه: مفيش مره في فيلم او مسلسل بتعرض كقيمه دينيه و اقتصاديه غايه في الاهميه للحفاظ علي الاقتصاد القومي
و في نقطه دينيه غايه في الخطوره, و طبعا تم التعامل معاها علي مدار سنين و ادي نتايجها بنحصدها جميعا كجيل بيعيش الايام بتاعتنا دي و هي الحلال و الحرام و طريقه فصلهم عن بعض و التعامل معهم, مثلا يعرضو الشاب"الروش" كشخصيه مدخنه مستهتره لا يبالي بشيء سوي ملذاته و خروجاته و السهرات الحمراء و ما شابه و يبجلو النموذج ده و يطلعو بيه السما كنموذج ناجح و الحياه مبتسمه في وشه
و بعد ده تلاقي الشباب في الشوارع المعاكسه عندهم شيء عادي مع ان ديننا واضح جدا في اداب الطريق و كان في حديث عن رسول الله صلي الله عليه و سلم عن اداب الطريق مش فاكره بس ممكن حد يكتبه, و مفاده انك لو واقف في الشارع مع اصحابك فعليكم واجبات كتير قوي تجاه عابر الطريق, و اكيد طبعا اللي يعرف الحديث ده عارف ان المعاكسه دي مثلا شيء عظيم الوزر
و غير المعاكسه حاجات كتير اتربينا علي انها عيب و حرام لايتم معالجتها في السينما و التلفزيون علي هذا الاساس فتحولت الي شيء مستباح من كتر ما بتعرض علي انها شيء عادي جدا و اللي بيرفض الحاجات دي بيبقي متخلف رجعي و جاهل خد عندك مثلا الزنا, كلمه لما كنت صغير كانت كبيره قوي قوي, شوف كده كام فيلم البطل بيزني و المستجد البطله كمان و بيتم التعامل مع الموضوع عادي جدا و المهم ان مفيش حمل و انك استخدمت واقي ذكري( و الله كانت كلمه قبيحه لغايه ما حلمي باشا ولا الاخ التاني سلامته الف سلامه ) طلع علينا بكلمه كنايه عنه و هي كابوت تقريبا!!
و اكيد تعاطي المخدرات تم تمجيده لاسباب مش قادر افهمها بس في بعض الافلام و بالذات الحديثه نسبيا المخدرات خدت اعلانات جامده جدا لدرجه تجب معاها معامله بعض الافلام كأعلانات عنها
وده من وجهه نظر دينيه
اما اجتماعيا فالكلام يطول عن القيم التي تم القضاء عليها نهائيا من قاموس السينما و التلفزيون و علي سبيل المثال: احترام الوالدين, احترام الاخوات, احترام كبار السن, احترام الزوج و الزوجه لبعض, احترام زملاء العمل و غيره و غيره

و انا مركز علي السينما و التلفزيون لأهميتهم القصوي كوسائل اعلام مرئيه و مسموعه لها مصداقيه و سحر خاص علي جموع الناس, و مننساش ان بلدنا القله فيه مثقفه و الاكثريه عندها جهل و اميه و ان اختلفت النسب, و لسبب ده الافلام و المسلسلات بتلاقي تسميع ضخم عند غالبيه الشعب نظرا لأنها مصدر ثقافته الوحيد تقريبا
و بعد كل ده مش لازم نستغرب قوي من ظهور الحصاد الطبيعي لمسلسل طويل قديم قدم التلفزيون ذاته, من شباب غير ملتزم بدينه ولا يعرفه اصلا, و جرائم غايه في البشاعه و علاقات اسريه مفككه و علاقات زوجيه مشوهه (الجواز بقي مرتبط بالاشباع البدني و الرومانسيه المستمره 24\7)
و احب اوضح ان الاعلام الامريكي لما بيحبو يفرضو قوانين او يغيرو طباع الشعب بيلجئو للسينما و التلفزيون و الاعلانات الموجهه(مش بطريقه اعلانات حزام المرور اللي لو يسيبوهالي هخلي الناس تربط الحزام في بيوتها و متمشيش بأكتر من 60 كيلو علي الصحراوي كمان!!) بالمناسبه حد شاف اعلانات دبي اللي كانت بتيجي علي mbc عن السرعه و تأثير الصدمات بالمقارنه بالسقوط من ارتفاعات مختلفه!!!
كان اعلان غايه في التأثير لدرجه تمنيت انه يتعرض علي القنوات المحليه
ربنا يرحمنا و يلطف بينا

• دي كانت مشاركه ليا في موضوع كان معمول عن ايه اللي بيحصل للناس في رمضان
• للاسف مازالت صالحه للاستخدام نظرا ان اسباب المشكله لم و لن تحل
• لكي الله يا مصر و ربنا يحفظنا