جايلى عقد عمل مهندس مدنى بدبى

[just4fun]

انا مهندس مدنى خريج دفعة 2013 شغال حاليا فى اوراسكوم و باخد مرتب كويس جدا بجانب خبرة ممتازة .... المهم جالى فرصة عمل فى مكتب مقاولات صغير بدبى على 5000 درهم و هيوفرلى سكن فى كامب عمال (حمام مشترك وشكلوا كدة حاجة مش تمام لو حد يعرفه ياريت يفيدنى ) على حسابو ولو مش عجبنى هاخد استوديو على حسابى .. وعلية الموصلات و كل حاجة و الاكل عليا .... دلوقتى انا محتار اسيب الشركة اللى انا فيها واخد الفرصة دى و يعالم هيشيلنى شغل اد ايه و ممكن اكبر معاه او لا و لا افضل زى منا ؟؟ .. وانا حسبتها كدة هصرف من ال 5000 درهم حوالى 2500 يعنى مش هحوش كتير بس انا ببص للمستقبل ... ياريت تفيدونى اى حد جرب او عايش هناك

[qkash.com]

مبروك سافر من غير تردد

[Ahmed Anwer]

حسب معلوماتي المرتب ده قليل جدا بالنسبة للمهندسين ،،

[shiko85]

مرتب قليل جدا
خليك فشغلك هنا احسن

[أحمد كمال]

انا مهندس مدنى خريج دفعة 2013 شغال حاليا فى اوراسكوم و باخد مرتب كويس جدا بجانب خبرة ممتازة .... المهم جالى فرصة عمل فى مكتب مقاولات صغير بدبى على 5000 درهم و هيوفرلى سكن فى كامب عمال (حمام مشترك وشكلوا كدة حاجة مش تمام لو حد يعرفه ياريت يفيدنى ) على حسابو ولو مش عجبنى هاخد استوديو على حسابى .. وعلية الموصلات و كل حاجة و الاكل عليا .... دلوقتى انا محتار اسيب الشركة اللى انا فيها واخد الفرصة دى و يعالم هيشيلنى شغل اد ايه و ممكن اكبر معاه او لا و لا افضل زى منا ؟؟ .. وانا حسبتها كدة هصرف من ال 5000 درهم حوالى 2500 يعنى مش هحوش كتير بس انا ببص للمستقبل ... ياريت تفيدونى اى حد جرب او عايش هناك

كامب عمال ده هيكون اسوأ من اسوأ كوابيسك على الاطلاق ..... ريحة تقرف و مكان مش نضيف و ساكن معاك عمال يعني نضافتهم الشخصية في الباي باي و هتقرف من عيشتك


5000 درهم في الامارات ما يأكلوش عيش حاف بالمناسبة ...... تذكرة المترو مسافات طويلة مثلا ب 10 درهم .......

اقل ستوديو في دبي مش هيقل عن 25-35 في السنة (يعني من 2 الى 3 في الشهر) ...... فاضي مش مفروش (هتفرشه بحوالي 10-15 مثلا) ...... و لسه الكهرباء و المية و الغاز و الانترنت و ضريبة البلدية على الايجارات (في حدود مثلا 700-800 شهريا).......

المرتب ده بمقاييس مصر 1500 و لا 2000 جنيه ....... اوعى تحسبها ان 5000 درهم يعني 10 الاف جنيه ...... تكاليف المعيشة بتختلف من بلد لبلد جذريا ....... لو مرتبك في مصر احسن من كده + بالاضافة الى انك شغال في شركة مصرية-عالمية ذات اسم (كل ما تقعد معاهم كل ما خبرتك تمنها يزيد)

مبروك سافر من غير تردد

هتلبس الراجل في الحيط حرام عليك

[hilal]

انا مع الراي انك لا تسافر
هذا المرتب لا يساوي ثمن الغربة والتضحية بوظيفتك المحترمة التي يتمناها الكثيرون

[أحمد كمال]

فيه حل بين الكامب و الستوديو ..... سكن مشترك (شباب بياجروا شقق و ياجروا الاوض الفاضية منها) ....... الاوضة ب 1700 و طالع ........ شاملة كل حاجة من ايجار و كهرباء و غاز و تكييف و انترنت ..... بس برضه ارجع و اقول لك هتبقى صرفت اكتر من تلت دخلك على السكن + المرتب لا يزال قليل جدا برضه

[محمد عز]

اتقل شويا

المرتب ده مش مرتب مهندسين فى الامارات

ودبى كل يوم الاسعار بتزيد من ساعة ما اخدوا اكسبو

[Ahmed_Rahem]

انت شغال فى شركة كويسة جداً فى مصر وهتنقل إلى مكتب مقاولات يعنى اولاً بتزل فى مستواك، ثانياً المرتب ضعيف، ثالثاً مكتب صغير يعنى الربح قبل كل شئ واولهم الموظفين (العملا والمهندسين).
لما تحب تنقل يبقى تنقل على شركة فى نفس المستوى او اقل منها درجة او اتنين مش واحدة لسة فى اول السلم وانت فى واحدة حاجزة الاسنسير عمولة!
المرتب فعلاً يقارب من 1000 إلى 2000 جنية بحد اقصى والسؤال هنا مرتبك الحالى اقل ولا ازيد؟
فى نقطة التامين الصحى على مين؟ انت مهندس واصابات العمل واردة وتكلفتها على مين؟ كشف واح
علشان تعمل كشف برد مع اشعة على الصدر وتحليل دم دخلت فى 500 درهم فى مستشفى حكومى مش خاص.
دة مش احباط بس بنورلك طريقك.
الحل الامثل لو ينفع تاخد اجازة من 3 الى 6 شهور تروح تشوف النظام، كويس استمر، وحش ارجع تانى.

[amr011111]

من غير كلام لما يكلموك تانى قولهم اقل من 10 الاف محدش يكلمنى
بالنسبه للسفر للخارج
انت لسه خريج حديث اصبر لحد ما تاخد خبره كويسه وابقى سافر بعد كده بمرتب ينفع يعيشك هناك وتحوش منه

[dodo2000]

اصلا انجاز انك تبقى حديث التخرج و تشتغل فى اوراسكوم
خليك فى شركتك و متسافرش

[غزلة]

Egyptian Community In Dubai

استشير الرآبط التالي

[kar!m]

انت في المرحلة دي من حياتك بتبني نفسك و أهم حاجه الخبرة .. طول مانت بتتعلم في الشركة اللي انت فيها اوعى تسيبها .. أول ما تحس انك خلاص بتعمل عمل روتيني و مفيش جديد .. فكر في شغل بره.

بخلاف ان أنا شايف ان العرض مش فرصه خالص .. بالنسبة لتكاليف المعيشة في دبي.

خلي بالك كمان انك لما تسافر بيكون صعب جدا تلاقي شغل في مصر تاني أو تعرف تتجوز برضه.. عشان محتاج تنزل عشان تعمل انترفيو و كده .. فنصيحة .. حالول تتجوز الأول أو ترتبط و بعدين ربنا يوفقك وتلاقي فرصه أفضل.

الميزة الوحيدة في العرض هو انك هتعيش في بلد نضيفة.

[Rsarabia]

طبعا راتب قليل جدا فى دبى مش هتعرف تعيش ولا تحوش كويس

[a7medsh3rawi]

اوعى تعمل حاجه زى كدا
يعنى تسيب أهلك وناسك وبلدك وشركتك المحترمه وتهاجر
فى المقابل ايه؟ شوية دراهم فى شركة مقاولات صغيره يعنى (مؤسسه) وهتسكن مع العمال
الكمباوند اللى بيقولك عليه دا .. عباره عن ثكنات فراخ من اللى بنشوفها منوره بالليل واحنا مسافرين
والمواصلات هى الاتوبيسات ومع العمال برضه
ولو عايز تجيب حاجه من السوبر ماركت ولا تشترى هدوم هتروح تركب تاكسى
واتفرج بقى على الاسعار وتقعد تحسب بالمليم علشان عايز تحوش
ولو حصل مشكله أوغيبت كام يوم من الشغل او اتاخرت هيبدأ يخصم عليك من المرتب
ولو حصل ظرف وعايز تنزل مصر هيقولك انزل على حسابك وطبعا مش هتعرف
دا اذا كفيلك وافق انه ينزلك اصلا .. وهنا تبدأ مرحلة الذل من الكفلاء
ولو وافق هتدفع تمن تاشيرة الخروج والعوده وتذكرة الطياره دا غير مصاريفك

ما تزعلش منى فى الكلمه .. دا مش مرتب مهندس وهتكون عامل زى الشحات
لما تلاقى مرتبات خياليه وتسمع قصص وانت هناك .. هتتعقد من المظاهر والترف اللى عايشين فيه

انا شغال فى السعوديه .. بقيت عامل زى المطلقه لا عارف انزل بلدى ولا قادر اعيش شحات
ومرتبى نفس المرتب اللى انت كاتبه وفى مؤسسه برضه

الحمد لله على كل حال