بتعامل زملائك في العمل ازاي ؟؟

[ayman20100]

في الجزء الاول - العمال او الاوفس بوي - شايف ان فيه شبه اجماع على الطريقة المعتدلة وطبعاً عشان من وقت للاخر هيبقى فيه دلع يبقى لازم تدي وش محترم وتشد شوية وده تقريباً الى بحاول اعمله مع انه ضد طبعي ... بس للاسف اوقات بتكون مضطر للطريقة ديه من التعامل عشان الشعب المصري دايماً عنده ميل للخروج عن النص

الجزء التاني وده اظن انه متغير جداً من شخص للاخر
التعامل مع زملائك في نفس القسم او نفس الادارة
هل انت من الناس الى بتميل لبناء علاقات قوية مع زملاء العمل
هل انت انسان متعاون مع زملائك ؟
امتى بتحس ان علاقتك مع زميلك ممكن تضرك ؟؟
شايف ان ممكن علاقة العمل تمتد لعلاقة اجتماعية خارجة ؟
زميلات العمل شايف ايه الافضل في التعامل معاهم ؟؟

الاسئلة ديه كلها نابعة من مواقف بمر بيها في العمل ... فيه الزميل الحويط الى ما بيحبش حد يدخل في شغله وفيه الزميل الى مش بيحب يساعد وفيه زميل الى بيرمي كل الشغل وطول الوقت يمثل انه مشغول وفيه العصفورة وفيه الشخصية الانتهازية المؤذية وديه بقى شخصية ضعيفة بتحترف الكذب والاساءة للزملاء امام الادارة العليا املاً في تحسين صورته هو .
ياريت كله يشارك ويقول الشخصيات المختلفة في الشغل وازاي بيعرفهم على حقيقتهم وبيعمل ايه ؟؟؟ ويوصف العلاقة مع زملاء العمل ؟؟

[canner]

بالنسبة لى الشغل شغل يعنى بلاش الاجتماعيات و الصحوبية و خللى التعامل فى حدود التحية و الشغل بس

[Ahmed abdkarim]

الموضوع بختلف حسب الشخص اللى انت بتعامله مثلا . الاوفيس بوى عندنا طيب اوى وبيحترم كل الناس بس انا عن نفسى مش بخلى الاوفيس بوى يعملى اى مشروبات لانى بعملها بنفسى . وطبعا زى ما فى عضو قال ان المدير مش بيحب الموظفين هما اللى يعملو مشروبات لنفسهم علشان حييضيعوا وقت وساعة الموظف اغلى من ساعة الاوفيس بوى اللى هو اصلا شغلة .

فالموضوع متوقف على من تعامل . لو واحد شايف نفسه اطلب منه كل حاجه لان ده اصلا شغله . وزى ما انت جاى تشتغل هو برضه جاى يشتغل

[maheralsisi]

سيدى الفاضل
منصب اللى بتتعامل معاه او تعليمه مش شئ حيوى او هام يعنى مش هاتفرق كتير اذا كان عامل او زميل او رئيس
حضرتك اللى بتحط الحدود اللى بتتعامل بيها
بس لازم تراعى ان الدراسات النفسية و السيكلوجية اثبتت انك بتاخد انتج اعلى بالحب مش بالأمر
الانتاج ممكن يكون كمية او جودة و لكن . . .
مبدئيا فيه مبدئين مهمين لازم تحطهم لنفسك فى التعامل
المبدأ الأول
تعامل فى العمل فى حدود الاختصاصات و المسئوليات
يعنى مثلا لو بتتعامل مع عامل او حتى موظف تحت رئاستك لازم تبقى عارف حدود اختصاصاته و مسئولياته و هو اللى يقوم بيها يعنى مثلا
مهمة الاوفيس بوى (ده مجرد مثال لأن حضرتك اللى ذكرته مش اكتر ) مسئوليته الوظيفية النظافة و الخدمة
فما ينفعش انت تعملهم . ما ينفعش تخش تعمل ده بنفسك . لأنه بيبدأ يفترض حدود من وحى مزاجه مش من وحى الواقع
هو يعمل اللى المفروض منه . لكن انت تعامله بود و احترام خارج حدود المطلوب
يعنى بلاش تتأمر و تشخط . لا عامله بود و شكرا و متشكر و الله يخليك و تسأله اخبارك ايه و عامل ايه و كده
لكن اذا وجدته يتعدى الحدود ( و دى طبع بشرى ) لازم تتعامل بحسم و حزم بطريقة المطلوب منك تعمله و بعد كده نبقى نتكلم

المبدأ الثانى
الفصل التام بين العلاقة داخل العمل و خارجه و فى كل الاحوال لازم يبقى ليك صداقات داخل العمل لأن اغلبنا بيقعد فى الشغل اكتر من اى مكان تانى
هاتلاقى نفسك فى وقت بترأس زملاء ليك فى العمل و بعضهم اقدم منك
او العكس زميل يبقى رئيسك
فى الحالة دى ما ينفعش العشم لازم تفصل
جوة الشغل تخضع لقواعد الشغل و التزاماتك و مسئولياتك
و اللى مش هايقدر العلاقة مش هايبقى صاحب بجد و فى الحالة دى ما يلزمكش
و صاحبك اللى بيفهم هايقدر ان الشغل حاجة و الصحوبية حاجة تانية
زميل ليك بيستهبل و يرمى عليك الشغل بدعوى العشم ما ينفعش لازم تحدد له ان انت كمان عندك شغل باسلوب ظريف فان لم يرتدع فالجأ للوش الخشب
مرؤوس افتكر ان الصحوبية تعنى تعدى حدود العمل لازم توضح له ان جوة الشغل حاجة و الصحوبية حاجة تانية

الشغل شغل و الصحوبية برة
اشيلك فى الشغل لما يكون عندك ظرف فعلى (و المفروض ده مع اى زميل مش بس اصحابك )
لكن تستهبل و ترمى عليا لأ حتى لو صاحبى
و ده هايزعل الناس منك لأن ثقافة العمل عندنا فى مصر غريبة يعنى مش هايستهبل عليك الا صاحبك
بس لما تحط حدود من اولها افضل لأن اللى هايصاحبك بحدودك هايبقى بيصاحبك بجد انما لو صاحبت الاول و بعد كده حطيت الحدود هايتقال انك اتغيرت و اتكبرت و.و.و.و.
خصوصا لو اترقيت

و حاول انك تطبق نفس المبدأ مع رئيسك
يعنى ما تطلبش منه شئ بعشم يأثر فى الشغل
و فى نفس الوقت لازم تبقى حاطط مبدأ ان حتى لو اختلفت فى الشغل لازم يبقى ليه حدود ما يتعدهاش فى الاسلوب
لأن للأسف اصحاب العمل الخاص فى مصر بيبقى فاكر انه اشتراك لما شغلك و بيستعبدك

ملحوظة اخيرة
مبدأى فى التعامل مع الزملاء سواء مرؤوسين او رؤساء احتفظ ليا بصداقات كثيرة حتى الأن مع اشخاص محترمين
و لكن مبدأى فى التعامل مع اصحاب العمل الخاص تسبب فى تركى للعمل مرتين لأن بعض اصحاب العمل بيحبوا يتجاوزوا الحدود لا لشئ الا لاثبات السلطة

[ayman20100]

طيب بعد ما شوف جزء من التعليقات ومنتظر الباقي
احب اضيف رأيي الشخصي في التعامل مع زملاء العمل في نفس الادارة
1- انا ضد العلاقات الاجتماعية مع زملاء العمل لان العلاقة ديه ساعات بتبقى نقطة ضعف في التعامل ونقطة استغلال
2- فيه قاعدة مهمة جداً متبعها (ما فيش زميل في العمل عندي على الفيس بوك او مواقع التواصل الاجتماعي ) الموضوع ده مهم جداً واكتشفت ليه ايجابيات كبيرة ولكن لما بغير الشغل واسيب المكان بضيف الناس من الشغل القديم للتواصل
كمان عشان انا عامل ديه قاعدة على الجميع فمش بلاقي احراج في التنفيذ
3- العشم في العمل حلو ومطلوب بس قبله الذوق ... بمعنى لو حد طلب مني مساعدة اقوله من عيني حد قالي اعملي اقوله مع نفسك
4- الاساس في الشغل هو الشغل بمعنى وجود شغل في ايدي معناه اني اخلصه وبعدين اتكلم او اهتم ياي فرعيات تانية
5- البعض ممكن يحكي في مشاكل شخصية خاصة بحياته ..اعتقد مش مكانه العمل والاجدر النقاش في الامور العامة والمصالح الشخصية بمعنى المساعدة بالمشورة في انهاء اجراءات او الحصول على خدمة
6- انا ضد الخروج في رحلات اسرية تضم الاسرة منعاً من حدوث مشاكل ممكن تأثر على العلاقة بين الزملاء
7- عندي مشكلة ازلية في التعامل مع الشخصيات المتعودة على الكدب والنفاق ... مش بعرف ابص في وشه اصلا

[S O P H O S]

واضح ان الحوار ده مع الاغلب
لما تتعامل بطريقة طبيعة تلاقي معاملة تانية خالص

[prof2013]

انا بتعامل مع الكل سواء موظف او عامل بدون وضع فروق بيني وبينهم والكل بيحترم نفسه والحمد لله

[moudy88]

طيب لما تكون مهندس لسه مبتدي حياتك المهنيه وتلاقي كبير الفنيين بيقولك اللي معاك في التيم بيقولك ياصاحبي وياحوده ...تتطنش ولا تعمل ايه

[A.Saad]

الاوفيس بوى لو احترمته بيكون محترم
بس فيهم ناس برده لازم تخاف علشان تفضل تحترمك
وفى كل الاحوال يكون فيه خط فاصل

[A.Saad]

طيب لما تكون مهندس لسه مبتدي حياتك المهنيه وتلاقي كبير الفنيين بيقولك اللي معاك في التيم بيقولك ياصاحبي وياحوده ...تتطنش ولا تعمل ايه

تكلمه بذوق انك مش بتحب الاسماء دى ومش متعود عليها
او بتفضل اسمك