أعمل لأختى اكونت عالفيس بوك ولا لأ ؟

[adel 000]

السلام عليكم ورحمة الله وبركاته

كالعاده يا جماعه المنتدى الاجتماعى احسن مكان ممكن افضفض فيه واتكلم على راحتى

انا عندى مشكله كبيره وهيا أن أختى دلوقتى فى سن حرج " 18 سنه " وهيا مبتقعدش عالنت خالص او ولا الكمبيوتر ولا الاب هيا على طول فى أوضتها وعندها تلفزيون فقط

الأول كنت شايف ان دى نعمه ان يبقى اختك مدخلتش عالم اللنت واللفيس بوك بسبب انى بشوف ان الفيس ده زى ما ليه حاجات مفيده فبرده ليه حاجات مضره وفيه فتن كتير

بس للأسف أختى بسبب العزله دى وكمان فى الأجازه من كليتها وعندها فراغ كبييير والفراغ ده بيسبب ان دماغها بقيت غريبه وعندها احساس ان احنا متضهدينها وعاملين مؤمرات عليها واننا ظالمينها ومش عايزينلها الخير مع ان كلنا بنحبها ونخاف عليها

فى مشاكل كتير حصلت " دون الدخول فى تفاصيل " وصلت ان جالها أفكار فى الانتحار الله اعلم بتهدد ولا ممكن تنفذ فعلا

فأنا فكرت مع نفسى كده لقيت ان ممكن يكون كل ده بسبب الفراغ الللى بتعانى منه وانها قاعده على طول فى أوضتها فلازم دماغها تودى وتجيب ويولد فى مخها أفكار مش كويس

أكتشفت ان أغلب صحباتها وقرايبها البنات عندهم فيس بوك ومتابعين الدنيا وهيا ففكرت انى اعملها فيس وأخليها تشغل وقتها و تدخل تشوف الدنيا وتبقى على اتصال بصاحبتها وقرايبها
بس خايف جدا من فتن الفيس ! خايف ابقى فتحت على نفسى فتوحه اكبر ! خايف ابقى حاولت احل المشكله أبوظها اكتر !

ومحدش يقترح عليا انها تنزل نادى او تقرا او تعمل حاجه زى دى لانها للأسف مش اجتماعيه اوى وكمان ملهاش فى القرايه

[amrelsaqqa]

مفيش مشكلة بس يبقى في اهتمام ومتابعة من الاهل يعنى خليك مصاحبها على طول ما تبقاش بعيد عنها ما تعرفش اي حاجة عنها وعن مشاكلها وحط في اعتبارك ان موضوع التقفيل على البنات والمراهقين ده ما بقاش ينفع في الزمن ده ومش عايز اقولك بيجيب نتايج عكسية اصلا !

عرفها الصح من الغلط يعنى مثلا تقوللها ما تحطش صور شخصية ليها ع النت خصوصا في المرحلة دى عشان محدش يستغلها او يبتزها بأي حاجة ، ما تضيفش حد ما تعرفوش ، تضيف اصحابها البنات وقرايبها بس ، محدش يضحك عليها بأي كلام مهما كان ، تتقى ربنا في كل حاجة بتعملها .. .. .وهكذا ، بس بطريقة لطيفة مش بطريقة انك بتراقبها او مخونها او وصى عليها

وحاول برضه يبقى الموضوع بتاع الفيس بوك ده مجرد ترويح عن النفس او ترفيه او حاجة ثانوية في الحياة ما يبقاش الفيس بوك هو الملاذ الوحيد وتقعد ع النت بـ الـ 24 ساعة ، اولا خطر زي ما حضرتك بتقول وثانيا هتزهق برضه وممكن تكتئب اكتر لا قدر الله

مفيش بديل عن الحياة الاجتماعية السليمة ، قرب منها اكتر وحاول تبينلها انك مهتم بيها وبمشاكلها مهما كانت تافهة اقعد معاها واسمعلها وحسسها بالاهتمام مهما قالت حاجات تافهة ، خليها تقرب من ربنا واحدة واحدة ..

ممكن في الويك اند تخرج معاها وتفسحها في اي مكان ، تدخل المطبخ وتتعلم اكلة جديدة مثلا ..
تشوف نفسها في اي هواية زي الكروشيه والحاجات دى ..

فكر الحلول كتير :)

واحدة واحدة هتقضى على العزلة اللى هى فيها و تبدأ تكون حياة وانشطة اجتماعية كويسة ونفسيتها تفرق 180 درجة

[احمد المصرى]

اعملها فيس بوك بس خليك جنبها علشان محدش يتحك عليها بمعنى خليك صاحبها مش اخوها وكل ال فى البيت كدا وهيا لو عايزه تعمل حاجه غلط هتعملها وانت صاحبها علشان تاخد خبره فى الحياه ومش اى يتحك عليها بكلمه وفى نفس الوقت متبقاش قافله تبق عارفه كل حاجه فى الدنيا فيس بوك مثلا لما حد يتكلم عليه قدامها تبق فاهمه مش من عالم اخر وفى الاجازه خرجها انت او اى حد من اهلك وافتكر انها بعد سنوات قليله هتكون مخطوبه ان شاء الله ولازم تعرف تفرق بين الصح والغلط

[automea]

ان شاء الله ربنا يجنبها الفتن ماظهر منها وما بطن

بس اهم حاجة انت الي تقرب منها عشان بجد لو قربت من اختك هتحكيلك عن كل حاجة وهتفضفضلك ومش هتحس انها لوحدها .

[aldesha989]

اعملها اكونت على الفيس بوك ومدام هى صغيره خليك برضه متابعها بس من غير ما تحسسها انك بتخنقها او بتقيديها لان مش كويس

[ayman20100]

تفكيرك سليم وحاول تضيف بعض الافكار التانية الفيس لوحده مش الحل

[hussein]

حاول تشغلها فى حاجه مفيده كمان
تساعد مامتك وطبعا تمدحها وتثني عليها
خدها وانزل تشترو حاجه وتأكلها ايس كريم او تزورو حد
اديها اي تسك فى حدود امكانيتها تعمله وكافاءه عليه
خليها تحس انها انسانه بتعمل حاجه مفيده ولها لازمه فى الحياه
واخيرا ادعيلها :)

[automea]

ان شاء الله ربنا يجنبها الفتن ماظهر منها وما بطن

بس اهم حاجة انت الي تقرب منها عشان بجد لو قربت من اختك هتحكيلك عن كل حاجة وهتفضفضلك ومش هتحس انها لوحدها .

بضيف على كلامي اول حاجة تكون قريب منها

مفيش مانع انك تعملها فيس بوك بس الفيس بوك مش كفاية :) يعني اشتركلها في كام موقع خاص بالبنات زي فتكات مثلا

وكل ده مسكنات يعني ممكن لا قدر الله الملل هيرجع تاني الحالة دي اشبه بحالتي انا غير اجتماعي وعلى طول في اوضتي بس انا بحب اخرج مع اصحابي وبخلق اي سبب عشان انزل من البيت يعني لما ازهق ممكن اركب المترو من اول الخط لاخر الخط


بس الحل الاساسي انكم تكسروا عندها حتت الوحده دي مش هقولك انزل نادي او اي حاجة

لو فيه في كليتها اي نشاطات قلها تشترك فيها وانت كمان لو وقتك يسمح انزل معاها

زي رسالة وعشانك يابلدي حتى لو مش موجودين في الكلية ممكن تتطوع عادي

الانسان بفطرته بيحب الخير والانسان لما يعمل خير ويلاقي الناس مبسوطة بيفرح فبيحب نفسه والانسان لما يحب نفسه مش هيفكر يحزن او انه يحاول ينهي الحياة دي باي طرقة هيحب انه يعيش اطول فترة ممكنه :)

[مصطفى-حسن]

[lena jo]

اعملها اكونت و ضيف نفسك اول واحد و كلمها و اهتم بها. احلي صداقة في الدنيا هي صداقة الاخوة . مفيش اي حواجز و فيه حب فطري.ممكن كمان لو قريب منك جمعية رسالة . اذهب معها مرة و تعرف معها علي الانشطة المختلفة و ممكن تشترك في اي نشاط يعجبها. لو بعيدة . روح برده مره و فيه نشاط الكتابة للمكفوفين. ممكن تاخذ كام صفحة منهم و تكتبهم علي الكمبيوتر(هما بيحولوها لطريقة برايل بس بتكون اسهل من الورق) و تبعتهم علي mail بتاعهم . و بعد كده التواصل عن طريق الmail ،يبعتولها صفحات هما عاملين لها سكان و بعدين هي تكتبه برده و تبعته. مش كمية كبيرة .يعني 4 ورقات مثلا في الاسبوع حسب ما تقدر. و ممكن كمان فوق كل ده تفتحلها صفحات اكلات سهله تنقلها و تعمل اللي يعجبها و تشجعها تعمل علي ال small scale و لو حلو تعمل تاني. ممكن من الu tube .creative aid channel اكلتهم سهلة جدا و بسيطة و سريعة. مش لازم النت يكون شات و كلام فاضي و بس . يعني شوف مواقع مفيدة و خليها تشترك فيها. طبعا لو فيه نادي يبقي افضل كمان.ممكن تشترك في الانشطة الصيفية لو موجودة في مسجد قريب مع حفظ للقرأن و دروس مفيدة.يعني انشطة متنوعة هتحس انها مشغولة علي طول. خذ رأيها في اي حاجة بسيطة تكون عارف رأيها هيكون مثل رأيك و كأنك سمعت كلامها هتكون سعيدة جدا .اهم حاجة تعرف انك الاخ الصديق مش المراقب الشكاك و ان شاء الله تكون مشغولة و حاسة انها بتعمل حاجة مفيدة.

[A_H_M_A_D]

نصيحه بلاش بجد ، هاترجع تندم وتقول ياريتني معرفتها سكة الزفت ده
فيه حاجات تانيه كتير ممكن تشغلها ، هاتلها تابلت مثلا وخليها تنزل جيمز و ابليكيشنز و تتسلى
او خليها تدخل على الواتساب ، على الاقل هايبقى كل اللي بتكلمهم ناس هي وانت عارفهم بس بلاش الفيس بوك

[moody_687]

من الواضح من كلامك ان عائلتك شديدة وبتمنع كل شئ سواء كخروج مع اصحابها البنات وتشوف الدنيا لوحدها وده استشفيته ( من جملة انها ع طول ف اوضتها ومقدمهاش غير التلفزيون )
وطبعا مفيش لاب ليها ولا كمبيوتر وتدخل ع النت عاما ومعندهاش بالتالي فيس بوك اى التواصل الاجتماعي مع اصحابها البنات
نصيحتي ليك احتوها ثم احتوها وزى ماحضرتك ماقلت انها ف سن حرج وعايز اكدلك ع حاجة ان البنت لو عايزة تعمل الغلط هتعمله حتى لو قفلته مية باب وباب
ولازم تحسسوها انك مدينها الثقة وانها انسانة مسئولة واجذبوها ليكم بحيث تيجي وتحكى ليكم مشاكلها اللي بتقابلها فالحياه عاما عشان انتم الناس الوحيدة اللي عايزين ليها الخير

[ريحانة]

جلوسها لوحدها فى السن دا اكبر خطر ....وبيولد أمراض نفسية لا حصر لها

سنها عز الحركة والطاقة والحيوية
لازم تتفاعل مع المجتمع حتى لو هى مش اجتماعية
انتو شجعوها بدل ما تفقدوها للأبد
ممكن تشجعوها على الاشتراك فى الندوات ...او كورسات تنمية بشرية
او كورسات لغات...تتعلم حاجة جديدة
او تشارك فى انتاج....او تشارك فى عمل
زى تروح جمعية خيرية وتساعد فيها
او تروح دا ايتام -دار مسنين............الخ
تساعد الوالدة فى اعمال المطبخ والمنزل
تروح دروس فى المساجد وتحفظ قرآن فى المقارئ...لعلها تجد صحبة صالحة تعينها
على الدنيا
انما لا انصح ابدا بموضوع الفيس بوك وهى فى هذا السن
الفيس بوك اصبح فعلا قنبلة موقوتة
والنت عموما حتى المنتديات النسائية فيها الصالح وفيها الطالح
وربنا يكتبلها الخير ويصرف عنها الشر

[mustafavet]

والله انا شايف انها تعتمد علي افعالك انت
طالما بتحترم البيوت وبتتبقي الله في بنات الناس اعرف ان ربنا هيباركلك في اختك
كما تدين تدان
الفيس بوك مدخل للشيطان بس مش هو بس ف مداخل كتيرة

[مصطفى-حسن]

صدقنى لو عرفتها سكة الفيس زفت دة هتضرب نفسك بالجــ$#@!$
مجرد نصيحة من اخ