<<<< وزاره الصحه >>>>

[amir]

انا بحكم عملي الحالي في وزاره الصحه شفت و حضرت الكثير من البلاوي و الاخطاء و التجاوزات
و حبيت اعمل موضوع نتناقش فيه عن وزاره الصحه و دورها في بلدنا و مالها و عليها
و ياريت الموضوع يتناول حقوق المريض و حقوق الطبيب برضو
و عايز الناس تشترك و تقول تجاربها و ارائها
و بالنسبه للدكاتره الموجوده ياريت ارائهم بخصوصها و هل التمسك بالعمل فيها اختيار صائب ام خاسر, خصوصا لأطباء الاسنان لأني واحد منهم, و التعديلات الاخيره في المرتبات لم تشملنا, بأعتبارنا اننا مش اطباء مع العلم ان مستوانا العلمي و وظيفتنا بطبيعتها بتتطلب مجهود اقرب ما يكون للطبيب الجراح مش الطبيب العادي كمان
والتمييز بيننا و بين اطباء البشري في عدم السماح لينا بأداره المستشفيات و قصور ذلك علي الاطباء البشريين

[Dr.A.Nabil]

انا شايف ان وزير الصحه حاتم الجبلي هو افشل وزير في تاريخ مصر

-اولا الراجل ده بيعادي الكل... اطباء وصيادله وأسنان
.. والصيادله بالذات معاديهم وعمال يطلع في قوانين ومشروع جديد
1. لقانون مزاولة المهنة الجديد وتنظبم العملي الصيدلي .. الجديد
قانون فاشل بكل المقاييس وباعتراق كل الصيادله
2. عمل غرامات كبيره جدا على الصيدليات اللي بتبيع ادويه مستورده غير مسجله... زي البانادول مثلا اللي موجود في كل بيت... هاتقولي ايه الحكمه هاقولك اسأله
3.رفع الدعم عن اللبن المدعم تم قصر بيعه على الوحدات الصحيه واتهم الصيادله ببيعه سوق سودا..
والمشكله لنه وضع قواناين وشروط لاستلام اللبن المدعم ان تكون الأم مريضه ويتم الكشف عليها في الوحده الصحيه او تكون الام متوفيه او عندها 3 توائم !!!!
4.منتهى الاستغلال متمثل في مستشفى دار الفؤاد والارقام الفلكيه
5.قانون التأمين الصحي الجديد !! عايز يعمل تأمين اجباري لكل المصريين وطبعا هايلم من كل المصريين فلوس
6.كادر الاطباء الجديد... مهزله بكل المقاييييس



هاجمع افكاري وارجعلك تاني

[bimmeraddict]

انا شايف ان وزير الصحه حاتم الجبلي هو افشل وزير في تاريخ مصر

-اولا الراجل ده بيعادي الكل... اطباء وصيادله وأسنان
.. والصيادله بالذات معاديهم وعمال يطلع في قوانين ومشروع جديد
1. لقانون مزاولة المهنة الجديد وتنظبم العملي الصيدلي .. الجديد
قانون فاشل بكل المقاييس وباعتراق كل الصيادله
2. عمل غرامات كبيره جدا على الصيدليات اللي بتبيع ادويه مستورده غير مسجله... زي البانادول مثلا اللي موجود في كل بيت... هاتقولي ايه الحكمه هاقولك اسأله
3.رفع الدعم عن اللبن المدعم تم قصر بيعه على الوحدات الصحيه واتهم الصيادله ببيعه سوق سودا..
والمشكله لنه وضع قواناين وشروط لاستلام اللبن المدعم ان تكون الأم مريضه ويتم الكشف عليها في الوحده الصحيه او تكون الام متوفيه او عندها 3 توائم !!!!
4.منتهى الاستغلال متمثل في مستشفى دار الفؤاد والارقام الفلكيه
5.قانون التأمين الصحي الجديد !! عايز يعمل تأمين اجباري لكل المصريين وطبعا هايلم من كل المصريين فلوس
6.كادر الاطباء الجديد... مهزله بكل المقاييييس



هاجمع افكاري وارجعلك تاني

أخيرا يا دكتور صيدلي فى المنتدى.
المشكلة أن مهنة الصيدلة أصبحت مطمع لفئات كتيرة من الناس ومنهم حاتم الجبلي الي كان عاوز يرخص سلاسل صيدليات أجنبية في مصر.ربنا يستر على الصيادلة.ممكن أبعتلك على الخاص؟

[Dr.A.Nabil]

ابعت يا عزيزي
انا في الانتظار

[amir]

ياريت المناقشات تستمر

[Dr Ahmed]

وهى الجامعات بعيدة عن الموضوع ده؟
أنا مدرس فى الجامعة (وزارة التعليم العالى) ومتعاقد مع التأمين الصحى (وزارة صحة) والإتنين زى ال............ والحمد لله على كل شئ

مش هقول مرتبى بالضبط (مكسوف منه) بس كفاية إنه زى (ويمكن يكون أقل من) مرتب مدرس فى كلية الآداب كل مهمته الشرح لبعض الطلبة.. فى حين مهمتى مثله وتزيد بعض الأشياء البسيطة الغير مهمة مثل الكشف على المرضى ومتابعتهم وإجراء العمليات والتعرض للعدوى فى كل ساعة عمل بمقابل 15 جنيه على ما أذكر لا تكفى شريط مضاد حيوى محترم..

أما الصيادلة والصيدليات فأعلن عدائى مع معظمهم بسبب تحويلهم صيدلياتهم لمستوصفات غير مشروعة مستغلين الجهل المستشرى بين الناس ومستغلين عدم وجود تشريع يحرم ويجرم صرف العلاج بدون إذن طبيب

[Dr.A.Nabil]

يا دكتور احمد

هو الاختلاف في وجهات النظر يخليك تعادي الصيادله::

هو الصيدلي لو جالي حد عنده ضغط هاصرفله دوا ضغط من نفسي؟؟؟ استحاله لا انا ولا غيري
هاقوله روح اكشف...وده احسنلي.. لأنه هايروح يكشف وهايرجعلي بروشته مليانه فأنا في الاخر اللي كسبان حتى بالتفكير التجاري اللي احنا بعيد عنه
وفيه ادويه كتير otc مش محتاجه فهلوه

ا-انا يوميا باطلع اخطاء فادحه في روشتات للدكاتره نتيجة جهلهم بالدوا
2- دكاتره كتير بتبيع دوا في العياده وده مش شغلته
3-الدكاتره في مصر معطمهم بيقبضوا من شركات الدوا عشان بكتبوا الدوا بتاعهم ومش محتاجه كلام دي لأني اشتغلت في سانوفي وسكويب سنتين

وكل الدكاتره بتاخد هدايا ويطلعوا مؤتمرات وبيقبضوا على الروشته الواحده !!

في يا عم اكتر من كده

بس مش معنى ان كل حاجه في مصر مقلوبه وماشيه بالعكس هاقول انا باعادي الصيداله
يعني انا بأه كده هاعادي الدكتور وهاعادي المدرس اصله بيدي دروس خصوصيه وهاعادي المهندس اصله بيقلل في المون والاسمنت وهاعادي الممثل اصله بيمثل وهاعادي الضابط اصله مش عارف ايه ...


ماتعممهاش كده
ده انا بحبك برضه

[Dr Ahmed]

هو الصيدلي لو جالي حد عنده ضغط هاصرفله دوا ضغط من نفسي؟؟؟ استحاله لا انا ولا غيري
هاقوله روح اكشف...وده احسنلي.. لأنه هايروح يكشف وهايرجعلي بروشته مليانه فأنا في الاخر اللي كسبان حتى بالتفكير التجاري اللي احنا بعيد عنه

يا دكتورنا الحبيب أنا عندى 3 عيادات بفضل الله وأعرف صيادلة كثيرين وأنا متأكد مما أقول ، ولم أر أى صيدلى أو بائع فى صيدلية لا يصرف علاج من نفسه بعد سماعه شكوى المريض وتحليلها على قد معلوماته
وجملة (روح إكشف) دى أكتر من نادرة بشوية (عصفور فى اليد...)

ا-انا يوميا باطلع اخطاء فادحه في روشتات للدكاتره نتيجة جهلهم بالدوا

دا من وجهة نظرك يا دكتور أحمد ، وممكن يكون وجهة نظرك هى اللى خطأ لأن الدكتور ليه تقدير الجرعة حسب شدة المرض ، وليه حرية إختيارالصنف تبع للتشخيص اللى حضرتك مش عارفه ومدرستوش ، يبقى حضرتك لا تستطيع أساسا إكتشاف أخطاء فى العلاج لأمراض لا تعرفها ومريض لا تستطيع الكشف عليه ، ومن هنا أشكو كل صيدلى يفتى للمريض بالجملة المشهورة "العلاج دا غلط"
ولو حضرتك شفت روشتة فيها خطأ "فادح" يبقى مسئوليتك قدام ربنا تتصل بالدكتور وتستفهم منه أو تقول للمريض ملاحظتك علشان يراجع طبيبه

2- دكاتره كتير بتبيع دوا في العياده وده مش شغلته

كتير؟
أنا معرفش ولا واحد بيعمل كده
واللى تعرفه منهم ياريت حضرتك تبلغ عنه وزارة الصحة وعيادته هتتقفل فورا وياريت حضرتك فعلا تحارب الموضوع ده لو منتشر حولك

3-الدكاتره في مصر معطمهم بيقبضوا من شركات الدوا عشان بكتبوا الدوا بتاعهم ومش محتاجه كلام دي لأني اشتغلت في سانوفي وسكويب سنتين
وكل الدكاتره بتاخد هدايا ويطلعوا مؤتمرات وبيقبضوا على الروشته الواحده !!

حضرتك جبت المفيد لإن دى فعلا سياسة شركتين تلاتة فى مصر منهم سكويب وهى إصطياد كام دكتور والإغداق عليهم بالهدايا وربط دا بكتابة المنتج بالإسم...
ربما يكون المنتج غير منافس سعريا الكنه بالتأكيد منافس طبيا بالمفعول والله أعلم
لكن هل دى سياسة كل الشركات؟
وحكاية كل الدكاترة بتاخد هدايا وتقبض دى أصدقها إزاى؟ يبقى أنا بقالى كتير قوى مقبضتش مرتبى من شركات الأدوية..... ياراجل قول كلام غير ده.

ماتعممهاش كده
ده انا بحبك برضه

أنا قلت "معظمهم" وحضرتك قلت "كل الدكاترة" يبقى مين اللى بيعمم؟
عموما أنا فعلا ممكن أعمم لأن كل الصيدليات اللى أعرفها بلا إستثناء بيتم فيها تقديم خدمة سماع أعراض المريض وصرف العلاج بالبركة مجانا مع التعليق وتعديل الأدوية الموصوفة فى روشتة من رأى المريض وشخص حالته.

إجمالا أنا فعلا شايف الموضوع ظاهرة مش حوادث فردية
الصيدليات فى مصر مأساة
وممارسة معظم الصيادلة والعاملين بالصيدليات من حاملى الإعدادية والدبلومات للطب الخلفى من أسوأ المصائب المصرية

[Dr_Smart]

يا دكاتره كل مهنة وفيها الكويس وفيها الوحش

وبالنسبة لأن الصيادله بيوصفو ادوية للزباين فهي فعلا معظمها لأعراض بسيطة ونسبة العك فيها نادرة .

لكن قليل لما صيدلي يوصف من نفسه علاج ضغط ولا قلب ولا كده ... بيقول " روح اكشف "

المهم خلونا نرجع للموضوع الاساسي اللي عن وزارة الصحة عشان مايتحولش النقاش لخلاف بين الاطباء والصيادله

[amir]

مش هقول مرتبى بالضبط (مكسوف منه)

المهم خلونا نرجع للموضوع الاساسي اللي عن وزارة الصحة عشان مايتحولش النقاش لخلاف بين الاطباء والصيادله

سبحان الله
نفس احساسي بالظبط من مرتبي
انا مكسوف منه
و يوم ما بيجي القبض ببقي خجلان و انا بحطه في المحفظه
يمكن علشان بطلع زيه و اكتر منه كمان بنزين للعربيه شهريا للوصول الي ذات العمل!!!

او يمكن لأن مرتب اصدقائي خريجي التجاره (اللي انا شايفهم زي المسمار اللي بيدق في اي حيطه و يشتغل) من نفس دفعه المدرسه تخرجو من قبلي بسنين و بدءو اعمالهم بأول مرتب ضعف او ضعفين المرتب اللي باخده, مش حكايه استعلاء عليهم بس انا بذلت مجهود في المدرسه اكتر منهم و مجهود في الكليه اكتر و مصاريف اكتر بكتير ( اطباء الاسنا و الطيارين من اكتر الناس اللي بيتصرف عليهم فلوس عالميا!!)

و اكيد الجكومه مدفعتش حاجه في الموضوع ده
انا فاكر اني كان ممكن اصرف الف جنيه في اسبوع واحد فقط, و ده لأننا بيطلب منا معالجه عدد معين من المرضي في كل قسم في الكليه لأجتياز السكاشن العمليه دي, و الحكومه ملهاش دعوه العيانين معاهم ولا لأ فالواقع اننا كنا بنتكفل بكافه المصاريف , و ما ادراكم المصاريف دي قد ايه, بس لتقريب الصوره للاذهان شوف كده انت بتدفع كام عند دكتور الاسنان في مستوصف حتي( مش هنقول عياده خاصه) و اقسم اللي انت بتدفعه علي اتنين (علي اساس نوصل لأقل تكلفه ممكن علاج اسنانك يوصلها) و تخيل بقي عدد الحالات المطلوب مننا علاجها علي مدار سنتان!!!!!!!!!!!!!!

انا فاكر في الجيش لما واحد نطع كان بيتنطط علينا و يقولنا بلدكم اللي علمتكم بالمجان و عملتكم بني ادمين
و في ظروف اخري كان نفسي البسه البياده في بقه( مش بس علشان الاشكال دي بتكره كره العمي كافه حمله المؤهلات العليا و بتسعي جاهده لتحطيمهم خاصه الدكاتره) بس علشان اللي تكفل بمصاريف دراستي و اكلي و شربي و لبسي من يوم ما وعيت علي الدنيا الي ان توفاه الله هو والدي اللي بكنله كل احترام و تقدير

و انا خجلان ان واحد استاذ من اساتذه الجامعه (اللي بكنلهم كل الاحترام اللي بيمليه عليا علمهم و مكانتهم) و اللي كان منهم ناس اعتبرتها زي والدي او اخواتي الكبار
, و اكمل و اقول خجلان ان البلد مش بتديله القدر الكافي ليه ماديا في نفس الوقت اللي مكتوب علينا فيه نسمع و نقرا بعد كل رمضان الممثله الفلانيه خدت معرفش كام مليون عن مسلسل معرفش ايهو الممثل التاني القدير ( و تلاقي كل ادواره هلس و سفاله علي مدار تاريخه) بياخد كام برضو
و مثال الفنانين و المسلسلات علشان الفلوس دي فلوسنا , مش احنا بندفع الضرايب و بيدفع منها اجور الفنانين دول برضو؟
عن نفسي انا مش عايز مسلسلات ولا زفت
خصوصا انها هايفه شكلا و مضمونا

و نرجع لمرجوعنا
عنك يا استاذ دكتور احمد
هقول انا مرتبي كام
262 جنيه
باكرر 262 جنيه بس ده من غير الحوافز (اللي لسه مقبضتهاش اساسا بقالي شهور) بس سمعت انه بيوصل لحدود ال 400 جنيه!!!!

مع العلم اني شغال في منطقه نائيه و علي بعد 50 كيلو رايح و زيهم جاي!!!!!!
حد بقي يعرف مرتب الزبالين اللي في الشارع كام لأني حاسس انه ازيد من المرتب بتاعي!!!

احساس لايوصف و انت المفروض انك دكتور لازم يكون ليك وضع معين من مظهر و ملبس و كمان تعرف ان في البلاد الاجنبيه بيتم صرف مبلغ مرتين سنويا للاطباء عشان فقط الملبس!!!!!
و اللي برضو يفرسك ان الامور في الوزاره ماشيه بطريقه محاولات بائسه لتغليف طبق من الفول المدمس و ايهامك و ايهام الناس انه طبق كباب و كفته, و تلاقي كل شويه يحطو بروتوكولات و دورات و ندوات, و يطلعو علينا منها بقشور من الهيافات, حد فاكر حقوق المريض اللي متعلقه في كل عياده؟ ياريت يكتبها هنا علشان الناس العاديه بنفسها تحكم هل بيحصل المريض عليها فعلا ولا لأ خاصه ان التفتيشات بتهتم اهتمام جم انها تكون متعلقه في العياده , و كمان اساليب مكافحه العدوي الهزيله شكلا و مضمونا و اللي بكل جداره بيتم انتهاكها بصفه يوميه الا من رحم ربي
انا عن نفسي بحاول من حسابي الخاص العنايه بالمرضي بذات الاسلوب اللي ممكن اطبقه مع اهلي و قرايبي لكن الاعداد الضخمه و الحاله النفسيه السيئه اللي وصلتني ليها الوزاره بتخليني افكر يوم ورا يوم في الاستسلام و اعلان انتصار الوزاره في تدمير ضميري
و برضو تلاقي التفتيش جاي و هدفه الوحيد اصطياد اليوم اللي محدش مضالك فيه حضور و انصراف (اه بعترف كحل واقعي مادي و عملي , كافه المستشفيات الحكوميه و المراكز التابعه بيطبق فيها نظام ايام اوف, كملطف و مهدئ للاطباء, و كل المفتشين و المدراء عارفين الموضوع ده و بيسيبوه بمزاجهم الي ان يفتح واحد بقه و يتكلم في السلبيات تلاقيهم نازلين عليك بكل ما اوتي العقل البيروقراطي المصري من قوانين غاشمه في الكثير من الاوقات)

ياللا مش مشكله الحمد لله اني مش مهتم بالمرتب اساسا و ان كنت بسعي للخلاص التام من المنظومه الاداريه دي
ياريت نكمل الموضوع و بلاش مشاحنات بين ابناء المهنه و زملائها خاصه ان العدو واحد و مشترك و العيب و الغلط عليه بالاساس

ياللا يا جماعه نكمل ادينا علي الاقل بنفضفض

[Dr.A.Nabil]

حضرتك بتقول:

دا من وجهة نظرك يا دكتور أحمد ، وممكن يكون وجهة نظرك هى اللى خطأ لأن الدكتور ليه تقدير الجرعة حسب شدة المرض ، وليه حرية إختيارالصنف تبع للتشخيص اللى حضرتك مش عارفه ومدرستوش ، يبقى حضرتك لا تستطيع أساسا إكتشاف أخطاء فى العلاج لأمراض لا تعرفها ومريض لا تستطيع الكشف عليه ، ومن هنا أشكو كل صيدلى يفتى للمريض بالجملة المشهورة "العلاج دا غلط"
ولو حضرتك شفت روشتة فيها خطأ "فادح" يبقى مسئوليتك قدام ربنا تتصل بالدكتور وتستفهم منه أو تقول للمريض ملاحظتك علشان يراجع طبيبه

اقول انا لحضرتك على الاخطاء اللي الدكاتره بتقع فيها وباتصل بيهم واقولهم ان حضرتك كاتب غلط لأنها في الاول امانه:
دكتور يكتبلك حقنه يوناسين ويقولك تتحل في 4 سم ويعطى 2 سم كل 12 ساعه
طيب... مش حضرتك دكتور
الكلام ده غلط... قولي انت ليه
غلطه تانيه مشهوره:
يقولك امبول زانتاك وامبول فيسرالجين وامبول كورتيجين في سرنجه واحده !!!!!
هو احنا بنعمل كوكتيل ولا ايه؟ جرب حطهم في سرنجه واحده هاتلاقي لون المحلول زي اللبن

بلاش جايلي روشته فيها زيثروسين اقراص..(حضرتك عارفه) ومكتوب في الروشته قرص كل 6 ساعات !!! يا نهار اسود ومنيل !!!

طب شوف دي : طفل عنده سنه .. ومكتوبله لبوس فولتارين 25م صباحا ومساءا !!!!! دي مصيبه وجريمه كمان
حضرتك بتقول:
حضرتك جبت المفيد لإن دى فعلا سياسة شركتين تلاتة فى مصر منهم سكويب وهى إصطياد كام دكتور والإغداق عليهم بالهدايا وربط دا بكتابة المنتج بالإسم...
ربما يكون المنتج غير منافس سعريا الكنه بالتأكيد منافس طبيا بالمفعول والله أعلم

لا يا دكتور مش شركتين دول كتير : نوفارتس وسكويب وليلي ونوفو جلاكسو وفايزر واسترا وسولفاي وافنتس ونيكوميد ده غير الشركات المصري لبيكس وامون والدلتا والفرعونيه ....ألخ
كلهم بيعملوا كد هومفيش دكتور مش بيطلع مؤتمر.. ومفيش دكتور مش بياخد هديهوفيه اللي بياخد فلوسه كاش وفي اللي بيركبوله تكييف في العياده وفي اللي بيسافر بره هو المدام....
طب دي مش تجاره؟
ومين الصحيه في الاخر؟
مش المريض؟
رأي حضرتك ايه في الكلام؟
ولو حضرتك بتقول انك مش منهم والحمد الله... طيب كام واحد في مصر بيعمل كده؟؟؟ 95 % من الدكاتره وخصوصا الدكاتره الكبار


وممارسة معظم الصيادلة والعاملين بالصيدليات من حاملى الإعدادية والدبلومات للطب الخلفى من أسوأ المصائب المصرية

القانون بيلزم ان الصيدلي بيكون متواجد في الصديليه طوال فترة العمل... واي صيدليه حضرتك تعرف ان مفيهاش صيدلي روح بلغ عنها... بالنسبه لحملة الدبلومات لا يتعدى كونه عامل نضافه او ديلفري او مساعد زي التمرجي اللي بيشتغل في العياده ...

[amir]

بلاش جايلي روشته فيها زيثروسين اقراص..(حضرتك عارفه) ومكتوب في الروشته قرص كل 6 ساعات !!! يا نهار اسود ومنيل !!!

...

هو الزيسروسين مش اقراص برضو؟
ولا قصدك علي موضوع كل 6 ساعات؟
طيب شكله مشفش العلبه اللي مش هتقضي يوم و العيان كمان!!!
دكتور احمد اتمني ان الموضوع يتكمل و افتكر العدو هو الوزاره مش احنا
و الموضوع بسيط جدا
فئات سيئه من جميع المهن
يبقي بلاش نعمم و ندخل في حاجات فرعيه

[Dr Ahmed]

د/ أحمد نبيل.....
طبعا فيه خلل لا أنكر....
لكن -على حسب ما يصلنى من معلومات وما أراه بعينى - الخلل أكثر بكثير فى علاقة الصيدلية بالمريض والطبيب
وعلى ذكر الأمثلة (وكل أمثلتك أخطاء فعلا لا جدال)
إيه رأيك فى الصيادلة اللى بيفتحوا الدمامل ويخيطوا الجروح؟
إيه رأيك فى الصيدلى اللى بيمسك سماعة على ودانه ويكشف على صدر المريض ويشخص نزلات شعبية ويكتب روشتة؟
إيه رأى حضرتك فى الكثير من الصيادلة اللى لما يشوفو حقنة يوناسين 750 مكتوبة لطفل عنده 5 سنين ووزنه مناسب إن الحقنة غلط و "هتهبط" الولد ؟ ويصرفوا بدلها 375؟
إيه رأيك فى الصيادلة اللى أكتب لهم رينوستوب بالفم يكتبوا على العلبة تنقيط بالأنف؟
إيه رأيك فى اللى يطلع برمبران بدل بريموميسين؟ (خطى واضح جدا جدا)
إيه رأيك فى اللى يحذر المريض من أى عبوة فيها كورتيزون كـأنه لقط الخطأ الكبير ويحذره إنه دوا غلط؟؟؟
والصيدلى اللى معندوش الصنف اللى الدكتور كاتبه فيقول للمريض يااااااه دا الدكتور دا قديم قوى والصنف دا اتمنع من زمان والجديد أهوه! ويصرف أى حاجة للمريض الغلبان

الأمثلة أكثر من أن تحصى
وفعلا أنا بافكر أبلغ لكن والله ما أعرف أبلغ مين وإزاى، لو حضرتك تعرف قول لى وأكون شاكر ليك
وماتزعلش منى دى مناقشة عامة وأنا متأكد إنك مش من اللى أقصدهم بما ذكرت من أمثلة وما أكنه من عداوة وبغض لهذه الأمثلة الدخيلة لما ذكرت من أسباب وليست لأسباب شخصية.

[Dr.A.Nabil]

عزيزي دكتور احمد:

كل اللي حضرتك قلته دي اخطاء فاضحه... لكنها والله قليله...انا عمري ما شفت صيدلي بيطلع سماعه ويكشف على مريض
لكن عموما احنا في مركب واحد
لما تلاقي حاجه من دي بتحصل حضرتك اتصل بنقابة الصيادله
وتأكد ان النقابه فيها مجموعه من الصيادله المحترمين اللي بيحاربوا الانحراف والفساد
ودي نمرة النقابه:
27964523
27958394

بالنسبه لدكتور امير:
الزيثروسين بيتاخد قرص كل 24 ساعه قبل الاكل بساعتين والعلبه 3 اقراص عشان 3 ايام متتاليه..

المهم...
وزارة الصحه..

[amir]

بالنسبه لدكتور امير:
الزيثروسين بيتاخد قرص كل 24 ساعه قبل الاكل بساعتين والعلبه 3 اقراص عشان 3 ايام متتاليه..

طيب انا عارف المعلومات دي و متشكر ليك عليها و احب ازود انه بيمنع الاكل بعده بساعه (ها مذاكر كويس ولا ايه؟؟)
و كويس ان الموضوع بينك و بين الدكتور احمد مخرجش عن الموضوعيه و انا بحييكم و شاكر لمشاركاتكم
المهم فعلا وزاره الصحه و انا مستغرب من قله المشاركات مع اني لاحظت ان عدد الدكاتره في المنتدي مش قليل اطلاقا!!