<<<< وزاره الصحه >>>>

[bimmeraddict]

يا دكتورنا الحبيب أنا عندى 3 عيادات بفضل الله وأعرف صيادلة كثيرين وأنا متأكد مما أقول ،

لو سمحت يا دكتور أنت عندك 3 عيادات
أولا:هل أنت لوحدك شغال في 3عيادات ولا معاك دكاترة تانيين شغاليين تحت ايدك,ولو كده هل أنت متأكد 100%أن كل اللي شغاليين عندك بيشخصوا ويعالجوا صح؟
ثانيا:أنت المرضى لما بييجوا العيادة أو العيادات عندك بينتظروا أد اية؟ولا بيكشفوا على طول؟وكل مريض بتخصصلة وقت أد اية ولا كلة بالبركة؟
ثالثا:هل أنت بتدفع مرتب الممرضيين عندك ولا بتحملة على ثمن الكشف وبيدفعة المريض؟
رابعا:حضرتك تخصصك اية؟
أخيرا أنا طبيب ووالدي صيدلي وتربيت من وأنا صغير جوة مطبخ الأطباء والصيادلة.وأقدر أقولك برغم حبي لطب مهنة الصيدلة أشرف بكتير من طب.أكيد في كل مهنة الكويس والوحش.

[Dr.A.Nabil]

عارف يا امير...
في جنبينا مستشفى تجميل
دايما اقرأ لها اعلانات في الوسيط
شد وش.. شفط دهون.. رفع حواجب .. نتف صوابع... ترقيع مناخير
...الخ

وكنت قريت مره في الجرايد انها اتشمعت اكتر من مره
عشان مخالفات جسيمه

ومع ذلك لسه شغاله

فين وزارة الصحه؟؟

انا زمايلي اللي شغالين في التأمين الصحي بيياخده 200 ج مرتب

----------------------------------------------------

طب بلاش..
البلد الوحيده اللي في العالم اللي بيقولك ادفع مصاريف العلاج عشان تستلم الجثه وتتدفن !
-----------------------------------------------------
العلاج على نفقة الدوله... حدث ولا حرج
90% منه مخصص للوسايط والمعرف.. ولا يذهب لمن يستحقه
-----------------------------------------------------
فين الرقابه والمتابعه على محلات الفاست فود؟
وفين الرقابه على الجزارين وبتوع الفراخ؟
كانوا فين لما لحمة الحمير والكلاب بتتدبح؟؟؟
-----------------------------------------------------
فين الرقابه على المستشفيات الخاصه؟

-----------------------------------------------------
مين المسئول عن فضيحة اكياس االدم الملوثه
-----------------------------------------------------

----------------------------------------------------
للحديث بقيه

[Dr.A.Nabil]

فيه سؤال تاني هايجنني

مين اللي بيحدد تمن الكشف بتاع الدكتور !!!!!

تلاقي دكتور كشفه 350 ج والحجز قبلها بشهرين تلاته
وتلاقي واحد تاني كشفه 200
وواحد 100 ج
وتاني يقولك 50ج
وممكن في الاخر كلهم اساتذه كبار @@@



دكتور يدخل يعمل عملية بواسير يقعدلك في غرفة العمليات ساعه ويقولك 5000 ج اجره ايدي غير مصاريف المستشفى !!!

ماهي اصلها مفيش قوانين ولا قواعد بتحكم وبتربط الارقام العجيبه دي

[bimmeraddict]

فيه سؤال تاني هايجنني

مين اللي بيحدد تمن الكشف بتاع الدكتور !!!!!

تلاقي دكتور كشفه 350 ج والحجز قبلها بشهرين تلاته
وتلاقي واحد تاني كشفه 200
وواحد 100 ج
وتاني يقولك 50ج
وممكن في الاخر كلهم اساتذه كبار @@@



دكتور يدخل يعمل عملية بواسير يقعدلك في غرفة العمليات ساعه ويقولك 5000 ج اجره ايدي غير مصاريف المستشفى !!!

ماهي اصلها مفيش قوانين ولا قواعد بتحكم وبتربط الارقام العجيبه دي

للأسف الأطباء دلوقت بقوا زي المقاولين بياخد أي عملية جراحية من بابها, ياخد مكسب الدوا ومكسب الاقامة في المستشفى ومكسب طبيب التخدير ويديه الفتات.طبعا مش كل الدكاترة بس مش أقل من 50%.
ده غير أن معظم العيادات حتى بتاعة الدكاترة الكبار تلاقيها صغيرة والمريض بيقعد أكتر من ساعتين عشان يدخل للطبيب.وتحجز قبلها بشهر وأكتر.
ده غير أن أهم عيب شفتة لحد دلوقت وأشنع عيب أن معظم الأطباء بيبخلوا بمعلوماتهم على الطلبة .أنا اتبهدلت في مستشفيات الجامعة ومحدش بيعلمنا.

[Dr Ahmed]

وأشنع عيب أن معظم الأطباء بيبخلوا بمعلوماتهم على الطلبة

للأسف صح
وأنا عانيت منها جدا وتعبت جدا للوصول لمستوى يصلح فى نظرى كأساس مرضى قابل للتطوير ولا أزعم أنى وصلت لأعلى مستوى بل أطمح إليه وأسعى إليه طول حياتى بإذن الله
ورد فعل الدكتور اللى بيكافح علشان يتعلم ويتدرب كويس نوعين: إما يعاقب -دون أن يدرى-كل من يكون مسئول عنه فلا يعلمه كى يتعب مثله (وللأسف 75% منهم كذلك) أو يرى أن من واجبه الحتمى توصيل هذه الأمانة لمن يليه .. وهم ليسوا كثيرين
ويوجد نوع ثالث لا يوصل المعلومة لأحد لأنه لا يعرفها أساسا أو غير قادر على توصيلها

أما بخصوص أسعار الكشوفات والعمليات فأعتقد إنها تخضع للشهرة قبل الخبرة ، فأطباء التليفزيون مهما كان مستواهم العلمى تكون أسعارهم أغلى
عموما يوجد لكل درجة علمية حد أدنى لكن لا يوجد حد أقصى ولا يوجد أى تشريع فى العالم يحدد هذه القيمة إلا فى المستشفيات ، أما العيادات الخاصة فلا يوجد.
كما تخضع لقناعة الطبيب
الطبيب بشر مثل غيره ، ومن الأطباء من يقنع بمبلغ معين ولا يهمه الثراء ومنهم من يحب المبالغ الكبيرة ويطمح للثراء ، ومنهم من يخفّض أو يعالج الفقير بالمجان زكاة عن صحته وماله ومنهم من يرى أن الفقير له طريق آخر فى المستشفيات الحكومية بالمجان ، وكلا الطرفين له وجهة نظره الخاصة

الموضوع تشتت جدا ويسير بعيدا عن هدف الكاتب

[Dr_Smart]

بالنسبه لدكتور امير:
الزيثروسين بيتاخد قرص كل 24 ساعه قبل الاكل بساعتين والعلبه 3 اقراص عشان 3 ايام متتاليه..

..

يا دكتور مع احترامي

بس على حد علمي ان ممكن ال Azithromycin يستخدم بجرعه اكبر من كده في بعض الحالات تصل ال 2 جم في اليوم single dose كمان

والله اعلم

اقصد ان طالما الخطأ مش absolute ومتأكدين منه تماما يبقى لازم نحتسب ان الدكتور ده جايز يكون اكثر خبره مننا

[MoToRiZeR]

انا لي صاحبي صيدلي بيشتغل في شغل حكومي تبع الوزارة و مرتبه 154 جنيه .. يعني الواحد يشقي و يتعب في مدرسة و كلية و تدريب عشان ده

لولا إنه من عيلة مستريحة مادياَ و مش عايز الشغل غير في score ملف الهجرة بتاعه كان زمانه بيشد في شعره طبعاَ .

[amir]

طيب سؤال موجه للاخوه الاطباء
لا خاب من استشار برضو
انا دلوقتي علي اخري من الوزاره
و مش بروح للسبب ده بقالي اسبوع تقريبا
و كل اللي عايزه اني اروح ارمي الاستقاله
ممكن اراء و نصايح؟