الانفجار السكاني مشكلة ... برأيك هل لها حل !!

[Y a r i s]

الإنفجار السكاني مشكله هل لها حل ؟

اكيد كلنا لامسنا مشكلة الزحمة ... والمشكلة الاقتصادية ... لكن انا كل ما اطلع الشارع واشوف كمية الشباب والعيال الي موجوده في الشارع بقول لنفسي (( يالهوووووي ... كل دووول. ياترى العيال دي مصيرها ايه هنجبلهم شغل منين ولا هيلاقوا شقق منين ))



الغريب اني رحت ازور مهندس صديق ليا لسه متجوز قريب من خمس او ست سنين على ما اتذكر. المهم رحت ازوروا لقيتوا مخلف تالت عيال والرابع لسه في اللفة يعني بقه عندو اربع عيااااااال ... الحقيقة انا ذهلت ايه يا ابني كل العيال دي (( لقيتوا بيدحك ويقولي ياسيدي العيال احباب الله )) طبعاً مرضيتش اتكلم معاه في الموضوع. لان خلاص الي حصل حصل. هقولوا يعني رجع العيال دي تاني بطن امهم ولا هقولوا استنضفلك اتنين وارمي الباقي :) . لكن الشاهد في الامر انا وهو كنا زمان نقعد نقول واحنا بندردش مشكلة البلد دي الناس الي بتخلف خمسه سته. ... مشكلة البلد الناس الكتيررر ... وان الخلفة الكتير مشكلة المشاكل. ... يجي الأفندي اول ما يتجوز يجيب كل كمية العيال دي ... ويمكن حالت صاحبنا دي بسيطة لكن احنا في ٢٠١٤. ومازال في ناس بتخلف بالخمس والست عيال .

اكيد واحد هيقولي طب وانتا زعلان ليه ... هقولك لا ابداً بس قولي انهي أب في الدنيا هيقدر يربي كل العدد الكبير ده او حتى يصرف عليه ... وادي النتيجة بقينا نشوف. تالت تربع العيال في الشارع مش متربيين. ... واهاليهم مورهمش شغلانه غير خلف وارمي ... تانياً يا اخي. بالعقل كده. لاحنا الصين ولا احنا اليابان. معندناش القدرة الاقتصادية اننا نكفي الي موجودين ونوفر لهم وظائف وشقق فليه. بنزيد اعباء فوق اعبائنا .... يعني بالذمة يا فرحتك لمن تخلفلك ١٠ عيال وتقعدهم في البيت جمبك لانتا قادر تلاقي ليهم شغل ولا نتا نفسك قادر تشتغل وتصرف عليهم ... وسيبكم من كلام احمد الشقيري الي عايش في عالم الاحلام ويقولك لا دي قوة بشرية ومش قوة بشرية ... لكن خد مني انا المفيد الحاجة ان زادت عن حدها تتقلب ضددها.

@@@@@@@@

بذلك انا فتحت معاكم الموضوع وعاوز اشوف شباب المستقبل لو اتجوزتوا
هل ناوين تخلفوا اكتر من عيل !! ولا ناوي تحدد النسل ؟

هل انتا شايف في حل لمشكلة الزايدة المفرطة في التعداد السكاني او الانفجار السكاني ... وهل انتا سعيد بكترت الناس !!!
برأيك الشخصي أيه الحل للانفجار السكان !!
وبرجاء مرعات حدود النقاش في اطار إجتماعي بعيد عن التطرق باي شكل من الاشكال للسياسة

@@@@@@@@@@@
وشكراً ... وتحياتي

[qkash.com]

يسلم لسانك
لكن تقول ايه شعب مبيفكرش في اي حاجة بيعملها قبل ما يعملها بيعملها وخلاص وزي ماتيجي تيجي
والنتيجة اجيال متخلفة وعقول خربة مثلهم الاعلي عبده موته والالماني وغيره وغيره من رموز الانحلال والانحدار الاخلاقي
وبعضهم يعتبر النادي الذي يشجعه وطنه الذي يضحي بنفسه من أجله
ويقولك يوم ما ابطل اشجع هكون ميت اكيد....واللي يقولك فداك روحي يا زمالك واللا يا اهلي

وكل هذا نتيجة الاهمال واللامبالاة من جانب الاهالي التي تنجب اطفال بلا حساب ولا تهتم بتربيتهم فتربيهم البيئة الاجتماعية السيئة التي نعيش فيها من اعلام فاشل وفن هابط وشيوخ تتدعي التدين وتطبيق صحيح الدين وهم ابعد مايكونوا عن الاسلام

ربنا يرحمنا برحمته ويهدينا جميعاً الي ما يحب ويرضي
ويصلح احوال البلد

[بحار]

فى الحقيقة هى فعلا قوة بشريه ... بس استغللها ازاى وامتى وفين ؟ هوه ده الكلام اللى نتكلم ونفكر فيه ..
احنا بوضعنا ده زى اللى معاه تنك بنزين كبير مخزنه ومعندوش عربية !!!
وبكده تخزين البنزين عندك .. مكلف وبتعمل صيانه للخزان وريحه ضارة فى المكان .. وبتعرض حياتك وحياة الناس للخطر !!
البنزين حلو وله قيمه عالية .. بس لما يبقى عندك عربيه !!
ولحد مانجيب العربيه .... انا ضد الانجاب بدون حساب .. تحياتى

[mustafavet]

كنت بتكلم مع صديق ليا صيني وبساله عن سر النهضة الاقتصاديه الحاليه
قالي ان الشركات الصينيه بتقلد المنتجات العالميه علشاان يتم البيع داخل الصين لانهم عددهم كبير وبالتالي يقدروا ينجحوا اي منتج
عاوز اقولك في حلول كتيرة جدا
انت شايف ان العدد كبير لاننا سايبين مصر كلها ومتركزين حول شريط النيل تقريبا 4 % من مساحة مصر الكليه
المشكله مش في العدد لكن اولا الحكومه فاشله وثانيا البلد مقفوله ومش مفتوحة للاجانب زي البلاد التانيه وبالتالي غياب المنافسه وغياب الافكار الاستثماريه
المصريين عندهم رهاب اجانب (زينوفوبيا) فاكرين ان اي حد هييجي يبقي احتلال او اقتسام ارزاق
الحل ان البلد تتفتح بضوابط زي كل الدول المحترمه وندور علي افكار جديده وانشاء مدن جديدة وتغيير العاصمة
القاهرة خلاص راحت عليها لازم العاصمة تتغير

[prof2013]

عمر ما كانت الزياده السكانيه مشكله بل تعتبر ثروة بشريه بدليل ان فيه دول تفوقنا عددا ولكن يعدون من الدول المتقدمه ونسبه البطاله عندهم ضئيله
المشكله ياريس باشا في الحكومات اللي حكمتنا على مدار 60 سنه بدايه من عبد الناصر حتى وقتنا الراهن
ولو رجعنا ورا شوي في عهد الاحتلال الانجليزي تم ضرب التعليم في مقتل لان كلما انتشر الجهل كلما صب هذا قي مصلحه الاستعمار وهذا مربط الفرس (انتشار الجهل) ومن المعروف ان اساس تقدم الشعوب هو تطوير منظومه التعليم لديهم فكيف نستطيع تحقيق الاكتفاء الذاتي ونحن على مستوى متدني من العلم والمعرفه
لذالك بعد جلاء الانجليز عن مصر لم يتم الاهتمام بمنظومه التعليم حتى انتشر الجهل شيئا فشيئا
وبالتالي حدثت طفرة كبيره بين ازدياد السكان وضعف التعليم مما ادى الى انتشار الفوضى والهوجائيه في المجتمع بجانب عدم اهتمام الحكومات بتطوير المنشات والموؤسسات وبناء مدن جديده بما يتناسب مع الاعداد الكبيرة التي تزداد يوما بعد يوم
وبعد ان فلت الزمام وانتشرت الفئات الضاله كسائقي التكاتيك والتروسيكلات
فلا اعلم ما هو الحل الامثل لمعالجه هذا الامر الخطير وخصوصا ان نسبه المتعلمين والمحترمين اقل كثيرا من نسبه الجهلاء

يتبع .......

[Y a r i s]

تحياتي ليكم ولأ رائكم ... وعجبني كلامكم ولو هسايركم جدلاً وهكون معاكم. ان الحكومات السابقه هيا السبب ومش هيا السبب ... طيب الي حصل حصل وادينا شايفين الحال وصل بينا لأيه. هل هنستمر ننتج في طاقة بشرية غير مستغله وملهاش مكان في الكون ولا ليها اي وجود في الوجود ولا المفروض نمسك نفسينا شوية ونعمل وقفه لعملية الخلفة والحمل .

ثم ذكرتم حضارتكم مثال. الصين ... الصين على فكرة قبل ما تنهض كانت زينا كده فاتحينها على البحري قعدو يخلفوا يخلفوا يخلفوا. لحد ما فلسوووا ومبقوش عارفين. حتى يأكلو عيالهم او يلاقوا لقمه ... المهم قعدوا يفكروا ازاي يطلعوا من المئزق الي هما فيه ... وفي اخر تفكيرهم لقوا. ان اول حاجة علشان البلد تعرف تفوق وتنهض. انهم يمنعوا الخلفة دي نهائي ... وانهم يقفلوا حنفية. العيال الي شغاله تنقيط وخلفه عمال على بطال وبالنسبة للأسر الجديدة لكل اسرة من حقهم طفل واحد فقط. هو الي يستحق الدعم من مأكل ومشرب وصحه وتوفير وظيفة ... واي طفل تاني. غراااااامة كبيرة يدفعها الاب مدام هو فييس قوي ونفسوا في طفل تاني .

يعني الموضوع مش زي عندنا هنا كل واحد مخلفلي قرطت عيال ... لا وبيطالب البلد انها توفرلوا احسن تعليم واحسن صحه واحسن خدمات ... وعاوز دعم في كل شيء في بانزين في غاز في جاز في سولر في كهربا في عيش في سكر في زيت. في لحمة في حتى لبسوا وشربوا ليه ولعيالوا وعيال عيالوا !!! وكل عيل عاوز وظيفة وعاوز يتجوز وعاوز شقة فيخرررررررب بيتك ماهو في غيرك تسعين ملييييييون . وبحسبة بسيطة انتا لو عندك ٩٠ مليون. نصهم رجاله ونصهم اناث وقلنا الرجال هيتجوزوا الاناث ... يبقى انتا محتاج ٤٥ مليون وحده سكنية !!

قول نص الوحدات السكنية دي موجود وباقي ٢٠ مليون شقة ... هتلحق ايمتى تبني الشقق دي كلها علشان العيال تتجوز وفين الفلوس الي هتبني بيها ... ثم ان الصين فيها مجمعات سكنية والله العظيم عبارة عن عشش او تقدر تقول عليها كده سكن جماعي بتلاقي الدور صالة كبيررررررررة ومليانه سراير بدورين وانتا بتدفع تمن ايجار السرير يعني لا ليك خصوصية ولا نيلة بيرموا الناس كده فوق بعض فوق بعض . فليه احنا بنستنى نوصل للي وصلوا ليه الصينين. انا بعتبر الي الصين فيه ده مأساه مش نهضة ... بقت حياتهم كلها شغل في شغل منزوعه الانسانية والادمية .

اذن. الخلفة الكتير دي كارثة مش قوة بشرية ابداً. لانها هتكون نقمة بشرية وليست نعمة الخلفة الكتير بتبلع اي تقدم ممكن نوصلوا ولا ايه. يا شباب ... وهنا انا بسئل ايه الحل اواي نقدر نخف شوية من الخلافة ؟

[KemozTanta]

انا شايف العيب في الست المصرية
اربطة بالعيال وهو مسئول يأكلهم ويجيب مصاريفهم ,, المفروض الهانم تمسك نفسها وليهم سكك كتير توقف بيها الخلفة بعد عيلين وفي نفس الوقت متقصرش في حقوق الراجل.. لكن مفيش مخ وهمهم اكبر قدر من السيطرة ع الراجل للابد ان شاء الله يتقطع نفسه من الشغل والصرف عليهم
هي لما تقوله كفاية او حتي تضحك عليه وتاخد حبوب تمنع اى حمل تاني هيحصل ايه
وعي الست المصرية في الضياع تماماً

[Y a r i s]

طيب ماهو زي مافي وسائل منع الحمل للسيدات ... ماهو فيه كمان وسائل منع حمل للرجالة بكفاة انواعها ... بس المشكلة في ثقافة الشعب و ههههه اغلب الرجاله بيخافوا ياخدوا حاجة كده ولا كده تأثر سلب على كلووو ومايرجعش زي زمان خالص ( وقول الزمان ارجع يا زمان ) . لكن. يا سلام لو يعملو حبايه كده اتنين في واحد تكون مقويات وفي نفس الوقت بتمنع يعني بيرت بلس اتنين في واحد ... يااااه مفيش كده عالم مصري صيدلي جهبز. كده يخترع حاجة زي كده ... الصيادلة عندنا أكوام أكوام. وكلهم بسم الله مشاء الله شغالين يا مندوبين مبيعات. يا قاعد بيبع معجون سنان. ولا قزازة شامبو ! مفيش حد فكر فيهم كده في اوقات الفراغ يصطاد عرستين ويقعد يعمل عليهم ابحاثوا :)

[dede_dodo88]

من يومين أتجننت و نزلت كنت عايز أشتري شوية حاجات من مول العرب و كنت متخيل أني هلاقيه فاضي عشان بعيد و كده,, و أتصدمت أول ما دخلت من الباب بالمنظر,, أيه كل البــــشــــر دي !!
أنا كنت ماشي بوسع عشان أعرف أمشي, و لوهلة حسيت أني روحت الهند أو الصين.. فأخدتها من قاصرها و مشيت من غير ما اجيب حاجة..

حل التكدس السكاني هو التوسع الأفقي بعيداً عن شريط النيل, و ده دور الحكومة..
مهم أنها تشجع الأستثمارات العقارية بعيداً أماكن التكدس و يكون في أهتمام بتوصيل الطرق و المرافق للأماكن دي,
نقل الادارات و الوزارات خارج العاصمة, و أنشاء محافظات جديدة..

أنا بتخيل مثلاً لو مصر كانت في حجم أمريكا و كان في نهر النيل برضه قاسم البلد ؟ كنا هنسيب بقية المساحة و نتكدس حوالين النيل ؟!
أحنا محتاجين البلد تتبني زي أمريكا كده, أفقياً مش رأسياً,, معرفش بقى لو الوضع فضل بالشكل ده الحياة هتستمر أزاي !!..

[subhimust]

يا باشا العيب عيب حكومات
هقولك انا انت بتقول يبنوا منين 20 مليون شقة هقولك شوف كمية الااراضي اللي في اكتوبر فاضية قد ايه خصوصا الحي التاسع و خلافة شوف امتداد اكتوبر صحراء ليه عارف ليه عشان فيه مافيا حكومية رجال اعمالية من تجار الاراضي عاوزين التكدس ده عشان يسقعوا الارض ويبيعوها مثلا لما الحكومة تعلن عن ارض قرعة مثلا الف قطعة يتقدم ليها 50000 واحد يعني 50000 اسرة طب انا ليه كدولة معملش مرافق ل 50000 قطعة ارض عارف ليه عشان يفضل السوق عطشان وهلم جرا
ليه انا كدولة لا ابني مدن جديدة زي اكتوبر بنفس مقوماتها وادي رخص جامعات خاصة فيها عشان تكون مدن جذب
ليه انا كدولة الاراضي الصناعي بستلم مقدماتها واقعد اذل المستثمرين باعشر سنين عشان اوصلهم مرافق مع ان لو وصلتلوا مرافق هيعمل مصنع و يشتغل ليه ليه
ليه انا كدولة لا اتبنى مشروع قومي زي الصين يعمل على انتاج كل شى في مصر بدا من سلكات الاسنان حتى الصاروخ عن طريق تجمعات صغيرة مدعومة ومدروسة من الدولة مع منع المستوردين من استيراد اي منتج يصنع بالداخل مع وضع سياسة تسعيرية حازمة جدا منعا لاستغلال منع الاستيراد

الدولة هي كل شى لولا وجود دلة في الصين لوجدت الصين ماتت من المجاعة من زمان

[subhimust]

ليه انا كدولة املك ملايين الافدنة و قوة زراعية جبارة لا استغل هذه حتى يكون الدخل القومي المصري يعتمد على الزراعة وليس على السياحة
تعرف لو اهتمت الدولة بالزراعة نصف اهتمامها بالسياحة لوجدت مصر دولة اخرى خالص
دول زي هولندا والمغرب قائم اقتصادها على الزراعة
اسرائيل تنتج زراعيا افضل من مصر
احنا مش دولة

[subhimust]

ماليزيا ثلت مساحة مصر و تلت عدد سكان مصر ولا تمتلك مقومات و موارد زي مصر و كانت افقر من مصر قبل مهاتير محمد
شوف لمن جه مهاتير محمد عمل فيها ايه

[zorg]

اعرف واحد متخرج من سنتين ومش لاقى شغل وسيادته راح يخطب
انا شايف علاج المشكلة:
1- توزيع السكان على المساحات الشاسعة اللى موجودة ببناء مدن جديدة وخلافه ويبقى التوزيع بالعافية
2-اجراء تغييرات على نظام الزواج والولادة اما يمنعه الجواز او يمنعه الخلفة ويتم فرض عقوبات صارمة ضد الناس اللى بتخلف اكتر من واحد

[subhimust]

اعرف واحد متخرج من سنتين ومش لاقى شغل وسيادته راح يخطب
انا شايف علاج المشكلة:
1- توزيع السكان على المساحات الشاسعة اللى موجودة ببناء مدن جديدة وخلافه ويبقى التوزيع بالعافية
2-اجراء تغييرات على نظام الزواج والولادة اما يمنعه الجواز او يمنعه الخلفة ويتم فرض عقوبات صارمة ضد الناس اللى بتخلف اكتر من واحد

يمنعوا الجواز ايه الحل السحري ده
ونقضيها زي القطط على رأي اللمبي#####

[Y a r i s]

الخلفة في مصر

هو منع الجواز هيدخلنا في مشكلة تانية وهيا انتشار التحرش ... وبالعكس انا محتاج ان المجتمع كلوو يتجوز لان الجواز بيعصم من الخطأ ... وبيهدي ويلم البني ادم. .... بس الي احنا مش محتاجينوا. هو خلفة تفوق قدرة البلد الاقتصادية ... يعني انا شايف برضوا الحلول بتقتصر على الدولة وماما الدولة رغم اني بتكلم عن ثقافة شعب ازاي نقدر نغيرهاااا .

اي مدن جديدة او اي تنمية هتلاقيها ضاعت هباءً منثورة مع زيادة عدد المواليد ونقص عدد الوفيات ... يعني ممكن على مستوى مصر كلها (( توفى ال رحمة الله ١٠ مثلاً في اليوم لكن احنا بنتحدث عن عدد ولادات مولود في كل دقيقة. في كل ثانية ...

لو شفنا اوروبا مثلاً بيكون فيها العكس عدد وفيات اعلى و عدد مواليد اقل ... لكن تعاله نبص كويس على حياة الاسرة الاوروبية وسر نجاحهم في حياتهم بتلاقي الرجل والست. بيقعدوا يقعدوا يعيشوا حياتهم شغل عمل فسح سياحه وفي الاخر يخلفولهم حتت عيل. يدخلوه احسن مدارس احسن تعليم احسن علاج صحي. واحسن واجمل طعام. ويعيشوا حياتهم في هنا وسرور ... في حين اننا عندنا العكس. بنخلي الستات تقعد تخلف وتخلف وتخلف لغيات ما تلاقي الست ضربت خلاص وهنجت ... ويصبح جسمها متهالك وهيا لسه مكمليتش ٤٠ سنة يعني في عز شبابها. تشوفها تقولها ازيك يا حجة ... بينما الاوروبية تشوف عندها ٦٠ سنة ولا ماشية في ال ٦٥ وتشوفها. تتجنن عليها وتتهبل عليها ... يعني حتى علمياً المرأة بتبدء تعيش حياتها بعد الى٤٠. تبتدي كده وتبقى زي الثمرة المستوية .... وفي حالة اسمها مراهقة الخمسين عند النساء .... تبص تلاقيها رجعت عيله من تاني ... لكن مش زي عندنا احنا بعد ال ٣٢ خلاص. يابابا تبص تلاقيها تقولك خد بايدي يابني سندني علشان تطلع ولا تنزل من فوق الرصيف في الوقت الي الاوربيات بيتسلقوا جبال الهماليه الاستاذة عندنا مش قادرة تنزل ولا تطلع من فوق الرصيف !!! :) وتلاقي بقه الم مفاصل وهشاشة عضام وسنان ابتدت تخلع ... وقولون بايظظظ طول ماهي قاعده بتلاقيها تبخرلك الؤوضة ... ومتبقاش عارف دي عاوزة تغير شكمان ولا تركبلها طبه.... طول ما هي قاعدة على محشي وورق عنب وكرونب ... لما تعمي الراجل خالص ... والمسكين يا عيني. قبل ما يتجوز كان نظروا ٦/٦. بعد الجواز من كتر ما تعمى يا عيني. تبص تلاقي بقه يلبس نضرات .

القصد : انا كنت بشوف في رمضان الي فات ده اعلان بتاع بنك الطعم تحت مسمى (( مسلسل الجووووع والفقر )) وفعلاً صور ناس كتير ولاحول ولاقوة الا بالله ياربي. بياكولوا من القمامة. ودي حقيقة وكلنا بنشوف. الناس دي ... ودايماً. بيحثونا اننا نتبرع لهم ونساعدهم. وان دينا كده بيأمرنا وخلي فعل الخير عادة الى اخره .... لكن الي انا باستغربلوا ان الناس الي بتدور على اكلها في القمامة والمخلفات. بتلاقيهم شايلين عيل وعيلين وتالته واربعه وخمسه وسته !!!!! يعني انا مش فاهم انتا مخلف عيل. علشان ياخود بيدك وتدورو سوى في الصفيحه على لقمة حلوة ... ولا مخلف العيال دي كلها وعامل حسابك ان كده كده الناس هتساعدك والجمعيات الخيرية كتيرررر وابو بلاش كتر منو !!

ده غير طبعاً ان الزكي فيهم. بياخد العيال الصغيرة ويرميها في اي دار ايتام. ... الي كده ولا كده الدولة بتصرف عليهم من الميزانية المخصصة لتنمية ... يعني بشكل من الاشكل الناس ماشية على نظام (( خلف وارمي )) وده الي بنشوفوا. على الاشارات الشحاتين الي موجودين على كل اشارة. او السايس البلطجي الي بيبلطج على خلق الله علشان عاوز ٥ جنية او ١٠ جنية من كل عربية بتركن أيتاوة .

فالمشكلة كلنا شايفنها ولمسينها ... لكن انا بسئل هل فيه حل لهذه المشكلة ... مشكلة ثقافة الشعب ذات نفسهاااا ... وهل هتبقى ظريفة لو كان في قانون ينظم عملية الخلفة. ... او مثلاً توزيع وسائل تحديد النسل. مجاناً مثلاً. اوقيه مجانيه. او حبوب منع الحمل مجانيه وتعاله خود الحباية. تحصل على مكافئة مالية خاصة للفقراء تحت خط الفقر. ولا مش هتبقى ظريفة ! انا عارف انها هتبقى مكلفة جداً على البلد. لكن على المدى البعيد هيبقى في تاثير ايجابي والناس هتقدر تحس بالانتعاش الاقتصادي ... وبعدين هشبهلكم الموضوع دلوقتي انتا لو عندك عربية هونداي اكسنت اخر موديل ٢٠١٥. ار بي مثلاً ولا حته كيا سيراتوا. دلوقتي العربية دي علشان تجري. مين احسن لها لمن تكون محملة اتنين تلاته. ياترى هتحس بالسحب وبالتكيف كويس. ... ولا لمن تبقى العربية مقعد الناس فوق بعض و فوق بعضها امم اممم وحتى فاتح الشنطح حاطط فيها عيال ورى وعيل كمان قاعد فوق الكبوت !!

فهو ده الي بتكلم فيه ... وبسئل كمان اين دور الاعلام ... في توعية الناس بخطورة الزيادة السكانية الغير محسوبة ... واخطار الخلفة الكتير على الصحه ... يعني حتى مسلسل الاخير صاحب السعادة بتاع عادل امام مصور للمشاهد ان السعاده الحقيقة. انك يبقى عندك عياااااااال كتيررررر وتشيل احفادك حوليك وتجمعهم في بيت واحد وجايبلهم اتوبيس الاخ يوديهم المدرسة ويرجعهم من المدرسة والحياة وردية وفل الفل !!!

بكرر سؤالي ازاي نمنع الكلمة المصرية الشهيرة. (( اصل اتفقنا هنجيب عيل واحد ... و بعدين التاني جه كده بظروفها يعني مكناش عملين حسابوا ... اما التالت ده بقه ياسيدي. ... التالت ده بقه عسسسسسل عسسسل )) هههههه طيب وبعدين .... وتحياتي