الانفجار السكاني مشكلة ... برأيك هل لها حل !!

[Ladawy]

جميل الموضوع ده ،،

و اليكم رأيى /
سبب المشكلة منين ؟؟
احد ابرز الاسباب هى الحكومة :) ... مش هاتكلم فى السياسة ولا حاجة

بس الزيادة السكانية امر طبيعى .. يتطلب موازنته و مواجهته من قبل الحكومات بالتوسع العمرانى لاستيعاب الزيادة دى

و الحكومات واخدة اجازة من المهام دى من عشرات السنين .. و شغالة ب 1% من كفاءتها ... لذلك حدثت الزيادة اللى كنا بنشوفها دى

للعلم ،،، من 100 سنة ، كنا 12 مليون تقريبا ، ايام جدى و جدك .. مش من زمان اوى ولا حاجة
( مصدر : التركيبة السكانية في مصر - ويكيبيديا، الموسوعة الحرة )

بس برضه زى ما قولتوا ثقافة المجتمع عندنا "بتحب اللمة" ... الخلفة بالكميات :)
فالعدد بقى اعداد ....... و الحكومة برضه لا عملت دورها ، ولا وعـّـت الناس للمنحدر اللى داخلين عليه
ووصل الحال لإن الدولة سايبانا احنا اللى نعالج و ننظلم الليلة .. عاوز سكن شوفلك اى ارض جرفها و دخلها انت المرافق بمعرفتك و خططها و قسمها . و ابنى و عيش .... لحد ما بقت مصر كلها عشوائيات

تعليم ، الفصل ابو 20 طالب حط فيه 40 ... اقلب المدرسة فترة صباحية و مسائية ... و اهى فرصة لناس تانية تسترزق بالمدارس الخاصة بعد ما التعليم بااظ .

الصحة و الخدمات ... طبقوا فيه درس ابتدائى بتاع ( كل واحد يخدم نفسه ) :) .. لإن الحاجات دى عندنا مسميات بس ، مفيش حد بيدخل مستشفى حكومى و يطلع احسن

و كله عندنا بقى مضروب


نحس بقى بالموقف و الوضع ده ؟؟؟
و نعرف اننا لو حتى وقفنا الخلف نهااائى هايبقى يادوب خففنا الاثر السلبى للى بيحصل بنسبة طفيفة
للأسف لأ .... مكملين !!

و خلف واحد و اتنين و تلاتة و خمسة
و السكينة و الشغل سارقك و مش قادر تربى حتى واحد .. و سايبها بظروفها
الاول تفضل تحوشله و تدخله هندسة خاصة ... و يفشل و يرجع تجارة
و التانى تسيبه لاجتهاده .. و يركن فى تجارة جنب اخوه
و التالت معهد ولا صنايع ... و هكذا
أو حتى يا أخى طلعت 5 دكاترة ... هاتشغلهم ازاى ؟؟ هاتجوزهم ازاى ؟؟ و فين ؟؟ و امتى ؟؟؟
و لو الخمسة اتعينوا دكاترة جامعات ... برضه هايحتاجوك ماديا فى تجهيزهم للزواج
كل ده على افتراض انك مخلف صبيان ... فمابالك بالبنات :) ..

هاتبقى عايش حماار ... تور فى ساقية ، بس علشان تعيش ، تــ survive !!
مراتك ما هى إلا منبع مصادر الازعاج اللى مخلفاهوملك !
قمة سعادتك متمثلة فى النوووووووم ... و البعد عن دوشة و مشاكل العالم دى كلها

=======================
البلد غلطت معانا غلطة و ركنت على جنب بخصوص موازنة التزايد السكانى
نقوم احنا برضه نسوق فيها و نكمل زيادة ...
و للعلم برضه ، لو اللى ماسك البلد " مورينيو - مدرب ريال مدريد " ... برضه مش هايحل مشكلة موازنة الزيادة السكانية دى فى يوم و ليلة ... ولا سنة ولا عشر سنين حتى ... بس احنا نساعد و ما نستمرش فى تكبير المشكلة
مش عشان مصر يا اخى ... انجو بنفسك انت و ماتزنقش نفسك

=======================
واحد صاحبى لسه كان معايا امبارح ، متجوز قريب ( فى فرح واحد صاحبنا تالت )
بيقول : مسئولية و التزامات و مصاريف و مشاوير ووجع قلب !
قولتله : امال ليه اتجوزتوا بقى طالما هى قرف كدا
قالى : علشان حتة الهدية اللى منتظرها بعد الولادة ، يقولى يا بابا و يبقى قرة عينى
.
( مراته هاتولد بإذن الله فى غضون الايام القادمة )
و عارف ان كمان سنة لو فتحنا الموضوع ، هايضم شكوى الخلفة جنب شكوى الجواز ..

************
الجواز حلو ... و الخلفة و ان ابنك يلعب حواليك حاجة زى العسل ( و انا فعلا مؤمن بكدا )
لكن شاءت الظروف ان الحاجات دى فى بلدنا حاليا بتبقى مشاكل ، مش فرحة أو مصدر بهجة
ظروفنا كدا !!


و متاابع معاكم

[cosmo]

انا فى كلام كتير عايز اقوله بس مش عايز اخش فى تفاصيل كتير
بس هو سؤال واحد تفتكر لو منعنا الخلفة نهائى مشكلتنا هتتحل؟
البلد دى لو بقيت 100 فرد هتلاقى 10 عايشين كويس والباقى بيعضعضوا فى الارض
وبالنسبة للناس الفقرا اللى بتخلف كتير فى فيلم جرى الوحوش بتاع الطورلوب
كان بيقوله كل واحد ليه رزق 24 قراط هياخدهم هياخدهم اختلفت التقسيمه برضو هيطلعو 24

[S O P H O S]

كل شخص لازم يبدأ بنفسه
يعني اثنين او ثلاثة بالكتير اوي
حتي علشان تطلعهم كويسين كمستوي معيشة وتعليم وخلافه

[Ladawy]

ممكن تكون وجهة نظرك صحيح يا cosmo
على افتراض ان الفساد بقى جزء لا يتجزأ من جيناتنا :)

لكن انت لو فكرت على الصعيد الشخصى ، هاتلاقيك بتهرب من فخ صعوبة و ضيق المعيشة
ازمة ان ربنا هايرزقك برزق المولود ،، بس الدولة مش حاسبة المولود ده و لا عاملة احتياطاته
و برضه لازم تاخد بالاسباب ، و ماتخلفش جيش !!
( أو الافضل ما تخلفش خالص :) )

[Bassem Youssef]

احنا عايشين علي 7% من مساحه مصر علي حسب كلام السيسي

لو ال 7% دي بقه 10% مثلا هتبقي العمليه كويسه شويه

و برضه الناس تمسك نفسها شويه و تخلف بالعقل

[cosmo]

ممكن تكون وجهة نظرك صحيح يا cosmo
على افتراض ان الفساد بقى جزء لا يتجزأ من جيناتنا :)

لكن انت لو فكرت على الصعيد الشخصى ، هاتلاقيك بتهرب من فخ صعوبة و ضيق المعيشة
ازمة ان ربنا هايرزقك برزق المولود ،، بس الدولة مش حاسبة المولود ده و لا عاملة احتياطاته
و برضه لازم تاخد بالاسباب ، و ماتخلفش جيش !!
( أو الافضل ما تخلفش خالص :) )

ياباشا انا مش بهرب من حاجة اناا لسه صغير على الكلام ده
انا بتكلم ان المولود رزق قبل ما يكون بيجى برزقه

[إنسانة]

التفكير العقلاني هو بداية الحل
بحيي حضرتك على الموضوع
معاك طبعا في موضوع تحديد النسل وعندي تعقيب على مسألة تأخير الإنجاب
لإن دول لو إقترنوا ببعض يبقى البلد بتتوجه لكارثة
تأخير الإنجاب مع تخفيضه هينتج لنا أجيال فيها نسبة تشوهات أعلى من الوقت الحالي
ودا ينطبق على المرأة بعد الأربعين و كمان على نسل الرجل اللي تخطى الأربعين
فالرجل مسؤل عن 30%(+-5 ) عن حالات متلازما داون و التوحد والإعاقات العقلية إذا أنجب في سن 40 وتزداد الخطورة بعد الخمسين
والمرأة مسؤلة عن 50% من داون بعد الــ 40
بتزيد نسبة التشوهات والإعاقات و الأمراض العقلية لنسل اللي بيتخطى الأربعين من الجنسين
وطبعا فيه دراسات كتير وضحت إن معظم التوحديين كانوا لآباء يتخطون الأربعين سنة وأمهات يتخطين الأربعين أو أحد الأزواج تخطى هذا السن
و عمر الأب يرتبط مع الشفة المشقوقة والحنك المشقوق، بصرف النظر عن عمر الأم
مع ما يصل الى 60% من حالات الفصام محتمل لكبر سنه الأب
بسبب إرتباط سن الرجل بزيادة الطفرات والتشوهات في الشفرة الوراثية مع إنخفاض كفائة عملية الموت المبرمج للشفرات المشوهة
وللأسف لايوجد أي توعية إلا فيما يتعلق بعمر المرأة رغم أن عمرها مسؤل فقط عن حالات داون وتهمل مسألة عمر الأب رغم أنه مسؤل عن عدد أكبر من التشوهات وبنسب مخيفة

لذلك الدولة المفروض تجبر المواطنين على تحديد النسل وتشجعهم على الزواج و الإنجاب في سن الـ 20 و الـ 30


ومش فاهمة الحقيقة نبرة اللوم للست المصرية كثيرة الانجاب ورميها بالجهل و الفشكلة : )
لما تحل الكارثة بقي الراجل ياعيني مربوط ومغلوب على أمره والست هي اللي مش بتفهم وجاهلة ههههه

إذا كان كثير من الي عندهم العادة دي هما اللي بعتبروها تحت الوصاية الذكورية في كل شيء إشمعنى جت على الخلفة وبقي قرارها وحدها
رغم إنها طرف مماثل للطرف الآخر المتمثل في الزوج في هذا الشأن ولا يمكن تحميلها كامل المسؤولية إلا إن كان الطرف الآخر فاقد تماما للأهلية


عندها وسائل منع و عنده نفس الوسائل
وعندها خوف على نفسها مماثل لخوفه على نفسه من الوسائل
فالأمر متساوي هنا

بخصوص الفشكلة أنا ممكن أعذر وحدة خلفت 6 أطفال ولم يهيء لها "الزوج" فرصة شراء أجهزة رياضية أو مراجعة متخصصين تجميل
بل ولم يعطيها حتى الوقت لتستطيع معالجة المشاكل الناتجة عن حمل وولادة 6 أطفال سحبوا من مخزون عظامها الكالسيوم ومن دمها الهيموجلوبين وتغذوا عليها
ويمكن كمان داخل طالع يتشرط أكلات وطبخات دسمة مليئة بالكربوهيدرات والسكريات والدهون بأنواعها ويمكن إن لم تمتثل يبدأ يقارنها بجارتها وزوجة صديقه الماهرات في الطبخ
ممكن أعذر السيدة دي وأشفق عليها وأتمنالها حياة أفضل : )

لكن مش ممكن أعذر شخص لم يحمل بأي طفل بجسد من أنجبت 10 أطفال توائم
ومتاحله كل وسائل التنقل والرياضة والوقت
والمصيبة فوق دا كله أعد يتريق على زوجته هههه
أو شخص يصعب على الكافر من كتر الضعف والوهن اللي وصله في سن الأربعين ويتحدث عن ضعف زوجته اللي حملت وتحملت 6 اطفال بإنتقاص
مش عارفة بصراحة أي مجنونة اللي هتفكر تربط هذا الكائن وتربطه بإيه "بأطفاله" اللي سحبوا كل صحتها هههههه
منطق يثير العجب


ولو بنفس المنطق عقدنا مقارنة للرجال الأجانب في عمر الخمسين كأنه رجل عربي ثلاثيني
فالأمر على هؤلاء سواء بسواء


فقليل من الإنصاف والإعتراف بحقيقة المشكلة لن يضر ^_^’

بخصوص مسألة الزراعة مصر مصنفة كأفقر الدول التي تهطل عليها الأمطار



وحصتها من الماء لم تتغير مع انفجار عدد السكان + 9 مليون فدان زراعي فقط


أجمالي المساحة الزراعية في مصر 2012 - دا مستخلصة من أقمار موديس -




"الزراعة باللون الأبيض" - 8.5 الى 9 مليون فدان

عندنا نموذج نمى ونجح في الزراعة و على صغر حجمه تفوق على الشرق الأوسط "كيبوتسات"
دا مصطلح عبري ودا كان بدايات سيطرة إسرائيل على مساحات فاضية و إعمارها
بالعربية "مزرعة تعاونية"
ودا من أنجح الوسائل اللي أثبتت كفائتها في موضوع الزراعة وحتى الصناعة محتاجين ننقل التجربة دي


---------

الشكل يمثل تضاعف السكان مقارنة بعددهم عام 1900




مصر زادت 10 أضعاف في 2013 ممن ماكانت عليه في 1900
نقارن بقى زيادتنا بدول العالم بالرسم البياني دا





المشكلة مش بس في عدد السكان في مصر، المشكلة الاكبر في التركيب الديموغرافي







سنة 1964 كان عدد سكان كوريا الجنوبية مماثل لعدد سكان مصر - أنهاردة كوريا الجنوبية 50 ، ومصر 90 مليون!! وبص التركيبة لكوريا




القوى العاملة اكبر شريحة في المجتمع ودا بينعكس على انتاجية الفرد لكل الشرائح


فمش ممكن نتكلم عن اي حلول مع الزيادة الكارثية دي وفقر الموارد

[Y a r i s]

الكثافة السكانية , الزواج والخلفة , تحديد النسل , مسلسل الفقر , مسلسل الفقر والجوع ,

كلام جميل ... وكلام موزون. مقدرش أقول حاجة عنوا :)
بس انا كان عندي سؤال صغنطط قاااد كدهوا على كلام حضرتك يا ست الكل ... بخصوص تأخير الأنجاب ... طبقاً للدراسات والكلام الي حضرتك. قولتيه انا بقولك اه الكلام ده واقعي ١٠٠٪ في المجتمعات العربية. لكن هل الاجانب سواء كانوا من دول الغرب او حتى الشرق وجنوب شرق اسيا ينطبق عليهم هذا الكلام ؟ إن لو أخروا الأنجاب ممكن بنسبة كبيرة يجي المولود مصاب بتوحد ... او حتى الامراض الجديدة الي بقينا نسمعها عن الاطفال كفالله الشر وربنا يشفي كل طفل يارب العالمين. الاطفال المصابين بالسكر او قلبهم ضعيف ... !

اعتقد الاجابة ... لا ... لأن نسبة كبيرة من الاجانب بيخلفوا او يبتدوا يفكروا حتى في الخلفة بعد الاربعين بعد ما يكون عاش حياتوا فعلاً بالطول وبالعرض وعاطفة الامومة او عاطفة الابووببه بتنقح عليه ونفسوا في حتت عيل يقولوا يا داااادي .

حد هيقولي اومال بيحصل معانا كده ليه (( الشر بره وبعيد عنكم وعن السامعين )) هقول بسبب الأكل السيء والملوث الي الناس بتاكلو. الي موجود بسبب فقر البلد وعاوزين يسدوا جوع البلد باي حاجة ... والي سبب هذا الفقر الاساسي كثرة المواليد بشكل أعتباطي وغير مدروس .

فأنا هنا عندما ذكرت تحديد النسل ... فذكرتوا من اجل حياة كريمه للجميع ... والى ان تتحسن الظروف ... ماهو ميصحش مثلاً يكون. الزوج مديون لطوب الارض وديون بره وديون جوه ودين خارجية وديون داخليه ونقوم نخلفلو كمان توؤم ونقلوا انتا مجبور توفر لهم معيشة كريمة .... وعندما ذكرت تأجيل الخلفة. فانا مش قصدي ان الواحد يخلف يعني على الخمسين او على الاربعين . لا. بس انا قصدت ان مش شرط انتا اتجوزت تبقى انتا لازم. تخلف وتخلي مراتك تحبل في أول سنة ! وده الي باستغربلوا من ثقافة شعب جاهل !! ده حتى في اول يوم الصباحية يجوا يزوروك. ويسئلوك عملت أيه !!! هكون عملت ايه يعني واحد راجع من الفرح الفجرية وراجع مهدود ومتكسر ومدغ دغ هيكون عمل ايه يعني ! لا والي يجي يقولك عاوزينك بقه يا بطل تملالنا البيت ده كلو عيال ... نفسي اشوف عيال كده يتنططوو حوليك !!!!!

وياسلالالالالالام بقه. لو عدى كام شهر ومحصلش حمل كل شوية واحد يجيلك. وكل واحد يشوفك. اول كلمة. على طرف لسانوا بعد سلام عليكم وكيف الحال ... يقولك ايه يا بطل مفيش حاجة جيه كده في السكة !! ويحسسوك بانك شركة شحن او كأنك بوسطجي وكل واحد يشوفك يقولك ايه مفيش جوابات ولا ايه ... شايفين الى اي مدى الناس بتتطفل على حياتك الخاصة .... شايفين كم الأحراج والأهانه الغير مبررة في ثقافة شعب فقير وجاهل ... وعاوز كمان يزيد الفقر. فقير جديد ويجي يتنطط في البلد كده ... عارفين المثل المصري الشهير الي بيقولك مركب البلالييط مش ناقصه بطل :)) .... ويا سلام بقه لو قلتلهم لسه واللهي ربنا ما أردش ... تبص تلاقي الي قدامك فجئة اتقلب راجل مؤمن وواعظ ... ويهزلك في دماغوا كأن في حد ماتلك ويطب طب عليك ويقلك معليش كلوا بأمر الله - طيب يا ابن التيت مدام انتا عارف كلو بامر الله فبتسئل ليه - لا ويكمل هز وطبطبه ويقلك معليش عرسان كتيررر كده مكنوش بيجيبوا وبعد كده جابو ... فأنتا كمان تبتدي بقه تهز في راسك وتقول ياسلالالام. فعلاً حكم - وتمص مص شفايفك وتقول : طول عمرك يا عم صلالالاح. بتقول حكم - ههههههه. (( ناس كتير مكنوش بيجيبوا وبعدين جابوا )) ياسلالالام. شوف حكمت ربنا يا مؤمن .

وكل ده واحنا بنتكلم عن سنة أولى جواااااااااااز - عارفين يعني ايه أول سنة جواز ... السنة دي بسميها انا. سنة التلين. ... او أول ألف كيلو للعروسة أو أول تلتومية خمسة وستين يوم للعروسة أيهما أقرب :) السنة الي بتبقى فيها الوحده بتطلع من مرحلة الطفولة والعزوبية وبحولها لربة منزل صالحه وزوجه ، ولسه بتبتدي تعودها وتخلي طنابيرها تطبع على طبعك وتشيل الرايش الي في دماغها ده كلو عن ايام زمان. وانها بدئت مرحلة جديدة ... فهل ينفع عروسة لسه في التليين. أخليها تحبل !!!! ده انتا نفسك. اول ١٠٠٠ كيلو. انتا العربية او العروسة جديدة عليك ومش متعود لسه على أبعادها ولا على طباعها ... ولسه بتجرب كل شيء فيها. ويمكن تقعد معاك العروسة سنة و متعرفش زرار الشبورة بتاعها حتى بتقيدوا منين ولا بتطفيه منين ولا علبة فيوزاتها فين. علشان لو اتجننت وطقلها فيوز وزعلت تقدر تغير الفيوز الي طاقق فيها قبل ما تلم شنطتها وتروح بيت ابوها .

فده الي انا بقولوا. خودها جربها كده سنة سنتين تلاته ... علشان حتى يا أخي لو لقيت فيها حدفة ودماغها بتحدفها كده ولا كده وبتحدف شمال. تقدر تعالجها. وتعملها ترصيص وظبط زوايا ... لكن عمرك ما هتعرف تعلمها زبط زوايا نهائي وهيا حامل. او بعد ما خلفت وبقت ام العيال ... واي زبط زوايا. بينتهي بالطلاق ودي هيا مشكلت ٩٠٪ من الجيل الجديد ... يعني عمرك انتا وهو شفت عربية نقل مثلاً بيتعملها زبط زوايا بالكمبيوتر ولا حتى ترصيص وهيا محملة ومليانه حاجات. او والعربية حامل وشايلة في شنطتهها عربية صغيرة !!! استحاااااله ... ويبقى انتا كده بترصص غلط وبتزبط غلط وهتفضل العروسة طول عمرها بتحدف معاك وتبان قوي الحدفة مع اول مشكلة. تيجي تدوس فرامل تبص تلاقي الدريكسيون الي بيحرك دماغها حدف معاك جامد شمال او يمين .

وهو ده الي نفسي فيه نشر الوعي في المجتمع ... صحيح كل عيل بيجي برزقوا بس كمان مننساش. انوا بيجي بمصاريفوا. وهيفضل طول عمروا يقولك بابا. هات هات هات ... فعيل واحد كفاية جداً او عيلين. وتبقى انتا كده ظلمت نفسك وظلمت صحتك وظلمت عيالك معاك لمن تخلف العيل التاني. لان الحياة مش هيا الحياة الوردية ولا دنيتنا دنيا مثالية علشان نفضل نخلف في عيال يتعذبوا ويعانوا من الي احنا بنعاني منو ولو الناس او الستات فاكرين ان الخلفة بتخلي قلب الراجل يحن وتخليه يحبها تكون غلطانة ... لان محاكم الاسرة اكبر دليل واكبر شاهد على كمية الطلاق في مصر .... وتلاقيها زي الهبلة ماشية وجرره في ديلها سبع تمن عيال. وفي النهاية جوزها يرملها. ٣٠٠ او ٥٠٠ جنية ويقلها يالله عيشي حياتك بقه يا حلوة. وحلي عن سماياااااااا . فالام تنزل العيال الشارع ينزلوا يشحتوا او يشتغلوا او يبلطجوا على خلق الله علشان يقدروا يصرفوا ... يبقى انا هنا ليه اخلي الامور توصل لكده ليه ما افرضش على كل اسرة عيل وااااااااااااحد فقط او عيلين بالكتير واوعي الناس باخطار الخلفة حتى لو كانت زينة. الحياة الدنيا ... فهيا في الاول والاخر زينة. يعني اكسيسورس. للحياة وليست هيا الحياااااااة ... في الحياة حجات اهم واسمى من المال ومن البنون .... وتحياتي

[إنسانة]

الاجانب بيتزوجوا في سن متأخر في الأساس والنساء و الرجال بيفضلوا العلاقات المؤقتة بغرض المتعة و التنويع
مش هنضحك على نفسنا دا مش مقبول لا عرفا ولا دينا عندنا وكمان مش صحي وهتشوف دا في زيادة الأمراض والبيئة الخصبة لتناقلها

غير كدا اللي عنده امكانية يتابع تطور الجنين في كل مراحله ويبقى عارف إمتى ياخد قرار بإنهاء الحمل لو ثبت تشوهه
ويكون على كبار السن رعاية مضاعفة
غير اللي مش بيتابع ومش بيعرف ياخد القرار ومش متوفرله أي نوع من الرعاية لما يوصل لسن فيه زيادة مخاطر أو حتى يكون مش عارف اساسا خطورة الانجاب في سنه وحذر
ودا السبب في زيادة نسبة المعاقين في الدول النامية عن الدول المتقدمة رغم صغر عمر الزوجين نسبيا
ولكن اللي عنده وعي أكبر بالمشكلة وقدرة على تداركها بدري بتقل عنده المشاكل أكتر


فلو عايز تطبق الكلام اللي في الغرب مفيش مشكلة بس إرفع مستوى الرعاية و التوعية و المتابعة الشديدة مع توخي الحذر
في الحالة دي بس ممكن يحصل إنجاب والزوجين كبار أو أحدهم

ولكن هل هيكون عندهم الطاقة الكافية لتربية طفل وهما محتاجين رعاية ؟

و هتفضل عندك مشكلة الزواج الضروري في سن الـ 25 أو الـ 30 هيعيشوا مع بعض 15 سنة بدون أطفال؟ مش شيء خيالي شوية ؟ وليه اساسا نقلد شيء مش صحي

طيب طالما فيه خيار مفتوح للزوجين ليه ميكونش الزواج في سن الشباب و الإنجاب بعد سنوات طفل وبعد سنوات طفل آخر والحياة تبقى منطقية وصحية والكل مرتاح ؟

ومش فاهمة الحقيقة فكرة تحنن قلبه بالإنجاب - إيه الرابط بين أي حاجة - وتحنن قلبه مين على مين
وليه أم ممكن تتسول حنان من أب بكثرة ولاده !
أب مش حنون على طفله دا ميستحقش إنها تضيع وقتها معاه ولا طبعا يستحق إنها تنجب منه أكتر
والأمور في مصر "على مساوئها" أفضل بكتير من السعودية على سبيل المثال في مايتعلق بالطلاق والخلع والحقوق اللي حققتها المرأة المصرية
فليه تنجب أعداد أكبر مش قادرة أفهم الرابط وتربط نفسها بشخصية بالشكل دا
دا في السعودية على قلة الوعي المنتشر وقلة حقوقها القانونية , المرأة ممكن تدفع كل ماتملك عشان تتخلص من زوج سيء وياريت بتقدر بسهولة
فالمراة المصرية في نعمة تحسد عليها فيما يتعلق بإمكانية ترك الزوج , فمش ممكن أتصور إنتشار حكاية بالشكل دا
وليه أساسا ؟ مش قادرة أتصور ناس بتفكر بالشكل دا إلا إن كنت بتتكلم عن طبقة من الناس معندهاش وعي خالص

هو الإنجاب مرتبط بفكر مجتمع ملوش دعوة بست عايزة تحنن قلب راجل وكلام من دا , دا كلام مش واقعي
وليه مصورين الراجل بالضعف وقلة الحيلة دي ؟
مش عارفة حاسة إنكم بتتكلموا عن شخص داخل غيبوبة أو مسير مسلوب الإرادة والست بتربطه وبتحننه وبتعمل وتسوي وهوا ملوش رأي !

الإنجاب شراكة بين طرفين لو فيه طرف مش عارف يسيطر على القصة دي يبقى دا شخص متسمعش منه حجج لا تحنن ولا تربط ولا تجر هوا إيه مش بني آدم هههههه

الإنجاب الكتير قلة وعي من كل الأطراف , بصراحة المجتمع اللي وصفته حضرتك دا مكنتش متصورة وجوده إلا في المسلسلات المصرية القديمة
لو فيه نسبة كبيرة كدا يبقى المدارس و الجامعات مهمتها ووظيفتها إيه في الدنيا مابتغيرش الفكر ليه
والزوجين طالما إختاروا بعض و كان عندهم كامل الحرية في الزواج فأمورهم هما يقرروها وحدهم
برضو هنقول الوعي لمليون مرة

فيه ناس بتجبر البنت على الزواج وبدخلها عنوة في دائرة صعبة وبالتالي بتزيد نسب الطلاق وكل المشاكل المترتبة عليها دا لو قدرت تسيبه !
يمكن دا منتشر في المجتمعات السلفية أو الخليجية أكتر و أنا بتكلم من تجربة مش مسلسلات يعني ههههه
ولكن دي نسبة مش كبيرة في مصر على ما اعتقد

في النهاية مش معقولة هتقولي الزيادة السكانية سببها الستات اللي بيحننوا قلب الرجالة ^^"

[ahmed1981]

كثير من العلماء أفتوا بجواز تنظيم النسل (تنظيم وليس تحديد)
أي أن تنظيم النسل لمراعاة صحة الأم والطفل جائز ولا حرج فيه

والتنظيم هو ضبط المعدل الزمني للإنجاب بما لا يكون ضغطاً على صحة الأم والطفل

الموضوع كان إتفتح زمان وكبر قوي وناس زعلت واتخاصمت :ـــ

http://www.nilemotors.net/Nile/15371-a.html

ـ