مشكلة مع خطيبتي المحترمة جدا ...

[Dr.Abdo]

السلام عليكم ...

لو سمحتم يا جماية تفيدوني باراءكم وحلولكم للمشكلة دي ...

انا عندي 28 سنة ومن فترة وانا بدور على عروسة ولقيت واحدة الحمد لله

هي قمة في الاحترام والادب والتدين ومؤهل عالي واهلها ناس محترمين جدا وشكلها كويس

ومن ساعة ما شفتها وانا مرتاج لها ...

اتقدمت ليها ووافقت وقرينا فاتحة علشان نتعرف على بعض اكتر ........ لحد دلوقتي كل حاجة كويسة

لكن في مشكلة حصلت وهي ان والدتي شايفة انها مش مناسبة ليا لأنها (رفيعة) ووالدتي شايفة ان

البنت لازم تبقى مليانة شوية وفيها (الامكانيات الانثوية) .... انا من الاول مفكرتش في الموضوع ده لأني

كنت مبهور بشخصيتها واخلاقها لكن بعد الكلام ده اترددت شوية وبقيت مش عارف اكمل وللا لأ وخصوصا

ان البنت مفيهاش حاجة تتعيب ...



ايه رأيكم هل الموضوع ده ممكن يأثر على الحياة الزوجية بعدين وللا الايجابيات هتطغي عليه ...؟؟



شكرا

[طارق _عبد السلام]

عرف الوالده انها بعد اول طفل هتبقى كتير جدا مش نحيفه ههههههههههه

الستات بتعمل المستحيل علشان يخسوا فلوسنا ضايعه يافندم على الرجيم

[prof2013]

افسخ الخطوبه ياباشا لان كلامك دليل على انك مش مقدر النعمه اللي في ايدك

[elpasha1]

انت اكيد بتهزر

[kar!m]

بص هو الموضوع شائك شوية .. بس حاول تقنع والدتك بهدوء و تذكر لها مميزات البنت .. و ان الحاجات التانية دي ممكن تتغير بالأكل و خلافه .. و اشرح لها ان أهم حاجه البيت و التربية .. و اذكر لها قصص الناس اللي اختاروا على أساس الشكل أو الجسم و جوازهم فشل بسبب ان الزوجة أخلاقها مش كويسة و زي ما قلت لك ان أي حاجه تانية ممكن تتغير.
أهم حاجه الهدوء و الحكمة في الحوار و ربنا يقدر لك الخير.

[#MAAM#]

بعد أول طفل هتبقى برميل ياباشا متقلقش خالص

[aimank]

هو انت اللى هتتجوزها ولا ولدتك ..... احب اقولك ان لو رميت ودانك للست الوالدة مش هتعمر مع واحدة

[الفجر]

ردا على موضوعك

واحد صاحبى اتجوز بنت قمر 14 وكان كل زملائة وقرايب بيحسدوة يوم فرحة على جمال البنت

وبعدها بشهرين فقط طلقها لانها طلعت قبيحة اللسان جدا وبتشتم جوزها بافظع الشتائم دة غير انها عضبية جدا

فاحترس انك ترفض لعيب شكلى ثم تندم ندم عمرك كلة

[buisnessman]

اسمك Dr. Abdo
هل انت دكتور فعلا وده تفكيرك ؟ معلش أنا آسف بس حابب أعرف.

[eslam atia]

انت في نعمة مش حاااااااااااااااااااااسس بيها
وفي كتييييييييييير جدا بيدور علي نصف ما حصلت علية , اللهم بارك
انما الامم الاخلاق مابقيت فان هم ذهبت اخلاقهم ذهبوا
احمد ربنا واشكرة علي ما انت علية
وادعي لباقي زملائك اللي لسة :d

[Mostafa.Mahran]

الى هيتبقى من الجواز هو النسب الطيب و الاخلاق و التدين و حسن المعاملة
الباقى هينتهى فى اول كام سنة

[islam_lee]

بص يا .. Dr ,,
الحريم مش بيجري في عروقهم "تستستيرون" زي حلاتنا ,,
الحريم في دمهم "إستروجين و بروستريجون" ..
و طبعاً الهرمونات دي بتخليهم "فلشي و ملفوفين و مدورين و طرايي" ..
و الكلام إلي الشيطان يجيبه و ميجيبوش في دماغك ..
الهرمونات دي يا ريس .. بتكتر في دمهم أوووووي بعد الجواز ..
ذي ما التستستيرون ما بييكتر في دما بعد الجواز و يتحول للـ DHT ..
و يتعب البنا و يشعر سدرنا و يجبلنا الصلع إلخ إلخ ,,
فا النظريه :
"تجوزها مصفصه تدور .. تجوزها مدوره تدهور" ,,
و عجبي !!

و تظل أزواء يا برنس ,,
و المحترمه بنت الناس .. لو شويه عضم في شوال ,,
ما تفرطش فيها ,,

[magdy_c_c]

هههههههههه
تفسخ الخطوبة علشان رفيعة؟؟؟!!!!
من 15 سنة كنت متضايق ان خطيبتى رفيعة
دلوقتى نفسى تخس مش عارف
يا باشا الجواز و الحمل و الولادة بيخللوا الست تخينة
و احمد ربنا انها رفيعة بعد اللى قلت لك عليه هتبقى برنسيسة
و بعدين حاجة مهمة أوى ما تخليش والدتك تتدخل فى كل كبيرة و صغيرة و بعدين استخير ربنا هو الأعلم بالخير لك
و ربنا يوفقك

[أحمد كمال]

مع احترامي ليك ...... هو ازاي شخص عاقل بالغ بيشتغل و بيصرف على نفسه و هيفتح بيت يخلي كلمة توديه و كلمة تجيبه ....... حتى لو من والدته ........

بر الوالدين مش معناه نسمع كلامهم عمياني في الامور الشخصية زي دي ....... هو مع احترامي بعد الزواج ...... باب اوضة النوم هيتقفل على مين مع العروسة؟ العريس و لا امه ؟؟؟؟؟؟


ما تزعلش مني ........ انا ضد ان اي ست تقول على زوجها او خطيبها انه "ابن امه" لانه بيبرها و بيسمع نصايحها ....... بس المرة دي انا شايف ان حضرتك منقاد بزيادة لوالدتك و هتتعب اي بنت تتجوزها بسبب انك هتسيب تدخلات والدتك تخش ما بينكم


كلامي كان هيختلف لو العيب اللي الوالدة شايفاه في الاخلاق او الدين او حتى النسب ...... و كان كلام صح او يستاهل النظر فيه .......

[qkash.com]

غريبة جداً الحكاية دي
المفروض الست الوالدة تكون عارفة ومتأكدة من انها بعد الجواز هتطخن وبعد الخلفة هتطخن تاني وتالت وهلما جرااااااااا

ومش هتلاحق علي مصاريف الاكل والشرب

وهتتمني انها ترجع الي ما هي عليه الآن

عندي احساس ان الست الوالدة بتتحجج باي حجة "وفي سبب تاني لرفضها هي مش عايزة تصارحك بيه"والله اعلم

لو انت واثق في البنت ومرتاحلها ومرتحالك وحسنة الخلق واللسان وطيبة القلب

توكل علي الله وصلي صلاة استخارة وربنا يهديك لما فيه خيراً لك