مشكلة عائلية وقراري ، شاركوني إياه

[Ahmedmiy]

بسم الله الرحمن الرحيم


الحمد لله والصلاة والسلام على رسول الله نبينا محمد خير خلق الله


هدية جميلة لكل من يقرأ الموضوع

أتمنى تنال إعجابكم والإستمتاع بها

اللهم اجعلنا من الصالحين و ارزقنا من الصالحين و أصلح ديننا و دين جميع المسلمين


حبيتك لإلتزامك . . . . . . . . . . . . حبيتك لاحترامك
حبيت فيكي التواضع . . . . . . . . . . . . والعزة اللي ف كلامك
مبسوط منك لأنك . . . . . . . . . . . . إسلامك كل همك
أنا أصلي قابلت بابا . . . . . . . . . . . . واداني فكرة عنك
وسألته عن طباعك . . . . . . . . . . . . إن كانت يعني هادية
فحكالي عن سماعك . . . . . . . . . . . . لكلامه وانت راضية
وازاي بتسلي نفسك . . . . . . . . . . . . بذكرك وانت فاضية
وحلاوة صوت تلاوتك . . . . . . . . . . . . وازاي بتكوني شادية
* * *

وسألته إن كنتي فاهمة . . . . . . . . . . . . معنى كلمة زوجين
قالي هتكونوا ورقة . . . . . . . . . . . . مطبوعة نسختين
غني كنت أو فقير . . . . . . . . . . . . ليك عند بنتي دين
سرك هيكون في بير . . . . . . . . . . . . معرفش مكانه فين
تفضل دايماً كبير . . . . . . . . . . . . في نظرها حبتين
لو جيت بفلوس كتير . . . . . . . . . . . . تطمن جت منين
* * *

هتكون دايماً معاها . . . . . . . . . . . . سيرتك هتكون هواها
والشوق اللي ف خيالك . . . . . . . . . . . . تلقاه لحظة لقاها
لو جيت زعلان ف مرة . . . . . . . . . . . . إرمي همومك وراها
ومهما شوفت بره . . . . . . . . . . . . مش هتشوف مستواها
واطمن يابني خالص . . . . . . . . . . . . عقلها مافيهوش تفاهة
وزي ما هي بنتي . . .. . . . . . . . . . بنت حماتها وحماها
* * *

وسألته عن ولادي . . . . . . . . . . . . منك هيكونوا إيه؟
قاللي هيكونوا عادي . . . . . . . . . . . . فسألته يعني إيه؟!
قاللي العادي إللي كان . . . . . . . . . . . . عند الناس من زمان
العادي بتاع سراقة . . . . . . . . . . . . وحذيفة بن اليمان
العادي بتاع أسامة . . . . . . . . . . . . وابن الحكيم لقمان
ده العادي بتاعنا إحنا . . . . . . . . . . . . بنربي عليه عشان
لو جينا ولا رحنا . . . . . . . . . . . . هنقابل الرحمن
عمرك ما تخاف عليهم . . . . . . . . . . . . ولادك في الأمان
أنا بنتي هتربيهم . . . . . . . . . . . . ع السنة والقرآن
هتشوف ابنك بيصحى . . . . . . . . . . . . مادام سمع الأذان
ينزل في الفجر يقرا . . . . . . . . . . . . بالسجدة والانسان
هتشوف في حجاب بناتك . . . . . . . . . . . . العفة والإحسان
هتشوف إزاي مراتك . . . . . . . . . . . . هتعينك إنت كمان
* * *

وسألته عن حياتك . . . . . . . . . . . . من قبل الالتزام
قال أتذكر في ليلة . . . . . . . . . . . . مش فاكر أنهي عام
أذان الفجر أذن . . . . . . . . . . . . وقالتلي سيبني أنام
فدخلت الأوضه جوه . . . . . . . . . . . . أجيب منها الحزام
وعبال ما رجعت تاني . . . . . . . . . . . . كات رجعت ف الكلام
الله يجازي الشيطان . . . . . . . . . . . . خلاها تقول أنام
بس اطمن خلاص . . . . . . . . . . . . دلوقتي بقت تمام!
* * *

قلتله طيب ياعمي . . . . . . . . . . . . يسعدني أقولك إني
بطلب بنتك ونفسي . . . . . . . . . . . . تناسبني وترضى عني
راح شادد فجأه لبسي . . . . . . . . . . . . وقلب وشه وسألني
* * *

حافظ كم جزء يابني . . . . . . . . . . . . وقاري كم كتاب
احكيلي كده عن مؤتة . . . . . . . . . . . . أوغزوة الأحزاب
وسمع كم حديث . . . . . . . . . . . . في الأخذ بالأسباب
وكمان سمعلي آيه . . . . . . . . . . . . ذكرت فيها الدواب
ولو شايفها صعبة . . . . . . . . . . . . قللي بتاعة الذباب
واحكيلي حلم يوسف . . . . . . . . . . . . وبراءة الذئاب
واخواته لما جولوه . . . . . . . . . . . . دخلوا من أنهي باب
واديني فكرة برضه . . . . . . . . . . . . بتقبض كم ثواب
وناوي ازاي تحسن أنا شايفك لسه شاب
* * *

وسأل نفسه وسألني . . . . . . . . . . . . هيعوز إيه يعني مني؟
لو عندي كل حاجه . . . . . . . . . . . . وديني مش شاغلني
أحسن لك تنسى بنتي . . . . . . . . . . . . ومهرك مش لازمني
قلتله صبرك ياعمي . . . . . . . . . . . . وبراحتك امتحني
يبقى اما أسأل تجاوب . . . . . . . . . . . . خليك دايماً فاهمني
سألتك وانت ساكت . . . . . . . . . . . . خليتني أظن ظني
وفضل يسأل واجاوب . . . . . . . . . . . . وعشان خاطرك عصرني
وظهرت النتيجة .. . . . . . . . . . . . وبفضل الله قبلني
* * *

قاللي مقبول في نظري . . . . . . . . . . . . مبروك عليك ياسيدي
لكن في نظرها هي . . . . . . . . . . . . نجاحك مش بإيدي
وهي زمانها راجعة . . . . . . . . . . . . من تمرين السويدي
خليك قاعد شوية . . . . . . . . . . . . استنا لما تيجي
هعملك من إيديا . . . . . . . . . . . . كباية شاي صعيدي
* * *

سابني وقعدت أفكر . . . . . . . . . . . . هل ممكن ترفضيني
طاب قولي حتى أفكر . . . . . . . . . . . . مش يمكن تفهميني
وفضل مخي يلاعبني . . . . . . . . . . . . يجيبني ويوديني
وخايف م المقابلة . . . . . . . . . . . . مرعوب بينك وبيني
ودق الباب في ثانية . . . . . . . . . . . . وشوفتك مرة تانية
مش قادر أنسى يومها . . . . . . . . . . . . وفاكر كل ثانية
* * *

ونده والدك عليكي . . . . . . . . . . . . عشان أول لقاء
دخلتي وشوفت وشك . . . . . . . . . . . . عليه نور الحياء
نور والله فعلاً . . . . . . . . . . . . مش نور بودرة وزواء
كان أول مرة أخاف . . . . . . . . . . . . من فتنة النساء
أخلاقك مش عادية . . . . . . . . . . . . وجمالك كان شفاء
* * *

قعدتي جنب والدك . . . . . . . . . . . . وسألتيني وجاوبتك
وفكل مرة أجاوب . . . . . . . . . . . . كنت باشوف ابتسامتك
ف أقول من جوه نفسي . . . . . . . . . . . . يارب أكون عجبتك
وبعد شوية قمتي . . . . . . . . . . . . ندهت عليكي مامتك
ورحتي دخلتي جوه . . . . . . . . . . . . وراح وراكي والدك
وانا قلت مش مروح . . . . . . . . . . . . غير لما أكون خطبتك
* * *

وابوكي جاني تاني . . . . . . . . . . . . وقرب من وداني
لابس كرفته سوده . . . . . . . . . . . . وبدله لون فراني
المنظر يعني كله . . . . . . . . . . . . ميدلش ع التهاني
قلتله مالك ياعمي . . . . . . . . . . . . من فضلك قول عشاني
عرقي غرقلي كمي . . . . . . . . . . . . سايبني ليه أعاني
قاللي مستني إيه . . . . . . . . . . . . فين إيدك إديهاني
البنت مش موافقة . . . . . . . . . . . . تتجوز حد تاني
* * *

كان أول مرة أعرف . . . . . . . . . . . . إزاي الناس بتفرح
سعادتي كات غريبة . . . . . . . . . . . . مش ممكن هقدر أشرح
من كتر حبي ليكي . . . . . . . . . . . . نويت أضحي وادبح
رحت اشتريت خروف . . . . . . . . . . . . وكان خروف بينطح
ده أخيراً هبقى جوزك . . . . . . . . . . . . وشجرة صبري تطرح
* * *

خطوبتنا كات بسيطة . . . . . . . . . . . . مكانش فيها زيطة
وفرحنا كان في جامع . . . . . . . . . . . . يعني مش خلطبيطة
ومامتك جت في يومها . . . . . . . . . . . . ورقعت كام سويطة
هاتولي بنتي منه . . . . . . . . . . . . دي مش فاهمة العبيطة
إنه هيخطفها مني . . . . . . . . . . . . وهتوحشني الغتيتة
* * *

صعبت عليا مامتك . . . . . . . . . . . . الموقف كان شديد
لكن فعلاً خطفتك . . . . . . . . . . . . ورحنا مكان بعيد
فاكرة ولا انتي ناسية . . . . . . . . . . . . أكيد فاكرة أكيد
من يوم ما بقيتي زوجتي . . . . . . . . . . وانا متهني وسعيد
معايا ف كل يوم . . .. . . . . . . . . . ويوم لؤاكي عيد
عمرك ما دقتي نوم . . . . . . . . . . . . وانا تعبان أو مريض
فلوسي كات بتكتر . . . . . . . . . . . . والخير عندك يزيد
وعامله ليه دفتر . . . . . . . . . . . . ومرتبه المواعيد
وبفضل الله قدرتي . . . . . . . . . . . . وجبتيلي الوليد
وبعديها بشوية .. . . . . . . . . . . . جبتيلنا عليه يزيد
وبعديه جت سمية . . . . . . . . . . . . وآخرهم كان حميد

بدعيلك كل يوم . . . . . . . . . . . . وأفضل أعيد وازيد
ربيتي عيالي دول . . . . . . . . . . . . ع القرآن المجيد
طول عمرك وانتي صافية . . . . . . . . . . . . قلبك لون الجليد
أخلاقهم مش عادية . . . . . . . . . . . . طلعنلك مش بعيد
وليد دلوقتي ضابط . . . . . . . . . . . . ومعاه رتبة عقيد
ودعوة قلبي صابت . . . . . . . . . . . . ويزيد أهو مات شهيد
وبنتك صيدلية . . . .. . . . . . . . . وحميد أصبح معيد
الله برحم أبوكي . . . . . . . . . . . . راجل من نوع فريد
كل اللي قاله فيكي . . . . . . . . . . . . أنا عشته بالتحديد
* * *

عشت معاكي ف حكاية . . . . . . . . . . . . أحلى وأجمل رواية
حكايتي كات معاك . . . . . . . . . . . . وحكايتك كات معايا
اديتك كل عمري . . . . . . . . . . . . وهمك كان رضايا
وعمرك خدته منك . . . . . . . . . . . . وقربك كان دوايا
وخلاص العمر راح . . . . . . . . . . . . راحت أيام صبايا
ومسافر رحله صعبة . . . . . . . . . . . . وزادي مش كفايه
مش عاوز أشوف دموعك . . . . . . . . . . بالذات ف يوم عزايا
أنا عارف إنتي عارفة . . . . . . . . . . . . إن الموت مش نهاية
دي لسة الرحلة طالعة . . . . . . . . . . . . والموت خط البداية
إدعيلي يمكن أوصل . . . . . . . . . . . . وأشوف هناك حمايا
أنا عارف إنه فيها . . . . . . . . . . . . محجوزله هناك سرير

وسلامي في النهاية . . . . . . . . . . . . أنا خلصت الحكاية
لو يوم فكرتي فيه . . . . . . . . . . . . إقري شعري وغنايا
وأمانه ف كل مرة . . . . . . . . . . . . تدعي لي بالهداية
عسى ربي بدعائك . . . . . . . . . . . . يغفر ليا الخطاي






اللهم لك الحمد كما ينبغى لجلال وجهك وعظيم سلطانك
الحمد لله ملئ السموات وملئ الأرض وملئ ما شئت يا ربنا من شئ بعد

[magid1010]

بص يا سيدى انا كنت زيك كده مع بعض الاختلافات عصبيه و نرفزه لحد ما روحت لدكتور استشارات زوجيه ممتاز صرفت عنده فى ساعه و نص 150 جنيه لانه بالساعه بس الكلام اللى قالهولى مفيد جادا فى حياتى بعد كده و فهمنى ان تلركيب مخ الراجل مختلف عن الست و ان الستات كلامهم فى خلال النرفزه يساوى صفر و لا اكنها قالت حاجه و خلال النرفزه كل واحد بيتكلم لغه غير التانى فشوف كده اسم الدكتور احمد الباجورى

[بحار]

انا قريت رأى الاعضاء كلهم الله يبارك فيهم جميعا .. نصحو باخلاص وقالو مافيه الكفايه
انا هاتكلم من زاويه تانيه ماأخدتش حقها كفايه .. الاولاد .. اللى أكيد جزء أو كل المشكلات دى حصلت قدامهم :
عارف انا سمعت من طبيب نفسى فى حديث تلفزيونى بيشبه احساس الاطفال ووالديهم بيتخانقو أمامهم .. بيقول نفس احساسك بالضبط وانت راكب طيارة ..
سمعت دوشه جامده فى الكابينه .. روحت تشوف فيه ايه ..
لقيت كابتن الطيارة والمساعد بتاعه سايبين الطيارة بتقع وماسكين فى خناق بعض .. هاتحس بأيه ؟؟
أرجوك تقدر النعمه اللى ربنا ادهالك وحافظ على أولادك وربيهم فى جو صحى بدون مشاكل ..
أما من ناحية زوجتك .. تعالى على نفسك وسيطر على غضبك وجرب لو غلطت فيك ..
تسكت ماتردش خالص وماتدخلش فى مناقشه .. وممكن لو مقدرتش سيب البيت لوقت قصير تكون النفوس هديت ..
وكلمها بعد ماتهدى انته وهيا ..
وعرفها انها غلطت .. وانك سكت مش علشان ضعيف او العشرة او الاولاد .. انته سكت علشان بتحبها وماتقدرش تعيش بعيد عنها .. صدقنى الست بتيجى بالكلمه الطيبه والمعاملة الحسنه ..
قدر انها سايبه شغلها وشايفه بيتك وولادك ..
وانته رغم انك نفس المؤهل .. مشغول بشغلك وبتعمل عليها صاحب الامر المطاع .. دعواتى لك بالتوفيق ..

[h_shahin]

ورد فى المشاركات قوله تعالى "الرجال قوامون على النساء" بصيغة يفهم منها خطأ أن الرجال أفضل من النساء فى المطلق و لذا أدعوكم لقراءة تفسير الشيخ الشعراوى لهذه الآية الكريمة كما يلى :

سأل فضيلة الشيخ محمد متولي الشعراوي عن قوله تعالى : (الرجال قوامون على النساء بما فضل الله بعضهم على بعض وبما أنفقوا من أموالهم )

فما معنى القوامة عن الرجل على المرأة ؟؟؟
وهل تلك القوامة تفضيل من الله للرجل على المرأة ؟؟

فأجاب فضيلته :
إذا قيل أن فلاناً قائماً على أمر فلان ، فما معنى ذلك ؟
هذا يوحي بأن هناك شخصاً جالس ، والآخر قائم فمعنى قوامون على النساء .... أنهم مكلفون برعايتهن والسعي من أجلهن وخدمتهن ، إلى كل ما تفرض القوامة من تكليفات ،
إذاً فالقوامة تكليف للرجل .
ومعنى : (بما فضل الله بعضهم على بعض ) ، ليس تفضيلاً من الله عز وجل للرجل على المرأة كما يعتقد الناس ،
ولو أراد الله هذا لقال : بما فضل الله الرجال على النساء ،
ولكنه قال : ( بما فضل الله بعضهم على بعض ) فأتى ببعض مبهمة هنا وهناك .... ،
ذلك معناه : أن القوامة تحتاج إلى فضل مجهود ، وحركة وكدح من ناحية الرجال ، ليأتي بالأموال يقابلها فضل ناحية أخرى ، وهو أن للمرأة مهمة ، لا يقدر عليها الرجال ، فهي مفضلة عليه فيها ... فالرجل لا يحمل ولا يلد ولا يحيض ،
ولذلك قال تعالى فى آية أخرى : ( ولا تتمنوا ما فضل الله به بعضكم على بعض ) ، لمن الخطاب هنا ؟؟؟
إنه للجميع . وأتى بكلمة البعض هنا أيضاً ، ليكون البعض مفضلاً في ناحية ، ومفضولاً عليه فى ناحية أخرى ،
ولا يمكن أن تقيم مقارنة بين فردين لكل منهما مهمة تختلف عن الآخر .
لكن إذا نظرنا إلى كل من المهمتين معاً ، سنجد أنهما متكاملتان .
فللرجل فضل القوامة بالسعي والكدح .
أما الحنان والرعاية والعطف فهي ناحية مفقودة عند الرجل ؛ لانشغاله بمتطلبات القوامة .
ولذلك فإن الله عز وجل يحفظ المرأة لتقوم بمهمتها ، ولايحملها قوامة بتكليفاتها تلك ، لتفرغ وقتها للعمل الشاق الآخر ، الذي خلقت من أجله .
ولكن الشارع اثبت لنا ان الرجل عليه أن يساعد المرأة .
وقد كان إذا دخل البيت ووجد أهله منشغلين بعمل يساعدهم ، مما يدل على أان مهمة المرأة كبيرة ،وعلى الرجل أن يعاونها .
أن المرأة تتعامل مع أجمل الأجناس على الإطلاق مع الإنسان ، فهي تربي سيد الوجود بينما الرجل يتعامل مع الجماد والتراب ، مع النبات والحجر والحيوان .

و القوامة فى واقع الأمر تكليف و ليست تشريف أو تفضيل

و القوامة لغويا تعنى ولاية الأمر أو الولاية على المال أو القيام بشؤن العيش أو الإنفاق أو الدفاع و رعاية المصالح

و القوامة لها شروط شرعية بأن يأن يفضل الرجل على المرأة فى رجاحة العقل و القوة و الإنفاق
و هذا التكليف يتحمله الرجل فى مقابل أن يكون له قيادة الأسرة و اتخاذ ما يلزم لحمايتها من أى انحراف و فى مقابل هذا العبء فإن واجب الزوجة طاعة زوجها فيما لا معصية فيه.

أعتذر عن الإطالة فى هذه النقطة

اما فى الموضوع لإسأورد بعض الوصايا الربانية و النبوية و لن أضيف عليها

﴿ وَمِنْ آَيَاتِهِ أَنْ خَلَقَ لَكُمْ مِنْ أَنْفُسِكُمْ أَزْوَاجاً لِتَسْكُنُوا إِلَيْهَا﴾ - الروم

﴿ وَلَهُنَّ مِثْلُ الَّذِي عَلَيْهِنَّ بِالْمَعْرُوفِ وَلِلرِّجَالِ عَلَيْهِنَّ دَرَجَةٌ﴾ - البقرة

﴿ وَعَاشِرُوهُنَّ بِالْمَعْرُوفِ﴾ - النساء


قال صلى الله عليه وسلم: (خيركم خيركم لأهله، وأنا خيركم لأهلي)

عَنْ أَبِي هُرَيْرَةَ عَنِ النَّبِيِّ صَلَّى اللَّه عَلَيْهِ وَسَلَّمَ قَالَ:
(( مَنْ كَانَ يُؤْمِنُ بِاللَّهِ وَالْيَوْمِ الْآخِرِ فَلَا يُؤْذِي جَارَهُ، وَاسْتَوْصُوا بِالنِّسَاءِ خَيْرًا، فَإِنَّهُنَّ خُلِقْنَ مِنْ ضِلَعٍ، وَإِنَّ أَعْوَجَ شَيْءٍ فِي الضِّلَعِ أَعْلَاهُ، فَإِنْ ذَهَبْتَ تُقِيمُهُ كَسَرْتَهُ، وَإِنْ تَرَكْتَهُ لَمْ يَزَلْ أَعْوَجَ، فَاسْتَوْصُوا بِالنِّسَاءِ خَيْرًا ))

عَنْ أَبِي هُرَيْرَةَ قَالَ: قَالَ رَسُولُ اللَّهِ صَلَّى اللَّه عَلَيْهِ وَسَلَّمَ
(( إِنَّ الْمَرْأَةَ خُلِقَتْ مِنْ ضِلَعٍ، لَنْ تَسْتَقِيمَ لَكَ عَلَى طَرِيقَةٍ، فَإِنِ اسْتَمْتَعْتَ بِهَا اسْتَمْتَعْتَ بِهَا وَبِهَا عِوَجٌ، وَإِنْ ذَهَبْتَ تُقِيمُهَا كَسَرْتَهَا وَكَسْرُهَا طَلَاقُهَا ))

عَنْ أَبِي هُرَيْرَةَ قَالَ: قَالَ رَسُولُ اللَّهِ صَلَّى اللَّه عَلَيْهِ وَسَلَّمَ:
(( لَا يَفْرَكْ مُؤْمِنٌ مُؤْمِنَةً، إِنْ كَرِهَ مِنْهَا خُلُقًا رَضِيَ مِنْهَا آخَرَ ))

و ورد عن النبى صلى الله عليه و سلم أنه
(( إذا دخل بيته كان بساماً ضحاكاً، وكان يقول: أكرموا النساء فما أكرمهن إلا كريم، ولا أهانهن إلا لئيم ))

و كان عليه الصلاة و السلام يدلل زوجاته فقد قال فى عائشة رضى الله عنها ((فضل عائشة على النساء كفضل الثَّرِيد على سائر الطعام))

و ناداها ذات مرة قائلا ((يا عائش، هذا جبريل يُقْرِئك السلام))

وقد كان رسول الله - صلى الله عليه وسلم - لا يعيب طعاماً قط، إن أحبّه أكله، وإن كرهه تركه، وكان يلتمس الأعذار.

و كان نساء النبي - صلى الله عليه وسلم - يراجِعْنَه الحديث وهو رسول الله - صلى الله عليه وسلم -، وتهجره الواحدة يوماً كاملاً إلى الليل، وجرى بينه - عليه الصلاة والسلام - وبين عائشة كلامٌ حتى أدخل أبا بكر حَكَماً بينهما، كل هذا مع جلالته وعظمته، فأحسن إليهنّ، وصبر عليهنّ.

[medo_2060]

اخواتنا كلموا حضرتك وقالوا حلول ممتازه
انا بس عايز اضيف حاجه كأخ ليك وأرجو انك تتقبلها بصدر رحب :
حضرتك بتتعامل بمفهوم خاطئ عن كلمه "السيطره"
حضرتك فاهم انك لازم تكون مسيطر في بيتك باسلوب اشبه بشغل الشرطه لكن الحقيقه انك تتعامل برفق وبذوق وبتفهم ونقاش هادئ عند المشاكل ودا يخلي زوجتك تحط نفسها تحت سيطرتك برضاها وشوف هتديك ايه
لكن عايز تسيطر بطريقتك هتخليها تعند وطبيعي مش هتشوف منها حاجه حلوه
فكر في الكلمتين دول شويه وربنا يكرمكم

[wessam3fat]

.اختلف صحابي مع زوجته، واشتد الخلاف بينهما فلم يجد ملجأ إلا بيت الخليفة يطرق بابه ويشكو إليه حاله، هكذا عوَّد عمر بن الخطاب الخليفة الراشد رعيته أن الإمام هو أقرب من يطرقون بابه ليحمل معهم همومهم، وهو يفضل ذلك لأنه يخشى أن تتعثر بغلة في أرض العراق فيُسأل عمر: لماذا لم يسوِّ لها الطريق. توجه الصحابي لبيت عمر بن الخطاب، وطرق الباب، وإذا بالصوت يصله من الداخل، إنه صوت زوجة عمر الصاخب الغاضب.. "فالخليفة في خلاف مع زوجته"...هكذا حدث الصحابي نفسه، فتحرك بعيداً عن الباب، ولكن صوت الطرقة كان قد وصل إلى عمر، وكان لا بد أن يستجيب فلعل الطارق في حاجة، لا بد للخليفة أن يقضيها حتى ولو كان وقت راحته أو خلافه مع زوجته، فتح عمر الباب ليرى الصاحبي يولي مبتعدا.. يناديه عمر: يا هذا ماذا تريد؟ يعود الصحابي يقول: جئتك أشكو زوجتي فوجدتك تعاني مما أعاني منه، فما أردت أن أشغلك بحالي فيكفيك حالك، يبتسم أمير المؤمنين ويقول: يا هذا إنهن زوجاتنا؛ إن كرهنا منهن سلوكا قبلنا غيره، إنهن يربين أولادنا، ويقمن على شأننا، إني سمعت الرسول الكريم يقول: إن المرأة قد خلقت من ضلع أعوج، وإن أعوج ما في الضلع أعلاه؛ فإن أردت أن تستمتع بها فاستمتع بها على عوجها، وإنك إن ذهبت تقوِّمه كسرته، وإن كسر المرأة طلاقها، فاستوصوا بالنساء خيراً.


كما حدث خلاف بين النبي وعائشة ـ رضي الله عنهما
فقال لها من ترضين بيني وبينك ..

أترضين بعمر؟ قالت: لا أرضي عمر قط "عمر غليظ".

قال أترضين بأبيك بيني وبينك؟ قالت: نعم،
فبعث رسول الله رسولاً إلى أبي بكر فلما جاء قال الرسول : تتكلمين أم أتكلم؟

قالت: تكلم ولا تقل إلا حقاً، فرفع أبو بكر يده فلطم أنفها، فولت عائشة هاربة منه واحتمت بظهر النبي ،
حتى قال له رسول الله: أقسمت عليك لما خرجت بأن لم ندعك لهذا.

فلما خرج قامت عائشة فقال لها الرسول : ادني مني؛ فأبت؛

فتبسم وقال: لقد كنت من قبل شديدة اللزوق(اللصوق) بظهري – إيماءة إلى احتمائها بظهره
خوفًا من ضرب أبيها لها -، ولما عاد أبو بكر ووجدهما يضحكان قال: أشركاني في سلامكما،
كما أشركتماني في دربكم

سيدي لن القي باللوم عليك فأنة ليس بالوقت المناسب لذلك لانك علي شفي مفترق طرق قد تذهب من طريق ولكن علي ان انبهك ان الطريق ذات اتجاة واحد اذا ضللت الطريق فلن تستطيع العودة

[egy_anonymous]

معلش اسمحلي انت غلطان لان من ضمن حقوق الزوجه انك تكون متواجد معها اطول وقت و انك تعوضها عن غيابك و انك تستحملها زي مانت طالب انها تستحملك
عزيزي انت غلطان في حقها
اما الواجبات الزوجيه اسمحلي انت غلطان تاني مره لعرضها هنا لكن الحل هوا بعد تعديل المعامله بينكم و رجوع المحبه والموده من جديد حتلاقي الواجبات اتعملها و حتاخد عليها نجمه مش كحكه ;-)

[طارق _عبد السلام]

ابغض الحلال عند الله الطلاق

مش كل شوية طلاق طلاق

العييب منك او منها انتو فى بنكم اولاد فكر فيهم

و مشاكل و هتعدى ان شاء الله

ملحوظه بس مفيش حاجه اسمها ابغض الحلال...بلاش نردد الكلمه دى كتير هو فيه حلال بغيض !!!!!!!!!!!

[طارق _عبد السلام]

استاذنا الفاضل
حضرتك اعترفت بعصبيتك وركز قوى لان العصبى بيصدر منه تصرفات بشعه وهو يعتبرها عاديه

زوجتك كما تقول وضعها الاجتماعى اعلى وهى قبلت الزواج منك بل وساعدتك يعنى بتقدرك

زوجتك واخده اجازه من الشغل علشان اولادك .. وبتقف فى المطبخ كتير علشان اولادك بردوا وعلشانك

وحضرتك طبعا شغلك واخدك ولو قعدت فى البيت بتقعد على الانترنت ! وبردوا هى اللى مش شايفه طلباتك... ازاى بس هو حضرتك بتفضى لها امتى علشان حقوقك ..

وفى الاخر معينفعش اصلا تهين مراتك هى لها كيان ومتعلمه وام ولادك وانت الراجل الرجوله مش انى اهين ام ولادى لان اهانتها اهانه لك

سؤال على جنب هو هتجيب وقت منين للزوجه النانيه

وسؤال تانى هو حضرتك تعرف حد معين وعلى صله بيها وفيه نيه للزواج ؟

[lonedoctor]

انا رايي يختلف عن رأى الاخوة الاعضاء لانى ارى ان الاحترام المتبادل بين الزوجين هو الشعرة التى لو قطعت انقطع معها حبل المودة والرحمة تماما واستحالت الحياة الى جحيم وللانصاف لا يمكن ان اقول ان الخطا يقع على من ولكن فى المجمل يجب على المراة ان تتحمل زوجها طالما انه يحسن عشرتها وهذا هو المنظور الشرعى الدينى كما قال حديث النبي صلى الله عليه وسلم \" لو كنت آمرا أحدا أن يسجد لأحد لأمرت المرأة أن تسجد لزوجها \
فارى انك تحتاج ان تعيد صياغة منظومة حياتك والتى ربما بعض الاهمال والانشغال بعملك كان عاملا في ضعف التواصل بينكما وتغير القلوب
وهذا الامر ليس صعبا ابدا يمكنك مع الصبر والاستعانة بالله ان تضع اسس جديدة للعلاقة بينكما وبلا شك ان الاصلاح والتفاهم خير من الطلاق وتمزق الاسرة وضياع الاولاد
تقبل تحياتى

[fepsceasar]

ركز على المشكلة اللى مضايقاك
هل هى عدم حصولك على حقوقك الزوجية وأعتقد فى الحالة دى حقك تتجوز
أما بالنسبة للجذب والشد والتلميح بفرق المستوى الاجتماعي فده مش حله الجواز
على العموم جرب تاخذ أجازة وتحاول تبقى شهر عسل جديد ..لاقيت نفسيتك أحسن والحياة مشت أوك ..ما لقتش لمح بأن الجواز حق شرعي للزوج وشوف النتيجة

[Khalid_Mostafa]

انا مش حكرر كلام الإخوة تاني و لاكن تعالي ننظر للإمور بنظرة عملية بحتة (وانت راجل مهندس) ...ما احتمال ظهور نفس المشاكل (ان ما كانش مشاكل اكثر) في الزوجة الجديدة ؟ 50% ؟ .... بمعني اخر ...قد يكون الزواج الجديد إضافة جديدة لمشاكلك. في رأيي ..الإستثمار في زواج قديم اجدي بكثير من الإستثمار في زواج جديد

[KemozTanta]

واضح ان روتين الحياة وتحملك وصبرك علي حقوق الزوجية " اللي اكيد شحناك زيادة ضدها " خلي التفاهم بينكم فيه عند وكبرياء !
رأي ان الحياة الزوجية " حقوقكم الشرعية " بينكم سيئة ودا اللي مخليك عصبي عليها وهي كذلك غير مهتمة بنفسها من اجلك.. شوفوا حل انتم الاثنين في الموضوع دا والا الزواج الثاني هو الحل ليك وهي ممكن تتزوج شخص اخر والاولاد ربنا يتولاهم !
هل عايزين دي النهاية بينكم !
انت لو طلقتها واتجوزت جديد ... هتتغير وهتدلع الزوجة الجديدة وولو تخين ممكن تخس لها وهتسافر وهتغير جو و و و
هي لو اتجوزت شخص اخر كذلك نفس التغيير هيحصلها عشان ترضيه..
طب ليه متتغيروش عشان بعض ! وعشان الاولاد اللي بينكم..
وصدقني طالما علاقتكم الزوجية مرضية ليك وليها .. هتعيشوا حياة سعيدة جدا والاولاد مش هيطلعوا معقدين بسبب عصبيتكم وتكبركم علي بعض بالشكل دا..
الزواج الثاني مش حل ! تخيل لو انجيت منها ولدين اخرين ! هتصرف علي 5 اولاد ازاي وامرأتين

[Ahmed abdkarim]

والله يا اخي انا شايف من كلامك انك انت اللي غلطان
من الاول اساسا المفروض كل شغلك يكون علي انك تغير طباعها وتخليها تسمع كلامك يمين يمين شمال شمال يعني باختصار تلغي شخصيتها خالص وتستشيرها في بعض الامور لو حبيت لكنت انت سبتها من الاول تعند معاك وتعند وكل مرة بتعند فيها بتذيد ثقتها في نفسها وبتفتكر انها كده صح
اهم حاجه حاول في الاول تفكر مع نفسك هل اللي هي بتعمله ده صح وهل عادي وهل هي ليها حق فيه لو لقيت الاجابة ان ده غلط في غلط وان لازم تتصلح انا لو مكانك همشي المراحل دي
الحل الوحيد حاليا من وجهة نظري
اولا لازم وقفة معاها وتحط النقط علي الحروف انت الراجل وهي الست وبعد الكلام تشوف هتتغير ولا اية ماتغيرتش
هتخش علي المرحلة اللي بعدها وهي انك تقعدها من الشغل طالما هو اللي مفرعنها كده هددها في الاول انها تقعد من الشغل ماتظبطتش قعدها غصب عنها
ثالثا هنخش علي مرحلة الشكوي لاهلها نعرفهم في المرحلة دي كل حاجه ونشتكيلهم بنتهم لعل وعسي يشدوها ولو اني اشك اصلا انهم هيطلعوا الغلط عليها
رابعا ابدأ امنعها من زيارة اهلها علي قد ما تقدر لحد ما دماغها تتظبط
خامسا لو مظبطتش بعد كل ده هتبدأ تهددها انك هتتجوز عليها علشان مش مستريح معاها
مع العلم انك مش هتطلقها وهتسيبها كده زي البيت الوقف لامنها متجوزة ولا منها مطلقة و
لو عديت المرحلة دي وماتظبطتش خدها من ايديها وديها علي بيت اهلها وسيبها شوية لغاية ما دماغها ترد وفي نفس الوقت تكون اديت نفسك فرصة تفكر هل انت صح ولا غلط وتاخد قرارك وتفرم بعد كده
وميصعبش عليك اي حاجه حتي الاولاد كده كده هيتربوا متقلقش المهم انك تعرف ان الرجولة مش بسهولة.

فى البداية اسمحلى ارد الاول على اخونا اللى كاتب الرد ده وبعدين ارد على حضرتك

اولا اخونا قال الغى شخصيتها تماما و المفروض انها تسمع الكلام يمين يمين شمال شمال كأنها ريموت كنترول فى ايدك . للأسف ثقافتنا كمصريين و عرب عموما غلط عن الجواز . ياريت نتعلم من النبى محمد فى الجواز فى صلح الحديبية لما النبى أمر المسلمين انهم يتحللوا من الحج ورفضوا ودخل على ام سلمة وقال هلك المسلمون لا يريدون اطاعة رسول الله ام سلمة ساعتها هى اللى قالت لسيد الخلق معلم البشرية كلها ازاى يتصرف وفعلا عمل اللى قالت عليه و رأيها انقذ المسلمون كلهم . الست ربنا خلقها من ضلع اعوج اذا حاولت انك تعدله زى ما انت عاوز حتكسره وده لان الست طبيعتها مختلفة عن الراجل .

حضرتك بتقول انك شتمتها . مش هى برضه انسانه وليها شعور وكرامة ولا حضرتك بس اللى عندك كرامة موضوع اصل انا الراجل . الراجل مش بالفلوس اللى بيصرفها . يبقى لو هى غلطانة مرة انها شتمتك تبقى حصرتك غلطان 100 مرة لانك شتمتها .


برضه الرسول لما مرة اختلف مع السيدة عاشة و سيدنا ابو بكر راح يصلح بينهم الرسول بيقول لها احكى انا ولا تحكى انتى قالت له احكى انت بس متقولش الا الحق . تخيل ام المؤمنين بتقول كده لأشرف الخلق ساعتها ابو بكر كان قايم يضربها والرسول هو اللى حاش عنها .

الستات كلهم تفكيرهم مختلف عن الرجالة تمام . حضرتك لو عاوز تستريح ممكن تتجوز واحد صاحبك لانه حيكون فاهمك لحد كبير . ياريت تكون فهمت قصدى الجواز تكامل مش تماثل .

الحل ان حضرتك حتعاملها كويس جدا الست بتحب الرومانسية اكتر من اى حاجه اما بالنسبة لموضوع العلاقة الزوجية الست تفضل الرومانسية فى العلاقة عن العلاقة نفسها واعتقد ان حضرتك لا تهتم بالموضوع ده . اعتقد ان الحل حيكون فى اجازة ليكم فى مكان هادئ ممكن بره مصر رحلة تجددوا فيها شهر العسل . و لو هى فعلا بتعرف ربنا و بتحافظ على الاولاد يبقى تمسك بيها جدا . علشان معدش فيها منها كتير ولو اتجوزت مش حتلاقى اللى فى دماغك الزوجة مش بدلة بتتفصل على المزاج

[M.ABDOU]

كان فى مره شيخ مسجد جزاه الله خيرا بيشرح حديث الذى معناه

ان خلقت المراءه من ضلع اعوج... واعوج ما فى الضلع اعلاه ( وشاور على الرأس ) فأن ذهبت تقيمه كسرته

وكسر المرأه طلاقها

يعنى اجيب من الاخر

مفيش فى العالم دلوقتى ست كامله اطلااقا

وفعلا اغلب الستات مهما كانوا ولاد اصول ومتربيين وذات دين كمان حتشوف منها حته شمال كده

ممكن يبقى عوجها فى مصاريفها الكتيره

ممكن فى عصبيتها

ممكن فى كلامها الكتير

ممكن وممكن وممكن

المهم تبص على الاجمالى يا بشمهندس وزى ما قال الرسول عليه الصلاه والسلام

قال رسول الله صلى الله عليه وسلم: «لَا يَفْرَكْ مُؤْمِنٌ مُؤِمْنِةً: إِنْ كَرِهَ مِنْهَا خلقا رضي منها آخر» . رواه مسلم.

يعنى من الاخر المهم تكون مؤمنه والاجمالى بتاعها كويس لان دى الدنيا فعلا والله

ومفيش حد من اللى نصح حضرتك دول كلهم وانا على يقين تاااااااااام متعرضش لمشاكل ويمكن مشاكل كبيره كمان

لكن هوا ستر ربنا اللى بيستر وبتوفيقه بتمشى الدنيا

ليس كل البيوت مقامه على الحب والله

نصيحه اخيره كنت سمعتها من راجل معايا فى المنطقه قبل ما اتجوز وطلع بيفهم فى الستات بجد

كان بيقول ان الست لما تحب راجل بجد تحب التراب اللى بيمشى عليه

خلى بالك قال تحبه مش تخاف منه او تعمله حساب

خليك حنين شويه ......... ده حته هما بيقولوا كله بالحنيه بيفك

شويه حنيه كده يا بشمهندس مع كلام معسول والله حتجيب نتيجه

اذا كانت بتجيب نتيجه مع الرجاله يبقى مش حتجيب نتيجه مع الستات ازاى يعنى


انت مبتتفرجش على خطابات الريس ولا ايه؟؟؟؟؟؟؟