هو مفيش حد مرتاح

[engmody32]

الواحد ملاحظ ان المنتدي هنا مليان مشاكل من كل حاجه اللي زيي عازب بيدور علي عروسه مش مرتاح و مش عارف يلاقي اللي يريحه و اللي خاطب عنده مشاكل مع خطيبته و اهلها و اللي متجوز عنده مشاكل مع مراته و عياله هو في اي يا جدعان هو الجواز دي كله مشاكل كده من اول ما تفكر فيه
اكيد في حاجه غلط لأن ربنا مخلاش حاجه حلال الا و فيها خير و مخلاش حاجه حرام الا و فيها شر
لكن اللي واحد شايفه ان الناس في حوارت الجواز ده مخنوقه و عندها مشاكل رغم انها حاجه حلال المفروض يبقي فيها خير و سعاده

[hesham fawzy h]

الانسان ميملاش عينة غير التراب

مييين صاحب هذة المقولة

[بحار]

يااااعم سيبك من الكلام ده .. اتجوز انته بس .. وهاتدعيلى .. !!
بكرة تشوف .. !!

[هيثم مجدي]

الإنسان خلق في كبد, و الدنيا دار شقاء, طبيعي كل انسان عنده مشاكل
و كل انسان مشكلته بتححسه انه اتعس شخص في الكون.
دا حال الدنيا . الحمدلله على كل حال

[Bassem Youssef]

المشكله ان نظام الجواز هنا غير متناسب مع الظروف الاقتصاديه في البلد

العريس و اهله شايلين 95% من الجوازه

اهل البنت شايلين 5% من الجوازه

البنت شخصيا شايله 0% من الجوازه

ده اللي بيحصل في معظم الجوازات

فلازم يكون نظام اجتماعي فاشل فشل ذريع

[Bassem Youssef]

لو الجواز زي الدول الغربيه

شقه مفروشه بتتأجر و الايجار بالنص

الشاب و الشابه بيشتغلوا مش الشابه قاعده زي العويله في البيت و بتتفرج علي مسلسلات تركي

غير الشقه الايجار

خاتم + فرح حتي لو في البيت + شهر عسل اسبوع حتي لو في بلطيم

مصاريف البيت بالنص

هتلاقي الجواز زي الفل و الحياه عنب

[prof2013]

فرق شاسع لما تبقى عايش في اوروبا وتعجبك واحده تحطها تحت باطك انت ما تتكلمش لاء انت تعمل ايدك تلاقي المقرر لبس على طول
غير هنا مجرد ما بفكر في الجواز وافكر اتقدم لواحده ابقى خايف ومتوتر من الاحراج اخاف لاحسن الاقي رد مش ظريف ولو العروسه وافقت بيك تحملك تمن الموافقه وتتشرط هي واهلها وبعد الجواز خد عندك نكد ومشاكل
العيب فينا احنا ياباشا
طلع فكرة الجواز من دماغك ياباشا اسلملك
لو عايش في دوله تانيه اقدر اقولك اتجوز وانت مطمن ان شاء الله

[midoabdeen]

العيب قينا احنا

احنا مجتمع غريب فى عاداته وتقاليده الصراحه

ياعني بمجرد ماتفكر فى الجواز انت فعلا بتفكر تنتحر بدون مبالغه

ايه لازمته الذهب اللى ب 20000 ولا 30000 الف جنيه
ايه لازمته اني اجيب شقه 200 م علشان تعجب الناس
ايه لازمته اني اعمل فرح بتمنه انا اعيش سنه مرتاح وملك زماني
ايه لازمته لما العروسه تجيب اطقم ب 10 - 15 الف علشان تتركن فى النيش للمنظره

وبعد الجواز طبعا المسئوليات وهموم الحياه والمصاريف والفشخره الكدابه قدام اهل مراتك واهلك علشان انت والمدام تثبتوا للناس انكوا اكتر اتنين مرتاحين ومريحين بعض

ياباشا العيب فينا احنا احنا لو نعيش على قدنا وكل واحد يبص لنفسه وبس ونبطل نراقب الناس ونقلدهم فى كل تصرفاتهم هنرتاح

وكمان لا التربيه ولا الدين فى مجتمعنا دلوقتي بقوا يرضوا ربنا

انزل الشارع شوف البنات لابسه ازاي وبيتصرفوا ازاي وازاي اصلا اهاليهم يسيبوهم كده

ياعني من ناحيه انت مش لاقي تتجوز ومن ناحيه تانيه بتشوف المناظر دي فى الشارع طيب ما انا لازم اتسرع على الجواز يا اما هغضب ربنا

وعلى فكره دا مالوش علاقه بغني وفقير انت ممكن تبقي مستكتر تدفع مثلا 45-50 جم فى متر سيراميك وواحد تاني بينزل يجيبه ب 300 - 400 جم ومبيبقاش عاجبه

احنا بقينا عايشين فى صفيحة زباله (اسف على الوصف)

[rotanamasoud]

المشكله ان نظام الجواز هنا غير متناسب مع الظروف الاقتصاديه في البلد

العريس و اهله شايلين 95% من الجوازه

اهل البنت شايلين 5% من الجوازه

البنت شخصيا شايله 0% من الجوازه

ده اللي بيحصل في معظم الجوازات

فلازم يكون نظام اجتماعي فاشل فشل ذريع

طيب تخيل فكرت تسيبها بعد ما جبت عيل(نتيجه مشاكل لا تحل) حتاخد كل حاجه وانت تاخد الباب فى ايدك وعلى ماما ودى لو انسانه مش سليمه نفسيا او عندها نقص ممكن تتنطط عليك تنطيط بسبب ان كل القوانين معاهم ال يعنى مظلومين والراجل قوى واحنا بالقوانين دى غلابه

[Adnfalcon]

محدش يزعل بس المفروض الراجل يشيل كل حاجه "دي السنه النبويه"
لكن المشكله فالعادات والتقاليد . . أنا بنتي تجيبلها شبكه 250 جرام مش أقل من كده . . مؤخر 100 ألف جنيه . . ومعظم فرش الشقه طبعا عليك . . دا بيحصل دايما للأسف
ايه المشكله اننا نطبق السنه الشريفه ؟؟
يعني أنا هجيب شقه و هفرشها فرش بسيط جدا وأتجوز فحدود امكانياتي . . مش لازم قاعه فرح ب 50 ألف وفالأخر متعجبش الناس ! مش لازم شبكه فوق 60 ألف ! مش لازم غساله أطباق و ميكرويف وشاشه led 52 بوصه !
الحاجات دي تيجي بعدين لما ربنا يرزق . . الموضوع أصبح بيعه و شروه . . معاك يابني ؟ أه معايا يا عمي . . شيل يا بني ومبروك عليك !
نتوقع ايه من راجل دافع فوق ربع مليون عشان يتجوز وفالأخر الشروه تطلع فيها عيب يحب يطلق يفتكر ال 100 ألف مؤخر !
قصه حياه الشعب المصري . .

[engmody32]

كل ده جميل بس اتفرج كده علي المشاكل اللي مكتوبه في المنتدي من الناس اللي خاطبه و متجوزه اللي هما المفروض عدوا المراحل دي هتلاقي قرف و مشاكل غريبه
يعني من الاخر تخلص من مشكله الاختيار تدخل في مشاكل الاتفاقات و بعدها مشاكل الخطوبه و مشاكل الجواز و العيال و هوبا تلاقي سنين عمرك عدت في مشاكل
و الغريبه ان البنات و الستات بتقرا زي ما الرجاله بتقرا الكلام ده و محدش من الطرفين بيحب يغير و يخلي الحياه احسن
المفروض الراجل هو اللي يصرف علي البيت مش الست تساعده بس يصرف علي حسب قدرته و تقديره مش الست تجبره و تنكد عليه علشان تعمل اللي في دماغها زي طنط فلانه و علانه او تخليه يستلف و يتداين علشان تقلد الي بتشوفه مع غيرها
و المفروض الراجل يوسع علي بيته لما ربنا يقدره و يحاول يراضيهم عند مقدرته
ده الدين علي ما اعتقد

[samehafez]

الانسان كائن غلس ... عازب مش مرتاح متجوز برضه مش مرتاح .. كان فيه قصة ايام المماليك .. عن مصري بيعدموه علي الخازوق ... فواحد من المماليك معدي علي حصانه فندهله و طلب يقعد علي خازوق تاني و شاورله علي واحد ... فالمملوك بيسأله ليه يعني ده خازوق و ده خازوق و كده هتموت و كده هتموت .. قاله تغيير !!

[medo_2060]

عندك حق
بجد الواحد كره الجواز من كتر المشاكل وعيشه النكد الي بيشوفها من الاخوه السابقون
الجواز هنا بقي كانك رايح تجيب عربيه ب 300 الف دافع فيها دم قلبك ومن جواك متاكد انها مسروقه وملحومه نصين وهتجيبلك مشاكل طول العمر

[dede_dodo88]

الانسان كائن غلس ...

loooool
u made my day

[Mostafa.Mahran]

على رأى الفنانة نجاة الصغيرة لا العاشق مرتاح ولا الخالى مرتاح