الطلاق ... موضوع شائك

[cyborg_ift]

طبعا الموضوع حساس جدا بس حبيت اخد رايكم فيه لاني بصراحه مش عارف اخد قرار فياريت اللي مقتنع من رده ينصحني بس اللي محتار زيي بلاش يرد لان الموضوع متداخل جدا.

انا كنت متزوج قبل كده وزوجتى توفت وتزوجت واحده تانيه انسانه محترمه ومؤدبه واستحملت معايا كتير عندي بنت والتانيه في السكه الموضوع من اوله اني بحب مراتي وولادي جدااا وبعاملهه بكل احترام وبغيير عليهه كأي واحد بيخاف على عرضه طبعا ده كله كلام جميل ... الطبيعي ان الانسان كل ما بيكبر حياته بتتغير سواء صحته او مستواه او مسئولياته والحمد لله انا وصلت لمرحله كويسه في حياتي المشكله تكمن في الاتي.

في اول الجواز كان الواحد موظف صغير مسئولياته محدوده مرتبه على اده طبعا كنت مقضيهه بلطجه في الشغل اجازات على اذون كاي شاب صغير ولتغير الحال ودلوقتي مسئولياتي كبرت جدا وبقيت رئيس قسم في شركة مالتي ناشيونال ومسئول عن 15 فرد وطبعا المستوى المادي اتغير والهموم كترت مراتي باه مش عاجبهه الحال ده وشغلالي في نغمة انت اتغيرت وحبك ليا قل والشغل اهم مننا مع اني والله بنسافر نصيف مرتين في السنه وبحاول نروح كافيهات كتير عشان متملش المهم انا غلطت غلطه رهيبه في اول الجواز بجني ثمارهه دلوقتي مراتي عصبيه جدا فكان في اي مشكله بيننا تزعق وتشتم وتهلل وبصراحه كنت بحايلهه مش ضعف مني بس كانت بتصعب عليا ومكنتش عاوز اخسرهه بس الواحد العمر بيجري بيه ومبقاش مستحمل الكلام ده من كام يوم حصلت مشاده عنيفه بيننا مراتي كانت من 3 سنين مش طايقه الشقه اللى كنا فيهه فكلمتهه بصراحه ان الامكانيات مش سامحه نعزل دلوقتي قالتلي هتستلف من امهه مبلغ ونرده براحتنا ووالله قولتلهه بالنص انا مش حمل ديون دلوقتي قالتلي ملكش دعوه المهم حطيت القرشين بتوعي على اللي استلفته وخدنا شقه واكراما مني كتبتلهه الشقه باسمهه ولحد دلوقتي برد الدين لان المبلغ كان كبير حوالي 70 الف جنيه فبداية المشكلة كنا بنتناقش في امور حياتنا فهيه هتولد بعد شهرين قولتلهه مش هنرد حاجه من الديون الشهرين دول لحد الولاده فاتعصبت جدا انت هتخلي شكلي وحش وكيت وكيت ولازم ترد ديونك فقولتلهه لا انا برد ديونك انتي والشقه باسمك انتي قامت هايجه وهاتك يا طولة لسان وانا ماسك نفسي عشان حامل يابنتي اهدي مفيش فايده قامت قايله انا هسقط نفسي فجريت وراهه ولسه بحوشهه لقيتهه بتزقني وبتضربني على صدري قدام البنت طبعا تمالكت نفسي ومتكلمتش معاهه طول الليل النهار طلع رحت الشغل لقيتهه بتكلمني انا سبت البيت وعاوزه اطلق وبصراحه كبرت في دماغي ومكنتش هرجعهه بس قولت عشان البنت والحمل اقصر الشر وبعد مناهده معاهه طول اليوم رجعت بالعافيه ودلوقتي انا من جوايا مشلول التفكير هيه مش هتنصلح ومش هتعدل اسلوبهه وكرامتي نقحاني ازاي تشتمني وتمد اديهه عليا وفي نفس الوقت ازاي هيه اللي تغلط وانا اللي احايلهه بصراحه مش عارف اقوم حياتي وبالرغم من نجاحي في الشغل وادارة قسم بنجاح بصراحه مش عارف ادير حياتي الشخصيه وعشان كده لجأت لنصيحتكم عشان استرشد بيهه لو مكاني هتعمل ايه في المشكله الجايه

[ibrahim sallam]

ماهي طبيعة الشتيمه؟

[exelence]

طبيعة حالتها العصبية بتبقى ازاى لان اى واحد متجوز بيحصل معاه كده لكن طبيعة الخلاف و كلامها بيبقى عامل ازاى ؟
و بعدين انت كده بتؤجر على صبرك عليها فحاول تتريث و ما تستعجلش الأمور.

[cyborg_ift]

شتيمه بيا وشتيمه لاهلي وبتبقا في حالة هياج شديد ومد ايد وصوت عالي جدا وصريخ وكل ما تتخيله

المشكله اني مببقاش فاهم هيا عاوزه الانفصال فعلا ولا بتعمل كده عشان تشوفني متمسك بيهه ولا لا

وبعدين حزني جدا ان بنتي جت تقولي ماما ضربتك ليه طبعا زعلت جدا وبعدين موضوع انهه عمرهه مبتعتزر عن غلطهه مضايقني جدا

[Abo_Mazen]

بسم الله الرحمن الرحيم ..قال الله تعالى في محكم كتابه
وَإِنْ خِفْتُمْ شِقَاقَ بَيْنِهِمَا فَابْعَثُوا حَكَمًا مِنْ أَهْلِهِ وَحَكَمًا مِنْ أَهْلِهَا إِنْ يُرِيدَا إِصْلَاحًا يُوَفِّقِ اللَّهُ بَيْنَهُمَا ۗ إِنَّ اللَّهَ كَانَ عَلِيمًا خَبِيرًا..

طبعا واضح إن حضرتك جايب من الآخر ..أقصد يعني حضرتك تخطيت مراحل المسايسه وبالهداوه شوية وبالعنف شويه ..وأكيد طبعا ياما نصحت وياما سايست ..لغاااااااااااااااااااااااااااااااااية الأمور ما وصلت إلى ما هو عليه ..فأكيد طبعا أي كلام على شاكلة إنصحها وهددها ومش عارف إيه فات أوانه ..وحضرتك وصلت فعلا للمرحلة اللي مذكوره في الآية اللي فوق دي ...


راي الشخصي وده هيكون في سياق الآيه المذكوره أعلاه ..حضرتك تطلب عمل جلسه ..ودي معروفه كويس قوي عند المصريين حكاية الجلسة دي ..وتجيب حد من أهلك ..وحد من أهلها تثق فيه..ويكون كذا واحد من عندك وكذا واحد من عندها ..ويكونوا من كبارات العيلة بتاعتها كمان ..وتقعدوا مع بعض وهي تكون قاعده ويكون حاضر حد من أهلها ليه كلمة عليها ..يكون حد من اللي لما يقول بس ..تبقى هي البس ..عشان تعرف تتكلم وعشان كمان أهل الحكمه من أهلك وأهلها يعرفوا يتكلموا ..وإعرض ككككككككككككككككل اللي عندك ..كل اللي عندك من سنين ...لو تقدر تكتب قبل ما تحضر الجلسة دي إكتب ...وقول قالتلي وعملتلي وأنا شيلتها يوم كذا وشيلتها يوم كذا ..أنا ما بقولش تمن عليها في الكلام ..لكن أنا بقول إن اللي حاضر لازم يعرف كل حاجه ..لإن أكيد طبعا اللي حاضر مش عارف ..فحضرتك هتقول للي حاضر إنك مقصرتش معاها في حاجه ..وتعرض ..وتكون مجهز بينك وبين نفسك تسويه لا ترتضي أقل منها ..زي مثلا إعتذار منها قدام أهلها وتبوس راسك وكمان إيدك ..وده مش عيب ولا حرام على فكره ..أو زي مثلا تفويض من أهلها لو عملتلك حاجه هاتها عندنا وإحنا هنعملك فيها اللي مش هتقدر تعمله ...كنت أعرف واحد زمان لما يزعل من مراته يوديها بيت أبوها وأبوها كان بيفرمها ضرب زي العيال الصغيره لغاية ما تقول حقي برقبتي ..لدرجة إنه كان بيهددها ببيت أبوها ...يعني مثلا ..أهم حاجه توصل لتسويه ..إن لو عادت للي هي عملته ده تاني يبقى هتعمل وهتعمل وكذا وكذا ..أهم حاجه بقى في الموضوع ...إن أي تسويه توصلها لازم هي تقر بيها قدام أهلها ..يعني ما ينفعش مثلا أبوها يقولك أنا اللي بتكلم وأنا اللي بقول ..وهي قاعدة ساكته ..وتيجي في الآخر يقولك يلا ..خد مراتك وروح على بيتك ..وهي ساكته ..يبقى هي كده ولا أقرت ولا إعترفت ولا إلتزمت..أو مثلا تبص تلاقي القعده قلبت كلها مطيابطية وإنت ما خدتش حاجه ولا إستفدت حاجه ..لأ ..لازم المواضيع القديمه تتسوى ..بيوت كتير كانت على شفا الخراب وتم عمل الجلسة دي وتم تسوية المواضيع ..والأمور هديت وإستقرت ..خلي بالك ...أنا شفت في الفلاحين الجلسات دي بيتعمل بيها محاضر ..آه محاضر بجد ..وبيمضي فيها شهود وبيمضي فيها ا لزوج والزوجه ..عشان بعد كده بيستعينوا بمحاضر الجلسات دي قدام القاضي لو لا قدر حصل طلاق ..وحاول تخلي كلمة الطلاق دي بعيده ..أو حاول تخفيها من على مسامعك على الأقل دلوقتي ..للأسف ..أحيانا بيكون الطلاق حل ..بس بإذن الله ..ما يكونش هو الحل في حالتك ..ويكون كل ما في الموضوع دلع حريم عايزين قرصة ودن بس مش أكتر ...

[cyborg_ift]

اولا موضوع اهلها مش هيبقا منصف ليا لانهم مبيطقونيش وعلاقتي بيهم مش جيده وبعدين مش حابب المشاكل يعرفوهه هيصطادوا في المايه العكره بعد كده

[Abo_Mazen]

اولا موضوع اهلها مش هيبقا منصف ليا لانهم مبيطقونيش وعلاقتي بيهم مش جيده وبعدين مش حابب المشاكل يعرفوهه هيصطادوا في المايه العكره بعد كده

ما هو لازم أهلها يدخلوا في الموضوع ..عشان لما نوصل للنقطة السوده ..اللي هي الطلاق تبقى حضرتك معاك شهاده معنوية من أهلك إن أهلها ناس متحاملين وغير منصفين ..طبعا الشهاده المعنوية دي تفرق كتيييييييييييييييييييييييييير بالنسبة ليك ..عشان لو لا قدر الله الموضوع دخل للمحاكم تقدر تستشهد بالناس دي عشان يثبتوا إن أهلها كانوا متعسفين وكانوا بيسعوا للطلاق ..وبعدين أنا مقلتش لحضرتك تروح تحضر الجلسة لوحدك ..أنا قلت ناس من أهل حضرتك معاك ..وما دام الموضوع بقى داخل فيه تعسف وتحامل ..يبقى ممكن تجيب حد مش قريبك ..بس يكون حد محترم وراجل كلمته موزونة..عشان شهادة الراجل ده هتبقى أقوى من شهادة قرايبك بعد كده قدام القاضي لو لا قدر الله الموضوع دخل المحاكم ..لإن الراجل مش قريبك ..في ناس كتير أعرفهم بيحضروا جلسات صلح بيبقى ليهم كلام موزون ..وبعدين حتة مش حابب المشاكل يعرفوها فأنا عايز أقول لحضرتك إنك لازم تواجه ..ولازم تتحرك ..ما ينفعش حضرتك تقعد كده مش عايز حد يعرف حاجه لغاية ما تلاقي دعوة خلع إترفعت ضدك وإنت ملحقتش تعمل حاجه ..خلي بالك ..الناس اللي هيحضروا الجلسه دي لو لاقدر الله الموضوع دخل في قضايا هيكونوا شهود لصالحك ..أنا مش عاوز أعقد المواضيع ..بس عايزك تبقى مدرك أبعاد الأمر كويس

[ibrahim sallam]

شتيمه بيا وشتيمه لاهلي وبتبقا في حالة هياج شديد ومد ايد وصوت عالي جدا وصريخ وكل ما تتخيله

.

اتوكل على الله ولا تتردد

وربنا ان شاء الله يعوضك افضل منها

انتهى.

[amr011111]

انت غلطان من الاول لان طبيعه البشر عموماً إلا ما رحم ربى ان الطيب بيدوسوا عليه. فعلشان امورك تستقيم اول لما تفكر تعلى صوتها عليك كنت متسنكتش وتوقفها عند حدها المهم دلوقتى هى عارفه انها مهما عملت انت اللى بتحايلاها الحل دلوقتى انها اول لما تقولك انا عاوزه انفصل تقولها مع السلامه والقلب دعايلك ده انا اللى عاوز اطلق. الحل دلوقتى بقى انك تديها طناش ولما تسالك قولها بصراحه مش مبسوط والحوارات ديه انا زهقت منها بصراحه ولو كمان فيه امكانيه انك تخليها تشك انك تعرف واحده عليها يبقى كويس. والشقه يفضل انك تكتبها باسمك لو ينفع

[ibrahim sallam]

اوالشقه يفضل انك تكتبها باسمك لو ينفع

باسم مين ياحج.

ده لو خلص منها بأقل الخسائر يبقا هو الكسبان.

هو حضرتك ماضي على وصل امانه او ماشابه؟ ( سؤالي لصاحب الموضوع)

[cyborg_ift]

ماضي على قايمه

وللعلم انا والله بعاملهه بما يرضي الله وعمري ممديت ايدي عليهه وبعدين هيه اساسا بتشك في طوب الارض مش محتاجه اني احسسهه اني اعرف حد

[afndina]

اولا بخصوص المشكلة الحالية , دي مشكلة وحتعدي.
ثانيا بخصوص عصبية مراتك
انت بتقول انها انسانه محترمه ومؤدبه واستحملت معاك كتير لو فعلا الكلام دا صح , يبقي حاول تعالج الموضوع بحكمة , انما طلاق لا لا لا
الشئ التاني معروف ان الست بتبقي في فترة الحمل عصبية جدا , دا بالاضافة ان كمان مراتك عصبية بطبعها فالموضوع زاد اليومين دول حبتين .
ثالثا نقطة انها شتمتك وضربتك , احب اقلك انك انسان راجل بجد ومحترم ,لانك قدرت ان دي ست وحامل
اوعي تفتكر ان الراجل اللي يشتم واحده ست او يضربها حتي لو هي ضربته ,الست طبيعة جسمها اضعف من الراجل ومعروف انه لو ضربها هو اللي كسبان , معني بقي ان الراجل يمسك نفسه وميضربهاش حتي لو هي ضربته دا قوة واحترام .
والست علي فكرة لما بتضرب مش بتضرب علشان تهينك لا بتضرب كنوع من التعبير عن العتاب واللوم و علي عكس الراجل لما بيضرب ست بيضربها عقاب وفرض سيطرة ودا طبعا مش بعتبره راجل من اساسه
مراتك محترمه ومؤدبه بكلامك , حاول تصلح عيوبها وبلاش تخسر واحده زيها فى الزمن دا

[cyborg_ift]

طب وحتة انهه مبتعترفش بغلطها ابداااااااا حلهه ايه

[elpilot]

لا حول ولا قوة الا بالله
ايه اللي بيحصل بس ده احنا في نهاية العالم ولا اية
ست تشتم جوزها وتضربة
ربنا يصبرك اخي العزيز وربنا ما يكتب الذل ده علي حد
من رأيي تديها اخر فرصة وتحط النقط علي الحروف واكيد هي مش هيعجبها وتتعدل وتمشي زي الناس الوضع هيكون صعب عليها فيبقي انت عملت اللي عليك وهي اللي اختارت
وملعون ام الفلوس اللي هتذل صاحبها واللي ديته فلوس اقتلة

[afndina]

طب وحتة انهه مبتعترفش بغلطها ابداااااااا حلهه ايه

كل الستات كدا يا ريس
كل دي عيوب مش خطيرة حاول تعالجها , انا مش بقلك متخدش موقف , بس خد موقف بحكمه وميكنش فيه خسارة ليكم الانتم الاتنين