سيتي ستارز .... أيام الجاهليه ..كل الفواحش

[meza]

بصراحة انا بروح ستارز كتير وبقعد فى الفود كورت دايما وبستغرب من الكلام يعنى انا عمرى ما شفت شاب لابس بنطلون عورته باينة ، يمكن بالكاد تلاقى البوكسر بتاعه باين لكن العورة مشفتش بصراحة ، موضوع الشواذ دة كمان عمرى ما شفته ، واللى كانوا بيلعبوا بالموبايل صباح الدماغ هيلعبوا بيه ازاى فى وسط الزحمة !! وايه بالظبط المتعة فى انهم يلعبوا بالموبايل كورة وسط الناس مش فاهم !! اشمعنى الموبايل حقيقى مش داخلة دماغى ، اما بالنسبة للبنات فدة اللبس الطبيعى فى أى مكان مش ستارز بس.

لا خالص ، الحقيقة انا مستغرب يعنى أنت تقريبا أول مرة تروح ستارز بالليل وشفت حاجات انا مشفتهاش أبدا ً (شذوذ - عورات مكشوفة "ممكن تقصد المؤخرة بس انا مشفتش ولد ماشى فرحان بمؤخرته دى أبدا ً لا فى ستارز ولا برة ستارز فما بالك بحاجة تانية" - عيال بيباصوا لبعض الموبايل وسط الزحمة والمحلات) ، كلامك حاسس إن فيه مبالغة مش أكتر.

و لا أنا والله يا إسلام عمرى ما شفت الكلام ده بالصورة الشنيعة دى اللى كتبها أستاذ عبد الرحمن .. مع إنى بروحه كتير خاصة قبل العيد عشان اللبس و كده أو سينما.
و متهيألى هما منعوا السجاير فى سيتى ستارز و غرامتها 50 جنية .. فيه أماكن ممكن تشرب فيها على جنب لكن لو مشيت بيها ممكن أى حد من الأمن يدفعك الغرامة.


مع إحترامى لحضرتك يا أستاذ عبد الرحمن .. بس أنا حسيت بمبالغة شديدة فى كلامك لدرجة إنى فكرتك بتتكلم على مول تانى غير سيتى ستارز و إتلخبطت فى الإسم بس.

[Bossy_Fadl]

انا بروح سيتي ستارز كتير

بس بجد مشوفتش الحاجات دي بالصورة دي للدرجة دي

يعني ممكن اه نشوف شلل بنات و ولاد من مختلف الاعمار

بس موضوع الشواذ ده مشوفتوش بصراحة

طبعا يمكن حضرتك شوفته فعلا

بس يعني مفيش حاجة تتقال

للأسف هو ده المفهوم الخاطيء للحرية

العري و الفساد و انعدام الاخلاق

للاسف كل جيل بقي افسد من اللي قبله

بس صدقني مع كل واحد فاسد في عشرة كويسين

و مع كل بنت منحله فيه غيرها عشرين محترمات و غيورات علي دينهم

انا و الله لما باصلي في الجامع باقول ايه ده ياربي

اللهم صلي علي النبي

لما كل البنات اللي لسه في مقتبل العمر دي بتصلي هنا و بتحضر دروس امال البنات الفاسده اللي موجودة في الشوارع دول جم منين؟

بلاقي البنات بتتزاحم مع بعض و يفرشو و يصلو علي الرخام لان الاماكن خلصت

و نفس الكلام بالنسبة للشباب

في شباب بيخرجو و يقعدو شلل مع بعض و يتفسحو و يسافرو

بس مش بيعملو حاجة حرام و لا بيغضبو ربنا

و وقت الصلاة تلاقيهم بيجرو يتسابقو مين يتوضي الاول

صدقوني و الله مصر لسه فيها خير

بس للاسف الشباب الي مسوء سمعة البلد دول تصرفاتهم بتبقي واضحه و ملفته للنظر بحيث انهم بيغطو علي الكويس

و بالتالي عنينا للاسف مبقتش تشوف غير النموذج السييء بس

اللهم لا تؤاخذنا بما فعل السفهاء منا

و الف شكر لحضرتك يا بشمهندس علي الطرح

[Dr. Elsaadani]

الحمد لله الخير لسه كتير والبركة كتيرة ومظاهر الفساد قليلة مقارنة بالكثير من الخير

ربناا يهدى هذه القلة بهدايه اهلهم اولا

والكل يحرص على اللى عنده ويخلى باله كويس من اى جديد يطرا من الاصحاب والخروجات وخلافه

[Abdelrahman]

King De Egypt
IslamGen2
Bossy
اخواني في الله ....أنا يا جماعه ساكن جنب سيتي ستارز من أيام ما كان سيتي ستارز ده عباره عن حفره كبيره في الأرض..من اكتر من 15 سنه.
بروح سيتي ستارز كتير جدا جدا جدا كلها غالبا لسبينس علشان طلبات البيت
وبرضه ما شفتش قبل كده الي أنا بقول عليه
وهو ده الي خلاني مستغرب جدا جدا جدا جدا جدا الي انا شفته يوم الخميس الي فات...يمكن علشان يوم خميس ؟؟الله أعلم
أنا قلت شفت واحد او اتنين من الشواذ...مش مصر كلها يا جماعه...ولد لابس بنطلوط ديق جدا (استرتش) وحلق صغير في ودانه ..سنسله وحظاظات...وبدي شتوي ديق جدا ...ومشيتوا ...حدث ولا حرج...هذا للتوضيح ...ولم يكن يمارس الشذوذ والعياذ بالله
يا أخواني في الله ...الاختلاف لا يفسد للود قضيه ...ده لما يكون الاختلاف في الرأي في موضوع قابل لاختلاف الآراء ...إنما التشكيك او التكذيب في مصداقية الحوار او الموضوع سواء جملة وتفصيلا او لجزء من الموضوع ..فهو يا أحبائي ليس من آداب الحوار ..وقبل ذلك ليس من آداب الاسلام يا اسلام.
طيب والاخوه الاحباء الي قالوا ان الي أنا شفته في سيتي ستارز يوم الخميس هو شئ لا يذكر بالنسبه او شئ مكرر جدا بأماكن تانيه جوه وبره القاهره (مارينا ...وديسكوهات ...واعياد ميلاد ...وغيره) حتى شواذ من البنات والعياذ بالله ...هما كمان بيبالغوا ؟؟
ولا علشان انتم ما رحتوش الاماكن دي ..وربنا لم يقدر لكم ويارب لا يقدر لكم انكم تشوفوا المناظر دي ..يبقى كده ما فيش مبالغه؟!

ولا إيه يا إداره؟؟؟؟؟؟؟؟؟؟؟؟

[Abdelrahman]

يعني الي يبان الاندر وير بتاعه ...ما تعتبرش كده عوره يا جماعه ..أليست عورة الرجل من السره الي الركبه ؟؟؟؟هل ظهور الاندر وير ليس عوره ...ألا يظهر احيانا جزء من العوره؟؟؟بقول جزء
هو أنا قلت كل حاجه كانت باينه؟؟؟
يعني ماشي والبنطلون مدلل مثلا!! ولا مثلا زي ما خلقه ربنا ...سبحان الله العظيم

[bishoo33]

ان ضاع الدين ضاع كل شىء

[elassar2010]

مش كل الناس كده....انا 90% في الكليه بدون مبالغه ...ناس في قمة الأدب والأخلاق...بس هي المشكله ان الواحد ميباخدش باله غير من السيء ...يعني في نفس الوقت اللي الناس ديه موجوده في سيتي ستارز . روح مثلا مسجد يوسف الصحابي يوم الأربعاء بعد المغرب ...هتلاقي شباب في نفس السن((ولاد وبنات)) مليين المسجد عن اخره بيحضرو درس ديني

طبعا مش كل البنات والصبيان بيعملو كدة انا متفق مع حضرتك 100%
بس انا كنت فى مجمع كليات نظرى وكان الموضوع منتشر بطريقة رهيبة اكتر بكتير من 10%بكتير للسيىء

[نور القمر]

الناس اللي بتتسائل فين دور الاهل وفين الام والاب من ده كله
لو دورت وراهم هاتلاقي حاجة من 2
يا اما الاب والام ناس محترمين لكن في تفكك اسري وكل واحد مشغول بنفس وناسي ولاده
يا اما الاب والام من نفس عينة ولادهم
الاب فوق الخمسين سنه ولابس شورت في المول كأنه على البحر وسلسه بجمجمه وحظاظة
والام فوق الخمسين سنه صابغه شعرها اصفر ولابسه حمالات وممكن اوي شورت والحمد لله المايوه بتلبسه على البحر والبسين بس
كمان غالبا هيكون المايوه بتاعها محترم عبارة عن قطعه واحدة مش بكيني

[elassar2010]

النظام دة في مجمع الكليات بدمنهور انا قعدت هناك سنتين وقعدت في مجمع الشاطبي سنتين فرق شاسع بين الاتنين دمنهور الناس رايحة تتعلم الغالبية يعني ,مجمع الكليات بالشاطبي الناس رايحة تتفسح:)

حضرتك لو كنت رحت مجمع الكليات النظرى بسبارباى طنطا كنت هتشوف الى عمرك ماشوفتة وخصوصا الاداب والحقوق والزراعة حشيش ودعارة بمعنى الكلمة

[r0xer]

ولنفرض فعلا إن في حاجات زي دي موجودة في مصر.....فين المشكلة ?

يعني هل حد متخيل ان مصر دي المدينة الفاضلة مثلاً؟

كل مكان وفيه الحلو والوحش.....والحمد لله ان الوحش عندنا -أو الذي نحسبه كذلك- نسبته قليلة، وكمان لابد إننا ندرك إن مصر دي خليط لأكثر من دين و أكثر من مستوى اجتماعي و اكثر من مستوى ثقافي و اكتر من مستوى علمي، بل واكتر من مستوى اخلاقي كمان!!

فطبيعي يكون في تعددية...بالعكس التعددية دي شيء مفيد جداً للبلد .

وربنا يهدينا كلنا.

[AhmedGen2]

ولا إيه يا إداره؟؟؟؟؟؟؟؟؟؟؟؟

الحقيقة أنا قلت كل اللى عندى ومكنتش ناوى أرد ، لكن شدنى آخر سطر فى مداخلتك ، ايه علاقة الإدارة بالموضوع؟ ، يعنى حضرتك عاوزهم يعملوا ايه بالظبط؟ ، يدونى كارت أحمر مثلا عشان شايف مبالغة فى كلامك؟ .

[king_de_egypt]

الحقيقة أنا قلت كل اللى عندى ومكنتش ناوى أرد ، لكن شدنى آخر سطر فى مداخلتك ، ايه علاقة الإدارة بالموضوع؟ ، يعنى حضرتك عاوزهم يعملوا ايه بالظبط؟ ، يدونى كارت أحمر مثلا عشان شايف مبالغة فى كلامك؟ .

يا اسلام كبر يا اسلام احنا قولنا راينا بصراحه وخلاص و فعلا انا عمرى مشوفت الكلام دا هناك و الاداراه عارفه احنا بنتكلم ازاى وبعدين ولا اسلام قال كلمه خارجه ولا انا كمان قولت كلمه خارجه ولا بوسى وبعدين دا موضوع للنقاش واحنا قولنا راينا بصراحه وقولنا اننا هناك مبنشوفش الحاجات دى بس كدا .............

[Abdelrahman]

ياسيدي الفاضل قول رايك زي ما تحب ..لا أنا ولا غيري نقدر نقول حاجه...موضوع مطروح لتبادل الآراء والخبرات مش عيب ولا غلط ولا حرام انك تقول رأيك ...بس التشكيك في مصداقية الحوار
كليا او جزئيا ..لا يمت بصله لاصول الحوار الحضاري او آداب الاسلام...
انت على فكره تقريبا من النوعيات الي بتفرض سوء النيه في الانسان
أنا كان قصدي ب (الاداره)
ان الاداره كتبتلي تعليق ان بلاش التريقه على اسلوب احد الاعضاء ...وكان معاهم حق
ان اسلوبك الصراحه واسلوب الاخ كنج (بوسي لا) كان مستفز وخلاني اغلط بالتصرف الي انا معترف بيه كخطأ ...بس مش معترف بأسلوبك انت والاخ كنج ...كأسلوب حوار.

شكرا للجميع

[OlaOsman]

خلاص يا جماعة الله يكرمكوا، الموضوع أبسط من كده بكتير. يا ريت ما نعملش مشكلة على حاجة ممكن تعدي.. و لا ايه؟ :)

[king_de_egypt]

خلاص يا جماعة الله يكرمكوا، الموضوع أبسط من كده بكتير. يا ريت ما نعملش مشكلة على حاجة ممكن تعدي.. و لا ايه؟ :)

اكيد يا علا و مفيش مشاكل ان شاء الله :wacko: