فشل ذريع وبفكر استسلم وابقى روتيني !!!

[Mecha]

يعني هو الصالح ليا ان الكل يتضايق مني بسبب فشلي
ولا الصالح ليا اني بعد ما خلاص قررت استقل وعاندت الظروف اني ارجع خائب الأمل
ولا الصالح ليا اني اقعد افكر تفكير يتعبني نفسيا ويشككني ف ديني
ولا الصالح ليا اي بالظبط
انا زهقت ومش شايف أي شئ عدل ولا اي دلالة على اي امل او شئ فيه خير ليا

طالما الامور وصلت لكده يبا لازم وقفه وممكن اجازة .لازم وقفة صدق مع النفس وتحلل اسباب المشكله اللي ممكن تكمل وراك في كل مكان .اركن الحظ والقدر علي جنب لانهم غيب يبا ملكش طلب بيهم .اسال نفسك ليه حصل كدا ,هل كسل ,هل نقص مهارات وقدرات وهل المهارات دي تتعوض وتكتسب ولا الشغل دا تقيل عليه وانا مش قابله .
حاجه كمان البني ادم مش بالالقاب محلل مالي او وسيط عقاري ويغيرهم كل شويه يبا مش هتوصل لاي حاجه .اي مهنه من دول عاوزه سنين خبره ومهارات وتعلم .مفيش حاجه في البيزنس اسمها حظ فيه educated guess وليه حساباته و risk assessment والصداع دا كلو . وديما افتكر -كل ميسر لما خلق له. وبالتوفيق

[Mahmoud Naguib]

المشكلة مش ف ان السوق نايم أو شغال
ما انا في ناس معايا ف المكتب شغالين كويس جدا
أنا بتعب برضه وبعمل أكتر منهم بس مفيش جديد برضه !!

لي بجد يعني محسش بأي تقدم ولآ رزق !!
هوكدة ربنا مش راضي عني مثلا !!

[Mahmoud Naguib]

وبرضه اللي بيقولوا هي دي شغلانة !!
حضرتكفي ناس كتير شغالينها قاعدين فى فيلل دلوقت

[Bassem Youssef]

هو حضرتك بتاخد مرتب ثابت و لا عمولات بس ؟؟؟

[mikho83]

"الله يبسط الرزق لمن يشاء من عباده ويقدر له إن الله بكل شئ عليم"
يقدر معناها يضيق، دا أمر في إيد ربنا، اعمل اللي عليك وانت مش مسئول عن النتائج

[Mohamed_Hamid]

شوف النقط الى بتتاخد عليك فى الشغل وحطها تحت الميكروسكوب واستشر أصدقاءك هل هى عيوب فعلا ولو كدة حاول تتطور نفسك . بص جواك ممكن تكون محتاج تطور مهاراتك الشخصية السلوكية والعملية
ربنا يوفقك ويصلح لك الحال

[friendship7897]

إلغي من دماغك خالص أنك مش محظوظ أو نصيبي قليل أو رزقك ضيق أو كل الكلمات السلبية دي ... لأن بالكلمات دي هتزيد الصفات نفسها ... يعني فيه فيلم كوميدي ( مش فاكرة بتاع مين ) بس فاكرة الموقف .. الموقف أن كان دكتور نفسي بيعالج شخص قصير مش واثق في نفسه فالدكتور قال له : عيد هذه الجمله أكتر من مرة ( أنا مش قصير أزعه أنا طويل وأهبل ) - بغض النظر عن الموقف الكوميدي - على فكرة دا فعلا طريقة علاج - لأني قرأت أكتر من كتاب في علم النفس كانت بتعالج بالشكل دا منهم : أيقظ قدراتك ، the Secret أو السر ومحتواهم إن التفكير الإيجابي يمكن ان يخلق نتائج تجعل الحياة أفضل مثل زيادة في الثروة والصحة والسعادة.
طبعاً دا مع دعواتك بالتوفيق فأكثر من الإستغفار والدعاء
وربنا سوف يفتح لك أبواب رزقه بإذن الله .

[4fun14]

حضرتك اى مهنة في الدنيا ليها عامل الحظ "الموهبه"
اه ماهى الموهبه دى حظ ورزق برضه
انا فاكر زمان كان في ف الزمالك لاعب اسمه احمد غانم سلطان..الراجل ده مكنش عنده موهبه تقريبا رغم انه كان بيتدرب ليل ونهار وبيموت نفسه ف الملعب
وفى نفس الفريق كان في لاعب اسمه شيكابالا..لا بيتدرب ولا ملتزم ولا اى حاجه بس كان موهوب وحريف وتحس انه تمامه لعيب كرة قدم
المقصود ان في حاجه اسمها موهبه..التدريب مهم هيخليك ناجح "احمد غانم لعب ف احد اكبر الفرق في العالم العربى اللى هو الزمالك" لكن التدريب لوحده مش هيخليك متفوق
قيس الكلام ده على اى مهنه "الميكانيكى..المدرس..الدكتور وغيره"
انت لو كلامك صحيح يباه عندك نقص في الموهبه الفطريه في مهنتك "موهبه الاقناع"..محتاج تعالج النقص ده بالتدريب..بالقراءه في ال soft skills
وعندك فرصة كويسه انك شغال الشغلانه دى انك تطبق اللى قرأته وتحاول تشوف بيجيب نتيجة ولا لا
وهتلاقى في Tips مشهورة للسيطرة على تفكير الاخرين خصوصا في مجال التسويق
مثلا انا من الحاجات اللى بتقفلنى ف اى وسيط او حتى دكتور ولا صنايعى انه يعيب ف المنافسين"يقولى ده نصاب ..ده كان هيضيعك والحمدلله انه وصلتلى"
بتقفل جدا من اللى يقولى العرض ده النهارده بس وخد قرارك في الساعتين تلاته الجايين
محتاج تبين انك واثق من اسم شركتك ومن المنتج اللى بتبيعه وان الزبون جاى جاى مش قلقان من حاجه (الكلام ده تحسس العميل بيه مش تقولهوله مباشرة"
لازم تكون محضر الكلام كويس قبلها وتعرف ازاى تتهرب من إجابة سؤال غلس بشياكة
وعموما انا اتعالملت مع سماسرة كويسين جدا وارتحتلهم بس مشترتش منهم لان في الاخر السلعه نفسها صاحبة التأثير الأقوى..عادى ممكن ميكونش عندك حظ فعلا انك وقعت مع عملاء عاوزه تاخد معلومات مش بتشترى فعلا
وكل سنة وحضرتك طيب

[hh]

بص مجال العقارات ده زي اي مجال مبيعات ممكن شخص ميكنش مناسب ليه. التسويق و المبيعات علم و ليه اصول و دراسة و طرق للبيع و لل closing او انهاء عملية البيع. حاول تاخد كورسات selling skills و communication skills. السوفت سكيلز دي مهمة و اساسية لأي شخص بيشتغل في المبيعات اي كان المجال. لو تقدر كمان تدرس اكتر و تاخد دبلومة ماركيتنج مثلا قطعا حتفيدك انما محتاجة وقت و مجهود و فلوس. بعد ما تدرس صح و تجرب تشتغل فترة ان شاء الله تلاقي فرق في شغلك. بس برضه لازم قبل اي شئ تسأل نفسك انت المجال ده حابه و عايز تكمل فيه فعلا؟ عندك مؤهلاته؟ شخصيتك و طريقتك مع الناس بتقدر تقنعهم و تكسب ثقتهم و الاهم من كدة بتعرف تقرا اللي قدامك و تحدد اهتماماته و مخاوفه؟ بتعرف تفرق بين الشخص اللي جاد في الشراء بس متردد و اذا تتعامل مع مخاوفه و بين الشخص اللي مش جاد اصلا؟ كل الحاجات دي ممكن الواحد يتعلمها و يطورها انما لازم يبقى عنده اساسيات في شخصيته تؤهله لده. فكر في ايه اللي ناقصك و خليك صريح مع نفسك في تقييمها يمكن تكون مش مؤهل للشغلانه دي و في الحالة دي دور على حاجة تانية فورا.

[Mahmoud Naguib]

باسم يوسف ..... مرتب ثابت وعمولة مش عمولة بس !

Mohamed_Hamid ..... أغلب الناس اللي بيحسسوك انهم بيفيدوك هما ف الأصل بيوقعوك أكتر وبيحاولوا بقدر الإمكان مينصحوش بمعلومة صح علشان تفضل مكانك !
أنا طبعا باخد بنصيحة ناس كتير حواليا بس الناس اللي بتنجح فعلا

friendship7897 .... أنا فضلت وقت طويل جدا مقتنع بالكلام ده وشايفه صح وبعمل بيه بس ده لما كنت ف الكلية لسة !!
يعني وقت ما كنت لسة مدخلتش بجد ف الحياة العملية واللي هي بجد مش سهلة خالص !!
بعد الكلية ولما دخلت الجيش اقتنعت تماما بعكسها وفهمت انه لما انت بتحاول تحسس نفسك انك محظوظ أو غيره ده بيبقى تغيير مود بس لحظي ومش بيستمر !
التفكير ف الشئ السئ يأتي بالمشاعر السيئة والذكريات الأليمة والعكس صحيح !
الكلام ده مش غلط بس بقدر معين !
مينفعش مثلا أفضل ماشي ف طريق وبعافر فيه وهو أصلا طريق غلط !
وأفضل أحسس نفسي اني كل ما أقع لآزم أقوم وأضيع حياتي فى تجارب خاطئة أصلا !
وإذا كان كل اللي حواليك سئ وانت ف مشاكل كتير هتهرب منها وتفكر فى أشياء إيجابية مثلا !
هتتحل هي لوحدها بعد كدة !!
في مقولة برضه فى علم النفس بتقول إن الحزن بيخلي الإنسان قادر بصورة أفضل على حل المشاكل اللي بتواجهه وبتخلي تفكيره أحسن !
طب أصدق مين !!
للأسف اكتشفت إن علم النفس كله هزار وكل إنسان بيكتب تجربة على هواه ممكن يكون نجح بها لو حد تاني عمل بيها مش هينجح !
بس لو الحد التاني نفسه مشافهاش ممكن كان ينجح !
محدش مستني حد تاني يدله على الطريق لأنه هو لوحده عارف اللي بيدور فى دماغه وعارف قدراته !

4fun14 --- كلامك صح بس هي اي الحاجة التانية دي اللي ممكن أنجح فيها !!
وهل هقضي حياتي تجارب !

hh ... 3 طب منا ممكن برضه أفضل أعمل كدة وف الآخر منجحش فيها !!
يعني أدور على حاجة تانية ولآ أطور نفسي فيها !!؟؟